Муддатли ҳарбий хизматга чақирилаётган чақирилувчилар танловини ўтказиш тартиби тўғрисидаги Низом (АВ томонидан 20.07.2016 й. 2813-сон билан рўйхатга олинган 26.05.2016 й. Мудофаа вазирлигининг 5-сон, Вазирлар Маҳкамаси ҳузуридаги Давлат тест марказининг 15/кк-сон қарори билан тасдиқланган)

Ўзбекистон Республикаси

Адлия вазирлигида

2016 йил 20 июлда 2813-сон

билан рўйхатга олинган

Ўзбекистон Республикаси

Мудофаа вазирлиги,

Вазирлар Маҳкамаси ҳузуридаги

Давлат тест марказининг

2016 йил 26 майдаги

5, 15/кк-сон қарорига

ИЛОВА

Муддатли ҳарбий хизматга чақирилаётган

чақирилувчилар танловини ўтказиш

тартиби тўғрисидаги

НИЗОМ

Мазкур Низом Ўзбекистон Республикаси Президентининг 2006 йил 14 январдаги ПҚ-257-сон қарори билан тасдиқланган Ўзбекистон Республикаси фуқаролари томонидан ҳарбий хизматни ўташ тартиби тўғрисидаги низом ва Ўзбекистон Республикаси Вазирлар Маҳкамасининг 2009 йил 14 январдаги 10-сон "Фуқароларни муддатли ҳарбий хизматга йиғиш ва жўнатиш, уларни ҳарбий қисмларда қабул қилиш, шунингдек Ўзбекистон Республикаси Қуролли Кучлари резервига бўшатилган ҳарбий хизматчиларни яшаш жойларига қайтаришни ташкил этиш тизимини такомиллаштириш чора-тадбирлари тўғрисида"ги қарорига мувофиқ, муддатли ҳарбий хизматга чақирилаётган чақирилувчилар (бундан буён матнда чақирилувчилар деб юритилади) ўртасида танлов ўтказиш тартибини белгилайди.

1-БОБ. УМУМИЙ ҚОИДАЛАР

1. Танлов - бу чақирилувчининг умумжисмоний тайёргарлиги ва билим даражасини аниқлашга қаратилган махсус тадбирлар мажмуасидир.

2. Танлов ўтказишнинг асосий вазифалари қуйидагилардан иборат:

муддатли ҳарбий хизматга чақирилиш учун барча чақирилувчиларга бир хил шарт-шароит яратиб бериш, шунингдек ошкораликни, ижтимоий адолатни ҳамда самарали жамоатчилик назоратини таъминлаш;

муддатли ҳарбий хизматга чақиришда чақирилувчиларнинг билим савиясини ва умумжисмоний тайёргарлик даражасини холисона баҳолаш;

Ўзбекистон Республикаси Қуролли Кучлари таркибини соғлом, интеллектуал салоҳиятли, юксак билимга эга чақирилувчилар билан бутлаш.

3. Чақирилувчиларни муддатли ҳарбий хизматга чақириш Ўзбекистон Республикаси Президентининг қарорига асосан амалга оширилади.

4. Чақирилувчиларни тиббий кўрикдан ўтказиш Вазирлар Маҳкамасининг 2003 йил 21 февралдаги 95-сонли қарори билан тасдиқланган Ўзбекистон Республикаси Қуролли Кучларида тинчлик ва уруш даврида тиббий текширувдан ўтказиш тўғрисидаги низомга асосан ташкил этилади.

5. Туман (шаҳар) чақирув комиссияси чақирилиш муддатини кечиктириш ва чақирилишдан озод этиш ҳуқуқига эга бўлмаган, соғлиғининг ҳолатига кўра ҳарбий хизматни ўташга яроқли деб топилган, шунингдек танловда юқори балл тўплаган чақирилувчиларни муддатли ҳарбий хизматга чақириш тўғрисида қарор чиқаради.

2-БОБ. ТАНЛОВНИ ТАШКИЛ ЭТИШ ВА ЎТКАЗИШ

6. Танлов ўрта махсус, касб-ҳунар таълими ҳудудий бошқармалари ҳамда Ўзбекистон Республикаси Вазирлар Маҳкамаси ҳузуридаги Давлат тест маркази (бундан буён матнда Давлат тест маркази деб юритилади) билан биргаликда мудофаа ишлари бошқармалари ва бўлимлари томонидан ташкил этилади ҳамда ўтказилади.

7. Чақирилувчиларнинг умумжисмоний тайёргарлигини аниқлаш бўйича синовлар 25 сентябрдан келгуси йилнинг 15 январигача ўтказилади. Тест синовлари 10 октябрдан келгуси йилнинг 15 январигача ўтказилади. Йилнинг 16 январидан 21 январига қадар танлов учун захира кунлари белгиланади.

8. Танловга чақирилиш муддатини кечиктириш ва чақирилишдан озод этиш ҳуқуқига эга бўлмаган, соғлиғининг ҳолатига кўра ҳарбий хизматни ўташга яроқли деб топилган чақирилувчилар жалб қилинади.

9. Чақирилувчилар ҳар йилги танловда фақат бир марта иштирок этади.

10. Чақирилувчиларнинг умумжисмоний тайёргарлик даражасини баҳолаш мудофаа ишлари бошқармалари ва бўлимлари томонидан, билим даражасини аниқлаш бўйича тест синовлари Давлат тест маркази томонидан туман (шаҳар) ҳокимининг қарори билан белгиланган таълим муассасаларида ўтказилади.

11. Танлов тадбирларига жамоат тартибини сақлаш учун ички ишлар органлари, зарурий ҳолларда тез тиббий ёрдам кўрсатиш ходимлари жалб қилинади.

12. Танлов Ўзбекистон Республикаси Мудофаа вазирлигининг умумий раҳбарлиги остида ташкил этилади ва ўтказилади.

