Корхона чет эллик ҳамкорнинг хизматлари учун маблағларни ўтказса, норезидент даромадидан олинадиган солиқ қандай тўланади

“ҚҚС ва фойда солиғи тўловчиси бўлган корхона Дубайда рўйхатдан ўтказилган компания билан компаниянинг дастурий комплекси сервисига киришни тақдим этиш бўйича хизматларга доир шартнома тузди. Чет эллик ҳамкор Ўзбекистонда ДМга эга эмас.

Корхона компаниянинг дастурий комплекси сервисидан интернет-ресурси орқали фойдаланади. Фойдаланиш имконияти ва хизматни ўчириб қўймасликлари учун биз вақти-вақти билан ўз шахсий ҳисоб рақамимиздан БАА банкида очилган чет эллик ҳамкорнинг ҳисоб рақамига валюта пул маблағларини тўлдириб – ўтказиб турамиз. Шахсий ҳисоб рақами дастурий комплекс сервисида акс эттирилади ва маблағлар қолдиғини кўрсатади. Шу тариқа, ҳар куни бизнинг шахсий ҳисоб рақамимиздан чет эллик ҳамкорнинг хизматлари учун сумма ҳисобдан чиқарилади.

Ҳисобот ойи тугагандан сўнг 10-санага қадар чет эллик ҳамкор бизга электрон ҳисобот юборади. Ҳисоботда чет эллик ҳамкорнинг дастурий комплексидан фойдаланиш хизмати ҳисобига ҳисобдан чиқарилган пул маблағларининг умумий суммаси кўрсатилади.

Агар Дубайда рўйхатдан ўтказилган компания резидентлик сертификатини тақдим этолмаса, Ўзбекистон корхонаси ҳар бир ўтказма бўйича эмас, балки ой якунлари бўйича чет эллик ҳамкор ҳисоботининг умумий суммасидан 10% ставка бўйича норезидентнинг даромадларидан олинадиган солиқни тўлаши мумкинми?”

Buxgalter.uz илтимосига биноан вазиятни “Норма” эксперти Дилором САИДОВА тушунтирди:

– Чет эл компаниясига тўланадиган, ҳар қандай номоддий активдан Ўзбекистонда фойдаланиш ёки фойдаланиш ҳуқуқини бериш учун роялти тарзидаги даромадга даромаднинг ҳар бир тўлови пайтида норезидентнинг даромадидан олинадиган солиқ солинади . Солиқ ставкаси 20%ни ташкил этади .

БАА билан Ўзбекистон Республикаси ўртасида иккиёқлама солиқка тортилишига йўл қўймаслик ва даромад ҳамда капитал солиқларини тўлашдан бош тортишнинг олдини олиш тўғрисида битим (Абу-Даби, 2007 йил 26 октябрь, 2011 йил 25 февралдан кучга кирган) имзоланган. Битимнинг 12-моддасига мувофиқ, агар роялтининг ҳақиқий эгаси – БААнинг резиденти бўлса, ЎзРда ҳосил бўладиган роялтига 10% ставка бўйича норезидентнинг даромадларидан олинадиган солиқ солинади.

Халқаро шартноманинг қоидаларини қўллаш ва солиқни пасайтирилган ставка бўйича ушлаб қолиш учун даромад тўлангунга қадар БАА компаниясидан қуйидагиларни олиш лозим:

• солиқ резидентлигини тасдиқловчи ҳужжатни (СКнинг 358-моддаси талабларини ҳисобга олган ҳолда);
• норезидент даромадни олишга бўлган ҳуқуққа ҳақиқатда эга эканлиги тасдиқномасини .

Даромаднинг ҳақиқий эгасини қандай аниқлаш ҳақида бу ерда ўқинг:

• Роялти ҳуқуқига ҳақиқатда эга шахс қандай аниқланади.

Агар сиз ушбу ҳужжатларни олмаган бўлсангиз, норезидентнинг даромадига 20% ставка бўйича солиқ солинади.

Норезидентнинг Ўзбекистондаги манбалардан олинган ва доимий муассаса билан боғлиқ бўлмаган даромадларидан олинадиган солиқ норезидентга даромад тўловчи солиқ агенти томонидан ҳисоблаб чиқарилади ва ушлаб қолинади. Солиқнинг ушлаб қолиниши солиқ тўловчининг даромадларидан бундай даромадларнинг ҳар бир тўлови пайтида амалга оширилади .

Сизнинг вазиятингизда компания сервисларига киришни тақдим этиш бўйича хизматлардан олинган даромад қачон эътироф этилиши борасида контракт (оферта) шартларини эътибор билан ўрганиб чиқишингиз лозим. Агар ҳисобдан чиқарилган маблағлар суммаси бўнак ҳисобланмаса ва компания сервисларига киришни тақдим этиш учун даромад бўлса, пул маблағларининг ҳар бир ҳисобдан чиқарилиши (тўлови) пайтида солиқни ушлаб қолиш ва тўлаш лозим, деб ҳисоблайман.