Нодавлат нотижорат ташкилотлари фаолиятини давлат томонидан қўллаб-қувватлаш тартиби тўғрисида Низом (ЎзР ВМ 28.04.2007 й. 86-сон қарорига илова)

Вазирлар Маҳкамасининг

2007 йил 28 апрелдаги

86-сон қарорига

ИЛОВА

Нодавлат нотижорат ташкилотлари фаолиятини

давлат томонидан қўллаб-қувватлаш тартиби тўғрисида

НИЗОМ

I. УМУМИЙ ҚОИДАЛАР

1. Ушбу Низом "Нодавлат нотижорат ташкилотлари фаолиятининг кафолатлари тўғрисида"ги Ўзбекистон Республикаси Қонунига мувофиқ давлат томонидан қўллаб-қувватланиш ҳуқуқига эга бўлган нодавлат нотижорат ташкилотларига (кейинги ўринларда ННТ деб аталади) давлат субсидиялари ажратиш, давлат грантлари ва давлат ижтимоий буюртмаси бериш шаклида уларни давлат томонидан қўллаб-қувватлаш тартибини белгилайди.

2. Адлия органларида қонун ҳужжатларида белгиланган тартибда давлат рўйхатидан ўтган ва камида бир йил фаолият кўрсатаётган юридик шахсларнинг ягона давлат реестрига киритилган ННТ фаолиятининг давлат томонидан қўллаб-қувватланишига талабгор бўлишлари мумкин.

3. ННТ фаолиятини давлат томонидан қўллаб-қувватлашга Давлат бюджети ва давлат мақсадли жамғармаларидан ажратиладиган маблағлар ҳажми ҳар йили Давлат бюджети харажатларининг асосий параметрларида алоҳида сатрда тасдиқланади, унинг доирасида Ўзбекистон Республикаси Вазирлар Маҳкамаси томонидан ушбу Низомнинг 1-бандида кўрсатилган давлат томонидан қўллаб-қувватлаш шаклларидан ҳар бирига йўналтириладиган маблағлар ҳажми белгиланади.

II. ДАВЛАТ СУБСИДИЯСИ

АЖРАТИШ ТАРТИБИ

4. Ўзбекистон Республикаси Давлат бюджети, давлат мақсадли жамғармалари (кейинги ўринларда давлат субсидиялари деб аталади) маблағлари ҳисобига ННТ фаолиятини ҳамда махсус лойиҳаларнинг амалга оширилиши билан боғлиқ бўлмаган фаолиятини қўллаб-қувватлаш учун бериладиган молиявий ёки бошқача моддий ёрдам давлат субсидияси ҳисобланади.

5. ННТ фаолиятини давлат субсидиялари ажратиш шаклида давлат томонидан қўллаб-қувватлаш ушбу Низомга 1-иловага мувофиқ схема бўйича амалга оширилади.

6. Ижтимоий аҳамиятга эга бўлган фаолиятни амалга оширувчи, фуқаролик жамияти институтлари тизимини ривожлантиришда қатнашувчи ННТ давлат субсидиялари олишга талабгор бўлишлари мумкин.

7. Давлат субсидиялари фақат ННТнинг уставдаги мақсадлари ва вазифаларини бажариш учун, шу жумладан жорий таъминот, моддий-техник базани мустаҳкамлаш, ижтимоий аҳамиятга эга бўлган тадбирларни ўтказиш учун ажратилади ва фойдаланилади.

8. Давлат бюджети асосий параметрларида назарда тутилган маблағлар доирасидаги давлат субсидияларини ННТ ўртасида тақсимлаш Ўзбекистон Республикаси Вазирлар Маҳкамаси томонидан қуйидаги тартибда амалга оширилади:

Давлат бюджети қабул қилингандан кейин 15 кун мобайнида ННТ Ўзбекистон Республикаси Вазирлар Маҳкамасига уларнинг фаолиятини қўллаб-қувватлаш учун давлат субсидиялари ажратиш тўғрисида, улардан фойдаланиш йўналишларини кўрсатган ҳолда ёзма буюртманома билан мурожаат қиладилар;

