Ўзбекистон Республикаси Президенти ҳузуридаги Вазирлар Маҳкамасининг 28.05.1992 й. 249-сон "Ижтимоий аҳамиятга молик нашрларни чоп этиш учун зарур шароит яратиш ҳақида"ги Қарори

ЎЗБЕКИСТОН РЕСПУБЛИКАСИ

ПРЕЗИДЕНТИ ҲУЗУРИДАГИ

ВАЗИРЛАР МАҲКАМАСИНИНГ

ҚАРОРИ

28.05.1992 й.

N 249

ИЖТИМОИЙ АҲАМИЯТГА МОЛИК

НАШРЛАРНИ ЧОП ЭТИШ УЧУН

ЗАРУР ШАРОИТ ЯРАТИШ

ҲАҚИДА

Вақтли матбуот ҳамда китоб нашрчилигининг моддий-техника базасини мустаҳкамлаш, бозор иқтисодиётига ўтиш шароитида ижтимоий аҳамиятга молик нашрларни чоп этиш учун зарур шароит яратиш мақсадида Вазирлар Маҳкамаси ҚАРОР ҚИЛАДИ:

1. 1992 йил вақтли матбуот нашрларининг қимматлашгани муносабати билан сарф-харажатни қоплаш учун ажратилган қўшимча маблағни тақсимлаш бўйича комиссия таклифлари иловага мувофиқ тасдиқлансин.

2. Ўзбекистон Республикаси Алоқа вазирлиги 1992 йилда вақтли матбуотни тарқатиш ишларини 1991 йил обуна компанияси давридаги миқдорда ташкил қилсин.

"Ўзбекистон ҳаво йўллари" авиакомпанияси ва Ўрта Осиё темир йўл бошқармаси 1992 йилда ўтган йилга нисбатан вақтли матбуотни етказиб бериш ва тарқатишга кўпайган харажатни бошқа хилдаги хизматларга тарифларни ошириш ҳисобидан ташкил этсин.

3. Ўзбекистон Республикасининг тараққиёт истиқболини белгилаш қўмитаси, Ўзбекистон Республикаси Молия вазирлиги 1992 йилнинг иккинчи ярмида зарур асбоб-ускуна, техника, телевидеоаппаратлар, эҳтиёт қисмлар олиш учун:

Ўзбекистон Республикаси давлат матбуот қўмитасига 2 млн., "Шарқ" концернига 2,5 млн. эркин алмаштириладиган валюта ажратсин;

Ўзбекистон Республикаси давлат телерадиокомпаниясига 2,178 млн., Ўзбекистон миллий ахборот агентлигига 1 млн. эркин алмаштириладиган валюта ажратишни ва уни тегишли миқдордаги сўм билан қоплашни таъминласин;

икки ой муддат ичида маҳаллий хом ашёдан қоғоз ишлаб чиқариш имкониятларини ўрганиб чиқсин ва республикада целлюлоза-қоғоз ҳамда картон тайёрлаш саноатини ривожлантириш бўйича таклифлар киритсин.

4. "Ўзшартномасавдо" Россия Федерацияси билан амалдаги давлатлараро шартномага мувофиқ ажратилган квоталар бўйича қоғоз, картон ва муқовалаш материалларини Ўзбекистон Республикаси Давлат матбуот қўмитаси, "Шарқ" нашриёт-матбаачилик концерни ва "Камалак" нашриёт-ишлаб чиқариш бирлашмаси, Тошкент картография фабрикасига мунтазам етказиб турсин.

5. Ўзбекистон Республикаси Президенти ҳузуридаги Вазирлар Маҳкамаси комплекс раҳбарларининг вазирликларда ва муассасаларда газета ва журналлар таҳририятларига ҳомийлик қилиш ҳақидаги таклифлари маъқуллансин.

6. Вазирликлар, муассасалар, концернлар, корхоналар, ташкилотлар ва жамоат ташкилотлари ва Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига полиграфия корхоналарига, нашриётларга, газеталар ва журналларнинг таҳририятларига ва китоб савдоси муассасаларига одам яшамайдиган биноларни ижарага бераётганда ижара ҳақини амортизация нормалари ва биноларни сақлаш харажатларини қоплаш қийматини қайта тиклаш учун зарур бўлган суммадан ҳисоблаб чиқарилган миқдорда ундириш таклиф этилсин.

7. Ушбу қарорнинг бажарилишини назорат қилиш маданият, матбуот ва туризм комплекси (ўртоқ Э. Самандаров)га топширилсин.

Ўзбекистон Республикасининг Бош вазири                         А. Муталов

Вазирлар Маҳкамасининг

1992 йил 28 майдаги

249-сон қарорига

ИЛОВА

Давлат дотацияси бериладиган газеталар

ва журналлар таҳририятлари