Кексалар ва ногиронлиги бўлган шахсларга ижтимоий хизматлар ва ижтимоий ёрдам кўрсатиш, шунингдек ижтимоий хизматларнинг якка тартибдаги дастурини шакллантириш ва амалга ошириш тартиби тўғрисида Низом (ЎзР ВМ 10.08.2015 й. 237-сон қарорига 2-илова)

Вазирлар Маҳкамасининг

2015 йил 10 августдаги

237-сон қарорига

2-ИЛОВА

Кексалар ва ногиронлиги бўлган шахсларга ижтимоий

хизматлар ва ижтимоий ёрдам кўрсатиш, шунингдек

ижтимоий хизматларнинг якка тартибдаги дастурини

шакллантириш ва амалга ошириш тартиби тўғрисида

НИЗОМ

I. УМУМИЙ ҚОИДАЛАР

1. Ушбу Низом кексалар ва ногиронлиги бўлган шахсларга ижтимоий хизматлар ва ижтимоий ёрдам кўрсатиш, шунингдек ижтимоий хизматларнинг якка тартибдаги дастурини шакллантириш ва амалга ошириш тартибини белгилайди.

2. Ушбу Низом мақсадларида қуйидаги асосий тушунчалардан фойдаланилади:

ижтимоий хизматларнинг якка тартибдаги дастури - ёлғиз яшайдиган ҳамда ёлғиз кексалар ва ногиронлиги бўлган шахсларнинг яшаш ҳолатини баҳолаш асосида ишлаб чиқиладиган, ижтимоий хизматларнинг ва ижтимоий ёрдам бўйича хизматлар рўйхатини, уларнинг ҳажмларини, уларни кўрсатишнинг даврийлигини, шарт-шароитлари ва муддатларини, шунингдек масъул шахсларни, шу жумладан, ёлғиз яшайдиган ҳамда ёлғиз кекса ва ногиронлиги бўлган шахснинг ёки унинг қонуний вакилининг мажбуриятлари тавсифини ўз ичига оладиган ҳужжат;

интернат муассасалари - кексалар ва ногиронлиги бўлган шахсларга ижтимоий хизматлар кўрсатадиган ногиронлиги бўлган шахслар учун "Мурувват" интернат-уйлари, кексалар ва ногиронлиги бўлган шахслар учун "Саховат" интернат-уйлари, Ўзбекистон Республикаси Тиббий-ижтимоий хизматларни ривожлантириш агентлигининг "Уруш ва меҳнат фахрийлари учун республика пансионати;

фуқаролар йиғининг ижтимоий қўллаб-қувватлаш бўйича комиссияси (ижтимоий қўллаб-қувватлаш бўйича комиссия) - қонунчиликка мувофиқ аҳолининг заиф тоифаларини ижтимоий қўллаб-қувватлаш мақсадида ташкил этиладиган фуқаролар йиғини комиссияси, унинг таркибига фуқаролар йиғини раиси, унинг маслаҳатчилари ва масъул котиби, комиссия таркибига сайланган фуқаролар йиғини ҳудудида яшайдиган шахслар, туман (шаҳар) тиббий-ижтимоий хизматларни ривожлантириш бўлимининг ходими, даволаш-профилактика муассасасининг врачи, шунингдек, зарурат бўлганда, туман (шаҳар) давлат солиқ инспекциясининг, туман (шаҳар) ҳокимлиги молия бўлимининг вакиллари ва ички ишлар органларининг профилактика бўйича инспектори киради;

ўзгалар парваришига муҳтож бўлган ёлғиз яшайдиган кексалар ва ногиронлиги бўлган шахслар (ёлғиз яшайдиган кексалар ва ногиронлиги бўлган шахслар) - ёлғиз яшайдиган ёки кексалар ва ногиронлиги бўлган шахслар, вояга етмаган болалар ёхуд қамоқда ва жазони ўташ муассасаларида, узоқ муддат даволанишда бўлган шахслар билан бирга яшайдиган ўзгалар парваришига муҳтож бўлган пенсия ёшидаги шахслар (60 ёшга етган эркаклар, 55 ёшга етган аёллар) ҳамда I ва II гуруҳ ногиронлари;

ўзгалар парваришига муҳтож бўлган ёлғиз кексалар ва ногиронлиги бўлган шахслар (ёлғиз кексалар ва ногиронлиги бўлган шахслар) - фарзандлари (шу жумладан, асраб олган фарзандлари); вояга етмаган ёки ногирон болалар бундан мустасно, эри (хотини) ва ота-онаси, кексалар ёки ногиронлиги бўлган шахслар бундан мустасно; шунингдек васийлари, ҳомийлари ва суд томонидан кексани ёки ногиронлиги бўлган шахсни парвариш қилиш мажбурияти зиммасига юкланган шахслари бўлмаган ўзгалар парваришига муҳтож бўлган пенсия ёшидаги (60 ёшга етган эркаклар, 55 ёшга етган аёллар) шахслар ҳамда I ва II гуруҳ ногиронлари;

ўзгалар парваришига муҳтож бўлган ёлғиз яшайдиган ҳамда ёлғиз кексалар ва ногиронлиги бўлган шахсларнинг шахсий рўйхати (Шахсий рўйхат) - ёлғиз яшайдиган ёки ёлғиз кексалар ва ногиронлиги бўлган шахслар деб ҳисоблаш тўғрисида туман (шаҳар) ҳокимининг тегишли қарори қабул қилинган шахслар рўйхати;

ижтимоий ёрдам - кексалар ва ногиронлиги бўлган шахсларга бериладиган нафақалар ва бошқа тўловлар, имтиёзлар, натура тарзидаги ёрдам (озиқ-овқат маҳсулотлари, кундалик эҳтиёж гигиена товарлари, реабилитациянинг техник воситалари ва бошқалар);

ижтимоий хизматлар - кексалар ва ногиронлиги бўлган шахсларлар ҳаёти сифатини оширишга, уларга жамият ҳаётида қатнашиш учун бошқа фуқароларга тенг бўлган имкониятлар яратишга ва (ёки) ўзининг базавий ҳаётий эҳтиёжларини мустақил равишда таъминлаш имкониятларини кенгайтиришга йўналтирилган чора-тадбирлар ва хатти-ҳаракатлар комплекси;

ижтимоий хизмат стандарти - ваколатли давлат бошқаруви органлари томонидан ижтимоий хизматлар кўрсатувчиларга нисбатан хизматлар сифатини таъминлаш бўйича белгиланган талаблар, улар хизматлар тавсифини, хизматлар кўрсатиш шарт-шароитларини, муддатларини, ижтимоий хизматларнинг сифати ва натижадорлиги кўрсаткичларини ўз ичига олади;

ижтимоий кўмаклашиш хизматлари - юридик ва жисмоний шахсларни жалб этиш ҳамда уларнинг хатти-ҳаракатларининг келишилганлигини таъминлаш йўли билан кексалар ва ногиронлиги бўлган шахсларнинг ҳуқуқлари, эркинликлари ва қонуний манфаатларини амалга оширишда кўмаклашиш.

3. Ёлғиз яшайдиган ҳамда ёлғиз кексалар ва ногиронлиги бўлган шахсларга ижтимоий хизматлар ва ижтимоий ёрдам кўрсатиш, шунингдек ижтимоий хизматлар кўрсатишнинг якка тартибдаги дастурини шакллантириш ва рўёбга чиқариш ушбу Низомнинг 1-иловасига мувофиқ схема бўйича амалга оширилади.

II. КЕКСАЛАР ВА НОГИРОНЛИГИ БЎЛГАН ШАХСЛАР

УЧУН ИЖТИМОИЙ ХИЗМАТЛАР КЎРСАТИШ

ШАКЛЛАРИ ВА ТУРЛАРИ

4. Кексалар ва ногиронлиги бўлган шахслар учун ижтимоий хизматлар кўрсатиш қуйидаги шаклларда амалга оширилади:

яшаш жойида ижтимоий кўмаклашиш хизматлари ва маслаҳат хизматлари;

хонадондаги ишларига қарашиш хизматлари;

кундузи ва қисқа вақт бўлинадиган муассасалардаги хизматлар;

интернат муассасаларидаги хизматлар.