13. Ўзбекистон Республикаси Мудофаа вазирлиги:

июль ойида танловни ташкил этиш бўйича тегишли кўрсатма, шунингдек дастлабки саралаб олиш режасини тайёрлайди ҳамда 15 июлга қадар ҳарбий округ штабларига юборади;

20 сентябрга қадар ҳарбий округ штаблари томонидан тақдим этилган, мазкур Низомнинг 1-иловасига мувофиқ тест синовларини ўтказиш жадвали, мазкур Низомнинг 2-иловасига мувофиқ аудитория раҳбарлари ва кузатувчиларнинг рўйхати, мазкур Низомнинг 3-иловасига мувофиқ тест синовлари ўтказилиши режалаштирилган бинолар тўғрисидаги маълумотларни умумлаштиради ва Давлат тест марказига юборади;

мудофаа ишлари бошқармалари ва бўлимларида танловни ташкил этиш ва ўтказиш билан боғлиқ тадбирларни жойларга бориб ўрганади ҳамда уларга бу борада амалий ёрдам кўрсатади.

14. Ҳарбий округ штаблари:

Ўзбекистон Республикаси Мудофаа вазирлигининг кўрсатмаси ва дастлабки саралаб олиш режасини олгач, 25 июлга қадар Қорақалпоғистон Республикаси, вилоятлар ва Тошкент шаҳри (бундан буён матнда ҳудудлар деб юритилади) кесимида мудофаа ишлари бошқармаларининг ҳарбий хизматчилари таркибидан тест синовларини мувофиқлаштирувчиларни тайинлайди, танловни ташкил этиш ва ўтказиш тўғрисидаги ҳарбий округ штабининг буйруғини қабул қилиб, ижро учун мудофаа ишлари бошқармалари (бўлимлари)га юборади;

Ўзбекистон Республикаси Мудофаа вазирлигига 5 сентябрга қадар мазкур Низомнинг 4-иловасига мувофиқ шаклда Тест синовларини мувофиқлаштирувчи сифатида тайинланганлар рўйхатини, шунингдек 10 сентябрга қадар мудофаа ишлари бошқармалари томонидан тақдим этилган тест синовларини ўтказиш жадваллари, аудитория раҳбарлари ва кузатувчиларнинг рўйхатлари ҳамда тест синовлари ўтказилиши режалаштирилган бинолар тўғрисидаги маълумотларни умумлаштириб тақдим этади;

мудофаа ишлари бошқармалари ва бўлимларида танловни ташкил этиш ва ўтказиш билан боғлиқ тадбирларни жойларга бориб ўрганади ҳамда уларга бу борада амалий ёрдам кўрсатади;

октябрь ойининг иккинчи жумасидан бошлаб, кейинчалик ҳафтанинг ҳар жумасида мудофаа ишлари бошқармалари ва бўлимларида ўтказилаётган танлов натижалари ҳақидаги умумлаштирилган маълумотни Ўзбекистон Республикаси Мудофаа вазирлигига танлов якунлангунига қадар тақдим этиб боради.

15. Мудофаа ишлари бошқармалари:

ҳарбий округ штабининг танловни ташкил этиш ва ўтказиш тўғрисидаги буйруғи ҳамда дастлабки саралаб олиш режасини олгач, 1 августга қадар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига танловни ташкил этиш ва ўтказиш бўйича махсус тадбирлар режасини тасдиқлаш тўғрисида қарор қабул қилишни сўраб мурожаат этади;

махсус тадбирлар режаси тасдиқлангач, унинг нусхасини, шунингдек мудофаа ишлари бошқармасининг тегишли кўрсатмаси ва дастлабки саралаб олиш режасидан кўчирмаларни 5 августга қадар мудофаа ишлари бўлимларига юборади;

5 сентябрга қадар мазкур Низомнинг 5-иловасига мувофиқ шаклда Чақирилувчиларнинг умумжисмоний тайёргарлик даражасини баҳолаш бўйича синовлар ўтказиш жадвалини ишлаб чиқиб, кўчирмасини 10 сентябрга қадар мудофаа ишлари бўлимларига юборади;

мудофаа ишлари бўлимлари томонидан тақдим этилган чақирилувчиларнинг билим даражасини аниқлаш бўйича тест синовларини ўтказиш жадваллари, аудитория раҳбарлари ва кузатувчиларининг рўйхатлари ҳамда тест синовлари ўтказилиши режалаштирилган бинолар тўғрисидаги маълумотларни умумлаштириб 5 сентябрга қадар ҳарбий округ штабига тақдим этади;

танловга жалб этилган чақирилувчиларнинг умумжисмоний тайёргарлик даражасини баҳолаш тадбирларини ташкил этади ва ўтказади;

тест синовларини мувофиқлаштирувчилар билан биргаликда чақирилувчиларнинг билим даражасини аниқлаш бўйича тест синовларини ташкил этади ва ўтказади;

Давлат тест марказидан олинган тест синовлари натижаларини мудофаа ишлари бўлимларига етказади;

октябрь ойининг иккинчи жумасидан бошлаб, кейинчалик ҳафтанинг ҳар жумасида мудофаа ишлари бошқармалари ва бўлимларида ўтказилаётган танлов натижалари ҳақидаги умумлаштирилган маълумотни танлов якунлангунига қадар ҳарбий округ штабига тақдим этиб боради.

16. Мудофаа ишлари бўлимлари:

1 августдан 30 августга қадар чақирилувчиларнинг шахсий йиғмажилдларига мувофиқ чақирув ресурсларини ўрганади;

10 августга қадар туман (шаҳар) ҳокимлигига танловни ташкил этиш ва ўтказиш бўйича махсус тадбирлар режасини тасдиқлаш тўғрисида қарор қабул қилишни сўраб мурожаат этади;

1 сентябрга қадар чақирилувчиларнинг билим даражасини аниқлаш бўйича тест синовларини ўтказиш жадваллари, аудитория раҳбарлари ва кузатувчиларнинг рўйхатлари ҳамда тест синовлари ўтказилиши режалаштирилган бинолар тўғрисидаги маълумотни мудофаа ишлари бошқармасига юборади, мазкур Низомнинг 6-иловасида келтирилган Муддатли ҳарбий хизматга чақирилаётган чақирилувчига эслатмани мудофаа ишлари бўлими ҳудудидаги фуқаролар учун қулай ва кўринарли жойга осиб қўяди ҳамда мазкур Низомнинг 7-иловасига мувофиқ шаклда Чақирилувчиларнинг умумжисмоний тайёргарлик даражасини баҳолаш бўйича рўйхат тузади;

мудофаа ишлари бошқармаси билан ҳамкорликда чақирилувчиларнинг умумжисмоний тайёргарлик даражасини аниқлаш бўйича синовларни ташкил этади ва ўтказади;

