Хизматларни импорт қилишда ҚҚС ва фойда солиғи бўйича солиқ базасини қайси курс бўйича аниқлаш керак

«Биз хориждан хизматлар сотиб оламиз (импорт). 12% ҚҚС тўлаймизми? Бунда норезидентга тўланадиган даромадлардан фойда солиғини қайси курс бўйича ҳисоблаш керак - шартнома имзоланган санада ёки маблағлар ўтказилган санадами?»

Buxgalter.uz илтимосига кўра саволга «Assistance In Tax» солиқ маслаҳатчилари ташкилоти директори Радмила КАРИМОВА жавоб берди:

– Норезидентга тўланадиган даромадлардан олинадиган фойда солиғи кўрсатилаётган хизматлар турига боғлиқ. Бундай даромадларга СКнинг 351-моддаси қўлланилади.

Солиқ суммаси миллий валютада ҳисобланади ва тўланади, бунда норезидентга даромад тўланган санадаги Ўзбекистон Марказий банки курси бўйича ҳисобланади .

Хизматлар импортига ҚҚСни ҳисоблаш Ўзбекистон уларни реализация қилиш жойи деб тан олинишига боғлиқ. Умумий қоидага кўра, реализация қилиш жойи Ўзбекистон ҳудудидаги фаолият ёки жойлашув жойига қараб аниқланади .

Агар хизматлар харидори юридик шахс (унинг филиаллари ёки ваколатхоналари) давлат рўйхатидан ўтганлиги асосида бу ерда амалда мавжуд бўлса, Ўзбекистон хизматлар харидорининг фаолият жойи деб тан олинади. Агар давлат рўйхатидан ўтиш бўлмаса, хизматлар харидорининг амалда мавжудлиги юридик шахснинг таъсис ҳужжатларида кўрсатилган жой, унинг бошқарув жойи ёки унинг доимий муассасаси жойлашган жой асосида (агар хизматлар доимий муассаса орқали сотиб олинган бўлса) аниқланади . Шу билан бирга, СК 241-моддасининг 3-қисмида реализация қилиш жойи бир маънода Ўзбекистон деб тан олинадиган махсус ҳолатлар белгиланган.

Шунга кўра, ҚҚС тўлаш мажбурияти норезидент қандай хизматларни кўрсатгани ва улар қаерда кўрсатилганига боғлиқ.

Агар реализация қилиш жойи Ўзбекистон бўлса, хизматлар импорти бўйича ҚҚСни ҳисоблаб чиқариш ва тўлаш мажбурияти солиқ агентида пайдо бўлади .

ҚҚС бўйича солиқ базасини аниқлашда солиқ тўловчининг чет эл валютасида ифодаланган харажатлари СК 242-моддасида белгиланган товарларни (хизматларни) реализация қилиш бўйича айланма амалга оширилган санадаги Ўзбекистон Марказий банки курси бўйича миллий валютага қайта ҳисобланади .

Хизматларни реализация қилиш бўйича айланма амалга оширилган сана ҳисобварақ-фактура ёки уларнинг кўрсатилганлиги фактини тасдиқловчи бошқа ҳужжат расмийлаштирилган (имзоланган) сана ҳисобланади .