Ўзбекистон Республикаси Вазирлар Маҳкамасининг 23.04.2002 й. 136-сон "2002 йил бошоқли дон экинлари ҳосилини йиғиштириб олишга доир ташкилий чора-тадбирлар тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

23.04.2002 й.

N 136

2002 ЙИЛ БОШОҚЛИ ДОН ЭКИНЛАРИ

ҲОСИЛИНИ ЙИҒИШТИРИБ ОЛИШГА

ДОИР ТАШКИЛИЙ ЧОРА-ТАДБИРЛАР

ТЎҒРИСИДА

Бошоқли дон экинлари ҳосили ўз вақтида ва сифатли йиғиштириб олинишини ҳамда давлат ресурслари учун дон сотиш бўйича контрактация шартномалари бажарилишини таъминлаш мақсадида Вазирлар Маҳкамаси ҚАРОР ҚИЛАДИ:

1. Дон ҳосилини ўз вақтида ва сифатли йиғиштириб олишни ташкил этиш ва амалга ошириш учун шахсий жавобгарлик Қорақалпоғистон Республикаси Вазирлар Кенгаши раиси, вилоятлар ҳокимлари, Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси ва унинг машина-трактор парклари ҳудудий бирлашмалари раҳбарлари зиммасига юклансин.

2. Ўзбекистон Республикаси Қишлоқ ва сув хўжалиги вазирлиги, "Ўздонмаҳсулот" давлат-акциядорлик корпорацияси, "Ўзагромашсервис" уюшмаси, Қорақалпоғистон Республикаси Вазирлар Кенгаши ва вилоятлар ҳокимликлари:

жорий йилнинг 15 майигача дон ўриш комбайнлари, дон ташувчи транспорт воситалари тайёрланишини ҳамда уларнинг "Ўздавтехназорат" ва Йўл ҳаракати хавфсизлиги бош бошқармаси инспекторларининг далолатномалари бўйича комиссия орқали қабул қилиб олинишини, шунингдек хўжаликлардаги дон хирмонлари тайёрланишини тугалласинлар, донни қабул қилиш майдончаларини, дон тозалаш қурилмалари ва бошқа донни дастлабки қайта ишлаш воситаларини тузатсинлар;

Қорақалпоғистон Республикаси ва вилоятлар бўйича комбайнларнинг, шу жумладан юқори унумли "Кейс" ва "Клаас", "Нью-Холланд" комбайнлари ҳосил ўрим-йиғимида 1-иловага мувофиқ миқдорда қатнашишини таъминласинлар;

ҳамма жойда комбайнларнинг гуруҳ бўлиб ишлашини ташкил этсинлар, ҳар бир гуруҳга транспорт, техник хизмат кўрсатиш ва ёнилғи қуйиш воситаларини бириктирсинлар. Дон етилиши муддатлари ҳисобга олинган ҳолда гуруҳларнинг ҳаракат қилиш йўналишлари ишлаб чиқилсин;

техниканинг ишга яроқли ҳолда бўлишини таъминлаш учун эҳтиёт қисмлар ва тузатиш материалларининг зарур захирасини яратсинлар;

дон янчиб олиниши ва унинг кирим қилиниши устидан назоратни таъминлаш учун ҳосил эксперт баҳоланишини ҳамда ҳар бир дала бўйича тегишли далолатномалар тузилишини бошоқли дон экинларини йиғиштириб олиш бошлангунгача тугалласинлар. Дон ҳосилдорлигининг прогноз ва амалдаги кўрсаткичлари ўртасида асосланмаган фарқ пайдо бўлган тақдирда айбдор шахсларни жавобгарликка тортиш чора-тадбирлари кўрилсин;

дон хўжаликлар томонидан албатта дастлаб тозаланган, ифлослиги ва намлиги стандарт нормативлардан ортиқ бўлмаган ҳолда тайёрлов пунктларига етказиб берилишини таъминласинлар;

Ўзбекистон Республикаси Молия вазирлиги билан келишган ҳолда бир ҳафта муддатда операторлар, транспорт воситалари ҳайдовчилари ва ўрим-йиғимда, донни тозалаш ва ташишда, техникага хизмат кўрсатишда банд бўлган бошқа ходимлар меҳнатига иш унумига ва ҳосил ўрим-йиғими сифатига қараб ҳақ тўлаш ва моддий рағбатлантиришга доир тавсияларни ишлаб чиқсинлар ва хўжаликларга етказсинлар;