тест синови ўтказиладиган кундан 10 кун олдин мазкур Низомнинг 8-иловасига мувофиқ Тест синовида қатнашувчи чақирилувчиларнинг рўйхатини ёзма ва электрон шаклда тест синовларини мувофиқлаштирувчи орқали Давлат тест марказига тақдим этади ҳамда мудофаа ишлари бўлими ҳудудидаги фуқаролар учун қулай ва кўринарли жойга осиб қўяди;

чақирилувчилар ва уларнинг ота-оналари билан танловнинг ташкил этилиши ва ўтказилиши билан боғлиқ тарғибот-ташвиқот ҳамда тушунтириш ишлари олиб боради;

чақирилувчиларнинг титул варақаларини расмийлаштиради, чақирилувчиларни чақирилувчилар рўйхатига мувофиқ тест синовларига тўлиқ етиб келишларини таъминлайди, тест синовлари ўтказиладиган кундан бир кун олдин чақирилувчининг рухсатномасини чақирилувчиларга тарқатади;

йилнинг 30 январига мазкур Низомнинг 9-иловасига мувофиқ икки нусхада Танлов натижаларининг якуний рўйхатини тузади ҳамда унинг биринчи нусхасини мудофаа ишлари бўлими ҳудудидаги фуқаролар учун қулай ва кўринарли жойга осиб қўяди, иккинчи нусхаси эса мудофаа ишлари бўлимида юритиладиган тегишли жилдга тикилади;

мазкур Низомнинг 10-иловасига мувофиқ муддатли ҳарбий хизматга танлов варақасини расмийлаштиради. Чақирилувчиларнинг якуний рўйхатда қайд этилган тартиб рақами уларнинг танлов варақасига ёзиб қўйилади;

танлов натижалари тўғрисидаги маълумотни чақирув комиссиясига тақдим этади.

17. Давлат тест маркази:

тест материаллари сифатли тайёрланишини таъминлайди;

Давлат тест маркази вакиллари, ҳарбий округ штаби томонидан ҳудудларга тайинланган тест синовларини мувофиқлаштирувчилар, аудитория раҳбарлари ва кузатувчилари билан семинар машғулотларини ташкил этади ва ўтказади;

таълим муассасалари, маҳаллий давлат ҳокимияти органлари, Давлат тест маркази вакиллари, тест синовларини мувофиқлаштирувчилар, аудитория раҳбарлари ва кузатувчиларни махсус йўриқномалар билан таъминлайди;

Ўзбекистон Республикаси Мудофаа вазирлиги томонидан белгиланган миқдордаги тест материалларини тест ўтказиладиган кундан уч кун олдин мудофаа ишлари бошқармаларига Давлат фелдьегерлик хизмати орқали, Тошкент шаҳри ва Тошкент вилоятида эса тест синовларини мувофиқлаштирувчи орқали етказади;

чақирилувчиларнинг билим даражасини аниқлаш бўйича ташкил этилган тест синовларини назорат қилади ва мудофаа ишлари бошқармалари ва бўлимларига амалий ёрдам кўрсатади.

18. Муддатли ҳарбий хизматга чақириш мудофаа ишлари бўлимига муддатли ҳарбий хизматга юбориш учун белгилаб берилган режа ва унга ўн фоиз қўшимча миқдоридаги чақирилувчилар сонидан келиб чиққан ҳолда танлов натижаларига кўра юқорироқ балл тўплаган чақирилувчилар ҳисобидан амалга оширилади.

3-БОБ. ЧАҚИРИЛУВЧИЛАРНИНГ УМУМЖИСМОНИЙ

ТАЙЁРГАРЛИК ДАРАЖАСИНИ БАҲОЛАШ

1-§. Умумий қоидалар

19. Чақирилувчиларнинг умумжисмоний тайёргарлиги даражаси уларнинг мазкур бобда назарда тутилган тегишли нормативларни бажаришини текшириш орқали баҳоланади.

20. Чақирилувчиларнинг умумжисмоний тайёргарлик даражасини баҳолаш мудофаа ишлари бошқармасининг вакили раҳбарлигида мудофаа ишлари бўлими ҳамда умумтаълим ёки ўрта махсус, касб-ҳунар таълими муассасаларининг мутахассислари томонидан ўтказилади.

21. Чақирилувчиларга дастлаб нормативларни бажаришга қўйиладиган талаблар ва мезонлар ҳамда уларни бажариш тартиби умумтаълим ёки ўрта махсус, касб-ҳунар таълими муассасаларининг мутахассиси томонидан тушунтирилади.

22. Умумжисмоний тайёргарлик даражасини аниқлаш бўйича синовларда мудофаа ишлари бўлими қошидаги чақирув тиббий комиссияси томонидан ҳарбий хизматни ўташга яроқли деб топилган чақирилувчилар қатнашади.

23. Чақирилувчилар умумжисмоний тайёргарлик даражасини аниқлаш бўйича синовларга спорт кийимида келишлари лозим.

24. Чақирилувчиларнинг умумжисмоний тайёргарлик даражаси 15 балли шкала бўйича баҳоланиб, ҳар бир нормативга "аъло" баҳо учун - 5 балл, "яхши" баҳо учун - 4 балл, "қониқарли" баҳо учун - 3 балл берилади, "қониқарсиз" баҳо учун балл берилмайди.

25. Чақирилувчилар қуйидаги кетма-кетликда умумжисмоний нормативларни бажаради:

турникда тортилиш;

100 метрга югуриш;

3 000 метрга югуриш.

26. Белгиланган барча турдаги умумжисмоний нормативлар бир кунда бажарилади.

Нормативлар оралиғида чақирилувчиларга дам олиш учун камида 10 дақиқа вақт берилади.

27. Белгиланган нормативларни узрсиз сабабларга кўра топширмаган ёхуд топширишдан бош тортган чақирилувчиларга балл берилмайди.

28. Умумжисмоний нормативларнинг бирортасидан "қониқарсиз" баҳо олган чақирилувчи тест синовларига киритилмайди.

