Тиббий-меҳнат эксперт комиссияларида кўрик далолатномаларини расмийлаштириш ва юритиш Қоидалари (АВ томонидан 06.02.2015 й. 2653-сон билан рўйхатга олинган молия вазирининг 07.01.2015 й. 1-сонли буйруғи билан тасдиқланган)

Ўзбекистон Республикаси

Адлия вазирлигида

2015 йил 6 февралда 2653-сон

билан рўйхатга олинган

Ўзбекистон Республикаси

молия вазирининг

2015 йил 7 январдаги

1-сонли буйруғига

ИЛОВА

Тиббий-меҳнат эксперт комиссияларида кўрик

далолатномаларини расмийлаштириш ва юритиш

ҚОИДАЛАРИ

Мазкур Қоидалар Ўзбекистон Республикаси Вазирлар Маҳкамасининг 2011 йил 1 июлдаги 195-сонли "Тиббий-меҳнат эксперт комиссиялари томонидан фуқароларни тиббий кўрикдан ўтказиш тартибини янада такомиллаштиришга, ногиронликни ва касбий меҳнатга лаёқат йўқотилиши даражасини аниқлашга йўналтирилган норматив-ҳуқуқий ҳужжатларни тасдиқлаш тўғрисида"ги қарорига асосан Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг бош, туман (шаҳар), туманлараро ва ихтисослаштирилган тиббий-меҳнат эксперт комиссияларида (бундан буён матнда ТМЭК деб юритилади) кўрик далолатномаларини расмийлаштириш ва юритиш тартибини белгилайди.

1-БОБ. УМУМИЙ ҚОИДАЛАР

1. ТМЭК кўрик далолатномаси (бундан буён матнда кўрик далолатномаси деб юритилади) ТМЭК кўрик натижалари бўйича хулоса (бундан буён матнда ТМЭК хулосаси деб юритилади) чиқариш учун асос бўладиган асосий тиббий маълумотлар ва ижтимоий омилларни ёзиш учун мўлжалланган ҳужжат ҳисобланади.

2. Кўрик далолатномаларини расмийлаштириш ва юритиш ТМЭКлар томонидан мазкур Қоидаларга мувофиқ амалга оширилади.

ТМЭК кўригидан ўтиш учун юбориладиган шахсларга (бундан буён матнда кўрикдан ўтувчилар деб юритилади) мазкур Қоидаларнинг 1-иловасидаги шаклга мувофиқ кўрик далолатномаси расмийлаштирилади.

3. Ҳар бир ТМЭК врач-эксперти ўз хизмат вазифаси доирасида кўрик далолатномаларининг ўз вақтида ва сифатли расмийлаштирилиши учун жавобгардир.

Кўрик далолатномаларининг ўз вақтида ва сифатли расмийлаштирилиши устидан умумий назорат ТМЭК раиси томонидан амалга оширилади.

2-БОБ. ТМЭКга ТАҚДИМ ҚИЛИНГАН

ҲУЖЖАТЛАРНИ ҚАБУЛ ҚИЛИШ

4. ТМЭКда кўрикдан ўтиш учун қабул қилинадиган тиббий ва бошқа ҳужжатлар (бундан буён матнда ҳужжатлар деб юритилади) даволаш-профилактика муассасасининг тиббий-маслаҳат комиссияси (бундан буён матнда ТМК деб юритилади) раиси ёки масъул шахси томонидан тақдим этилади.

Кўрикдан ўтувчилар ва бошқа шахслардан ҳужжатларни қабул қилишга йўл қўйилмайди.

5. Кўрикдан ўтиш учун ТМЭКга тақдим қилинган ҳужжатлар ТМЭК врач-экспертлари томонидан коллегиал кўриб чиқилади. ТМЭКнинг врач-экспертлари:

тиббий текширувнинг сифати, ТМЭКга ўз вақтидалиги ва юборилишининг асослилиги ҳамда тақдим қилинган ҳужжатларнинг ҳаққонийлигига;

ТМЭКга йўлланманинг (бундан буён матнда 088/ҳ-шакл деб юритилади) тўғри ва тўлиқ расмийлаштирилганлигига;

амбулатор карта ва касаллик тарихидан кўчирмаларда имзолар ва думалоқ муҳр борлигига;

вақтинча меҳнатга лаёқатсизлик варақаларининг берилган санаси ва муддатлари, қўйилган ташхис ва иш берувчининг вақтинча меҳнатга лаёқатсизлик варақасини қабул қилганлик тўғрисидаги белги қўйилганлигига эътибор беришлари лозим.