меҳнатга маҳсулот билан ҳақ тўлаш ҳисобига дон беришни фақат "Ўздонмаҳсулот" корпорацияси дон қабул қилиш корхоналарига дон сотиш бўйича шартнома мажбуриятлари бажарилгандан, уруғлик фонди ғамлангандан ва маҳсулот кирим қилингандан кейин амалга оширсинлар.

3. "Ўздонмаҳсулот" корпорацияси:

озиқ-овқатбоп доннинг давлат захирасини 2002 йилга тасдиқланган дон балансига қатъий мувофиқ миқдорда янгиласин, унинг Ўзбекистон Республикаси Вазирлар Маҳкамасининг 2000 йил 20 майдаги 209-33-сон қарорида белгиланган дон маҳсулотлари корхоналарида алоҳида сақланишини таъминласин;

элеваторлар ва омборлар, шунингдек дон маҳсулотлари фумигантлар билан ўз вақтида зарарсизлантирилишини таъминласин.

4. "Ўзқишлоқхўжаликмаш-холдинг" холдинг компанияси ва "Ўзагромашсервис" уюшмаси комбайнларга ва бошқа техникага хизмат кўрсатишда амалий ёрдам бериш учун донни йиғиштириб олиш даврида 2-иловага мувофиқ корхоналарни йирик дон етиштирувчи туманларга шартнома асосида бириктириб қўйсинлар.

5. Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Қишлоқ ва сув хўжалиги вазирлиги, "Ўзагромашсервис" уюшмаси:

доннинг комбайнлардан хирмонгача ва дон қабул қилиш пунктларигача ташишнинг топшириқда белгиланган ҳажмлари бажарилишини таъминлайдиган миқдорда 3-иловага мувофиқ донни ташиш учун юк автомобиллари, тиркамали транспорт тракторлари қўйилишини таъминласинлар;

зарурат бўлганда дон ташишга Ўзбекистон Республикаси Мудофаа вазирлиги ҳамда бошқа вазирликлар, идоралар ва ташкилотларнинг автотранспортини шартнома асосида жалб этсинлар.

Белгилаб қўйилсинки, хўжаликлар томонидан донни дон қабул қилиш пунктларига ташиш бўйича транспорт харажатлари "Ўздонмаҳсулот" корпорацияси томонидан тўланади.

6. Ўзбекистон Республикаси Қишлоқ ва сув хўжалиги вазирлиги "Ўздавдонинспекция", "Ўздонмаҳсулот" корпорацияси, Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда хўжаликларнинг ўзлари етиштирган ҳосилдан Вазирлар Маҳкамасининг 2001 йил 14 сентябрдаги 373-сон қарорида белгиланган миқдорларда уруғлик ғамлашини ташкил этсин ҳамда уруғлик тайёрлаш сифати устидан кундалик назорат ўрнатсин.

7. 2002 йил бошоқли дон экинлари ҳосилини ўз вақтида ва сифатли йиғиштириб олиш ишларини ташкил этиш учун 4-иловага мувофиқ таркибда Ишчи комиссия тузилсин.

Қорақалпоғистон Республикаси Вазирлар Кенгаши раиси ва вилоят ҳокимлари раҳбарлигида республиканинг барча минтақаларида шундай комиссиялар ташкил этилсин.

Ишчи комиссия (И.Ҳ.Жўрабеков):

бошоқли дон экинлари ҳосили уюшқоқлик билан йиғиштириб олиниши ишларининг бажарилишини мунтазам ўрганиб борсин;

Ишчи комиссия мажлисларида ҳудудий штаблар, республика вазирликлари ва идоралари раҳбарларининг ҳосилни уюшқоқлик билан йиғиштириб олиш бўйича улар томонидан олиб борилаётган ишлар тўғрисидаги ҳисоботларини эшитишни амалиётга киритсин.