2-§. Умумжисмоний нормативларни бажаришга

қўйиладиган талаблар ва мезонлар

29. Турникда тортилиш нормативини бажаришда:

қўл кафтлари турникда олдинга қаратилган ҳолда ушланади, тана бироз ростланади, тизза бўғими тўғриланади, оёқ учлари чўзилади, товонлар бирлаштирилади;

ияк турник устига тўлиқ ўтгунга қадар қўллар букилади;

ҳаракат тўлиқ амалга оширилиши билан дастлабки ҳолатга қайтилади (осилиш ҳолати 1-2 сония давом этади).

Ушбу нормативни бажаришда оёқларни кериш, танани ҳаракатсиз ҳолатда эгиш ҳамда оёқлар билан силтанма ҳаракатлар қилиш тақиқланади.

Жуфт тутилган оёқларни 450 гача букишга рухсат берилади.

30. Турникда тортилиш нормативи қуйидагича баҳоланади:

11 маротаба ва ундан кўп тортилганда - "аъло";

9-10 маротаба тортилганда - "яхши";

6 - 8 маротаба тортилганда - "қониқарли";

1 - 5 маротаба ёхуд умуман тортила олмаганда - "қониқарсиз" деб топилади.

31. 100 метрга югуриш нормативи:

юқори ёки қуйи стартдан амалга оширилади;

стадионнинг югуриш йўлакчаси қаттиқ, қопламаси текис жойларда ўтказилади.

32. 100 метрга югуриш нормативи қуйидагича баҳоланади:

14,2 сония ичида бажарган тақдирда - "аъло";

14,3 - 14,6 сония ичида бажарган тақдирда - "яхши";

14,7 - 15,8 сония ичида бажарган тақдирда - "қониқарли";

15,9 сония ва ундан кўп вақтда бажарган тақдирда - "қониқарсиз" деб баҳоланади.

33. 3000 метрга югуриш нормативи стадионнинг югуриш йўлакчалари ёки текис жойларда, умумий ёки алоҳида старт берилган ҳолда ўтказилади. Старт ва марра чизиқлари бир жойда белгиланиши мумкин.

3000 метрга югуриш нормативини бажариш вақтида йўлакчаларни кесиб ўтиш ва юриб ҳаракатланиш тақиқланади.

34. 3000 метрга югуриш нормативи қуйидагича баҳоланади:

12,45 дақиқа ичида бажарган тақдирда - "аъло";

12,46 - 13,0 дақиқа ичида бажарган тақдирда - "яхши";

13,1 - 13,35 дақиқа ичида бажарган тақдирда - "қониқарли";

13,36 дақиқа ва ундан юқори вақтда бажарган тақдирда - "қониқарсиз" деб баҳоланади.

35. Умумжисмоний тайёргарлик синовларида биринчи марта қониқарсиз баҳоланган чақирилувчиларга навбатдаги умумжисмоний тайёргарлик синовларида тегишли нормативни яна бир марта қайта топширишга рухсат берилади.

36. Белгиланган муддатда узрли сабабларга кўра қатнашмаган чақирилувчилар учун қўшимча умумжисмоний тайёргарлик синовлари захира кунлари мудофаа ишлари бошқармаларида ўтказилади.

Қуйидагилар узрли сабаб ҳисобланади:

чақирилувчининг синовларга келишига имкон бермаган касаллиги;

яқин қариндошининг (қариндош ёки қуда томондан қариндош бўлган шахслар, яъни ота-она, туғишган ва ўгай ака-ука ва опа-сингиллар, хотин, фарзанд, бобо, буви, шунингдек хотиннинг ота-онаси, туғишган ва ўгай ака-ука ва опа-сингиллари) вафот этганлиги ёки оғир касаллиги;

чақирилувчига боғлиқ бўлмаган ҳолда унинг синовларга келишига имкон бермаган табиий офат ёки бошқа ҳолатлар.

3-§. Умумжисмоний тайёргарлик синови

натижаларини расмийлаштириш

37. Умумжисмоний тайёргарлик синовларининг натижалари мазкур Низомнинг 7-иловасига мувофиқ шаклдаги рўйхатга киритилади. Рўйхат мудофаа ишлари бошқармасининг вакили, мудофаа ишлари бўлими ҳамда умумтаълим ёки ўрта махсус, касб-ҳунар таълими муассасасининг мутахассислари томонидан имзоланади.

38. Рўйхатда кўрсатилган баҳолар синов ўтказилган куни чақирилувчиларга ўқиб эшиттирилади ҳамда рўйхат чақирилувчилар томонидан имзоланади.

39. Рўйхат мудофаа ишлари бўлимида 2 йил давомида сақланади, сўнгра ўрнатилган тартибда йўқ қилинади.

40. Умумжисмоний тайёргарлик синови натижасидан норози бўлган чақирилувчи умумжисмоний тайёргарлик синовлари натижаси эълон қилингандан кейин уч иш куни давомида мудофаа ишлари бошқармаси бошлиғи номига ёзма равишда шикоят бериш ҳуқуқига эга.

41. Мудофаа ишлари бошқармалари умумжисмоний тайёргарлик синовлари натижаларидан норози бўлган чақирилувчилар рўйхатини шакллантириб, уларни навбатдаги умумжисмоний тайёргарлик синовларида синовдан ўтказади ва натижалари бўйича чақирилувчиларга ёзма равишда асослантирилган жавоб беради.

4-БОБ. ЧАҚИРИЛУВЧИЛАРНИНГ БИЛИМ

ДАРАЖАСИНИ АНИҚЛАШ

42. Чақирилувчиларнинг билим даражасини аниқлаш мақсадида тест синовлари ўтказиладиган бино ва аудиториялар тайёрланади.

43. Биноларни тест синовларига тайёрлаш бўйича жавобгарлик туман (шаҳар) ҳокимининг қарорига асосан бириктирилган таълим муассасаси зиммасига юклатилади.

44. Ҳар бир аудиториядаги ўринлар сони 30 ёки 60 нафар кишига мўлжалланган бўлиши шарт. Аудиториялар етарли миқдордаги столлар, стуллар, тест материалларини тарқатиш ва қабул қилиш учун алоҳида стол билан таъминланган бўлиши лозим.

45. Ҳарбий округ штаби буйруғи асосида тест синовини ташкил этиш ва ўтказиш учун ҳудудлар бўйича камида бир нафардан тест синовларини мувофиқлаштирувчи тайинланади. Мудофаа ишлари бошқармаларида тест синовларини мувофиқлаштирувчи учун тест материалларини сақлашга алоҳида хона ва сейф ажратилади.

