Ўзбекистон Республикаси Вазирлар Маҳкамасининг 23.12.2004 й. 604-сон "Ғўза уруғчилигини ташкил этишни такомиллаштириш чора-тадбирлари тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

23.12.2004 й.

N 604

ҒЎЗА УРУҒЧИЛИГИНИ ТАШКИЛ

ЭТИШНИ ТАКОМИЛЛАШТИРИШ

ЧОРА-ТАДБИРЛАРИ ТЎҒРИСИДА

Вазирлар Маҳкамаси қайд этадики, Қишлоқ ва сув хўжалиги вазирлиги, "Ўзпахтасаноат" уюшмаси, Ўзбекистон пахта толасини сертификациялаш "Сифат" маркази, Қорақалпоғистон Республикаси Вазирлар Кенгаши ва вилоятлар ҳокимликлари раҳбарияти томонидан зарур даражадаги талабчанликнинг йўқлиги натижасида ғўза уруғчилиги, янги ва истиқболли навларни яратиш, юқори репродукцияли элита ва навларни сақлаб қолиш, шунингдек ғўзанинг сифатли уруғлик чигитини тайёрлаш масалаларидаги ишларнинг вужудга келган аҳволи қониқарсиздир.

Ғўзанинг янги ва истиқболли навлари уруғчилиги ва селекцияси билан шуғулланувчи илмий-тадқиқот институтлари, рўйхатдан ўтказилган навлар уруғларини етиштириш бўйича элита-уруғчилик хўжаликлари раҳбарларининг интизоми ва масъулияти пастлигича қолмоқда.

Ғўза уруғларини саноат жиҳатидан тайёрлаш, калибрлаш, дорилаш ва сортларга ажратиш, уруғлик чигитга қўйиладиган бошқа талабларни бажариш билан шуғулланувчи пахта тозалаш заводларини ихтисослаштириш ишлари тубдан яхшилашни талаб қилади.

"Уруғчилик тўғрисида" ва "Селекция ютуқлари тўғрисида"ги қонунлар талабларига риоя қилинмаяпти.

Дастлабки уруғчилик, янги ва истиқболли навларни синаб кўриш билан шуғулланувчи элита-уруғчилик хўжаликлари, илмий-тадқиқот муассасалари ва уларнинг экспериментал базалари фаолиятини ташкил этиш, шунингдек уларнинг фаолиятини рағбатлантириш ҳамда якуний натижа учун жавобгарлигини ошириш борасида кўплаб ҳал этилмаган масалалар мавжуд. Бунинг натижасида жойларда ғўзани районлаштириш, чигит экиш ва пахта хом ашёси етиштиришда ҳар қайси алоҳида ғўза навига қўйиладиган агротехнологиянинг зарур талаблари ва шартлари таъминланмаяпти.

Кўрсатиб ўтилган камчиликларни бартараф этиш ва ғўза уруғчилигини ташкил этишни яхшилаш, пахта етиштирувчи хўжаликларни сифатли уруғликлар билан таъминлаш мақсадида Вазирлар Маҳкамаси ҚАРОР ҚИЛАДИ:

1. Қуйидагиларнинг:

Ўзбекистон Республикаси Қишлоқ ва сув хўжалиги вазирлигининг ғўза селекцияси ва уруғчилиги, истиқболли ва юқори ҳосилли, касалликлар ва зараркунандаларга бардошли, пахта толаси параметрлари халқаро талабларга жавоб берадиган юқори сифатли бўлган навларнинг сифатли уруғларини тайёрлаш масалаларида техника сиёсатини ўтказиш бўйича;

"Ўзпахтасаноат" уюшмаси, пахта тозалаш заводларининг уруғларни саноат жиҳатидан тайёрлаш, калибрлаш, дорилаш ва сортларга ажратиш бўйича ишлари қониқарсиз деб ҳисоблансин.

2. Белгилаб қўйилсинки, Қишлоқ ва сув хўжалиги вазирлиги, биринчи навбатда Қишлоқ хўжалиги илмий-ишлаб чиқариш маркази, элита-уруғчилик хўжаликлари раҳбариятининг фаолияти уларнинг якуний иш натижалари бўйича, мазкур ишларнинг пахта етиштирувчи хўжаликларда қандай йўлга қўйилганлиги ва амалга оширилаётганлиги бўйича баҳоланиши керак.

Ўзбекистон Республикаси Қишлоқ ва сув хўжалиги вазирлиги Иқтисодиёт вазирлиги, Молия вазирлиги, Адлия вазирлиги билан биргаликда бир ой муддатда вазирликлар, идоралар, илмий-тадқиқот ва элита-уруғчилик хўжаликлари, пахта етиштирувчи хўжаликлар, ғўза уруғчилиги ва селекцияси масаласига алоқадор бўлган мансабдор шахсларнинг якуний натижалар учун аниқ жавобгарлигини назарда тутувчи Низомни тайёрласин ва белгиланган тартибда тасдиқласин.