8. 2002 йилда бошоқли дон экинлари ҳосилини йиғиштириб олиш даврида йўлларда ҳаракатланиш хавфсизлигини таъминлаш, ёнғинлар келиб чиқишининг олдини олиш ҳамда доннинг талон-торож қилиниши ва нобуд бўлишига йўл қўймаслик мақсадида:

Ўзбекистон Республикаси Ички ишлар вазирлиги жорий йилнинг 1 июнидан бошлаб Ички ишлар вазирлиги таълим муассасаларининг тингловчилари ва курсантларидан 2200 кишини 5-иловага мувофиқ вилоятлар ички ишлар бошқармалари ихтиёрига юборсин;

"Ўзбекистон темир йўллари" давлат-акциядорлик компанияси, "Тошшаҳарйўловчитранс" давлат уюшмаси Ички ишлар вазирлиги буюртманомалари бўйича тингловчилар ва курсантларни вақтинча бўлиш жойига олиб бориш ҳамда ҳосил йиғиштириб олингандан кейин уларни қайтариб олиб келиш учун зарур миқдордаги транспорт воситалари ажратилишини таъминласинлар. Тингловчилар ва курсантларни ташиш билан боғлиқ транспорт харажатлари "Ўзбекистон темир йўллари" давлат-акциядорлик компанияси ва "Тошшаҳарйўловчитранс" давлат уюшмаси ҳисобидан қопланади;

Жиззах, Қашқадарё, Самарқанд, Сирдарё, Сурхондарё ва Тошкент вилоятлари ҳокимликлари тингловчилар ва курсантларни вақтинча яшаш жойлари, озиқ-овқат, уларни ташиш учун транспорт ва ёнилғи-мойлаш материаллари билан таъминласинлар;

Ўзбекистон Республикаси Ички ишлар вазирлиги Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда донни ўриб-йиғиб олиш жойларида, дон хирмонларида ва донни қабул қилиб олиш пунктларида кеча-кундуз ишлайдиган назорат постлари ташкил қилсинлар;

Ўзбекистон Республикаси Соғлиқни сақлаш вазирлиги юборилаётган тингловчилар ва курсантларга тиббий хизмат кўрсатилишини, улар яшаётган жойлардаги санитария ҳолати кундалик назорат қилинишини таъминласин. "Дори-дармон" давлат-акциядорлик жамияти Ички ишлар вазирлигига сотиш учун зарур миқдорда дори-дармонлар ва бошқа даволаш воситалари ажратсин.

9. "Ўзбекнефтгаз" миллий холдинг компанияси, "Ўзнефтмаҳсулот" акциядорлик компанияси ҳосилни йиғиштириб олиш даврида хўжаликларга, машина-трактор паркларига ва ҳосилни йиғиштириб олиш ва ташиш билан банд бўлган бошқа ташкилотларга ёнилғи-мойлаш материаллари белгиланган лимитлар бўйича узлуксиз берилишини таъминласинлар, "Кейс", "Клаас" ва "Нью-Холланд" компанияларида ишлаб чиқарилган комбайнлар ва тракторлар учун мой етказиб берилишига алоҳида эътиборни қаратсинлар.

10. Ўзбекистон Республикаси Молия вазирлиги ҳузуридаги Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси:

2002 йил дон ҳосили учун ҳисоб-китоб қилиш учун маблағ ажратишда ҳосилни йиғиштириб олиш учун республиканинг бошқа минтақаларидан жалб қилинган "Кейс" ва "Класс" комбайнлари хизмати, дон ташиш бўйича автотранспорт хизматлари, шунингдек "Ўзқишлоқхўжаликмаш-холдинг" холдинг компанияси, "Ўзагромашсервис" уюшмаси ва донни ўриб-йиғиб олиш мавсумига техник ёрдам кўрсатувчи бошқа ташкилотларнинг корхоналари хизматлари учун ҳақ тўлаш харажатларини назарда тутсин;

"Ўздонмаҳсулот" корпорацияси билан биргаликда топширилган дон учун хўжаликлар билан ўз вақтида ҳисоб-китоб қилинишини таъминласин.