46. Тест синовларини мувофиқлаштирувчи тест материалларини мудофаа ишлари бошқармаларидан, Тошкент шаҳри ва Тошкент вилоятидан тайинланган мувофиқлаштирувчилар Давлат тест марказидан қабул қилиб олиш, тест синовлари ўтказиладиган бинога олиб бориш ва олиб келиш учун масъулдир.

47. Тест топширишга рухсат берилган чақирилувчилар тест синовлари ўтказиладиган бинога мазкур Низомнинг 11-иловасига мувофиқ Давлат тест маркази томонидан тақдим этилган Тест синовларида қатнашувчи чақирилувчиларнинг аудитория рўйхатига асосан фуқаролик паспорти ва чақирилувчи рухсатномаси билан киритилади.

48. Чақирилувчилар тест синовлари бошланишидан олдин 30 дақиқа мобайнида жавоблар варақасини тўлдириш тартиби билан таништирилади ва жавоблар варақасининг тегишли жойига ўзлари тўғрисидаги тегишли маълумотларни киритади. Ушбу жараён учун ажратилган вақт тест ўтказиш учун белгиланган вақт меъёрига кирмайди.

49. Тест синови ўтказиладиган кун учун шакллантирилган рўйхатда мавжуд бўлган, бироқ тест синовларига узрсиз сабабларга кўра келмаган чақирилувчилар учун қўшимча тест синови ўтказилмайди.

Узрли сабабларга кўра қатнашмаган чақирилувчилар учун қўшимча тест синовлари жадвалда белгиланган захира кунларида ўтказилади. Бундай ҳолатларда мудофаа ишлари бошқармалари ушбу чақирилувчиларнинг рўйхатини шакллантириб тест синовига қатнашмаганлик сабабини кўрсатган ҳолда Ўзбекистон Республикаси Мудофаа вазирлиги орқали Давлат тест марказига 3 кун олдин тақдим этади. Узрли сабаблар рўйхати мазкур Низомнинг 36-бандига мувофиқ белгиланади.

50. Тест синовлари бошланганидан кейин аудиторияга тест синовлари ўтказилишига масъул бўлган шахслардан бошқа ҳеч ким киритилмайди ва чақирилувчилар билан тест саволлари бўйича савол-жавоблар ўтказилмайди.

51. Тест синовлари қуйидаги фанлардан ўтказилади ва ҳар бир тўғри жавобга 1 балл берилади:

1-блок: математика фанидан 25 та савол, максимал - 25 балл;

2-блок: она тили фанидан 25 та савол, максимал - 25 балл;

3-блок: Ўзбекистон тарихи фанидан 10 та савол, максимал - 10 балл.

Барча фанлар бўйича максимал - 60 балл йиғилади.

Саволлар китобидаги тест саволларининг сони 60 та, уларни ечиш учун 1 соат 50 дақиқа вақт ажратилади, жавоблар варақасини тўлдириш учун яна қўшимча 20 дақиқа вақт ажратилади.

52. Ҳар бир саволга 4 та ("А", "В", "С", "D") жавоблар варианти берилган бўлиб, чақирилувчи фақат улардан биттасини белгилаши, кейинчалик жавоблар варақасининг мос фан блокидаги доирачани бўяши керак, ҳар бир саволга битта жавоб белгиланиши шарт.

53. Жавоблар варақаси чақирилувчи томонидан кўк (ҳаворанг) пастали шарикли ручка билан тўлдирилади.

Жавоблар варақасида тегишли доирачаларни нотўғри белгилаган, жавоблар варақасини алмаштирган, фан блоклари ўрнини алмаштириб бўяган, жавоблар варақасининг тегишли блокларида фамилияси, исми ва отасининг исмини ёзмаган, имзо қўймаган, жавоблар варақаси рақамларини бўяган чақирилувчиларнинг эътирози кўриб чиқилмайди.

Тўлдирилган жавоблар варақаси чақирилувчининг билим даражасини белгиловчи асосий ҳужжат ҳисобланади.

54. Чақирилувчи тест синовларига микрокалькулятор, луғат, жадвал, китоб, мобиль телефон, компьютер, телекоммуникация воситалари ва шпаргалкалар олиб киришга ҳаракат қилса ёки олиб кирган бўлса, тест синовлари давомида тест материалларини бошқа чақирилувчига узатса ёки ёрдам берса, тест синови учун ажратилган вақт тугагандан кейин тест материалларини топширишдан бош тортса, тест материалларини аудиториядан ташқарига чиқарса, саволлар китоби варақасини йиртса тест синовлари ўтказиш тартибини бузган ҳисобланади ҳамда тест синовларини мувофиқлаштирувчи иштирокида аудитория раҳбари ва кузатувчилар томонидан мазкур Низомнинг 12-иловасида келтирилган шаклга мувофиқ далолатнома тузилади ва чақирилувчи тест жараёнидан четлаштирилади.

55. Тест синовларини топшириш вақтида чақирилувчининг аудиториядан чиқиши тақиқланади. Аудиториядан сабабсиз чиққан чақирилувчилар такроран тест синовларига қўйилмайди, бундан соғлиғининг ёмонлашуви ва бошқа узрли ҳолатларга кўра тест материалларисиз, аудитория кузатувчиси назорати остида аудиториядан чиқиш ҳолатлари мустасно.

56. Аудитория раҳбари ажратилган вақт тугаганлиги, жавоблар варақасининг мос равишда фан блокларидаги доирачаларга бўяш учун қўшимча равишда ажратилган 20 дақиқа бошланганлигини эълон қилганда, чақирилувчилар саволлар китоби билан ишлашни тўхтатиб, жавоблар варақасининг мос равишдаги фан блокларидаги доирачаларни бўяшни бошлаши, ажратилган қўшимча вақт тугагани эълон қилинганда жавоблар варақаси билан ишлашни тўхтатиши шарт.

57. Тест материаллари Давлат тест марказига олиб келинганидан кейин натижа етти иш кунида ҳисобланади.