Даволаш-профилактика муассасалари томонидан расмийлаштирилган 088/ҳ-шаклнинг муддати бир ойдан ўтиб кетган тақдирда, ТМЭК томонидан қабул қилинмайди.

6. Уйда ёки стационарда сайёр кўрикни ўтказиш лозим бўлганда, кўрикдан ўтувчининг 088/ҳ-шакл титул варақаси юқори чап қисмига ТМКнинг кўрикни уйда ёки стационарда ўтказишни асословчи ёзма тавсияси кўрсатилади.

7. Агар ТМЭК кўригидан ўтиш вақтида кўрикдан ўтувчи республиканинг бошқа ҳудудида вақтинча яшаётган бўлса ("Саҳоват" ва "Мурувват" уйлари ҳамда мажбурий даволанишдаги шахслардан ташқари) ва соғлиғи ҳолатининг оғирлиги сабабли транспортировка қилишга қарши кўрсатма бўлган тақдирда, кўрикдан ўтувчининг (қонуний вакилининг) аризасига асосан Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси Республика тиббий-ижтимоий экспертиза инспекцияси (бундан буён матнда Инспекция деб юритилади) билан келишилган ҳолда кўрикдан ўтувчи жойлашган ҳудуддаги Бош ТМЭК раисининг рухсати билан тегишли ТМЭКда кўрикдан ўтказилади.

Бунда, ҳужжатлар кўрикдан ўтувчи жойлашган ҳудуддаги даволаш-профилактика муассасаси томонидан расмийлаштирилади ва тегишли ТМЭКга тақдим этилади. Кўрикдан ўтказган ТМЭК томонидан кўрик далолатномаси расмийлаштирилади ҳамда ТМЭК раиси ва врач-экспертлари томонидан имзоланиб, муҳр билан тасдиқлангандан сўнг кўрикдан ўтувчи доимий рўйхатда турадиган ҳудуддаги тегишли ТМЭКга 7 кундан кечиктирмай (алоҳида ҳолатларда, узоқ туманларни инобатга олиб 10 кундан кечиктирмай) юборилади. Кўрикдан ўтказган ТМЭК томонидан юборилган кўрик далолатномасига асосан ногиронлик белгиланганда, кўрикдан ўтувчи доимий рўйхатда турадиган тегишли ТМЭК томонидан Вазирлар Маҳкамасининг 2011 йил 1 июлдаги 195-сонли қарори билан тасдиқланган Фуқароларни тиббий-меҳнат эксперт комиссияларида тиббий кўрикдан ўтказиш тартиби тўғрисидаги низомнинг 1-иловасига мувофиқ шаклда ногиронлик тўғрисидаги маълумотнома, касбий меҳнат лаёқатининг йўқотилганлик даражаси белгиланганда мазкур Низомнинг 2-иловасига мувофиқ шаклда кўрик далолатномасидан кўчирма расмийлаштирилади.

ТМЭК хулосасининг тўғри белгиланиши учун кўрикдан ўтказган ТМЭК жавобгар ҳисобланади. Агар кўрикдан ўтказган ТМЭК хулосаси доимий рўйхатда турадиган ҳудуддаги ТМЭК томонидан ўзгартирилса, жавобгарлик кўрикдан ўтувчи доимий рўйхатда турадиган ТМЭК зиммасига юклатилади.

"Саҳоват" ва "Мурувват" уйлари, шунингдек мажбурий даволанишда бўлган шахслар тегишли ТМЭКларда кўрикдан ўтказиладилар. Кўрикдан ўтувчиларнинг ҳужжатлари, ушбу муассасалар жойлашган ҳудуддаги ТМК томонидан расмийлаштирилади ва тегишли ТМЭКга тақдим қилинади.