Ўзбекистон Республикаси Вазирлар Маҳкамаси тушган буюртманомаларни ННТ иш тажрибаси, уставдаги вазифаларининг бажарилиши, фаолиятининг ижтимоий аҳамияти даражаси тўғрисида хулосалар тақдим этиш учун - Адлия вазирлигига ҳамда ННТга илгари ажратилган давлат маблағларидан фойдаланишда молия интизомига риоя этилиши масаласи бўйича хулосалар тақдим этиш учун - Молия вазирлигига жўнатади;

Адлия вазирлиги ва Молия вазирлиги ҳар бир ННТ бўйича материалларни кўриб чиқиб Вазирлар Маҳкамасига уч ҳафтадан ортиқ бўлмаган муддатда ўз хулосаларини жўнатадилар.

Вазирлар Маҳкамаси тақдим этилган хулосаларни ҳисобга олган ҳолда, ННТ мурожаат қилган кундан бошлаб бир ой мобайнида давлат субсидиялари ажратиш тўғрисида қарор қилади.

9. Молия вазирлиги Вазирлар Маҳкамасининг ҳар чоракда тенг улушларда давлат субсидиялари ажратиш тўғрисидаги қарорига мувофиқ ҳар бир ННТни тасдиқланган ҳажмлар доирасида молиялаштиришни амалга оширади. Ажратилган давлат субсидияларини ҳисобга киритиш ва сарфлаш давлат субсидиялари оладиган ННТ учун махсус очилган бюджет ҳисоб рақамларидан амалга оширилади.

10. Давлат субсидиялари маблағларининг йил охиридаги фойдаланилмай қолган қолдиқлари бюджетга қайтарилади.

11. Давлат субсидиялари оладиган ННТ ҳар чоракда Молия вазирлигига бюджет ташкилотлари учун белгиланган муддатларда ва тартибда давлат субсидиялари маблағларидан фойдаланилиши тўғрисида ҳисобот тақдим этадилар.

12. Ажратилган давлат субсидияларининг мақсадли сарфланиши устидан назорат белгиланган тартибда Ўзбекистон Республикаси Адлия вазирлиги ва Молия вазирлиги томонидан амалга оширилади.

III. ДАВЛАТ ГРАНТИ

АЖРАТИШ ТАРТИБИ

13. Ижтимоий фойдали мақсадларга эришишга йўналтирилган лойиҳаларни амалга ошириш учун Ўзбекистон Республикаси Давлат бюджети маблағлари ҳисобига, танлов асосида ННТга бериладиган пул маблағлари ва моддий ресурслар давлат гранти ҳисобланади.

14. ННТ фаолиятини давлат гранти ажратиш шаклида давлат томонидан қўллаб-қувватлаш ушбу Низомга 2-иловага мувофиқ схема бўйича амалга оширилади.

15. Вазирлар Маҳкамаси Давлат бюджети қабул қилингандан кейин 15 кун мобайнида давлат грантлари ҳажмларини белгилаш билан бир вақтда ННТ томонидан давлат грантлари маблағлари ҳисобига амалга ошириладиган лойиҳаларни танлаб олишни амалга оширишга ваколатли бўлган мувофиқлаштирувчиларни (кейинги ўринларда Мувофиқлаштирувчи деб аталади) белгилайди. Давлат ҳокимияти ва бошқарув органлари, фуқаролик жамияти институтлари тизимини ривожлантиришда қатнашувчи ва миллий мақомга эга бўлган ННТ уюшмалари ва бирлашмалари (Ўзбекистон нодавлат, нотижорат ташкилотлари миллий уюшмаси, Ўзбекистон Республикаси оммавий ахборот электрон воситалари миллий уюшмаси, Ўзбекистон мустақил босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фонди ва бошқалар) мувофиқлаштирувчилар бўлиши мумкин.

16. Давлат грантлари маблағлари ҳисобига Мувофиқлаштирувчилар томонидан белгиланадиган ёхуд ННТ томонидан тавсия қилинган лойиҳалар амалга оширилади.