Давлат тест маркази уч иш куни ичида тест синови натижаларини Давлат фельдъегерлик хизмати орқали мудофаа ишлари бошқармаларига етказади. Тест синови натижалари тест синовларини мувофиқлаштирувчи томонидан мудофаа ишлари бошқармаларидан қабул қилиб олинади ва шу куннинг ўзида мудофаа ишлари бўлимларига етказилади.

Тошкент шаҳри ва Тошкент вилоятида тест синови натижалари чиқарилган кунда тест синовларини мувофиқлаштирувчи томонидан Давлат тест марказидан қабул қилиб олинади ҳамда шу куннинг ўзида мудофаа ишлари бўлимларига етказилади.

58. Мудофаа ишлари бўлимлари тест натижаларини икки иш кунида эълонлар тахтасига жойлаштиради.

59. Давлат тест маркази тест синови ўтказиш жадвалида белгиланган кундан уч кун олдин, чақирилувчиларнинг рўйхати, уларнинг сонига асосан тенг миқдордаги чақирилувчиларнинг рухсатномалари, саволлар китоби, жавоблар ва титул варақаларини Давлат фельдъегерлик хизмати орқали, Тошкент шаҳри ва Тошкент вилоятида эса тест синовларини мувофиқлаштирувчи орқали бевосита тегишли мудофаа ишлари бошқармаларига етказади.

60. Тест синовлари мазкур Низом талаблари асосида ташкил этилмаса, Давлат тест маркази ходимлари томонидан тест синовлари бекор қилинади ва тест синовларини мувофиқлаштирувчи иштирокида далолатнома расмийлаштирилади.

5-БОБ. ТЕСТ СИНОВЛАРИНИ

МУВОФИҚЛАШТИРУВЧИНИНГ ВАЗИФАЛАРИ

61. Тест синовларини мувофиқлаштирувчи тест синови ўтказиш жадвалида белгиланган кундан уч кун олдин Давлат фельдъегерлик хизмати орқали, Тошкент шаҳри ва Тошкент вилоятида эса Давлат тест марказидан тўғридан-тўғри тест топширувчиларнинг рўйхатини, уларнинг сонига тенг миқдорда чақирилувчи рухсатномаларини, саволлар китобларини, жавоб варақаларини ҳамда титул варақаларини қабул қилиб олади.

62. Тест синовларини мувофиқлаштирувчи тегишли ҳудуд бўйича тест жараёнини ташкиллаштиради ва унга умумий раҳбарлик қилади.

63. Тест синовларини мувофиқлаштирувчи тест синовларининг ўз вақтида бошланиши ва тугашини қатъий назорат қилади, тест синовларини адолатли, холисона ва белгиланган талаблар асосида ўтишини таъминлайди.

64. Тест синовларини мувофиқлаштирувчи тест жараёни бошланишидан аввал аудитория раҳбари ва кузатувчилари билан тест синовини ўтказиш бўйича тушунтириш ўтказади. Тест синовлари жараёнида муаммолар бўлганда, зудлик билан Давлат тест марказининг вилоятлардаги доимий вакиллари ёки Давлат тест маркази билан боғланади, муаммони ҳал этиш чораларини кўради.

65. Тест синовларини мувофиқлаштирувчи ҳар ҳафтанинг жума куни тест топширувчиларнинг сонига тенг миқдордаги саволлар китоблари, жавоблар варақалари ва титул варақалари пакетларини муҳрланган ҳолда Давлат фельдъегерлик хизмати орқали, Тошкент шаҳри ва Тошкент вилоятида эса тўғридан-тўғри Давлат тест марказига етказади.

6-БОБ. АУДИТОРИЯ РАҲБАРИ

ВА КУЗАТУВЧИЛАРИНИНГ ВАЗИФАЛАРИ

66. Аудитория раҳбари ва кузатувчилари тест синовида жамоатчилик асосида иштирок этади.

67. Тест синови ўтказиладиган аудиторияда тест синовининг мазкур Низом талабларига қатъий риоя этилган ҳолда тўғри ва адолатли ўтказилишини таъминлаш юзасидан жавобгарлик аудитория раҳбари ва кузатувчисининг зиммасига юкланади.

68. Аудитория раҳбари ёки кузатувчиси тест синовларини ўтказиш тартибини бузган тақдирда, улар тест синовларини мувофиқлаштирувчи томонидан тест синовидан четлаштирилади ва далолатнома расмийлаштирилади.

69. Аудитория раҳбари аудитория кузатувчисининг фаолиятини назорат қилади.

70. Аудитория раҳбари чақирилувчиларни фуқаролик паспорти ва чақирилувчи рухсатномаси асосида текшириб (расмлар шу чақирилувчига тегишлилигига ишонч ҳосил қилиб), рўйхат асосида аудиторияга киритади, тест синови бошланишига етиб келмаган чақирилувчиларни рўйхатга "қатнашмади" деб киритади.

71. Аудитория кузатувчиси жавоблар варақалари ва жавоблар варақаси рақамига мос рақамли саволлар китобларини ҳамда титул варақаларини чақирилувчиларга тарқатади.

72. Аудитория раҳбари чақирилувчиларга саволлар китобининг рақами билан жавоблар варақасининг рақами мослигини ҳамда тест материаллари нуқсонсизлигини текшириб чиқишларини, жавоблар варақаси ва саволлар китоби муқовасида кўрсатилган тегишли жойга фамилияси, исми, отасининг исмини ёзиб, имзо қўйишлари тўғрисида кўрсатма беради ва уларга тест синовлари топшириш тартибини тушунтиради ва тест синови бошланишини эълон қилади.

73. Аудитория раҳбари белгиланган вақт ўтгандан сўнг чақирилувчиларга тест синовларига ажратилган вақт тугаганлигини эълон қилади ва чақирилувчилардан тест материалларини топширишларини талаб қилади.

74. Аудитория раҳбари тест материаллари йиғиб олинганидан сўнг саволлар китоби ва жавоблар варақасига шикаст етмаганлигини текшириб, чақирилувчи рухсатномасининг тегишли жойини тўлдириб, имзо қўяди ҳамда чақирилувчиларга тест материаллари топширилганлигини тасдиқлаш мақсадида чақирилувчиларнинг рўйхатига имзо қўйдириб, уларни аудиториядан чиқаради.