11. "Пахта-банк", "Ғалла-банк" ва бошқа хизмат кўрсатувчи тижорат банкларига хўжаликлар ва машина-трактор парклари, автохўжаликларнинг дон ўриш-йиғиш мавсуми қатнашчиларига ҳар 5 кунда иш ҳақи тўлаш учун нақд пулга бўлган эҳтиёжини Давлат эҳтиёжлари учун харид қилинадиган қишлоқ хўжалиги маҳсулотларининг ҳисоб-китоб жамғармаси томонидан молиялаштириладиган маблағлар ҳисобига тўлиқ ҳажмда таъминлаш тавсия қилинсин.

12. Дон ташишни амалга оширувчи темир йўл ва автомобиль транспорти хизматлари учун ўз вақтида ҳисоб-китоб қилишни таъминлаш мақсадида 2002 йил дон ҳосилини ташиш даври учун жорий йилнинг 1 ноябригача "Ўздонмаҳсулот" корпорацияси тизими корхоналари учун, транспорт харажатларини ҳисобга олган ҳолда бевосита ишлаб чиқариш фаолияти билан боғлиқ долзарб эҳтиёжларга пул тушумидан ажратмалар ставкаси, истисно тариқасида, 15 фоизгача миқдорда белгилансин.

13. "Ўзагромашсервис" уюшмаси корхоналари қишлоқ хўжалиги техникасини бошоқли дон экинлари ҳосилини йиғиштириб олишга тайёрлаш учун таъмирлаш материаллари олиб келишда божхона тўловлари тўлашдан 6-иловага мувофиқ (божхонада расмийлаштирилганлик йиғимларидан ташқари), шунингдек уларни таъмирлаш корхоналари ва машина-трактор паркларига сотишда қўшилган қиймат солиғи тўлашдан озод қилинсин.

14. Ўзбекистон Республикаси Макроиқтисодиёт ва статистика вазирлиги хўжаликлар томонидан дон етиштириш ва уни сотиш тўғрисидаги статистика ҳисоботларининг тўғрилигини дон қабул қилиб олиш корхоналари даражасида мунтазам равишда текшириб борсин, аниқланган бузилишлар тўғрисида Вазирлар Маҳкамасига дарҳол ахборот берсин.

15. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Н.С. Юсупов зиммасига юклансин.

Вазирлар Маҳкамасининг Раиси                                                И. Каримов

Вазирлар Маҳкамасининг

2002 йил 23 апрелдаги

136-сон қарорига

1-ИЛОВА

2002 йилда бошоқли дон экинлари ҳосили

ўрим-йиғимида ғалла комбайнларининг

ҚАТНАШИШИ

(дона)

     

Вазирлар Маҳкамасининг

2002 йил 23 апрелдаги

136-сон қарорига

2-ИЛОВА

2002 йил дон ҳосилини ўриб-йиғиб олиш

даврида "Ўзқишлоқхўжаликмаш-холдинг"

компанияси ва "Ўзагромашсервис" уюшмаси

корхоналарини дон экувчи йирик туманларга

бириктириб қўйиш

Вазирлар Маҳкамасининг

2002 йил 23 апрелдаги

136-сон қарорига

3-ИЛОВА

2002 йилги бошоқли дон экинлари ҳосилини

ташиш учун жалб қилинадиган транспорт

воситалари сони

(дона)

Вазирлар Маҳкамасининг

2002 йил 23 апрелдаги

136-сон қарорига

4-ИЛОВА

2002 йил бошоқли дон экинлари ҳосилини

ўриб-йиғиб олишни уюшқоқлик билан

ўтказиш бўйича Ишчи комиссия

ТАРКИБИ

Вазирлар Маҳкамасининг

2002 йил 23 апрелдаги

136-сон қарорига

5-ИЛОВА

2002 йил бошоқли дон экинлари ҳосили

ўрим-йиғимига жалб этиладиган Ўзбекистон

Республикаси Ички ишлар вазирлиги таълим

муассасаларининг тингловчилари ва курсантлари

ТАҚСИМОТИ

Вазирлар Маҳкамасининг

2002 йил 23 апрелдаги

136-сон қарорига

6-ИЛОВА

2002 йилда бошоқли дон экинлари

ҳосили ўрим-йиғимига қишлоқ хўжалиги

техникасини тайёрлаш учун келтириладиган

таъмирлаш материаллари

РЎЙХАТИ