КПК орқали харид учун ҳисобварақ-фактурани касса чекини рўйхатдан ўтказиш билан алмаштириш мумкин

Юридик шахслар ва якка тартибдаги тадбиркорлар ўртасидаги корпоратив банк карталаридан фойдаланган ҳолда амалга ошириладиган ҳисоб-китоблар ҳисобварақ-фактура расмийлаштирилган ҳолда амалга оширилиши керак .  Агар контрагент ЭҲФ тақдим этишга шошилмаётган бўлса, нима қилиш керак?

ДСҚ тадбиркорларга ёрдам тариқасида солиқ тўловчининг шахсий кабинетида янги функционални ишга туширди. Buxgalter.uz илтимосига биноан ДСҚ ҳузуридаги «Янги технологиялар» ИАМ бўлим бошлиғи Шерзод ТЕШАБОЕВ бу ҳақда батафсил гапириб берди:

- Таъкидлаб ўтаманки, 30.10.2018 йилдаги ПФ-5564-сон Фармоннинг 1-бандида назарда тутилган норма бекор қилинмаган. Юридик шахслар ва якка тартибдаги тадбиркорлар ўртасидаги корпоратив банк карталаридан фойдаланган ҳолда амалга ошириладиган ҳисоб-китоблар ҳисоб-фактура расмийлаштирилган ва берилган ҳолда амалга оширилиши керак.

14.08.2020 йилдаги 489-сон ВМҚга 2-иловага мувофиқ бугунги кунда барча ҳисобварақ-фактуралар электрон шаклда расмийлаштирилмоқда. Товарлар корпоратив карталар орқали реализация қилинганда ҳисобварақ-фактура сотиб олувчининг (харидорнинг) талабига кўра товарлар (хизматлар) реализация қилинган календарь ойнинг охирги санасига қадар товарлар (хизматлар) амалда реализация қилинган сана билан расмийлаштирилиши шарт .

Амалиётда турли сабабларга кўра товарлар ва хизматлар сотувчилари ЭҲФни расмийлаштиришни кечиктириб юборишади. Бунда ҳисоб бузиб кўрсатилмаслиги ва ҳисоботларни қайта топшириш ҳоллари сонини қисқартириш учун сотиб олувчиларга муқобил вариант – солиқ тўловчининг шахсий кабинетида махсус сервисни таклиф қилишга қарор қилинди.

Сотиб олувчи товарлар ёки хизматларга корпоратив карта ёрдамида ҳақ тўлаш чоғида олинган онлайн-НКМ ёки виртуал касса чекини рўйхатдан ўтказиши зарур. Хизмат тажриба режимида ишга туширилди, уни қўллаш қоидаларини ҳали қонун ҳужжатларида ёзиш лозим бўлади, бу яқин вақтда амалга оширилади. Лекин тадбиркорлар ундан ҳозирнинг ўзида фойдаланишлари мумкин бўлади.

Онлайн-НКМ чекини тизимда харид амалга оширилган ойдан кейинги ойнинг 5 санасигача рўйхатдан ўтказиш зарур. Агарда бу муддат ўтказиб юборилса, чекни рўйхатдан ўтказишнинг имкони бўлмайди.

Агар сотувчи онлайн-НКМ ёки виртуал касса чекида хато тарзда харид учун нақд пулда тўланган деб кўрсатса ҳам чек рўйхатдан ўтказилмайди. Бу ҳолда уни қайта расмийлаштириш учун сотувчига мурожаат қилиш зарур бўлади.

Ахборот тизими рўйхатдан ўтказилган чеклар бўйича маълумотларни, бу ЭҲФ тизимидан ҳисоботни шакллантиришда рўй берганидек, ҚҚС бўйича ҳисоботни автоматик тарзда шакллантириш чоғида автоматик тарзда ҳисобга олади.

КПК орқали харид қилишда онлайн-НКМ чекини рўйхатдан ўтказиш чоғида ҳаракатлар алгоритми

1. My.soliq.uz тизимида тадбиркорлик субъектининг шахсий кабинетига киринг.

2. “Барча хизматлар” ҳаволасига босинг ва “Корпоратив карта орқали ҳақ тўлашда берилган чекни рўйхатдан ўтказиш” модулини танланг.

3. Очилган “Чекни рўйхатдан ўтказиш” шаклида чекдан фискал белги ва фискал модуль рақамини олиб ўтинг. Қолган маълумотлар – сотувчининг СТИРи, чек рақами, корпоратив карта орқали тўланган сумма, ҚҚС ва сумма ҚҚС билан – автоматик тарзда шакллантирилади.

Чекнинг QR-кодини сканер қилган ҳолда маълумотларни автоматик тарзда киритиш мумкин.

4. “Жўнатиш” тугмасига босинг ва сизнинг чеклар бўйича маълумотларингиз ҚҚС ҳисоботининг 4-иловасида акс этади.

Бундан ташқари, “Ҳисобга олинган чеклар” бўлимида ўзларининг ҚҚС бўйича ҳисоботларида шахсий кабинетнинг янги функционали ёрдамида рўйхатдан ўтказилган чекларни ҳисобга олган тадбиркорлик субъектлари рўйхати тақдим этилган.

Олег ГАЕВОЙ тайёрлади