8. Ногиронлик сабабларини белгилаш учун асос бўладиган қуйидаги қўшимча ҳужжатлар тақдим этилиши мумкин:

"меҳнатда майибланиш" сабабини белгилаш учун - меҳнат мажбуриятини бажариш билан боғлиқ бахтсиз ҳодиса ва ишлаб чиқаришда соғлиққа етказилган бошқа хил шикастлар тўғрисида далолатнома;

"касб касаллиги" сабабини белгилаш учун - қонунчилик ҳужжатларига мувофиқ махсус ваколатли соғлиқни сақлаш муассасасининг хулосасидан (касаллик тарихидан) кўчирма;

"болаликдан ногиронлик" сабабини белгилаш учун - ТМКнинг ногирон болага бериладиган тиббий хулосаси ёки 18 ёшгача бўлган даврда ногиронликка олиб келган касалликка чалинганлигини тасдиқловчи даволаш-профилактика муассасасининг касаллик тарихидан (амбулатор картадан) кўчирма;

"Чернобиль АЭСдаги ҳалокат туфайли майибланганлик ёки касалланганлик" сабабини белгилаш учун - ногиронликка олиб келган касалликнинг Чернобиль АЭСдаги ҳалокатни бартараф қилиш билан боғлиқлиги тўғрисидаги Республика экспертлари кенгашининг хулосаси ва кўрикдан ўтувчининг нурланиш зонасида (ҳудудида) бўлганлиги тўғрисида маълумотлар кўрсатилган ҳарбий гувоҳномаси;

"фронтда бўлиш билан боғлиқ касаллик", "ҳарбий хизмат мажбуриятларини бажариш чоғида орттирилган касаллик", "ҳарбий хизматни ўташ даврида орттирилган касаллик", "Ўзбекистон Республикаси Қуролли Кучларидаги хизмат билан боғлиқ бўлмаган касаллик", "Ўзбекистон Республикасини ҳимоя қилиш чоғида орттирилган майиблик (яраланиш, шикастланиш, контузия)", "Ўзбекистон Республикаси Қуролли кучларидаги хизмат билан боғлиқ бўлмаган майиблик (яраланиш, шикастланиш, контузия)", "ҳарбий хизмат мажбуриятларини бажариш чоғида орттирилган майиблик (яраланиш, шикастланиш, контузия)", "ҳарбий хизмат мажбуриятларини бажариш билан боғлиқ бўлмаган бахтсиз ҳодиса оқибатида орттирилган майиблик (яраланиш, шикастланиш, контузия)" сабабларини белгилаш учун - Ўзбекистон Республикаси Мудофаа вазирлиги, Ички ишлар вазирлиги ёки Миллий хавфсизлик хизмати марказий ҳарбий тиббий комиссияларининг касаллик тўғрисидаги гувоҳномаси.

9. Ишловчи кўрикдан ўтувчилар меҳнат дафтарчаси нусхасини, ишламайдиган кўрикдан ўтувчилар (уларнинг қонуний вакили) эса қачондан бери ишламаслиги тўғрисидаги маълумот кўрсатилган аризани ТМК орқали тақдим қилади.

10. Тўлиқ расмийлаштирилмаган ҳужжатлар ТМЭКга қабул қилинмайди ва ушбу хато-камчиликларни бартараф этиш учун даволаш-профилактика муассасасига қайтарилади. Бунда ТМЭК бир вақтнинг ўзида эса ўз навбатида ушбу хато-камчиликларни рўйхатга олади.

11. ТМЭКга қабул қилинган ҳужжатлар рўйхатга олингандан сўнг кўрикдан ўтиш санаси ва вақти кўрсатилган ҳолда ТМЭКда кўрикдан ўтиш талони расмийлаштирилади ҳамда ТМК орқали кўрикдан ўтувчига етказилади.

12. ТМЭКга тақдим этилган ҳужжатларни, шу жумладан фуқаролар мурожаатларини рўйхатга олиш учун ТМЭКда тегишли журналлар юритилади.