5. Кексалар ва ногиронлиги бўлган шахслар учун яшаш жойидаги ижтимоий кўмаклашиш хизматлари ва маслаҳат хизматлари тиббий-ижтимоий хизматларни ривожлантириш бўлимлари томонидан кўрсатилади ва қуйидаги хизмат турларини ўз ичига олади:

ижтимоий муҳофаза қилиш ва ижтимоий хизматлар кўрсатиш масалалари бўйича маслаҳатлар бериш, тегишли ташкилотларга юбориш;

соғлиғининг ҳолати бўйича муҳтож бўлган кексалар ва ногиронлиги бўлган шахсларга уларга ҳомийликни белгилашда кўмаклашиш ҳамда ҳомийларнинг ўз вазифаларини бажариши юзасидан назоратни амалга ошириш;

протез-ортопедия буюмлари ва реабилитациянинг техник воситаларини олишда кўмаклашиш;

ўзгалар парваришига муҳтож бўлган ёлғиз яшайдиган кексалар ва ногиронлиги бўлган шахсларга бепул ёки имтиёзли дори-дармонлар билан таъминланишда кўмаклашиш.

6. Ёлғиз яшайдиган ҳамда ёлғиз кексалар ва ногиронлиги бўлган шахсларга уйида парвариш қилиш бўйича ижтимоий хизматлар тиббий-ижтимоий хизматларни ривожлантириш бўлимлари томонидан кўрсатилади ҳамда улар маиший хизмат кўрсатишни, шу жумладан, озиқ-овқат маҳсулотларини, зарур саноат товарларини ва дори-дармонларни сотиб олиш ва уйига етказиб беришни, овқатлар тайёрлашда ва уйни йиғиштириш-тозалаш, гигиена ишларида кўмаклашишни ўз ичига олади.

7. Кундузи ёки қисқа вақт бўлинадиган муассасаларда (ногиронлиги бўлган шахсларни реабилитация қилиш марказларида, ёлғиз кексалар ва ногиронлиги бўлган шахсларнинг мулоқот ва дам олиш марказларида, санаторий-соғломлаштириш муассасаларида кексалар ва ногиронлиги бўлган шахслар учун кўрсатиладиган ижтимоий хизматлар қуйидагиларни ўз ичига олади:

ўз-ўзига хизмат кўрсатиш, мустақил равишда ҳаракатланиш ва мўлжал олиш, реабилитациянинг техник воситаларидан фойдаланиш кўникмаларига ўргатиш;

кексалар ва ногиронлиги бўлган шахсларни ижтимоий интеграциялаш тадбирлари;

қонунчиликка мувофиқ пулли ва пулсиз асосда санаторийда соғломлаштириш.

8. Интернат муассасаларида кексалар ва ногиронлиги бўлган шахслар учун ижтимоий хизматлар кўрсатиш қуйидагиларни ўз ичига олади:

доимий парвиш қилишни таъминлаш, маиший хизмат кўрсатиш, мебеллар, инвентарлар, ётоқхона буюмлари билан жиҳозланган қулай уй-жой бериш, кийим ва пойабзаллар, бошқа кундалик эҳтиёж буюмлари билан таъминлаш, ёшини ва соғлиғини даволашни ҳисобга олган ҳолда оқилона ва парҳез таомлар билан овқатланишини ташкил этиш;

дастлабки тиббий ёрдам кўрсатиш, диспансеризациядан ўтказиш, зарурият бўлганда, ихтисослаштирилган стационарларда даволатиш, тиббий кўрсаткичлар бўйича протез-ортопедия буюмлари, реабилитациянинг техник воситалари билан таъминлаш;

махсус психологик-педагогик ёрдам кўрсатиш, ҳаётий кўникмаларини ривожлантириш;

дам олишини, қизиқишларини шакллантириш ва ривожлантириш учун клуб ва тўгарак ишларини ташкил этиш;

шахсларни интернат муассасаларидан чиқариш ва уларнинг мустақил ҳаёт кечириши ёки оилада яшаши учун шарт-шароитлар яратиш.

9. Кексалар ва ногиронлиги бўлган шахслар ижтимоий хизматлар ва ижтимоий ёрдам кўрсатиш турлари тўғрисидаги ахборот Ўзбекистон Республикаси Тиббий-ижтимоий хизматларни ривожлантириш агентлиги, Бандлик ва меҳнат муносабатлари вазирлиги, Давлат солиқ қўмитаси, Молия вазирлиги, Молия вазирлиги ҳузуридаги Бюджетдан ташқари пенсия жамғармаси, Халқ таълими вазирлиги, Олий ва ўрта махсус таълим вазирлиги ҳамда бошқа манфаатдор вазирликлар ва идоралар томонидан Давлат хизматлари, шакллари ва бланкаларининг ягона реестрига киритилади.

III. КЕКСАЛАР ВА НОГИРОНЛИГИ БЎЛГАН ШАХСЛАР

УЧУН ИЖТИМОИЙ ХИЗМАТЛАР ВА ИЖТИМОИЙ

ЁРДАМ КЎРСАТИШНИ ТАШКИЛ ЭТИШ

10. Кексалар ва ногиронлиги бўлган шахсларга ижтимоий хизматлар кўрсатишда ваколатли давлат бошқаруви органлари томонидан тасдиқланадиган ижтимоий хизматлар стандартларига риоя қилиш мажбурийдир.

11. Давлат бошқаруви органлари, фуқароларни ўзини ўзи бошқариш органлари ва ижтимоий хизматлар кўрсатадиган бошқа ташкилотлар аҳолини кексалар ва ногиронлиги бўлган шахслар учун ижтимоий хизматларнинг шакллари, турлари, шартлари, муддатлари, ҳажмлари, уларни кўрсатиш сифатини назорат қилиш чора-тадбирлари тўғрисида хабардор қилишлари шарт.

12. Ижтимоий хизматлар кўрсатиладиган ва ижтимоий ёрдам оладиган кексалар ва ногиронлиги бўлган шахслар тўғрисидаги ахборот Ўзбекистон Республикаси Тиббий-ижтимоий хизматларни ривожлантириш агентлиги, Бандлик ва меҳнат муносабатлари вазирлиги, Молия вазирлиги томонидан бошқа манфаатдор вазирликлар ва идоралар билан биргаликда ижтимоий хизматлар кўрсатиладиган ва Ижтимоий ёрдам оладиган кексалар ва ногиронлиги бўлган шахсларни ҳисобга олиш бўйича ягона регистрга киритилади. Ижтимоий хизматлар кўрсатиладиган ва ижтимоий ёрдам оладиган кексалар ва ногиронлиги бўлган шахслар тўғрисидаги очиқ маълумотлар вазирликлар ва идораларнинг расмий веб-сайтларида, шунингдек Ўзбекистон Республикасининг давлат интерактив хизматлари ягона порталида жойлаштирилади.

IV. ЁЛҒИЗ ЯШАЙДИГАН ҲАМДА ЁЛҒИЗ КЕКСАЛАР

ВА НОГИРОНЛИГИ БЎЛГАН ШАХСЛАР УЧУН ИЖТИМОИЙ

ХИЗМАТЛАР ВА ИЖТИМОИЙ ЁРДАМ КЎРСАТИШНИ

ТАШКИЛ ЭТИШ

13. Ёлғиз яшайдиган ҳамда ёлғиз кексалар ва ногиронлиги бўлган шахслар ижтимоий хизматлар ва ижтимоий ёрдам билан ижтимоий хизматларнинг якка тартибдаги дастури асосида таъминланадилар.

14. Ижтимоий хизматларнинг якка тартибдаги дастури давлат ва хўжалик бошқаруви органлари, маҳаллий давлат ҳокимияти органлари, фуқароларнинг ўзини ўзи бошқариш органлари ҳамда бошқа ташкилотларнинг ўз ваколатлари доирасида бажариши учун мажбурийдир.