75. Аудиториядаги барча жавоблар варақаларининг жавоблар варақалари пакетига солиниши учун аудитория раҳбари ва кузатувчиси шахсан жавобгар ҳисобланади. Жавоблар варақаси пакетига қуйидагилар солинади:

тестда қатнашган чақирилувчиларнинг жавоблар варақалари;

ишлатилмаган жавоблар варақалари;

тест синовидан четлаштириш тўғрисидаги расмийлаштирилган далолатномалар, тест синовидан четлаштирилганларнинг жавоблар варақалари ва титул варақалари;

нуқсонли тест материаллари бўйича расмийлаштирилган далолатномалар;

тест синовига келмаган чақирилувчиларга тегишли титул варақалари.

76. Аудитория раҳбари титул варақалари пакетига тест синовида қатнашган чақирилувчиларнинг титул варақалари ва чақирилувчиларнинг рўйхатини солиб, аудитория кузатувчилари ва чақирилувчилар гувоҳлигида Давлат тест марказининг муҳри билан муҳрлайди ҳамда пакет устидаги маълумотларни тўлиқ расмийлаштиради.

Аудитория раҳбари тест синови тугагандан сўнг тест материалларини тест синовларини мувофиқлаштирувчига топширади.

7-БОБ. ТЕСТ СИНОВЛАРИ НАТИЖАСИ БЎЙИЧА

БЕРИЛГАН АПЕЛЛЯЦИЯЛАРНИ КЎРИБ ЧИҚИШ

77. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг тегишли қарори билан мудофаа ишлари бошқармаларида апелляция мурожаатларини кўриб чиқиш бўйича апелляция комиссияси ташкил этилади.

78. Комиссия таркибига тест синовларини мувофиқлаштирувчи, умумтаълим ва ўрта махсус, касб-ҳунар таълими муассасаларидан фанлар бўйича мутахассислар киритилади. Мудофаа ишлари бошқармаси бошлиғи апелляция комиссияси раиси ҳисобланади.

79. Тест синовлари натижасидан норози бўлган чақирилувчи тест синовлари натижаси эълон қилингандан кейин уч иш кун давомида мудофаа ишлари бошқармасида ташкил этилган апелляция комиссиясига ёзма равишда мазкур Низомнинг 13-иловасига мувофиқ тест натижалари бўйича апелляция шикояти бериш ҳуқуқига эга.

80. Апелляция шикоятига чақирилувчи рухсатномасининг нусхаси илова қилинади. Апелляция шикояти қабул қилинганлиги тўғрисида чақирилувчига мазкур Низомнинг 13-иловасига мувофиқ шаклда хабарнома берилади.

81. Чақирилувчи томонидан жавоблар варақаси, саволлар китоби, титул варақаси мазкур Низомда белгиланган тартибда тўлдирилмаган, шунингдек чақирилувчи тест синовидан четлаштирилган бўлса, шунингдек хабарномада белгиланган кун ва вақтда етиб келмаган чақирилувчининг апелляция шикояти кўриб чиқилмайди.

82. Апелляция комиссияси апелляция шикоятини қабул қилиб олган куни Давлат тест марказига апелляция шикоятининг нусхаларини юборади.

83. Давлат тест маркази апелляция шикоятини қабул қилган куни апелляция шикояти асосида чақирилувчиларга тест синови жараёнида тушган саволлар китоби ва жавоблар варақасининг нусхаларини ҳамда тест синовида йўл қўйган нотўғри жавоблари рўйхатини апелляция комиссиясига юборади.

84. Апелляция комиссияси апелляция шикоятини кўриб чиқиш жараёнида Давлат тест маркази вакилларини ҳамда аудитория раҳбари ва кузатувчиларини уларга тегишли масалалар бўйича жалб қилишга ҳақли.

85. Апелляция шикояти кўрилаётган чақирилувчига тест синови жараёнида тушган саволлар китоби ва жавоблар варақасининг нусхаларини ҳамда тест синовида йўл қўйган нотўғри жавоблари рўйхати берилади.

86. Тақдим этилган ҳужжатлар асосида чақирилувчи ўзининг тўлиқ таҳлилини (асосланган ҳолда, яъни мисол ва масалаларни ечган ҳолда) ёзма равишда баён қилади ва қабул қилинган тест материаллари билан бирга апелляция комиссиясига топширади.

87. Апелляция комиссияси икки иш куни давомида апелляция шикоятини кўриб чиқади. Апелляцияни кўриб чиқиш натижаси бўйича баённома тузилади ҳамда баённома апелляция комиссияси раиси ва аъзолари томонидан имзоланади. Апелляция комиссиясининг баённомасидан кўчирма чақирилувчига топширилади. Апелляция комиссияси қарори Давлат тест марказига тақдим этилади.

88. Апелляцияни кўриб чиқиш натижалари бўйича апелляция комиссияси қарори юзасидан чақирилувчи қонун ҳужжатларида белгиланган тартибда судга шикоят қилиши мумкин.

8-БОБ. ЯКУНИЙ ҚОИДАЛАР

89. Мазкур Низом талаблари бузилишида айбдор бўлган шахслар қонун ҳужжатларида белгиланган тартибда жавобгар бўладилар.

90. Мазкур Низом Ўзбекистон Республикаси Ички ишлар вазирлиги, Соғлиқни сақлаш вазирлиги, Меҳнат вазирлиги, Халқ таълими вазирлиги ҳамда Олий ва ўрта махсус таълим вазирлиги Ўрта махсус, касб-ҳунар таълим маркази билан келишилган.

Низомга

1-ИЛОВА

Тест синовларини ўтказиш

ЖАДВАЛИ

20___ йил "___" ____________.

Низомга

2-ИЛОВА

1-шакл

Аудитория раҳбарларининг

РЎЙХАТИ

2-шакл

Кузатувчиларнинг

РЎЙХАТИ

            

Низомга

3-ИЛОВА

Тест синовлари ўтказилиши режалаштирилган

бинолар тўғрисидаги

МАЪЛУМОТ

                

Низомга

4-ИЛОВА

Тест синовларини мувофиқлаштирувчи

сифатида тайинланганлар

РЎЙХАТИ

          

       

Низомга

5-ИЛОВА

Чақирилувчиларнинг умумжисмоний тайёргарлик

даражасини баҳолаш бўйича синовлар ўтказиш

ЖАДВАЛИ

20____ йил "___"____________.