3-БОБ. КЎРИК ДАЛОЛАТНОМАСИНИ РАСМИЙЛАШТИРИШ

13. Кўрик далолатномаси титул варақасининг 1 - 5-бандлари ТМЭК ҳамшираси томонидан тўлдирилади. Кўрик далолатномасининг қолган бандлари эса ТМЭКнинг врач-экспертлари томонидан расмийлаштирилади.

ТМЭК хулосаси чиқарилгандан сўнг кўрик далолатномасига тузатишлар киритилишига йўл қўйилмайди.

14. ТМЭК хулосасига кўра ногиронлик ва (ёки) касбий меҳнат лаёқатининг йўқотилганлик даражаси белгиланганда, ногиронлик тўғрисида маълумотнома ва (ёки) кўрик далолатномасидан кўчирма расмийлаштирилади.

Агар ТМЭК хулосасига кўра ногиронлик гуруҳи белгиланмаган бўлса, кўрик далолатномасининг хулоса қисмига "ногиронлик гуруҳи белгиланмади" деб ёзиб қўйилади.

15. Кўрикдан ўтувчи охирги тиббий кўрикда белгиланган ногиронлик (касбий меҳнат лаёқатини йўқотилганлик даражаси) муддати тугаган кундан бошлаб беш йилдан ошган муддатда ТМЭКга мурожаат қилса, мурожаат кўрик далолатномасида "бирламчи" деб, агарда ногиронлик (касбий меҳнат лаёқатининг йўқотилганлик даражаси) муддати тугаган кундан бошлаб беш йилдан ошмаган муддатда мурожаат қилса, "қайта" деб кўрсатилади.

16. Биринчи маротаба юборилган кўрикдан ўтувчиларга расмийлаштирилган кўрик далолатномаси ҳамда тақдим этилган ҳужжатларни тикиш учун ТМЭКда кўрик иши очилади.

17. ТМЭК кўригидан ўтган ҳар бир ногиронга Вазирлар Маҳкамасининг 2010 йил 23 декабрдаги 307-сонли қарори билан тасдиқланган Ногиронни реабилитация қилишнинг якка тартибдаги дастури тўғрисидаги низомга асосан ногиронни реабилитация қилишнинг якка тартибдаги дастури ишлаб чиқилади ва кўрик далолатномасининг реабилитация бўйича тавсиялар қисмига ҳамда 088/ҳ-шаклнинг қирқма талонига қайд этилади.

4-БОБ. "ТМЭК" ДАСТУРИДА МАЪЛУМОТЛАР

ҲИСОБИНИ ОЛИБ БОРИШ

18. ТМЭК рўйхатида турувчи ногиронлар, касбий меҳнат лаёқатининг йўқотилганлиги сабабли етказилган зарар учун тўлов пулини олувчилар (бундан буён матнда тўлов пули олувчилар деб юритилади), ногиронлик гуруҳи белгиланмаган шахслар, даволашни охиригача етказиш зарурлиги муносабати билан вақтинча меҳнатга лаёқатсизлик варақаси муддати узайтирилган беморлар ҳисоби ва мониторингини таъминлаш учун ТМЭК хулосалари, шунингдек ногиронлар (тўлов пули олувчилар) миграцияси ва вафот этганлиги тўғрисидаги маълумотлар "ТМЭК" дастурига киритилади.

Кўрикдан ўтувчилар тўғрисидаги маълумотлар кўрикдан ўтказилган кундан бошлаб уч иш кунидан кечиктирмасдан "ТМЭК" дастурига киритилади.

"ТМЭК" дастурига маълумотларни киритиш тегишли ТМЭК врач-эксперти ва ҳамшираси зиммасига юклатилади.

Маълумотларнинг "ТМЭК" дастурига сифатли, ҳаққоний ва тўғри киритилиши бўйича жавобгарлик ТМЭК раиси зиммасига юклатилади.