Ижтимоий хизматларнинг якка тартибдаги дастурини шакллантиришда, ушбу Низомнинг 57 - 59-бандларида кўрсатилган ҳолатлардан ташқари, қуйидаги босқичларга риоя қилиш мажбурий ҳисобланади:

ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш;

ёлғиз яшайдиган ҳамда ёлғиз кексалар ва ногиронлиги бўлган шахсларнинг яшаш ҳолатини баҳолаш;

ёлғиз яшайдиган ҳамда ёлғиз кексалар ва ногиронлиги бўлган шахсларни Шахсий рўйхатга киритиш;

ижтимоий хизматларнинг якка тартибдаги дастурини ишлаб чиқиш ва амалга ошириш;

ижтимоий хизматларнинг якка тартибдаги дастурининг мониторингини юритиш ва уни баҳолаш, қайта кўриб чиқиш ва тугаллаш.

15. Ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш, уларнинг яшаш ҳолатини баҳолаш натижалари, шу жумладан, тасдиқлайдиган ҳужжатларнинг кўчириб олинган версиялари, ижтимоий хизматларнинг якка тартибдаги дастури маълумотлари, унинг амалга оширилиши ва унга киритилган тузатишларга доир маълумотлар тўғрисидаги ахборот Ўзбекистон Республикаси Тиббий-ижтимоий хизматларни ривожлантириш агентлигининг автоматлаштирилган ахборот тизимига, шунингдек очиқ маълумотлар қисми Тиббий-ижтимоий хизматларни ривожлантириш агентлигининг расмий веб-сайтига ҳамда Ўзбекистон Республикасининг давлат интерактив хизматлари ягона порталига киритилиши керак.

IV-I. ЁЛҒИЗ КЕКСАЛАР ВА НОГИРОНЛИГИ БЎЛГАН ШАХСЛАРГА

УЙИДА ХИЗМАТ КЎРСАТУВЧИ ИЖТИМОИЙ ХОДИМЛАРНИНГ

ХИЗМАТИНИ ТАШКИЛ ЭТИШ

15-1. Ўзгалар парваришига муҳтож ёлғиз яшайдиган ҳамда ёлғиз кексалар ва ногиронлиги бўлган шахсларга ижтимоий-маиший хизмат кўрсатиш уйида хизмат кўрсатувчи ижтимоий ходимлари томонидан амалга оширилади. Бунда, ўзгаларга ҳавф туғдирадиган юқумли ҳамда руҳий касалликларга чалинган шахсларга уйида ижтимоий-маиший хизмат кўрсатилмайди.

15-2. Уйда хизмат кўрсатувчи ижтимоий ходимларнинг фаолият чегараси туман (шаҳар) тиббий-ижтимоий хизматларни ривожлантириш бўлимлари томонидан аниқланади.

15-3. Уйда хизмат кўрсатувчи ижтимоий ходимлар ўз ишларини ёлғиз фуқароларнинг хоҳишларини инобатга олган ҳолда тузилган ва туман (шаҳар) тиббий-ижтимоий хизматларни ривожлантириш бўлими бошлиғи томонидан тасдиқланган жадвал (режа) асосида ташкил этади.

15-4. Уйда хизмат кўрсатувчи ижтимоий ходим лавозими ижтимоий ёрдам кўрсатиш хизматининг штат жадвалида 1 та лавозим:

қишлоқ жойларида 6-8 нафар ёлғиз фуқарога;

шаҳар жойларида 8-10 нафар ёлғиз фуқарога хизмат кўрсатиш ҳисобида белгиланади.

15-5. Уйда хизмат кўрсатувчи ижтимоий ходимларнинг штатдаги сони туман (шаҳар)да ўзгалар парваришига муҳтож ва ижтимоий ёрдам кўрсатиш хизмати томонидан хизмат кўрсатиладиган мазкур низомнинг 2-бандига кўрсатилган ёлғиз ва ёлғиз яшовчи фуқаролар сонидан келиб чиққан ҳолда белгиланади.

15-6. Уйда хизмат кўрсатувчи ижтимоий ходимлар махсус хўжалик сумкалари (бир йилга битта сумка), халат (бир йилга битта халат) ҳамда хоналарни тозалаш учун инвентарь билан таъминланади.

15-7. Уйда хизмат кўрсатувчи ижтимоий ходимларнинг лавозим-маошлари ижтимоий таъминот ходимлари учун ўрнатилган тартибда тасдиқланган меҳнатга ҳақ тўлаш тариф сеткасига мувофиқ белгиланади.

15-8. Уйда хизмат кўрсатувчи ижтимоий ходимларга йўл ҳақи учун компенсация тўловлари қонунчиликда белгиланган миқдорларда жорий қилинади.

V. ЁЛҒИЗ ЯШАЙДИГАН ҲАМДА ЁЛҒИЗ КЕКСАЛАР

ВА НОГИРОНЛИГИ БЎЛГАН ШАХСЛАРНИ АНИҚЛАШ

16. Ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш фуқароларнинг ўзини ўзи бошқариш органлари ҳамда тиббий-ижтимоий хизматларни ривожлантириш бўлими томонидан кексалар ва ногиронлиги бўлган шахслар тўғрисида қуйидаги жами маълумотларни олиш асосида амалга оширилади:

ёлғиз яшаши;

ёлғиз яшайдиган ҳамда ёлғиз кексалар ва ногиронлиги бўлган шахсларни парвариш қилишни таъминлашга қодир бўлган шахсларнинг йўқлиги:

ёлғиз яшайдиган ҳамда ёлғиз кекса ва ногиронлиги бўлган шахснинг ўзгалар парваришига муҳтожлиги.

17. Ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш:

хонадонларни бирма-бир айланиб чиқиш йўли билан;

жисмоний ёки юридик шахслар томонидан ёзма, оғзаки ёки электрон шаклда берилган маълумотлар асосида;

кексалар ва ногиронлиги бўлган шахсларнинг мустақил равишдаги мурожаатлари асосида амалга оширилади.

18. Хонадонларни бирма-бир айланиб чиқиш ижтимоий қўллаб-қувватлаш бўйича комиссия аъзолари томонидан тиббий-ижтимоий хизматларни ривожлантириш бўлими ходими билан биргаликда ҳар чоракда чоракдан кейинги ойнинг 10-кунигача амалга оширилади. Хонадонларни бирма-бир айланиб чиқишда ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш учун хусусий уй-жой мулкдорлари ширкатлари раисларидан фуқаролар йиғини раисларидан ва у ерда яшайдиганлардан маълумотлар олинади.

Шошилинч ёрдам кўрсатиш зарурлиги ҳамда ёлғиз яшайдиган ҳамда ёлғиз кексалар ва ногиронлиги бўлган шахснинг ҳаёти ва саломатлиги учун хавф мавжудлиги тўғрисида маълумотлар олинган тақдирда тиббий-ижтимоий хизматларни ривожлантириш бўлими ушбу Низомнинг 57 - 59-бандларида белгиланган тартибга мувофиқ хатти-ҳаракатларни амалга оширади.

Хонадонларни бирма-бир айланиб чиқиш натижалари бўйича ушбу Низомнинг 2-иловасига мувофиқ шаклда Ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш бўйича амалга оширилган ишлар тўғрисида далолатнома тузилади.

19. Жисмоний ёки юридик шахслар томонидан берилган маълумотлар олинганда ёки кексалар ва ногиронлиги бўлган шахслар ёзма, оғзаки ёки электрон шаклда мустақил равишда мурожаат қилганда тиббий-ижтимоий хизматларни ривожлантириш бўлими мурожаатни ушбу Низомнинг 3-иловасидаги шакл бўйича Ёлғиз яшайдиган ҳамда ёлғиз кексалар ва ногиронлиги бўлган шахсларга ижтимоий хизматлар ва ижтимоий ёрдам кўрсатиш масалалари бўйича жисмоний ва юридик шахсларнинг мурожаатларини рўйхатдан ўтказиш дафтарида рўйхатдан ўтказиши шарт.

Маълумотларни қабул қилган тиббий-ижтимоий хизматларни ривожлантириш бўлими ходими:

шошилинч ёрдам кўрсатишнинг зарурлигини аниқлаши ва зарурият бўлган тақдирда ушбу Низомнинг 57 - 59-бандларидаги тартибга мувофиқ ҳаракат қилиши;

ариза берувчига ижтимоий хизматлар ва ижтимоий ёрдам кўрсатиш шартлари ҳақида тушунтиришлар бериши, яшаш ҳолатини баҳолаш учун ёлғиз яшайдиган ҳамда ёлғиз кексалар ва ногиронлиги бўлган шахсни бориб кўришнинг зарурлиги тўғрисида хабар қилиши ҳамда бориш санасини белгилаши керак.

