Қишлоқ хўжалиги, мелиорация ва йўл-қурилиш техникаларини давлат рўйхатидан ўтказиш тартиби тўғрисида Низом (ЎзР ВМ 17.04.2019 й. 325-сон қарорига 2-илова)

Вазирлар Маҳкамасининг

2019 йил 17 апрелдаги

325-сон қарорига

2-ИЛОВА

Қишлоқ хўжалиги, мелиорация ва йўл-қурилиш

техникаларини давлат рўйхатидан ўтказиш

тартиби тўғрисида

НИЗОМ

1-БОБ. УМУМИЙ ҚОИДАЛАР

1. Ушбу Низом қишлоқ хўжалиги, мелиорация ва йўл-қурилиш техникалари ҳамда ўзиюрар машиналарнинг (кейинги ўринларда техника деб аталади) давлат рўйхатидан ўтказиш тартибини белгилайди.

2. Техникаларни давлат рўйхатидан ўтказишни назорат қилиш Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси (кейинги ўринларда Инспекция деб аталади) томонидан, давлат рўйхатидан ўтказиш бўйича хизматлар Инспекция ҳузуридаги "Агросаноат мажмуида хизматлар кўрсатиш маркази" давлат унитар корхонаси (кейинги ўринларда Марказ деб аталади) томонидан мазкур Низомга мувофиқ амалга оширилади.

3. Ушбу Низомда қуйидаги асосий тушунчалар қўлланилади:

техниканинг эгаси - техника воситасига мулк ҳуқуқи ёки бошқа ашёвий ҳуқуқлар асосида эгалик қилувчи юридик ёки жисмоний шахс (кейинги ўринларда мулкдор деб аталади);

техникаларни вақтинчалик рўйхатдан ўтказиш - техникани вақтинчалик ҳисобга қўйиш, рўйхатдан ўтказиш ҳақида вақтинчалик техник паспорт ёки техник гувоҳнома ва давлат рақами белгисини бериш;

давлат рақами белгиси (кейинги ўринларда ДРБ деб аталади) - мазкур Низомга 6-иловада белгиланган намунада техникани давлат рўйхатидан ўтказишни ҳисобга олиш учун ҳудудий кодлар ва давлат рақамлари белгиларининг типларига мувофиқ бериладиган махсус рақамли белги;

техникаларни давлат рўйхатидан ўтказиш - техникани доимий ҳисобга қўйиш, техникани рўйхатдан ўтказиш ҳақидаги гувоҳнома ва ДРБни бериш;

рўйхатга олиш жойи - техникаларни давлат рўйхатидан ўтказишни амалга оширувчи Марказнинг жойлашган жойи;

техникаларни қайта рўйхатдан ўтказиш - тегишли ҳуқуқий асослар мавжуд бўлганда техниканинг рўйхатдан ўтказиш ҳужжатларига ўзгартириш ва қўшимчалар киритиш;

техникани қайта жиҳозлаш - бошқа модель ва модификациялар агрегат ва узеллари, эҳтиёт қисмлар ва бутловчи деталлардан фойдаланган ҳолда техниканинг таркибий қисмлари элементлари ва тузилишига ўзгартиришлар киритиш;

давлат рўйхатидан ўтказиш тадбирлари - қонун ҳужжатларига мувофиқ Марказ томонидан техникаларни рўйхатдан ўтказиш, вақтинчалик рўйхатдан ўтказиш, қайта рўйхатдан ўтказиш ва уларни ҳисобдан чиқариш, шунингдек, техникаларни рўйхатга олиш ҳақида гувоҳнома ва ДРБни беришдан иборат давлат рўйхатидан ўтказиш бўйича ҳаракатлар комплекси;

рўйхатдан ўтказиш ҳужжати - техникадан фойдаланишга ҳуқуқ берилганлигини тасдиқловчи, яъни рўйхатдан ўтказиш ҳақида техник паспорт, техник гувоҳнома, шунингдек, техникани рўйхатдан ўтказиш китоби;