19. Ҳар бир ТМЭК ўзининг хизмат кўрсатиш ҳудуди бўйича "ТМЭК" дастурига кириш имконига эга. Ногирон (тўлов пули олувчи) доимий яшаш учун Ўзбекистон Республикасининг бошқа ҳудудига кўчиб ўтган бўлса, "ТМЭК" дастурига мазкур ногироннинг (тўлов пули олувчининг) рўйхатда турган ТМЭКдан чиқарилганлиги тўғрисида белги қўйилади ва янги яшаш жойи бўйича тегишли ТМЭК томонидан ногирон (тўлов пули олувчи) тўғрисидаги маълумотлар илгари берилган уникал рақам асосида "ТМЭК" дастурига киритилади.

20. "ТМЭК" дастури бўйича ишларни бошқариш, маълумотлар ҳисобини юритиш, ахборотларни сақлаш ва хавфсизлигини таъминлаш, дастурни ишлаб чиққанлар билан келишилган ҳолда Инспекция томонидан амалга оширилади.

5-БОБ. НОГИРОННИНГ (ТЎЛОВ ПУЛИ ОЛУВЧИНИНГ)

ЯШАШ ЖОЙИ ЎЗГАРГАНЛИГИ МУНОСАБАТИ

БИЛАН КЎРИК ИШИНИ ЮРИТИШ

21. Ногирон (тўлов пулини олувчи) доимий яшаш учун Ўзбекистон Республикаси ҳудуди доирасида бошқа ҳудудга кўчиб ўтган тақдирда, кўрик иши ногироннинг (тўлов пули олувчининг) янги кўчиб ўтган жойидаги ТМЭКнинг мазкур Қоидаларнинг 2-иловасига мувофиқ шаклдаги сўровномаси асосида ТМЭК раисининг имзоси ва муҳр билан тасдиқланган конвертда почта орқали юборилади ёки ногиронга (тўлов пулини олувчига) ёхуд уларнинг қонуний вакилига мазкур Қоидаларнинг 3-иловасига мувофиқ шаклдаги қабул қилиш-топшириш далолатномаси асосида берилади.

Сўровнома ногироннинг (тўлов пулини олувчининг) паспортида янги яшаш жойида рўйхатдан ўтганлиги тўғрисидаги белги асосида берилади.

Кўрик иши ТМЭК сўровномани қабул қилиб олган кундан бошлаб икки иш кунида берилиши (юборилиши) лозим.

Қабул қилиш-топшириш далолатномаси икки нусхада расмийлаштирилади. Бунда унинг бир нусхаси ТМЭКда қолдирилади, иккинчи нусхаси эса кўрик ишига тикилади.

Қуйидагилар қонуний вакил ҳисобланадилар:

яқин қариндошлар (эр, хотин, ота-она, болалар, туғишган ҳамда ўгай ака-ука ва опа-сингиллар, боболар, бувилар, неваралар);

боқувга олувчилар ёки боқувга олинган ўғиллар (қизлар);

васийликка ёки ҳомийликка олувчилар;

нотариал расмийлаштирилган ишончнома асосида бошқа шахслар.

22. Агарда ногирон (тўлов пулини олувчи) Ўзбекистон Республикасининг битта ҳудуди (вилоят) доирасида доимий яшаш учун бошқа туманга (шаҳарга) кўчган тақдирда, сўровнома ва кўрик ишларини қабул қилиш-топшириш бевосита тегишли ТМЭКлар ўртасида амалга оширилади.

23. Кўрик иши ногироннинг (тўлов пулини олувчининг) янги яшаш жойидаги ТМЭКда тегишли журналда рўйхатга олинади.

24. Қабул қилиб олинган кўрик иши ТМЭК врач-экспертлари томонидан ўрганиб чиқилади. Агар ногироннинг (тўлов пули олувчининг) соғлиғи ҳолати ва ҳаёт фаолиятининг чекланиш даражаси ўзгарганлиги аниқланса, ногирон (тўлов пули олувчи) белгиланган тартибда қайта кўрикдан ўтказилади.