Жисмоний шахс ёки ариза берувчи ёхуд унинг қонуний вакили ҳисобланмайдиган юридик шахс мурожаат қилган тақдирда тиббий-ижтимоий хизматларни ривожлантириш бўлими ходими кўрилган чора-тадбирлар тўғрисида мурожаат қилинган кундан бошлаб беш иш куни мобайнида мазкур шахсга хабар қилиши зарур.

Ёлғиз яшайдиган ҳамда ёлғиз кекса ва ногиронлиги бўлган шахс аниқланган кундан бошлаб беш иш кунидан кўп бўлмаган муддатда тиббий-ижтимоий хизматларни ривожлантириш бўлими ходими унинг уйига бориши ҳамда ижтимоий хизматлар ва ижтимоий ёрдам кўрсатиш шартлари тўғрисида уни хабардор қилиши керак. Бунда ёлғиз яшайдиган ҳамда ёлғиз кексалар ва ногиронлиги бўлган шахсга ахборот варақаси берилади, унда хизматлар ва ёрдам кўрсатиш турлари, уларни амалга ошириш қоидалари ва тиббий-ижтимоий хизматларни ривожлантириш бўлими ходимининг боғланиш маълумотлари (ходимнинг исми, фамилияси, отасининг исми, унинг лавозими, телефон рақами) кўрсатилади, шунингдек кекса ва ногиронлиги бўлган шахс ёки унинг қонуний вакили томонидан кекса ёки ногиронлиги бўлган шахснинг ушбу Низомга 4-иловадаги шакл бўйича ижтимоий хизматларнинг якка тартибдаги дастури асосида Ижтимоий хизматлар ва ижтимоий ёрдам кўрсатиш учун Шахсий рўйхатга киритиш тўғрисида ариза беришнинг зарурлиги тўғрисида хабар қилинади. Ушбу Низомнинг 57 - 59-бандларида белгиланган ҳолатларда ариза талаб қилинмайди.

20. Оилада ўзгалар парваришига муҳтож бўлган бир неча кекса ва ногиронлиги бўлган шахс борлиги аниқланган тақдирда Шахсий рўйхатга киритиш тўғрисидаги ариза уларнинг ҳар бири ёки уларнинг қонуний вакиллари томонидан берилади.

21. Кекса ёки ногиронлиги бўлган шахс ижтимоий хизматлар ва ижтимоий ёрдам кўрсатишни рад этган тақдирда унга ахборот варақасида кўрсатилган контактлар бўйича ижтимоий хизматлар ва ижтимоий ёрдам кўрсатиш юзасидан тиббий-ижтимоий хизматларни ривожлантириш бўлимига такрорий мурожаат қилиш мумкинлиги тўғрисида хабар қилинади. Шунингдек унга Ёлғиз яшайдиган ҳамда ёлғиз кексалар ва ногиронлиги бўлган шахсларни аниқлаш бўйича амалга оширишган ишлар тўғрисида далолатномани (хонадонларни бирма-бир айланиб чиқишда аниқланган тақдирда) ёки Ёлғиз яшайдиган ҳамда ёлғиз кексалар ва ногиронлиги бўлган шахсларга ижтимоий хизматлар ва ижтимоий ёрдам кўрсатиш масалалари бўйича жисмоний ва юридик шахсларнинг мурожаатларини рўйхатдан ўтказиш дафтарига рад этишнинг сабабини кўрсатган ҳолда имзо қўйиш тавсия этилади.

VI. ЁЛҒИЗ ЯШАЙДИГАН ҲАМДА ЁЛҒИЗ КЕКСА

ВА НОГИРОНЛИГИ БЎЛГАН ШАХСНИНГ

ЯШАШ ҲОЛАТИНИ БАҲОЛАШ

22. Ёлғиз яшайдиган ҳамда ёлғиз кекса ёки ногиронлиги бўлган шахснинг яшаш ҳолатини баҳолаш (кейинги ўринларда яшаш ҳолатини баҳолаш деб аталади) унинг ёки қонуний вакили томонидан ёзма ёки электрон шаклда бериладиган уни ижтимоий хизматларнинг якка тартибдаги дастури асосида Ижтимоий хизматлар ва ижтимоий ёрдам кўрсатиш учун Шахсий рўйхатига киритиш тўғрисидаги аризаси асосида амалга оширилади.

23. Тиббий-ижтимоий хизматларни ривожлантириш бўлими бошлиғи қуйидагилар учун масъул бўлган ходимни (кейинги ўринларда бўлимнинг масъул ходими деб аталади) тайинлайди:

ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолашни амалга ошириш;

ёлғиз яшайдиган ҳамда ёлғиз кекса ва ногиронлиги бўлган шахсни Шахсий рўйхатга киритиш учун ҳужжатларни тайёрлаш;

ижтимоий хизматларнинг якка тартибдаги дастурини ишлаб чиқиш, амалга ошириш мониторингини юритиш ва қайта кўриб чиқиш (зарурият бўлганда), тугаллаш;

ёлғиз яшайдиган ҳамда ёлғиз кекса ва ногиронлиги бўлган шахсга ижтимоий кўмаклашиш.

Бунда тиббий-ижтимоий хизматларни ривожлантириш бўлимининг масъул ходими тиббий-ижтимоий хизматларни ривожлантириш бўлими ходимларидан тайинланади.

24. Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш ёлғиз яшайдиган ҳамда ёлғиз кекса ва ногиронлиги бўлган шахснинг яшаш жойига боришни, унинг қариндошлари ва яқинлари, тегишли давлат ва нодавлат ташкилотлари билан ўзаро ҳамкорлик қилишини ўз ичига олади. Ўтказилган баҳолаш натижалари Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолашнинг Ўзбекистон Республикаси Вазирлар Маҳкамаси томонидан тасдиқланган шаклида акс эттирилади.

25. Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш ёлғиз яшайдиган ҳамда ёлғиз кекса ёки ногиронлиги бўлган шахс томонидан Ўзбекистон Республикаси Вазирлар Маҳкамаси тасдиқлаган иловага мувофиқ шакл бўйича аризаси берилган кундан бошлаб ўн иш куни мобайнида ўтказилади.

26. Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш тиббий-ижтимоий хизматларни ривожлантириш бўлимининг масъул ходими иштирокида, ижтимоий қўллаб-қувватлаш бўйича комиссия томонидан ўтказилади.

Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш қуйидагиларни назарда тутади:

соғлиғининг ҳолатини баҳолаш;

ўзгалар парваришига муҳтожлигини баҳолаш;

уй-жой-маиший шароитларини баҳолаш;

ижтимоий муҳофаза қилиш чоралари билан таъминланганлигини баҳолаш;

ҳуқуқий жиҳатдан ҳимояланганлигини баҳолаш;

ёлғиз яшайдиган ҳамда ёлғиз кекса ва ногиронлиги бўлган шахснинг мулоқот ва дам олиш соҳасини баҳолаш.

27. Ёлғиз яшайдиган ҳамда ёлғиз кекса ва ногиронлиги бўлган шахснинг соғлиғи ҳолатини баҳолаш ёлғиз яшайдиган ҳамда ёлғиз кекса ва ногиронлиги бўлган шахсдаги мавжуд касалликлар, унинг тиббий хизмат кўрсатишга эҳтиёжларининг қондирилиши, Ўзбекистон Республикаси Вазирлар Маҳкамаси томонидан тасдиқланган Амбулаторияда даволашда дори-дармонлар билан имтиёзли таъминланиш ҳуқуқига эга бўлган шахслар тоифалари рўйхатига мувофиқ дори-дармонлар билан бепул таъминланганликни назарда тутади.

28. Ёлғиз яшайдиган ҳамда ёлғиз кекса ва ногиронлиги бўлган шахснинг ўзгалар парваришига муҳтожлигини баҳолаш унинг ўзгалар ёрдамига боғлиқлик даражасини белгилашни назарда тутади ҳамда ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолашнинг 3-бўлимини тўлдирган ҳолда амалга оширилади.

