Ўзбекистон Республикаси Вазирлар Маҳкамасининг 29.09.2004 й. 453-сон "Ўзбектелеком" акциядорлик компаниясини хусусийлаштиришга доир қўшимча чора-тадбирлар тўғрисида"ги Қарори

ЎЗБЕКИСТОН РЕСПУБЛИКАСИ

ВАЗИРЛАР МАҲКАМАСИНИНГ

ҚАРОРИ

29.09.2004 й.

N 453

"ЎЗБЕКТЕЛЕКОМ" АКЦИЯДОРЛИК

КОМПАНИЯСИНИ ХУСУСИЙЛАШТИРИШГА

ДОИР ҚЎШИМЧА ЧОРА-ТАДБИРЛАР ТЎҒРИСИДА

[Кўчирма]

Телекоммуникация соҳасида бошқарув тизимини янада такомиллаштириш, телекоммуникация миллий тармоқларини ривожлантириш ва унинг барқарор ишлаши бўйича ягона давлат сиёсатини амалга оширишни таъминлаш, ахборот хавфсизлигига риоя қилиниши устидан назоратни кучайтириш мақсадида Вазирлар Маҳкамаси ҚАРОР ҚИЛАДИ:

1. Ўзбекистон Республикаси Давлат мулки қўмитаси, Ўзбекистон алоқа ва ахборотлаштириш агентлиги, шунингдек "Ўзбектелеком" акциядорлик компанияси акциядорларининг "Ўзбектелеком" акциядорлик компанияси акциялар пакетларини жойлаштиришни тартибга солиш тўғрисидаги таклифига розилик берилсин.

"Ўзбектелеком" акциядорлик компанияси акциялари пакетларини жойлаштиришнинг қуйидаги тартиби белгилансин:

давлат мулкида сақланадиган улуш - 45 фоиз;

эркин сотишга мўлжалланган улуш - 55 фоиз, шу жумладан хорижий инвесторга сотиш учун - 49 фоиз. Бунда компания акциялар пакетининг илгари мустақил жойлаштирилган 6 фоиз миқдоридаги улуш Ўзбекистон Республикаси резидентлари - юридик ва жисмоний шахсларда сақлаб қолинсин.

2. "Ўзбектелеком" акциядорлик компаниясини хусусийлаштиришда, унда қонун ҳужжатларида белгиланган тартибда телекоммуникацияларнинг халқаро тармоқларига, шу жумладан "IP-телефонии" технологиясини қўллаган ҳолда чиқишни ташкил этишга алоҳида ҳуқуқлар сақланиб қолиниши маълумот учун қабул қилинсин.

Тегишли лицензиялар асосида ўз фаолиятини амалга оширувчи операторлар ва провайдерлар, фақат "Ўзбектелеком" акциядорлик компанияси техник воситалари орқали телекоммуникацияларнинг халқаро тармоқларига чиқиш ҳуқуқига эгадир.

3. Вазирлар Маҳкамасининг "Ўзбектелеком" акциядорлик компанияси фаолиятини ташкил этиш масалалари тўғрисида" 2000 йил 30 июндаги 253-сон қарорининг 3-банди ўз кучини йўқотган деб ҳисоблансин.

4. Ўзбекистон Республикаси Адлия вазирлиги Ўзбекистон алоқа ва ахборотлаштириш агентлиги билан биргаликда бир ой муддатда амалдаги қонун ҳужжатларига мазкур қарордан келиб чиқадиган ўзгартиришлар ва қўшимчалар тўғрисида таклифлар тайёрласин ва Вазирлар Маҳкамасига киритсин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари А.Н. Арипов ва Р.С. Азимов зиммасига юклансин.

Вазирлар Маҳкамасининг Раиси                                                 И. Каримов

"Ўзбекистон Республикаси қонун ҳужжатлари тўплами", 2004 йил, 38-сон, 428-модда.