25. Ногирон (тўлов пули олувчи) янги яшаш жойидаги ТМЭК томонидан рўйхатга олингандан сўнг мазкур Қоидаларнинг 4-иловасига мувофиқ шаклда икки нусхада рўйхатга олиш тўғрисида маълумотнома икки нусхада расмийлаштирилиб, унинг бир нусхаси Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг тегишли туман (шаҳар) бўлимига тақдим этилади, иккинчи нусхаси эса кўрик ишига тикилади.

26. Ногирон (тўлов пули олувчи) рўйхатда турган ТМЭК томонидан Ўзбекистон Республикаси ҳудудидан ташқарига кўчиб кетаётган ногиронларга (тўлов пули олувчиларга) мазкур Қоидаларнинг 5-иловасига мувофиқ шаклда ногироннинг (тўлов пули олувчининг) асосий индивидуал параметрлар идентификацияси тўғрисидаги хабарнома икки нусхада расмийлаштирилиб, унинг бир нусхаси Ўзбекистон Республикаси Молия вазирлиги ҳузуридаги бюджетдан ташқари Пенсия жамғармасининг тегишли туман (шаҳар) бўлимига юборилади, иккинчи нусхаси эса ТМЭКда қолдирилади.

27. Ногирон (тўлов пули олувчи) ижтимоий (пенсия) таъминоти бўйича халқаро шартномалар тузилмаган давлатларга доимий яшаш учун кўчиб кетган тақдирда, кўрик ишидаги барча ҳужжатлардан нусха берилади. Кўрик ишининг асли ТМЭКда сақланади.

Ногирон (тўлов пули олувчи) доимий яшаш учун Мустақил Давлатлар Ҳамдўстлиги қатнашчилари бўлган давлатларга кўчиб кетган тақдирда, ногирон (тўлов пули олувчи) ёки унинг қонуний вакилига унинг аризаси ва рўйхатдан чиқарилганлиги тўғрисида белги қўйилган паспорт нусхаси асосида кўрик ишининг асли берилади.

28. Ўзбекистон Республикасига доимий яшаш учун бошқа мамлакатдан кўчиб келган фуқаронинг кўрик иши янги яшаш жойи бўйича тегишли ТМЭКга тақдим қилинади.

Ушбу фуқароларни ТМЭК рўйхатига олиш мазкур Қоидаларда белгиланган тартибда амалга оширилади.

6-БОБ. КЎРИК ИШЛАРИНИ ТМЭКда САҚЛАШ

29. Кўрик ишлари ногирон (тўлов пули олувчи) рўйхатда турадиган ТМЭКда сақланади.

Берилган (юборилган) кўрик иши билан боғлиқ ҳужжатлар (сўровнома, қабул қилиш-топшириш далолатномаси) алоҳида йиғма жилдда сақланади.

Кўрик ишларини сақланиши бўйича жавобгарлик ТМЭК раиси ва ҳамшираси зиммасига юклатилади.

30. Объектив сабабларга кўра (ёнғин, сув босиши ва бошқа техноген ва фавқулодда ҳолатларда) кўрик иши йўқолган ёки сақланмаган тақдирда, охирги кўрик далолатномаси дубликат шаклида тикланади.

31. Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси туман (шаҳар) бўлимлари томонидан ҳар ойнинг 10 санасига қадар ўтган ойда вафот этган ногиронлар (тўлов пули олувчилар) рўйхати мазкур Қоидаларнинг 6-иловасига мувофиқ шаклда ТМЭКларга тақдим этилади.

7-БОБ. ЯКУНИЙ ҚОИДАЛАР

32. Кўрик далолатномаларини расмийлаштириш тартиби ва юритилиши бўйича амалга ошириладиган ишларни назорат қилиш Инспекция ва Қорақалпоғистон Республикаси, вилоятлар ва Тошкент шаҳар Бош ТМЭКлари томонидан амалга оширилади.

33. Мазкур Қоидалар Ўзбекистон Республикаси Соғлиқни сақлаш вазирлиги ҳамда Меҳнат ва аҳолини ижтимоий муҳофаза қилиш вазирлиги билан келишилган.