17. Иккала ҳолатда ҳам Мувофиқлаштирувчи давлат грантлари учун ажратиладиган маблағлар ҳажмлари белгилангандан кейин бир ой муддатда танлов комиссияси (кейинги ўринларда Комиссия деб аталади) тузади ва грант олиш учун ННТдан буюртманомалар қабул қилишни ташкил этади.

18. Давлат гранти олиш учун ННТ комиссияга давлат гранти олиш юзасидан буюртманомаларни Мувофиқлаштирувчилар лойиҳалари бўйича ҳам, ННТнинг ўзлари тавсия қиладиган лойиҳалар бўйича ҳам танлов шартларида белгиланган тартибда ва муддатларда тақдим этадилар.

19. Мувофиқлаштирувчи буюртманомаларни қабул қилишнинг белгиланган муддати ўтгандан кейин бир ҳафта муддатда танлов қатнашчилари рўйхатини амалга ошириш учун тавсия қилинаётган лойиҳанинг ННТнинг уставдаги фаолиятига, мақсадлари ва вазифаларига мувофиқлиги тўғрисида хулосалар олиш учун - Адлия вазирлигига ҳамда ННТга илгари ажратилган давлат маблағларидан фойдаланишда молия интизомига риоя қилиниши масаласи бўйича хулоса олиш учун - Молия вазирлигига жўнатади.

20. Адлия вазирлиги ва Молия вазирлиги ҳар бир ННТ бўйича материалларни кўриб чиқиб Мувофиқлаштирувчига уч ҳафтадан ортиқ бўлмаган муддатда ўз хулосаларини жўнатадилар.

21. Комиссия тақдим этилган хулосаларни ҳисобга олган ҳолда ННТ мурожаат қилган кундан бошлаб бир ой мобайнида давлат гранти ажратиш тўғрисида қарор қабул қилади, Мувофиқлаштирувчи ушбу қарор асосида ҳар бир ННТ - грант олувчи билан тегишли шартнома тузади.

22. Мувофиқлаштирувчилар ННТга ажратиладиган давлат грантлари мақсади ва ҳажмлари тўғрисида Адлия вазирлигига ва Молия вазирлигига ахборот берадилар.

23. ННТ - давлат грантлари олувчиларни молиялаштириш Мувофиқлаштирувчилар орқали Молия вазирлиги томонидан амалга оширилади.

24. Молиялаштириш учун Мувофиқлаштирувчига ва ҳар бир ННТга ажратилган давлат грантларини ҳисобга олиш ва сарфлаш мақсадида хизмат кўрсатувчи банкларда бюджет ҳисоб рақамлари очилади.

25. Давлат гранти маблағларининг йил охиридаги фойдаланилмай қолган қолдиқлари бюджетга қайтарилади.

26. Бир молия йили мобайнида ННТга биттадан ортиқ грант бериш тақиқланади.

27. Давлат грантлари олган ННТ Мувофиқлаштирувчиларга грантлар ажратиш тўғрисидаги шартнома (битим) шартларида белгиланган муддатларда ва тартибда, Мувофиқлаштирувчилар эса ҳар чоракда бюджет ташкилотлари учун белгиланган муддатларда - ажратилган маблағлардан фойдаланилиши тўғрисида Молия вазирлигига ҳисобот тақдим этадилар.

28. Ажратилган маблағларнинг мақсадли сарфланиши устидан назорат белгиланган тартибда Адлия вазирлиги, Молия вазирлиги ва Мувофиқлаштирувчи томонидан амалга оширилади.

IV. ДАВЛАТ ИЖТИМОИЙ БУЮРТМАСИНИ

ЖОЙЛАШТИРИШ ТАРТИБИ

29. Давлат органи ва ННТ ўртасида шартнома тузиш йўли билан ижтимоий аҳамиятга эга бўлган лойиҳаларни амалга ошириш учун ишларни бажариш ёки тадбирларни амалга ошириш юзасидан давлат топшириғи ННТга бериладиган давлат ижтимоий буюртмаси ҳисобланади.