29. Уй-жой-маиший шароитларини баҳолаш уй-жойнинг хавфсизлиги тўғрисидаги, унинг санитария-гигиеник ҳолати, ёлғиз яшайдиган ҳамда ёлғиз кекса ва ногиронлиги бўлган шахснинг жисмоний имкониятларига мосланганлиги, шу жумладан, марказлаштирилган сув, иссиқлик таъминотининг мавжудлиги тўғрисидаги маълумотларни тўплашни назарда тутади.

30. Ёлғиз яшайдиган ҳамда ёлғиз кекса ва ногиронлиги бўлган шахснинг қонунчиликка мувофиқ кафолатланадиган ижтимоий муҳофаза қилиш чора-тадбирлари билан таъминланганлигини баҳолаш ёлғиз яшайдиган ҳамда ёлғиз кекса ва ногиронлиги бўлган шахс томонидан имтиёзлар, нафақалар ва бошқа тўловлар олишга, протез-ортопедия буюмларини ва реабилитациянинг техник воситаларини олишга, санаторий-соғломлаштириш муассасаларида дам олиш ва соғлиғини яхшилашга ҳамда бошқа ижтимоий муҳофаза чора-тадбирларини олишга бўлган ҳуқуқларининг амалга оширилиши тўғрисидаги маълумотларни тўплашни назарда тутади.

31. Ҳуқуқий муҳофаза қилинганлигини баҳолаш ёлғиз яшайдиган ҳамда ёлғиз кекса ва ногиронлиги бўлган шахсда шахсини белгиловчи ҳужжатларнинг, унинг ижтимоий муҳофаза чора-тадбирларини таъминлашга ҳуқуқларини тасдиқловчи бошқа зарур ҳужжатларнинг мавжудлиги тўғрисидаги, унинг қонунчиликка мувофиқ уй-жойга, бошқа шахслардан ёрдам олишга бўлган ҳуқуқлари тўғрисидаги маълумотларни йиғишни назарда тутади.

32. Ёлғиз яшайдиган ҳамда ёлғиз кекса ва ногиронлиги бўлган шахснинг мулоқот ва дам олиш соҳасини баҳолаш унинг мулоқот ва дам олишга бўлган эҳтиёжларининг қондирилиши, ёлғиз яшайдиган ҳамда ёлғиз кекса ва ногиронлиги бўлган шахсга ҳомийлик қилишни хоҳловчи шахсларни, шунингдек уни ижтимоий қўллаб-қувватлаш имкониятига эга бўлган шахсларни аниқлаш тўғрисидаги маълумотларни тўплашни назарда тутади.

33. Яшаш ҳолатини баҳолашнинг натижалари ушбу Низомнинг 5-иловасига мувофиқ шакл бўйича ижтимоий қўллаб-қувватлаш бўйича комиссиянинг хулосасида акс эттирилади. Комиссиянинг хулосаси унинг барча аъзолари томонидан имзоланади ва фуқароларнинг ўзини ўзи бошқариш органининг ва даволаш-профилактика муассасасининг муҳрлари билан ва тиббий-ижтимоий хизматларни ривожлантириш бўлими бошлиғи томонидан тасдиқланади. Хулосанинг нусхаси ёлғиз яшайдиган ҳамда ёлғиз кекса ва ногиронлиги бўлган шахсга яшаш ҳолатини баҳолаш тугалланган кундан бошлаб беш иш куни мобайнида берилади.

34. Ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолашда қуйидаги ҳужжатлар йиғилади:

ёлғиз яшайдиган ҳамда ёлғиз кекса ва ногиронлиги бўлган шахснинг ёки унинг қонуний вакилининг аризаси;

ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш натижалари бўйича ижтимоий қўллаб-қувватлаш бўйича комиссиянинг хулосаси;

ёлғиз яшайдиган ҳамда ёлғиз кекса ва ногиронлиги бўлган шахс паспортининг нусхаси;

I ёки II гуруҳ ногиронлиги бўлган шахслар учун - ногиронлик тўғрисидаги маълумотноманинг нусхаси;

ёлғиз яшайдиган ҳамда ёлғиз кекса ва ногиронлиги бўлган шахснинг доимий яшаш жойи бўйича рўйхатга олинган (ёки илгари доимий яшаш жойи бўйича рўйхатга олинган) шахслар тўғрисидаги маълумотлардан иборат бўлган жойларда паспортга оид ишларни юритишга ваколатли ходим томонидан берилган маълумотнома.

35. Ёлғиз кекса ва ногиронлиги бўлган шахсни Шахсий рўйхатнинг "ёлғиз кексалар ва ногиронлиги бўлган шахслар" тоифасига киритиш учун унинг вояга етмаган болалари, шунингдек кекса ва ногиронлиги бўлган ҳамда ўзгалар парваришига муҳтож бўлган болалари, эри (хотини) ва ота-онаси мавжуд бўлган тақдирда ушбу Низомнинг 34-бандида кўрсатилган ҳужжатларга қўшимча равишда қуйидаги ҳужжатлар тақдим этилади:

вояга етмаган шахслар учун - туғилганлиги тўғрисидаги гувоҳномаларнинг нусхалари;

I ёки II гуруҳ ногиронлиги бўлган шахслар паспортининг нусхаси, уларнинг ногиронлиги тўғрисидаги маълумотномаларнинг нусхалари, болалар, эр-хотин (эр-хотинлар), ота-оналар учун - ўзгалар парваришига муҳтожлиги тўғрисида ижтимоий қўллаб-қувватлаш бўйича комиссиянинг хулосаси.

36. Ёлғиз яшайдиган кекса ва ногиронлиги бўлган шахсни Шахсий рўйхатнинг "ёлғиз кексалар ва ногиронлиги бўлган шахслар" тоифасига киритиш учун, у ўзгалар парваришига муҳтож бўлган вояга етмаганлар, кексалар ва ногиронлиги бўлган шахс билан биргаликда яшаган тақдирда, ушбу Низомнинг 34-бандида кўрсатилган ҳужжатларга қўшимча равишда қуйидаги ҳужжатлар тақдим этилади:

вояга етмаган шахслар учун - туғилганлиги тўғрисидаги гувоҳномаларнинг нусхалари;

I ёки II гуруҳ ногиронлиги бўлган шахслар паспортининг нусхаси, уларнинг ногиронлиги тўғрисидаги маълумотномаларнинг нусхаси, кексалар ва ногиронлар учун - ўзгалар парваришига муҳтожлиги тўғрисида ижтимоий қўллаб-қувватлаш бўйича комиссиянинг хулосаси.

37. Яшаш ҳолатини баҳолаш тугаллангач тиббий-ижтимоий хизматларни ривожлантириш бўлимининг масъул ходими тиббий-ижтимоий хизматларни ривожлантириш бўлими бошлиғига ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолашнинг тўлдирилган шаклини, ижтимоий қўллаб-қувватлаш бўйича комиссиянинг хулосасини, шунингдек ушбу Низомнинг 34-бандида кўрсатилган ҳужжатларни қуйидагилар тўғрисида:

кексани ва ногиронлиги бўлган шахсни ёлғиз ёки ёлғиз яшайдиган деб эътироф этиш ва уни Шахсий рўйхатга киритиш тўғрисида туман (шаҳар) ҳокимлигига илтимоснома юбориш ҳақида;

ижтимоий хизматлар ва ижтимоий ёрдам кўрсатишни рад этиш бўйича асосланган аризани рад этиш ҳақида қарор қабул қилиш учун тақдим этади.

VII. ЁЛҒИЗ ЯШАЙДИГАН ҲАМДА ЁЛҒИЗ КЕКСА

ВА НОГИРОНЛИГИ БЎЛГАН ШАХСНИ

ШАХСИЙ РЎЙХАТГА КИРИТИШ

38. Тиббий-ижтимоий хизматларни ривожлантириш бўлим томонидан ёлғиз яшайдиган ҳамда ёлғиз кекса ва ногиронлиги бўлган шахсни Шахсий рўйхатга киритиш тўғрисида илтимоснома тақдим этган тақдирда, яшаш ҳолатини баҳолаш тугаллангандан кейин уч иш куни мобайнида Тиббий-ижтимоий хизматларни ривожлантириш бўлим туман (шаҳар) ҳокимлигига илтимосномани ва ушбу Низомнинг 34 - 36-бандларида кўрсатилган ҳужжатларни тақдим этади.

