Агар ишлаб чиқарувчилар - турли мамлакатдан бўлса, импорт қилишда имтиёзлар қандай қўлланилади

Агар технологик асбоб-ускуна турли мамлакатларда ишлаб чиқарилган қисмларни ўз ичига олса, у 2436-сон Рўйхат (АВда 20.03.2013 йилдаги рўйхат рақами) бўйича божхона тўловларидан озод этиладими? Мисол учун - асбоб-ускуна Германияда ишлаб чиқарилган, двигателлари ва контроллерлари эса Хитойдан.

Саволга Давлат божхона қўмитаси мутахассислари жавоб беришди:

- Вазирлар Маҳкамасининг 27.11.2020 йилдаги “Ўзбекистон Республикасида ўхшаши ишлаб чиқарилмайдиган четдан олиб кириладиган технологик асбоб-ускуналарга божхона божи ва қўшилган қиймат солиғи бўйича имтиёзлар бериш механизмини такомиллаштириш чора-тадбирлари тўғрисида”ги 750-сон қарори билан товарларнинг ушбу тоифаси бўйича божхона имтиёзларини тақдим этиш механизми такомиллаштирилган.

Хусусан, имтиёзлар фақат янги технологик асбоб-ускуналарга қўлланилиши ҳамда битта контрактга (шартномага) мувофиқ мазкур технологик асбоб-ускуналар билан бирга уларнинг ажралмас қисми сифатида етказиб берилган бутловчи ва эҳтиёт қисмларга татбиқ қилиниши белгилаб қўйилган.

Ваколатли идораларга 2021 йил 1 январга қадар Ўзбекистон Республикаси ҳудудига четдан олиб киришда импорт божхона божи ва ҚҚСдан озод қилинадиган технологик асбоб-ускуналарнинг амалдаги Рўйхатини қайта кўриб чиқиш топширилган эди.

Бироқ янги Рўйхат ҳали тасдиқланмаган, шу боис технологик асбоб-ускуна бўйича имтиёзлар 2436-сон Рўйхат бўйича янги ҳужжат чиққунга қадар қўлланилади.

Бунда шуни эслатиб ўтамизки, янги технологик асбоб-ускуна - бу "Эркин муомалага чиқариш" божхона режимида божхона расмийлаштируви вақтида ишлаб чиқарилган йили 3 йилдан кўп бўлмаган технологик ускуна.

Четдан олиб кирилаётган технологик асбоб-ускунанинг ишлаб чиқарилган йилини тасдиқлаш учун ишлаб чиқарилган йилини тасдиқлайдиган ишлаб чиқарувчи заводнинг техпаспортини ёки ишлаб чиқарувчининг асбоб-ускуна, шу жумладан - ишлаб чиқарилган йили тўғрисидаги тегишли ахборотни ўз ичига олган ҳужжатини тақдим этинг .

Шу тариқа, агар янги технологик асбоб-ускуна бир бутун сифатида олиб кирилса, у Рўйхатга киритилган бўлса ва ишлаб чиқарилган йилини тасдиқловчи ҳужжат мавжуд бўлса, ишлаб чиқарилган мамлакатдан қатъи назар мазкур асбоб-ускунага бож ва ҚҚС тўлаш бўйича назарда тутилган имтиёзлар татбиқ этилади.

Манбага қаранг.