30. ННТ фаолиятини давлат ижтимоий буюртмасини жойлаштириш шаклида давлат томонидан қўллаб-қувватлаш ушбу Низомга 3-иловага мувофиқ схема бўйича амалга оширилади.

31. ННТ томонидан бажариладиган йўналишлар бўйича давлат ижтимоий буюртмалари учун ажратиладиган маблағлар рўйхати ва ҳажми Вазирлар Маҳкамаси томонидан тасдиқланади. Айни бир вақтда Вазирлар Маҳкамаси улар билан ижтимоий буюртмалар бажарилиши керак бўлган шартномалар бўйича давлат органлари (кейинги ўринларда Буюртмачилар деб аталади) рўйхатини ёхуд ННТ - ижтимоий буюртма бажарувчилари (Вазирлар Маҳкамаси буюртмачи бўлган тақдирда) рўйхатини белгилайди.

32. Ижтимоий буюртма олиш учун (Вазирлар Маҳкамаси буюртмачи бўлмаган тақдирда) ННТ томонидан бажариладиган ижтимоий буюртмалар рўйхати тасдиқлангандан кейин бир ой муддатда ННТ буюртмачиларга ижтимоий буюртмани бажариш юзасидан асосланган буюртманомалар тақдим этадилар.

33. Буюртмачи бир ҳафта муддатда буюртманомалар берган ННТ рўйхатини, амалга ошириш учун тавсия қилинаётган ижтимоий буюртманинг ННТнинг уставдаги фаолияти, мақсади ва вазифаларига мувофиқлиги тўғрисида хулосалар олиш учун - Адлия вазирлигига ҳамда ННТга илгари ажратилган давлат маблағларидан фойдаланишда молия интизомига риоя қилиниши масаласи бўйича хулоса олиш учун - Молия вазирлигига жўнатади.

34. Адлия вазирлиги ва Молия вазирлиги ҳар бир ННТ бўйича материалларни кўриб чиқиб Буюртмачига уч ҳафтадан ортиқ бўлмаган муддатда ўз хулосаларини жўнатадилар.

35. Буюртмачилар Адлия вазирлиги ва Молия вазирлиги хулосаларини ҳисобга олган ҳолда давлат ижтимоий буюртмаси бажарувчиларини белгилайдилар ва улар билан аниқ ижтимоий буюртмани бажариш юзасидан тегишли шартномалар (битимлар) тузадилар.

36. Молия вазирлиги давлат ижтимоий буюртмасини жойлаштириш тўғрисидаги қарорга мувофиқ ҳар бир ННТни тасдиқланган ҳажмлар доирасида, шартномада назарда тутилган муддатларда молиялаштиришни амалга оширади. Давлат ижтимоий буюртмаларини бажаришга ажратилган маблағларни ҳисобга киритиш ва сарфлаш ННТ - ижтимоий буюртма бажарувчиси учун махсус очилган бюджет ҳисоб рақамларидан амалга оширилади.

37. Давлат ижтимоий буюртмасини олган ННТ Буюртмачиларга тегишли шартнома шартларида белгиланган муддатларда ва тартибда, Буюртмачилар эса ҳар чоракда бюджет ташкилотлари учун белгиланган муддатларда - ажратилган маблағлардан фойдаланилиши тўғрисида Молия вазирлигига ҳисобот тақдим этадилар. Давлат ижтимоий буюртмалари учун ажратилган маблағларнинг йил охиридаги фойдаланилмай қолган қолдиқлари бюджетга қайтарилади.

38. Ажратилган маблағларнинг тўғри ва мақсадли сарфланиши устидан назорат белгиланган тартибда Адлия вазирлиги, Молия вазирлиги ва Буюртмачилар томонидан амалга оширилади.

Низомга

1-ИЛОВА

ННТга давлат субсидиялари ажратиш

СХЕМАСИ

Низомга

2-ИЛОВА

ННТга давлат гранти ажратиш

СХЕМАСИ

Низомга

3-ИЛОВА

Давлат ижтимоий буюртмасини жойлаштириш

СХЕМАСИ

"Ўзбекистон Республикаси қонун ҳужжатлари тўплами", 2007 йил, 17-18-сон, 183-модда.