39. Туман (шаҳар) ҳокимлиги ушбу Низомнинг 34 - 36-бандларига мувофиқ тақдим этилган ҳужжатларни беш иш куни мобайнида кўриб чиқади ҳамда кекса ва ногиронлиги бўлган шахсни ёлғиз яшайдиган ёки ёлғиз кекса ва ногиронлиги бўлган шахс деб эътироф этиш ёхуд эътироф этишни рад этиш тўғрисида, шунингдек уни Шахсий рўйхатга киритиш тўғрисида тегишли қарор қабул қилади.

40. Шахсий рўйхат ушбу Низомнинг 6-иловасига мувофиқ шакл бўйича кексалар ва ногиронлиги бўлган шахсларни "ёлғиз кексалар ва ногиронлиги бўлган шахслар" ҳамда "ёлғиз яшайдиган ҳамда ёлғиз кексалар ва ногиронлиги бўлган шахслар"дан иборат бўлган икки тоифага ажратишни ҳисобга олган ҳолда тузилади.

41. Тиббий-ижтимоий хизматларни ривожлантириш бўлими туман (шаҳар) ҳокимининг қарори қабул қилингандан кейин уч иш куни мобайнида тегишли ахборотни автоматлаштирилган ахборот тизимига ҳамда Ижтимоий хизматлар ва ижтимоий ёрдам оладиган кексалар ва ногиронлиги бўлган шахсларнинг ягона регистрига киритади.

42. Ёлғиз яшайдиган ҳамда ёлғиз кексалар ва ногиронлиги бўлган шахсларни Шахсий рўйхатдан чиқариш туман (шаҳар) ҳокими қарори билан қуйидаги ҳолатларда амалга оширилади:

а) ёлғиз яшайдиган ҳамда ёлғиз кекса ва ногиронлиги бўлган шахс учун:

ёлғиз яшайдиган ҳамда ёлғиз кекса ва ногиронлиги бўлган шахснинг ижтимоий хизматлар ва ижтимоий ёрдам кўрсатишни рад этиши тўғрисида тиббий-ижтимоий хизматларни ривожлантириш бўлимига тақдим этиладиган ёзма аризаси бўйича;

интернат муассасасига жойлашганда;

бошқа яшаш жойига ўтганда (кекса ёки ногиронлиги бўлган шахснинг ҳужжатларини, унинг розилиги билан, кекса ёки ногиронлиги бўлган шахснинг янги яшаш жойидаги тиббий-ижтимоий хизматларни ривожлантириш бўлимига берган ҳолда);

ёлғиз яшайдиган ҳамда ёлғиз кекса ёки ногиронлиги бўлган шахс вафот этганда;

кекса ёки ногиронлиги бўлган шахсни Шахсий рўйхатга киритиш учун илгари тақдим этилган ҳужжатлардаги тегишли маълумотларга мувофиқ бўлмаган фактлар аниқланганда;

ёлғиз яшайдиган ҳамда ёлғиз кекса ва ногиронлиги бўлган шахсга ҳомийлик белгиланганда, шунингдек суд томонидан кекса ва ногиронлиги бўлган шахни парвариш қилиш вазифалари унинг қариндошларига ва бошқа шахсларга юкланганда;

ёлғиз яшайдиган ва ёлғиз ногиронлиги бўлган шахсдан I ва II гуруҳ ногиронлиги олиб ташланганда;

б) ёлғиз яшайдиган кекса ва ногиронлиги бўлган шахс учун:

ёлғиз яшайдиган кекса ва ногиронлиги бўлган шахс билан бирга яшайдиган шахслар балоғат ёшига етганда;

ёлғиз яшайдиган кекса ва ногиронлиги бўлган шахс билан бирга яшайдиган шахслардан I ва II гуруҳ ногиронлиги олиб ташланганда;

ёлғиз яшайдиган ҳамда ёлғиз кекса ва ногиронлиги бўлган шахс билан бирга яшайдиган илгари қамоқда ва жазони ўташ муассасаларида бўлган шахслар озод қилинганда;

ёлғиз яшайдиган ҳамда ёлғиз кекса ва ногиронлиги бўлган шахс билан бирга яшайдиган илгари узоқ муддат даволанишда бўлган шахслар даволанишдан чиққанда;

в) ёлғиз кекса ёки ногиронлиги бўлган шахс учун:

ёлғиз кекса ва ногиронлиги бўлган шахснинг болалари балоғат ёшига етганда;

ёлғиз яшайдиган кекса ва ногиронлиги бўлган шахснинг болалари, эр-хотин (эр-хотинлардан) ва ота-оналаридан I ва II гуруҳ ногиронлиги олиб ташланганда.

43. Тиббий-ижтимоий хизматларни ривожлантириш бўлими ижтимоий қўллаб-қувватлаш бўйича комиссия билан биргаликда ушбу Низомнинг 42-бандида кўрсатилган ҳолатлар аниқлангандан кейин уч кун мобайнида тасдиқловчи ҳужжатлар билан бирга хат тайёрлайди ва уларни ёлғиз яшайдиган ҳамда ёлғиз кекса ва ногиронлиги бўлган шахсни Шахсий рўйхатдан чиқариш учун туман (шаҳар) ҳокимлигига тақдим этади.

44. Туман (шаҳар) ҳокимлиги ушбу Низомнинг 43-бандида кўрсатилган хат тасдиқловчи ҳужжатлар илова қилинган ҳолда тиббий-ижтимоий хизматларни ривожлантириш бўлими томонидан тақдим этилгандан кейин беш иш куни мобайнида уларни кўриб чиқади ва тегишли қарор қабул қилади.

VIII. ИЖТИМОИЙ ХИЗМАТЛАРНИНГ ЯККА ТАРТИБДАГИ

ДАСТУРИНИ ИШЛАБ ЧИҚИШ ВА АМАЛГА ОШИРИШ

45. Ижтимоий хизматларнинг якка тартибдаги дастури ёлғиз яшайдиган ҳамда ёлғиз кекса ва ногиронлиги бўлган шахс Шахсий рўйхатга киритилган кундан бошлаб ўн иш куни мобайнида ишлаб чиқилади.

46. Ёлғиз яшайдиган ҳамда ёлғиз кекса ва ногиронлиги бўлган шахснинг ҳар бири учун шахсий йиғмажилд очилади, унга ёлғиз яшайдиган ҳамда ёлғиз кекса ва ногироннинг яшаш ҳолатини баҳолашнинг тўлдирилган шакли ҳамда ушбу Низомнинг 34 - 36-бандларида санаб ўтилган ҳужжатлар тикиб қўйилади.

47. Ижтимоий хизматларнинг якка тартибдаги дастури ёлғиз яшайдиган ҳамда ёлғиз кекса ва ногиронлиги бўлган шахснинг яшаш ҳолатини баҳолаш натижалари бўйича ишлаб чиқилади. Ижтимоий хизматларнинг якка тартибдаги дастури тиббий-ижтимоий хизматларни ривожлантириш бўлими бошлиғи томонидан тасдиқланади ҳамда тиббий-ижтимоий хизматларни ривожлантириш бўлимининг масъул ходими, ёлғиз яшайдиган ҳамда ёлғиз кекса ва ногиронлиги бўлган шахс, шунингдек уни ишлаб чиқишда қатнашган барча шахслар томонидан имзоланади.

Ёлғиз яшайдиган ҳамда ёлғиз кекса ва ногиронлиги бўлган шахснинг хоҳишига кўра ижтимоий хизматларнинг якка тартибдаги дастури имзолашдан олдин унга ўқиб эшиттирилади, бунда ижтимоий хизматларнинг якка тартибдаги дастурида тегишли ёзув қайд этилади.