Қоидаларга

1-ИЛОВА

____________- сонли

КЎРИК ДАЛОЛАТНОМАСИ

1. Кўрик бошланган сана ______________

Ўтказилган сана ____________________

Тугатилган сана ____________________

      

8. ТМЭК I шакл бўйича шифр ___________ МКБ 10 бўйича ___________

9. Маълумоти: йўқ, умумий ўрта таълим, ўрта махсус, касб-ҳунар, олий (тагига чизилсин)

18. Касбий малака: етарли, етарли эмас, паст, йўқ (тагига чизилсин)

19. Меҳнат қилишга муносабати: ишни давом эттириш, бошқа енгил ишга ўтиш, иш ҳажмини ва соатини камайтириш, янги касб ўрганиш, янги касб эгаллаш учун ўқиш, ишлаш учун хоҳиш йўқ ва б. (тагига чизилсин)

         

21. Ижтимоий кўникма даражаси: яхши, ўрта, паст, йўқ (тагига чизилсин)

      

        

ЭКСПЕРТ ТЕКШИРИШ НАТИЖАЛАРИ

25. Алоҳида объектив маълумотлар: бўйи ______ см, вазни ______ кг.

26. Вақтинча меҳнатга лаёқатсизлик динамикаси (охирги 12 ойда)

        

          

27. Врач экспертларнинг кўрик натижалари:

   

    

28. Тиббий текшириш натижалари (функционал, лаборатор, рентгенологик ва б.)

29. Клиник - эксперт ташхис:

       

  

      

        

ТМЭК ХУЛОСАСИ

30. Организм функциясининг бузилиш тури:

(психик; тил ва нутқ; сенсор; статодинамик; қон айланиш; нафас олиш; овқат ҳазм бўлиш, ажратиш; қон яратилиш; модда ва энергия алмашиш; ички секреция; иммунитет функциялари; жисмоний майиб-мажруҳлик билан боғлиқ бузилишлар) (тагига чизилсин)

31. Организм функциялари турғун бузилиши (енгил, ўрта, ифодаланган, кучли ифодаланган) ______________________________________ даражада.

32. Ҳаёт фаолияти чекланиш тури ва даражаси:

а) ўз-ўзига хизмат кўрсатиш лаёқати ______________________ даража;

б) мустақил ҳаракатланиш лаёқати ______________________ даража;

в) мўлжал олиш лаёқати ________________________ даража;

г) муомала қилиш лаёқати ________________________ даража;

д) ўз хулқ-атворини назорат қилиш лаёқати _______________ даража;

е) ўқиш, билимларни ўзлаштириш ва такрорлаш, малака ва кўникмаларни эгаллаб олиш лаёқати ________________________ даража;

ж) меҳнат фаолияти билан шуғулланиш лаёқати ___________ даража.

33. Ногиронлик гуруҳи _________________________________________

  

37. Ногиронликнинг даврий муддати: 20____ йил "1" ___________ гача

38. Қайта ТМЭКдан ўтиш муддати: "____" _______________ 20___ йил

     

    

42. Қайта ТМЭК кўригидан ўтаётганлар учун:

42б. ТМЭКка асосли ёки асоссиз юборилган (тагига чизилсин)

43. Расмийлаштирилган ногиронлик тўғрисидаги маълумотнома:

Серияси __________________ тартиб рақами _______________________

44. Расмийлаштирилган кўрик далолатномасидан кўчирма:

(меҳнатда майиб бўлган ва касб касаллигига чалинган кўрикдан ўтувчиларнинг белгиланган касбий меҳнатга лаёқатининг йўқотилиш даражаси)

Серияси __________________ тартиб рақами _______________________

        М.Ў.

