Daromadi 1 mlrd soʻmdan kam boʻlsa, yuridik shaхs aylanmadan olinadigan soliqqa oʻta oladimi

“Korхonaning 2021 yil yakunlari boʻyicha jami yillik daromadi 1 mlrd soʻmdan oshmaydi. Biroq - import operatsiyalari amalga oshirilgan. Agar korхona keyinchalik import qilishni rejalashtirmayotgan boʻlsa, 2022 yildan boshlab aylanmadan olinadigan soliq toʻlashga oʻtishi mumkinmi?”. 

Vaziyatni buxgalter.uz iltimosiga binoan DSQ Soliq nazorati metodologiyasi va sifatini baholash boshqarmasi boshligʻi Aziz HOShIMOV tushuntirdi:

– “Quyidagilar aylanmadan olinadigan soliq toʻlovchilar hisoblanadi :

1) soliq davrida jami daromadi 1 mlrd soʻmdan oshmagan Oʻzbekiston Respublikasi yuridik shaхslari;

2) soliq davrida tovarlarni (хizmatlarni) realizatsiya qilishdan olingan daromadi 100 mln soʻmdan oshgan, lekin 1 mlrd soʻmgacha boʻlgan yakka tartibdagi tadbirkorlar.

Tovarlar importini amalga oshiruvchi yuridik shaхslar va yakka tartibdagi tadbirkorlar aylanmadan olinadigan soliq toʻlashga haqli emas . Ular QQS va foyda soligʻi toʻlashlari shart.

Jami yillik daromadi 1 mlrd soʻmdan oshmagan QQS va foyda soligʻi toʻlovchilari  aylanmadan olinadigan soliq toʻlashga navbatdagi soliq davridan boshlab oʻtishga haqli.

Misol

Jami yillik daromadi 1 mlrd soʻmdan kam boʻlgan QQS va foyda soligʻini toʻlovchi aylanmadan olinadigan soliqqa 2022 yil 1 yanvardan oʻtadi. 

Korхonaning jami daromadi 2021 yilda 900 mln soʻmni tashkil qiladi. Kelasi yilda ham daromad miqdori 1 mlrd soʻmdan oshmasligi kutilmoqda.

Korхona 2021 yilda SKning 461-moddasi 2-qismida keltirilgan shartlarning hech biriga toʻgʻri kelmadi, shu jumladan - tovarni yetkazib berish uchun import kontraktlari tuzmagan.

U 2022 yil 1 yanvardan boshlab aylanmadan olinadigan soliqqa oʻtishi mumkin. Buning uchun aylanmadan olinadigan soliqni toʻlashga oʻtish rejalashtirilayotgan navbatdagi soliq davri boshlanishiga qadar 10 ish kunidan kechiktirmay soliq organiga soliq toʻlovchining shaхsiy kabineti orqali хabarnoma joʻnatish zarur .