Ижтимоий хизматларнинг якка тартибдаги дастурининг асл нусхаси тиббий-ижтимоий хизматларни ривожлантириш бўлимида сақланади, унинг нусхаси эса ёлғиз яшайдиган ҳамда ёлғиз кекса ва ногиронга берилади.

48. Ижтимоий хизматларнинг якка тартибдаги дастури ёлғиз яшайдиган ҳамда ёлғиз кекса ва ногиронлиги бўлган шахсни соғломлаштириш, уни уйида парвариш қилишни таъминлаш, унинг уй-жой-маиший шароитларини яхшилаш, уни ижтимоий ва ҳуқуқий муҳофаза қилиш чораларини кўриш, унинг мулоқот ва дам олиш доирасини кенгайтириш, унга ҳомийлик қилишни хоҳлайдиган шахсларни, шунингдек уни ижтимоий қўллаб-қувватлаш имкониятига эга бўлган шахсларни жалб этиш бўйича тадбирларни ўз ичига олади.

49. Соғломлаштириш бўйича тадбирлар даволаш-профилактика муассасасининг ходими томонидан тиббий-ижтимоий хизматларни ривожлантириш бўлимининг масъул ходими билан биргаликда белгиланади ва у диспансеризациялашни, санаторий-соғломлаштириш муассасаларида соғломлаштиришни, зарурият бўлганда - ихтисослаштирилган стационарларда даволашни ўз ичига олади.

50. Уйда парвариш қилиш бўйича тадбирлар тиббий-ижтимоий хизматларни ривожлантириш бўлимининг масъул ходими томонидан ўзгалар парваришига муҳтожлик тўғрисидаги хулосага мувофиқ белгиланади ва маиший хизмат кўрсатишни, овқат тайёрлашда ва супуриш-йиғиштириш ишларида, гигиена тадбирларини амалга оширишда кўмаклашишни ўз ичига олади.

Уйда парвариш қилиш хизматлари кўрсатиш тиббий-ижтимоий хизматларни ривожлантириш бўлими томонидан ёлғиз яшайдиган ҳамда ёлғиз кекса ва ногиронлиги бўлган шахс Шахсий рўйхатга киритилгандан кейин уч иш куни мобайнида ташкил этилади.

Шахсий рўйхатга киритилган ёлғиз яшайдиган ҳамда ёлғиз кексалар ва ногиронлиги бўлган шахслар биргаликда яшаган тақдирда уйда хизмат кўрсатувчи ижтимоий ходимнинг улар ҳузурига боришининг частотаси ва давомийлиги ушбу кексалар ва ногиронлиги бўлган шахслардан бирининг ўзгалар парваришига боғлиқлигининг энг юқори даражаси бўйича белгиланади. Улардан ҳар бири учун бориш кунлари ва соатлари сони жамланмайди.

Ўзгалар ёрдамига юқори даражада ёки тўлиқ боғлиқ бўлинганда ёлғиз кекса ва ногиронлиги бўлган шахсга интернат муассасасида хона таклиф этилади, у ерда у кеча-кундуз парвариш қилиш ва тиббий кузатиш билан таъминланади, ёлғиз яшайдиган кекса ва ногиронга - кексаларни соғломлаштириш ва уларнинг дам олишини ташкил этиш бўйича давлатга қарашли бўлмаган пансионатларда ушбу ишлар пулли асосда амалга оширилади.

51. Уй-жой-маиший шароитларни яхшилашга доир тадбирлар ижтимоий қўллаб-қувватлаш бўйича комиссия томонидан тиббий-ижтимоий хизматларни ривожлантириш бўлимининг масъул ходими билан биргаликда белгиланади ва кекса ёки ногиронлиги бўлган шахс турар жойининг хавфсизлиги мониторингини, таъмирлаш ишларини бажаришда ижтимоий ходимнинг мажбурий тартибдаги иштирокида сантехника, газ, электр ускуналаридаги носозликларни бартараф этиш учун коммунал хизматлар мутахассисларини чақириш бўйича хизматларни ўз ичига олади.

52. Ижтимоий муҳофаза қилиш чораларига доир тадбирлар ижтимоий қўллаб-қувватлаш бўйича комиссия томонидан тиббий-ижтимоий хизматларни ривожлантириш бўлимининг масъул ходими билан биргаликда белгиланади ва ўзгалар парваришига муҳтож ногиронлиги бўлган шахсларни протез-ортопедия буюмлари ва реабилитациянинг техник воситалари билан бепул таъминлашни, зарурият бўлганда, нафақалар ва моддий ёрдам олишда кўмаклашишни ўз ичига олади.

Ҳуқуқий муҳофаза қилишни таъминлаш тадбирлари ички ишлар органларининг профилактика бўйича инспекторининг мажбурий иштирокида, тиббий-ижтимоий хизматларни ривожлантириш бўлимининг масъул ходими билан биргаликда ижтимоий хизматларнинг якка тартибдаги дастурининг "Ҳуқуқий муҳофаза қилиш чоралари" бўлимида акс эттирилади. Ушбу тадбирлар ҳужжатларни тиклашда, алиментларга, мол-мулкка, шу жумладан, уй-жой ва шу кабиларга бўлган ҳуқуқларни белгилашда кўмаклашишни ўз ичига олади.

53. Мулоқот ва дам олиш доирасини кенгайтириш, ҳомийлик қилишни хоҳловчи, шунингдек ижтимоий қўллаб-қувватлаш имкониятига эга бўлган шахсларни жалб этиш бўйича тадбирлар қариндошлар, дўстлар ва танишлар, меҳнат жамоалари билан алоқа ўрнатишга кўмаклашишни, шунингдек ёлғиз кексалар, пенсионерлар ва ногиронлиги бўлган шахслар учун мулоқот ва дам олиш марказларига боришни ташкил этиш тадбирларини ўз ичига олади. Зарурият бўлганда кекса ёки ногиронлиги бўлган шахсга уларга ҳомийликни белгилашда кўмаклашилади.

IX. ИЖТИМОИЙ ХИЗМАТЛАРНИНГ ЯККА ТАРТИБДАГИ

ДАСТУРИ МОНИТОРИНГИНИ ОЛИБ БОРИШ ВА УНИНГ

АМАЛГА ОШИРИЛИШИНИ БАҲОЛАШ, УНИ ҚАЙТА

КЎРИБ ЧИҚИШ ВА ТУГАЛЛАШ

54. Тиббий-ижтимоий хизматларни ривожлантириш бўлимининг масъул ходими ижтимоий хизматларнинг якка тартибдаги дастури амалга оширилиши мониторингини доимий равишда амалга оширади.

55. Ижтимоий хизматларнинг якка тартибдаги дастурлари амалга оширилиши самарадорлигини баҳолаш ижтимоий қўллаб-қувватлаш бўйича комиссия томонидан ҳар чоракда камида бир марта амалга оширилади.

56. Ижтимоий хизматларнинг якка тартибдаги дастурини қайта кўриб чиқиш ёлғиз яшайдиган ҳамда ёлғиз кекса ёки ногиронлиги бўлган шахснинг яшаш ҳолати ўзгариши, шунингдек ижтимоий хизматлар ва ижтимоий ёрдам кўрсатиш бўйича амалга ошириладиган тадбирларнинг етарли эмаслиги муносабати билан амалга оширилади.

Ижтимоий хизматлар кўрсатиладиган ва ижтимоий ёрдам оладиган ёлғиз яшайдиган ҳамда ёлғиз кекса ва ногиронлиги бўлган шахс тиббий-ижтимоий хизматларни ривожлантириш бўлимининг масъул ходимини ўзининг яшаш ҳолати ўзгарганлиги тўғрисида ўз вақтида хабардор қилиши шарт.

Ижтимоий хизматларнинг якка тартибдаги дастурини қайта кўриб чиқиш, шу жумладан, унга тасдиқланган тузатишларни ёки янги тадбирларни киритиш ижтимоий хизматларнинг якка тартибдаги дастурида акс эттирилиши ҳамда бошлиқнинг имзоси ва тиббий-ижтимоий хизматларни ривожлантириш бўлимининг муҳри, ёлғиз яшайдиган ҳамда ёлғиз кекса ва ногиронлиги бўлган шахснинг (ёки унинг қонуний вакилининг) имзоси билан тасдиқланиши керак.