Кўрик далолатномаси сифати ва назорат кўрик

натижалари бўйича Бош ТМЭКнинг

ХУЛОСА ВА КЎРСАТМАЛАРИ

       

РЕАБИЛИТАЦИЯ БЎЙИЧА ТАВСИЯЛАР

I. Тиббий реабилитация:

II. Ижтимоий реабилитация:

    

Доимий давлат ижтимоий ёрдамига тавсия ("Мурувват" ва "Саховат" уйи)

         

III. Касбий реабилитация:

Касб-ҳунарга ўқитилишга тавсия, иш жойида, ўрта-махсус, олий ўқув юртларида ва

          

Ишга рационал жойлаштиришга тавсия: оддий меҳнат шароитида, маълум чекланган шароитда, махсус иш шароитида, уй шароитида (тагига чизилсин)

         

Меҳнат жойи учун махсус-техник воситаларни, мосламаларни яратиб беришга тавсия

      

      

Қоидаларга

2-ИЛОВА

______________ вилоят (Республика)

_____-сонли ___________ ТМЭК раисига

СЎРОВНОМА

         

манзилга доимий яшаш учун кўчиб келганлиги сабабли кўрик ишини юборишингизни сўраймиз.

Ногиронлик гуруҳи ___________ сабаби ____________________________ муддати ______________________ йилгача, касбий меҳнат лаёқати йўқотилиш даражаси

     

ТМЭК кўригидан ўтган.

Ногиронлик тўғрисидаги маълумотнома серияси ______ N ____________

Кўрик далолатномасидан кўчирма серияси _______ N ________________

      

                              М.Ў.

Қоидаларга

3-ИЛОВА

ҚАБУЛ ҚИЛИШ-ТОПШИРИШ

ДАЛОЛАТНОМАСИ

"___" _____________ 20___ йил.

ҳужжатни қабул қилиб олувчи, қуйидаги ҳужжатларни қабул қилиш-топшириш тўғрисида ушбу далолатномани туздик.

1. Кўрик иши (кўрик далолатномалари ва мавжуд ҳужжатлар) ___ варақдан иборат.

2. Кўрик ишидаги мавжуд бўлган ҳар бир ҳужжатнинг тўлиқ номи (рўйхат асосида) ёзилади:

1. ____________________________________________________

2. ____________________________________________________

3. ____________________________________________________

4. ____________________________________________________

5. ____________________________________________________

6. ____________________________________________________

7. ____________________________________________________

Топширдим

         

Қоидаларга

4-ИЛОВА

Бюджетдан ташқари Пенсия жамғармаси

______________ туман (шаҳар) бўлимига

РЎЙХАТГА ОЛИШ ТЎҒРИСИДА

МАЪЛУМОТНОМА

(____%) билан "____" ____________ 20___ йилдан ногирон (тўлов пули олувчи) сифатида ________________________________________ _______-сонли ТМЭК рўйхатига олинди.

                          М.Ў.

Топширилган сана "____" ___________ 20___ й.

    

Қабул қилинган сана "____" ____________ 20___ й.

       

Қоидаларга

5-ИЛОВА

Бюджетдан ташқари Пенсия жамғармаси

______________ туман (шаҳар) бўлимига

Ногирон (тўлов пули олувчи)нинг асосий индивидуал

параметрлар идентификацияси тўғрисидаги

ХАБАРНОМА

_________________________ Паспорт серияси _____ N _________________

Яшаш манзили _____________________________________________ ногиронлик гуруҳи _____________ сабаби ______________________________ муддати _____________________________ йилгача, касбий меҳнат лаёқатининг йўқотилиш даражаси

________________ (%) муддати ____________ йилгача

(сўз билан ёзилади)

Ногиронлик тўғрисида маълумотномаси серия _____ N _______________

Кўрик далолатномасидан кўчирма серия ________ N _________________

                         М.Ў.

Топширилган сана "____" ___________ 20___ й.

    

Қабул қилинган сана "____" ____________ 20___ й.

        

Қоидаларга

6-ИЛОВА

______________ вилоят (Республика)

_____-сонли ___________ ТМЭК раисига

Вафот этган ногиронлар (тўлов пули олувчилар)

РЎЙХАТИ

Бюджетдан ташқари Пенсия жамғармаси _________________ туман (шаҳар) бўлими 20_____ йилнинг ______________ ойида вафот этган ногиронлар (тўлов пули олувчилар) рўйхатини юбормоқда

                   М.Ў.

"Ўзбекистон Республикаси қонун ҳужжатлари тўплами",

2015 йил 9 февраль, 5-сон, 62-модда