3. Қуйидагилар:

ғўзанинг янги ва истиқболли навларини янада яхшилаш ва дастлабки уруғчилик билан шуғулланувчи экспериментал хўжаликлар рўйхати 1-иловага мувофиқ;

ғўзанинг рўйхатдан ўтказилган навлари уруғини етиштириш бўйича элита-уруғчилик хўжаликлари рўйхати 2-иловага мувофиқ;

ғўзанинг янги ва истиқболли навларини яратиш бўйича элита-уруғчилик хўжаликлари рўйхати 3-иловага мувофиқ тасдиқлансин.

4. Вазирлар Маҳкамаси (Ш.М. Мирзиёев), "Ўзпахтасаноат" уюшмаси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда:

ўн беш кун муддатда заводларнинг фақат техника билан жиҳозланганлиги ва тайёргарлигини эмас, балки уларнинг минтақавий жойлашганлигини ва транспорт харажатларини ҳам ҳисобга олган ҳолда Қорақалпоғистон Республикаси ва вилоятлар бўйича уруғлик чигит етиштиришга ихтисослашадиган пахта тозалаш заводларини белгиласинлар ва уларнинг рўйхатини тасдиқласинлар;

бир ой муддатда 2005-2006 йилларда ихтисослаштирилган заводларни замонавийлаштиришнинг истиқбол дастурини тайёрласинлар, бунда уларни уруғлик чигитни тайёрлаш, калибрлаш, дорилаш ва сортларга ажратиш учун замонавий асбоб-ускуналар билан жиҳозлашни назарда тутсинлар.

5. Ўзбекистон Республикаси Қишлоқ ва сув хўжалиги вазирлиги, "Ўзпахтасаноат" уюшмаси, "Ўзстандарт" агентлиги бир ой муддатда ғўза уруғини сертификациялашнинг амалдаги тартибини қайта кўриб чиқсинлар ва уни белгиланган тартибда қайта тасдиқласинлар.

6. Ўзбекистон Республикаси Адлия вазирлиги манфаатдор вазирликлар ва идоралар билан биргаликда бир ой муддатда амалдаги қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

7. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Вазирлар Маҳкамасининг Раиси                                               И. Каримов

Вазирлар Маҳкамасининг

2004 йил 23 декабрдаги

604-сон қарорига

1-ИЛОВА

Ғўзанинг янги ва истиқболли навларини

яхшилаш ҳамда дастлабки уруғчилик билан

шуғулланадиган тажриба хўжаликлари

РЎЙХАТИ

I. Пахтачилик илмий-тадқиқот институти

1. Фарғона вилояти Қува туманидаги "Ўзбекистон" ширкат хўжалиги.

2. Қашқадарё вилояти Касби туманидаги А.Навоий номли ширкат хўжалиги.

3. Сурхондарё вилояти Денов туманидаги "Ҳазарбоғ" ширкат хўжалиги.

4. Сурхондарё вилояти Термиз туманидаги "Дўстлик" ширкат хўжалиги.

5. Тошкент вилояти Қибрай туманидаги Марказий тажриба хўжалиги.

6. Пахтачилик илмий-тадқиқот институтининг республиканинг барча вилоятларидаги филиаллари (Қорақалпоғистон Республикаси ва Тошкент вилоятидан ташқари).

II. Ғўза селекцияси ва уруғчилиги

илмий-тадқиқот институти

1. Наманган вилояти Уйчи туманидаги "Қизил Равот" ширкат хўжалиги.

2. Сурхондарё вилояти Жарқўрғон туманидаги "Сурхон" фермер хўжаликлари уюшмаси.

3. Тошкент вилояти Оққўрғон туманидаги "Оққўрғон" ширкат хўжалиги.

4. Тошкент вилояти Қибрай туманидаги Марказий тажриба хўжалиги.

III. Ўзбекистон Республикаси Фанлар академиясининг

Генетика ва ўсимликлар экспериментал биологияси

илмий-тадқиқот институти

1. Фарғона вилояти Бағдод туманидаги "Конизар" ширкат хўжалиги.

2. Тошкент вилояти Пискент туманидаги Дўстбеков номли ширкат хўжалиги.

3. Тошкент вилояти Зангиота туманидаги Тошкент тажриба базаси.

4. Сирдарё вилояти Сардоба туманидаги "Пахтаобод" ширкат хўжалиги.

IV. Қорақалпоғистон Республикаси

Деҳқончилик илмий-тадқиқот институти

1. Қорақалпоғистон Республикаси Чимбой туманидаги Марказий тажриба базаси.

Вазирлар Маҳкамасининг

2004 йил 23 декабрдаги

604-сон қарорига

2-ИЛОВА

Рўйхатдан ўтказилган ғўза навлари уруғларини

етиштирувчи элита-уруғчилик хўжаликлари

РЎЙХАТИ

           

Вазирлар Маҳкамасининг

2004 йил 23 декабрдаги

604-сон қарорига

3-ИЛОВА

Ғўзанинг янги ва истиқболли навлари уруғларини

етиштирувчи элита-уруғчилик хўжаликлари

РЎЙХАТИ

           

"Ўзбекистон Республикаси қонун ҳужжатлари тўплами", 2004 йил, 52-сон, 520-модда.