Ўзбекистон Республикаси Президентининг 24.11.2006 й. ПҚ-515-сон "2007 йилда қишлоқ хўжалигини минерал ўғитлар билан таъминлаш чора-тадбирлари тўғрисида"ги Қарори

ЎЗБЕКИСТОН РЕСПУБЛИКАСИ

ПРЕЗИДЕНТИНИНГ

ҚАРОРИ

24.11.2006 й.

N ПҚ-515

2007 ЙИЛДА ҚИШЛОҚ ХЎЖАЛИГИНИ

МИНЕРАЛ ЎҒИТЛАР БИЛАН ТАЪМИНЛАШ

ЧОРА-ТАДБИРЛАРИ ТЎҒРИСИДА

Республика қишлоқ хўжалигини минерал ўғитлар билан таъминлаш ва етказиб бериладиган минерал ўғитлар учун тўлов тизимини такомиллаштириш, шунингдек экспортга етказиб беришни кенгайтириш мақсадида:

1. 2007 йилда минерал ўғитлар ишлаб чиқариш ва тақсимлаш баланслари 1-3-иловаларга* мувофиқ тасдиқлансин.

2. "Ўзкимёсаноат" ДАК:

2007 йил давомида "Қишлоқхўжаликкимё" ҳудудий акциядорлик жамиятлари томонидан давлат эҳтиёжлари учун харид қилинадиган қишлоқ хўжалиги маҳсулотлари ишлаб чиқаришга мўлжалланган минерал ўғитларни қишлоқ хўжалиги товар ишлаб чиқарувчиларига минерал ўғитлар солишнинг агротехник муддатларига ҳамда тузилган шартномалар ва ўғитларни етказиб бериш жадвалига риоя қилган ҳолда 4-иловага мувофиқ сотилишини таъминласин;

Ўзбекистон Республикаси Қишлоқ ва сув хўжалиги вазирлиги билан биргаликда 2007 йил давомида қишлоқ хўжалиги кооперативлари (ширкатлари)ни фермер хўжаликларига айлантириш жараёнида давлат эҳтиёжлари учун қишлоқ хўжалиги маҳсулотлари ишлаб чиқаришга етказиб бериладиган минерал ўғитлар ҳажми бўлиш ведомостларига мувофиқ қайта тақсимланишини таъминласин.

3. "Ўзкимёсаноат" ДАК, "Қишлоқхўжаликкимё" ҳудудий АЖлари 2007 йилда давлат эҳтиёжлари учун қишлоқ хўжалик товар ишлаб чиқарувчиларига шартнома мажбуриятларини бажариши учун мўлжалланган минерал ўғитнинг белгиланган ҳажмлари ҳар бир етказиб бериладиган маҳсулот қисми ҳақининг 75 фоизини олдиндан тўлаш шарти билан сотилишини таъминласин, узил-кесил ҳисоб-китоб эса маҳсулот тўлиқ етказиб берилганидан сўнг 60 кун мобайнида амалга оширилсин.

4-6. Махфий.

7. Ўзбекистон Республикаси Иқтисодиёт вазирлиги "Ўзкимёсаноат" ДАК билан биргаликда 2007 йил учун минерал ўғитлар ишлаб чиқариш ва тақсимлаш балансларининг тасдиқланган параметрлари бажарилиши, шунингдек етказиб берилган маҳсулот учун ҳисоб-китоб қилиниши устидан доимий мониторингни амалга оширсин ва ҳисобот ойидан кейинги ойнинг 10 кунидан кечиктирмай Вазирлар Маҳкамасига ахборот тақдим этиб турсин.

8. Ўзбекистон Республикаси Президентанинг "2006 йилда қишлоқ хўжалигини минерал ўғитлар билан таъминлаш чора-тадбирлари тўғрисида" 2005 йил 23 декабрдаги ПҚ-243-сонли қарорининг 3-банди ўз кучини йўқотган деб ҳисоблансин.

9. Мазкур қарорнинг ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклансин.

Ўзбекистон Республикаси Президенти                                   И. Каримов

*) Иловалар рус тилидаги матнда берилган.