Ким ва қандай қилиб рўйхатдан ўтиш манзилида ҳозир бўлишга мажбур эмаслигини исботлаши мумкин

«МЧЖ коворкинг марказидаги жойни офис сифатида ижарага олади. Ходимлар асосан масофадан туриб ишлайди. Солиқ инспектори келиб, гўёки иш жойида ҳеч кимни топмаган. Шу асосда СКнинг 111-моддасига ҳавола қилган ҳолда ҳисоб-китоб рақамини ёпдим. Бундан ташқари, директорга жисмоний шахс сифатида маъмурий ҳуқуқбузарлик учун жарима солинди. Бундай вазиятда қандай йўл тутиш керак? Инспекторнинг хатти-ҳаракатлари қонунийми?»

Buxgalter.уз илтимосига биноан саволга «Assistance In Tax» солиқ маслаҳатчилари ташкилоти директори Радмила КАРИМОВА жавоб берди:

– Дарҳақиқат, солиқ тўловчининг (солиқ агентининг) ўзи маълум қилган манзилда бўлмаслиги юридик шахсларнинг ҳисобварақлари бўйича операцияларни тўхтатиб туришга сабаб бўлиши мумкин .

Саволда ташкилот қандай фаолият билан шуғулланиши кўрсатилмаган.

Қурилиш ва ишлаб чиқариш компанияларида ишчиларнинг мавжудлиги ҳақиқий фаолият фактини тасдиқлайди. Уларнинг кўрсатилган манзилда йўқлиги фаолиятнинг сохталигидан далолат бериши мумкин.

Виртуал манзилга эга бўлиш ва муайян иш жойида жисмонан бўлмаслик ҳуқуқига фақат Технопарк резиденти эга бўлади .

Шу билан бирга, индивидуал иш ўринлари қисқа муддатга ижарага бериладиган коворкинг майдончаси – бу ишлаш, тадбирлар ўтказиш ва бошқа мақсадлар учун вақтинча ижарага олинадиган умумий офисдир. Бундай офис майдонлари кўпинча IT -мутахассислари (веб-дастурчилар, дастурчилар), дизайнерлар томонидан танланади.

Шу сабабли, агар ташкилотнинг фаолияти юридик манзили бўйича мажбурий ҳозир бўлишни талаб қилмаса, унинг вакили ҳисобда турган жойидаги солиқ органига ходимнинг иш жойида йўқлиги юзасидан зарур тушунтиришларни шахсан тақдим этиши зарур .

Саида ЖАНИЗАКОВА тайёрлади