Олий ва ўрта махсус таълим вазирининг 13.12.2013 й. 470-сон "Олий таълим муассасаларида талабалар билимини назорат қилиш ва баҳолашнинг рейтинг тизими тўғрисидаги низомга ўзгартириш ва қўшимчалар киритиш ҳақида"ги Буйруғи (АВ томонидан 13.12.2013 й. 1981-2-сон билан рўйхатга олинган)

ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

13.12.2013 й.

N 1981-2

ЎЗБЕКИСТОН РЕСПУБЛИКАСИ

ОЛИЙ ВА ЎРТА МАХСУС

ТАЪЛИМ ВАЗИРИНИНГ

13.12.2013 й.

N 470

БУЙРУҒИ

Олий таълим муассасаларида талабалар билимини

назорат  қилиш  ва  баҳолашнинг  рейтинг  тизими

тўғрисидаги низомга ўзгартириш ва қўшимчалар

киритиш ҳақида

Ўзбекистон Республикаси Президентининг 2013 йил 28 июндаги ПҚ-1990-сонли "Юридик кадрларни тайёрлаш тизимини янада такомиллаштириш чора-тадбирлари тўғрисида"ги қарорига (Ўзбекистон Республикаси қонун ҳужжатлари тўплами, 2013 й., 29-сон, 372-модда) мувофиқ, шунингдек олий таълим муассасаларида талабалар билимини назорат қилиш ва баҳолашнинг рейтинг тизимига замонавий ахборот технологияларини янада кенг жорий қилиш мақсадида, БУЮРАМАН:

1. Ўзбекистон Республикаси олий ва ўрта махсус таълим вазирининг 2009 йил 11 июндаги 204-сонли буйруғи (рўйхат рақами 1981, 2009 йил 10 июль) (Ўзбекистон Республикаси қонун ҳужжатлари тўплами, 2009 й., 28-сон, 330-модда) билан тасдиқланган Олий таълим муассасаларида талабалар билимини назорат қилиш ва баҳолашнинг рейтинг тизими тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур буйруқ Ўзбекистон Республикаси Адлия вазирлигида давлат рўйхатидан ўтказилиши лозим ҳамда у расмий эълон қилинган кундан эътиборан кучга киради.

Вазир                                                                                             Б. Ходиев

Буйруққа

ИЛОВА

Олий таълим муассасаларида талабалар билимини

назорат қилиш ва баҳолашнинг рейтинг тизими

тўғрисидаги низомга киритилаётган

ўзгартириш ва қўшимчалар

1. 6-банднинг бешинчи хатбошиси "кенгаши" деган сўздан кейин "ёки олий таълим муассасаси кенгаши" деган сўзлар билан тўлдирилсин.

2. Қуйидаги мазмундаги 6-1-банд билан тўлдирилсин:

"6-1. Назорат турларини ўтказишда холисликни таъминлаш мақсадида талабалар тўғрисидаги маълумотлар уларнинг назорат ишларига олий таълим муассасаси томонидан идентификация коди бериш орқали шифрланиши мумкин.".

3. 8-банд "бўлими" деган сўздан кейин "ёки ўқув-услубий бошқарма" деган сўзлар билан тўлдирилсин.

4. 11-банд қуйидаги мазмундаги бешинчи - саккизинчи хатбошилар билан тўлдирилсин:

"Тошкент давлат юридик университетида рейтинг баллари назорат турлари бўйича қуйидагича тақсимланади:

жорий назоратга - 30 балл;

оралиқ назоратга - 20 балл;

якуний назоратга - 50 балл.".

5. 13-банддаги "дафтарчасига" деган сўз "дафтарчаси ёки талабалар рейтингини ҳисобга олиш электрон тизимига" деган сўзлар билан алмаштирилсин.

6. 21-банд "деканат" деган сўздан кейин "ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма)" деган сўзлар билан тўлдирилсин.

7. 23-банднинг иккинчи хатбошиси "фармойиши" деган сўздан кейин "ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма) ёки ўқув ишлари бўйича проректорнинг рухсатномаси" деган сўзлар билан тўлдирилсин.

8. 24-бандда:

қуйидаги мазмундаги учинчи хатбоши билан тўлдирилсин:

"Тошкент давлат юридик университетида талабанинг семестрда жорий ва оралиқ назорат турлари бўйича тўплаган баллари ушбу назорат турлари умумий балининг 55 фоизидан кам бўлса ёки якуний назорат бўйича тўплаган бали ушбу назорат тури умумий балининг 55 фоизидан кам бўлса, у академик қарздор ҳисобланади.";

учинчи хатбоши тўртинчи хатбоши деб ҳисоблансин;

тўртинчи хатбоши қуйидаги таҳрирда баён этилсин:

"Академик қарздор талабаларга семестр тугаганидан кейин (баҳорги семестр натижалари бўйича эса, талабаларнинг ёзги таътили ҳамда профессор-ўқитувчиларнинг меҳнат таътилидан сўнг) қайта ўзлаштириш учун бир ой муддат берилади. Шу муддат давомида фанни ўзлаштира олмаган талаба факультет декани ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма) бошлиғининг тавсиясига кўра белгиланган тартибда ректорнинг буйруғи билан талабалар сафидан четлаштирилади.".

9. 25-банддаги "деканига" ва "деканининг" деган сўзлар тегишлича "декани ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма) бошлиғига" ва "декани ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма) бошлиғининг" деган сўзлар билан алмаштирилсин.

10. 27-банддаги "дафтарчасининг" деган сўз "дафтарчаси ёки талабалар рейтингини ҳисобга олиш электрон тизимининг" деган сўзлар билан алмаштирилсин.

11. 29-банд қуйидаги мазмундаги хатбоши билан тўлдирилсин:

"Талабалар рейтингини ҳисобга олиш электрон тизими жорий этилган олий таълим муассасаларида талабаларнинг фан бўйича рейтинги рейтинг қайдномаси ва ушбу тизимга қайд этилади.".

12. 32-банд "деканат" деган сўздан кейин "ёки факультет тузилмаси бўлмаган олий таълим муассасаларида ўқув бўлими (ўқув-услубий бошқарма)" деган сўзлар билан тўлдирилсин.

13. Ушбу ўзгартириш ва қўшимчалар Ўзбекистон Республикаси Вазирлар Маҳкамаси ҳузуридаги Давлат тест маркази, Ўзбекистон Республикаси Халқ таълими вазирлиги, Соғлиқни сақлаш вазирлиги, Маданият ва спорт ишлари вазирлиги, Қишлоқ ва сув хўжалиги вазирлиги, Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси, Ўзбекистон Бадиий академияси, "Ўзбекистон темир йўллари" ДАК, Давлат солиқ қўмитаси, Ташқи ишлар вазирлиги ва Навоий кон-металлургия комбинати ДК билан келишилган.

"Ўзбекистон Республикаси қонун ҳужжатлари тўплами",

2013 йил 16 декабрь, 50-сон, 659-модда