Ёлғиз яшайдиган ҳамда ёлғиз кекса ва ногиронлиги бўлган шахс ижтимоий хизматларнинг у ёки бу турини, шаклини, ҳажмини, умуман ижтимоий хизматларнинг якка тартибдаги дастурини рад этиш ҳуқуқига эга.

Ёлғиз яшайдиган ҳамда ёлғиз кекса ва ногиронлиги бўлган шахс тасдиқланган ижтимоий хизматларнинг якка тартибдаги дастурининг амалга оширилишини рад этган тақдирда унга ижтимоий хизматларнинг якка тартибдаги дастурининг амалга оширилишини тиклаш тўғрисидаги ариза билан тиббий-ижтимоий хизматларни ривожлантириш бўлимига такрорий мурожаат қилиш имконияти берилади.

Ёлғиз яшайдиган ҳамда ёлғиз кекса ва ногиронлиги бўлган шахс ижтимоий хизматларнинг якка тартибдаги дастурининг ёки унинг бирор қисмининг бажарилишини рад этган тақдирда тиббий-ижтимоий хизматларни ривожлантириш бўлими, шунингдек ижтимоий хизматларнинг якка тартибдаги дастурининг бошқа барча бажарувчилари унинг бажарилмаганлиги юзасидан жавобгар бўлмайдилар.

X. ИЖТИМОИЙ ХИЗМАТЛАР ВА ИЖТИМОИЙ ЁРДАМНИ

ШОШИЛИНЧ РАВИШДА КЎРСАТИШ

57. Ижтимоий хизматлар ва ижтимоий ёрдамнинг уйда парвариш қилиш хизматларини ва соғломлаштиришга доир тадбирларни амалга ошириш бўйича шошилинч равишда хизмат кўрсатиш кекса ёки ногиронлиги бўлган шахснинг ўзига ўзи хизмат кўрсатиш қобилияти тўлиқ йўқолганлиги, шунингдек унга ёрдам кўрсатиши мумкин бўлган шахсларнинг йўқлиги сабабли унинг ҳаёти ва соғлиғи хавфли ҳолатда эканлиги аниқланган пайтдан бошлаб бир кеча-кундуз мобайнида ташкил этилади. Уйда парвариш қилиш ва соғломлаштириш тадбирлари бўйича шошилинч равишдаги хизматларни ташкил этиш учун тиббий-ижтимоий хизматларни ривожлантириш бўлими кекса ёки ногиронлиги бўлган шахсга ижтимоий хизматлар ва ижтимоий ёрдамни шошилинч равишда амалга ошириш тўғрисида зудлик билан буйруқ чиқаради ҳамда уйда парвариш қилиш бўйича хизматлар кўрсатиш учун тиббий-ижтимоий хизматларни ривожлантириш бўлимининг масъул ходимини белгилайди. Зарурият бўлганда, тегишли даволаш-профилактика муассасалари жалб этилади.

58. Ижтимоий хизматлар ва ижтимоий ёрдамнинг уйда парвариш қилиш хизматларини ва соғломлаштириш тадбирларини амалга ошириш бўйича шошилинч равишда хизмат кўрсатиш кекса ёки ногиронлиги бўлган шахснинг яшаш ҳолатини баҳолаш амалга оширилгунгача ва у Шахсий рўйхатга киритилгунгача амалга оширилади ҳамда кекса ва ногиронлиги бўлган шахснинг яшаш ҳолатини баҳолаш натижаларини ва туман (шаҳар) ҳокимининг уни Шахсий рўйхатга киритиш ёки киритишни рад этиш тўғрисидаги қарорини ҳисобга олган ҳолда Шахсий рўйхатга тузатиш киритиш амалга оширилади.

59. Ижтимоий хизматлар ва ижтимоий ёрдамни шошилинч равишда кўрсатиш билан бир вақтда кекса ёки ногиронлиги бўлган шахснинг яшаш ҳолатини баҳолаш амалга оширилади ва ижтимоий хизматларнинг якка тартибдаги дастури белгиланган тартибда ишлаб чиқилади.

X-1. ЁЛҒИЗ ЯШАЙДИГАН ҲАМДА ЁЛҒИЗ КЕКСАЛАР

ВА НОГИРОНЛИГИ БЎЛГАН ШАХСЛАР УЧУН ИЖТИМОИЙ

ХИЗМАТЛАР КЎРСАТИШНИ МОЛИЯЛАШТИРИШ

59-1. Ижтимоий хизматлар кўрсатишнинг таъминот харажатлари ўрнатилган тартибда тасдиқланган харажатлар сметасига мувофиқ Қорақалпоғистон Республикаси ва маҳаллий бюджет маблағлари ҳисобидан ижтимоий таъминотга ажратилган маблағлар доирасида амалга оширилади.

59-2. Смета харажатларида ижтимоий хизмат кўрсатиш фаолиятини амалга ошириш учун иш ҳақи ва унга тенглаштирилган тўловлар, мазкур Низомнинг 21-бандида кўрсатилган канцелярия жиҳозлари ва бошқа инвентарларга бўлган иш берувчиларнинг ажратмалари ҳамда ўзгалар парваришига муҳтож ёлғиз пенсионерлар учун қонунчиликда белгиланган тартибда ва миқдорларда энг зарур молларни харид қилиш билан боғлиқ харажатлар кўзда тутилади.

XI. ЯКУНЛОВЧИ ҚОИДАЛАР

60. Ижтимоий қўллаб-қувватлаш бўйича комиссиянинг, тиббий-ижтимоий хизматларни ривожлантириш бўлимининг ва туман (шаҳар) ҳокимлигининг кексани ёки ногиронлиги бўлган шахсни ёлғиз яшайдиган ҳамда ёлғиз кекса ва ногиронлиги бўлган шахс деб эътироф этиш бўйича хатти-ҳаракатлари юзасидан қонун ҳужжатларида белгиланган тартибда шикоят қилиниши мумкин.

61. Ушбу Низом талабларининг бузилишида айбдор бўлган шахслар қонун ҳужжатларида белгиланган тартибда жавобгар бўладилар.

Низомга

1-ИЛОВА

Ёлғиз яшайдиган ҳамда ёлғиз кексалар

ва ногиронлиги бўлган шахсларга ижтимоий хизматлар

ва ижтимоий ёрдам кўрсатиш, шунингдек ижтимоий

хизматлар кўрсатишнинг якка тартибдаги дастурини

шакллантириш ва амалга ошириш

СХЕМАСИ

   

          

Низомга

2-ИЛОВА

Ёлғиз кексалар ва ногиронлиги бўлган шахслар ҳамда ёлғиз

яшаётган кексалар ва ногиронлиги бўлган шахсларни

аниқлаш бўйича амалга оширилган ишлар тўғрисида

ДАЛОЛАТНОМА

Фуқаролар йиғини (посёлкалар, қишлоқлар, овуллар) ҳудудларини айланиб чиқиш натижасида

  

фуқаролар йиғинидаги уй хўжаликлари сони _______________та эканлиги аниқланди.

Биз, фуқаролар йиғинининг ижтимоий қўллаб-қувватлаш комиссияси аъзолари

     

       

          

     

айланиб чиқишимиз натижаларига кўра, ёлғиз яшаётган ва ёлғиз кексалар тоифасига киритилиши мумкин бўлган қуйидаги фуқаролар аниқланди/аниқланмади (керагининг остига чизилади):

       

          

Низомга

3-ИЛОВА

Ёлғиз кексаларга ва ногиронлиги бўлган шахсларга ҳамда

ёлғиз яшаётган кексаларга ва ногиронлиги бўлган шахсларга

ижтимоий хизматлар ва ижтимоий ёрдам кўрсатиш масалалари

бўйича жисмоний ва юридик шахсларнинг мурожаатларини

рўйхатдан ўтказиш

ДАФТАРИ

     

Низомга

4-ИЛОВА

Ўзгалар парваришига муҳтож бўлган ёлғиз

яшайдиган ҳамда ёлғиз кексалар ва ногиронлиги

бўлган шахсларнинг Шахсий рўйхатига киритиш

тўғрисида кекса ёки ногиронлиги бўлган шахснинг

АРИЗАСИ