Низомга

6-ИЛОВА

Муддатли ҳарбий хизматга

чақирилаётган чақирилувчига

ЭСЛАТМА

1. Тест синовларига микрокалькулятор, луғат, жадвал, китоб, мобиль телефон, алоқа воситалари ва шпаргалкаларни олиб кириш тақиқланади.

2. Тест вақтида чақирилувчилар:

саволлар китоби ва жавоблар варақасини олгандан сўнг жавоблар варақаси рақами билан саволлар китоби рақами мослигини синчиклаб текшириб чиқади. Саволлар китобининг тест саволларида типографик хато ёки бошқа сабабларга кўра тўла нашр қилинмаган ўринлар ёки бетлар бўлса, дарҳол аудитория раҳбарига хабар беради. Бунда тегишли далолатнома тузилиб, нуқсонли саволлар китоби унга илова қилинади ва чақирилувчи навбатдаги тест синовига киритилади;

жавоблар варақасини тўлдиришда чақирилувчи фақат кўк (ҳаворанг) пастали шарикли ручкадан фойдаланади. Фломастер ва сиёҳли авторучка ва гель ручкадан фойдаланиш ман этилади;

чақирилувчи ўзи ҳақидаги маълумотлар (фамилияси, исми ва отасининг исми)ни жавоблар варақасининг тегишли қисмига ёзади ва имзо қўяди;

чақирилувчи жавоблар варақасининг рақамини чақирилувчи рухсатномасига кўчириб ёзади.

3. Ҳар бир тест саволига фақат битта жавоб белгиланади. Агар битта саволга икки ёки ундан кўп жавоб белгиланса, ушбу жавобга балл берилмайди.

4. Тест синовлари қуйидаги фанлардан ўтказилади ва ҳар бир тўғри жавобга 1 балл берилади:

1-блок математика фанидан 25 та савол, максимал - 25 балл;

2-блок она тили фанидан 25 та савол, максимал - 25 балл;

3-блок Ўзбекистон тарихи фанидан 10 та савол, максимал - 10 балл.

Барча фанлар бўйича максимал - 60 балл йиғилади.

Берилган 60 та саволга жавобларни танлаш учун 1 соат 50 дақиқа вақт ажратилади.

Чақирилувчи ўзи танлаган жавобларини жавоблар варақасининг тегишли блокига мос равишда кўчиради. Бунинг учун тестга ажратилган вақтдан ташқари 20 дақиқа вақт берилади.

5. Тўлдирилган жавоблар варақаси чақирилувчининг билим даражасини белгиловчи асосий ҳужжатдир.

6. Жавоблар варақасининг тўғри тўлдирилиши учун чақирилувчи шахсан жавобгардир.

7. Жавоблар варақасида тегишли доирачаларни нотўғри белгилаган, жавоблар варақасини алмаштирган, фан блоклари ўрнини алмаштириб бўяган, жавоблар варақасининг тегишли блокларида фамилияси, исми ва отасининг исмини ёзмаган, имзо қўймаган, жавоблар варақаси рақамларини бўяган чақирилувчиларнинг эътирози кўриб чиқилмайди.

8. Тест синови пайтида чақирилувчининг аудиториядан чиқиши тақиқланади. Аудиториядан сабабсиз чиққан чақирилувчилар қайтадан тест синовларига қўйилмайди, бундан соғлиғининг ёмонлашуви ва бошқа узрли ҳолатларга кўра тест материалларисиз, аудитория кузатувчиси назорати остида аудиториядан чиқиш ҳолатлари мустасно.

9. Тест давомида чақирилувчининг бир-бири билан гаплашиши, жавобларни бир-бири билан маслаҳатлашиши, жавобларни бир-бирига кўрсатиши, тест материалларини бошқаларга узатиши, тест ҳужжатларидан нусха кўчириши ва бошқаларга ёрдам бериши тақиқланади.

10. Чақирилувчи мазкур қоидаларга риоя қилмаса, у тест синовларини ўтказиш тартибини қўпол равишда бузган ҳисобланади ва далолатнома тузилиб, тест синовидан четлаштирилади.

11. Чақирилувчиларнинг тест натижалари бўйича эътирозлари мудофаа ишлари бошқармалари томонидан қабул қилинади.

Низомга

7-ИЛОВА

Чақирилувчиларнинг умумжисмоний

тайёргарлик даражасини баҳолаш бўйича

РЎЙХАТ

20___ йил "____" ____________________

              

Низомга

8-ИЛОВА

Тест синовида қатнашувчи чақирилувчиларнинг

РЎЙХАТИ

20___ йил "_______" ____________________

         

Низомга

9-ИЛОВА

Танлов натижаларининг

ЯКУНИЙ РЎЙХАТИ

20___ йил 30 январь

        

Низомга

10-ИЛОВА

             

Низомга

11-ИЛОВА

Тест синовларида қатнашувчи

чақирилувчиларнинг аудитория

РЎЙХАТИ

20___ йилнинг "___" ______________

         

      

Низомга

12-ИЛОВА

Тест синовидан четлаштириш тўғрисида

ДАЛОЛАТНОМА

Биз, қуйида имзо чекувчилар шуни тасдиқлаймизки, чақирилувчи

махсус коди ___________, жавоблар варақаси рақами ____________________

соат _____: __________________ дақиқада тест синовидан четлаштирилди.

Изоҳ: мазкур далолатнома чақирилувчининг жавоблар варақаси ва титул варақаси билан биргаликда елимланиб, жавоблар варақаси пакетига солинади.

Низомга

13-ИЛОВА

ТЕСТ НАТИЖАЛАРИ БЎЙИЧА

АПЕЛЛЯЦИЯ ШИКОЯТИ

Менинг қуйидаги эътирозларимни кўриб чиқишингизни сўрайман:

Ариза 20__ йил "___" ___________ соат ________ да кўриб чиқилади.

М.Ў.

(қирқиш чизиғи)

--------------------------------------------------------------------------------------------------------------------------

ХАБАРНОМА ______-сон

Аризангизни кўриб чиқиш учун 20___ йил "___" __________ соат ____да

           

ва чақирилувчи рухсатномангиз билан етиб келишингиз сўралади.

"Ўзбекистон Республикаси қонун ҳужжатлари тўплами",

2016 йил 25 июль, 29-сон, 355-модда