қишлоқ хўжалиги, мелиорация ва йўл-қурилиш техникалари - қишлоқ ва ўрмон хўжалигига мўлжалланган барча турдаги тракторлар (ғилдиракли, занжирли ва ярим занжирли); ўзиюрар машиналар (ўзиюрар қишлоқ хўжалиги машиналари, ўзиюрар мелиоратив ҳамда йўл-қурилиш техникалари); трактор тиркамалари; қишлоқ хўжалиги, йўл-қурилиш, мелиоратив ва бошқа мақсадларга мўлжалланган тупроққа ва экинларга ишлов берувчи, юк ортувчи, дон ва уруғни қайта ишлашга мўлжалланган машиналар, чорвачилик, паррандачилик ва ем-хашак ишлаб чиқариш машиналари ва технологик ускуналари, сув насослари, кичик механизация мосламалари.

4. Техникаларни давлат рўйхатидан ўтказиш бўйича хизматлар Марказнинг туман (шаҳар) бўлимлари томонидан амалга оширилади.

Мазкур қарорга 5-илова билан тасдиқланаётган "Ўзбекистон Республикаси Вазирлар Маҳкамаси ҳузуридаги Агросаноат мажмуи устидан назорат қилиш инспекцияси томонидан назорат қилинадиган ва мажбурий техник кўрикка жалб этиладиган қишлоқ хўжалиги, мелиорация ва йўл-қурилиш техникалари, таъмирлаш ва сервис асбоб-ускуналари турларининг рўйхати"даги барча техника ва ускуналар давлат рўйхатидан ўтказилади.

5. Техникаларни давлат рўйхатидан ўтказишда бериладиган ҳамда мазкур Низомга 1-иловадаги намунада ва таснифга мос техник паспорт ҳамда 2-иловадаги намунада ва таснифга мос техник гувоҳнома Марказ томонидан пластик шаклда тайёрланади.

6. Техникаларнинг тузилмаси техник тартибга солиш соҳасидаги норматив ҳуқуқий-ҳужжатлар, Ўзбекистон Республикаси Вазирлар Маҳкамасининг 2016 йил 18 мартдаги 80-сон қарори билан тасдиқланган "Қишлоқ хўжалиги техникалари конструкциясининг хавфсизлиги тўғрисидаги умумий техник регламент" (кейинги ўринларда Техник регламент деб аталади), шунингдек, техника хавфсизлигини таъминлаш соҳасидаги меъёрий ҳужжатлар талабларига мос келиши лозим.

7. Техникага мулк ҳуқуқи асосида эгалик қилувчи шахс (бундан буён мулкдор деб аталади) ёки унинг вакили техникага мулк ҳуқуқи ёки бошқа ашёвий ҳуқуқлар пайдо бўлиши, ўтиши, чекланиши ва тугатилиши кунидан ёки техниканинг ҳуқуқий ҳолати ўзгаришидан бошлаб ўн кун ичида мазкур Низомнинг 19 ва 20-бандларига мувофиқ Марказда техник кўрикдан ўтказиш учун техникани, унинг техник ҳолатидан қатъи назар ва мазкур Низомда назарда тутилган ҳужжатларни тақдим этган ҳолда мурожаат қилиши зарур. Агар мурожаат қилиш муддатининг охирги куни дам олиш, байрам ва бошқа иш куни бўлмаган кунларга тўғри келса, ундан кейинги биринчи иш куни муддатнинг тугаган куни ҳисобланади.

Техникани қайта рўйхатдан ўтказишга олиб келувчи барча ҳолатларда у Марказ томонидан белгиланган тартибда техник кўрикдан ўтказилади.

Техник кўрикдан ўтказишда техниканинг типи, русуми, модели, ДРБ, идентификацияловчи шассиси (рама), кузови ва двигатель рақамининг рўйхатдан ўтказиш ҳужжатларида кўрсатилган маълумотларга тўғри келиши солиштирилади.

8. Ўзи ҳаракатланувчи қурилма (двигатель)га эга бўлган қишлоқ хўжалиги, мелиорация ва йўл қурилиш техникалари бошқа шахсга ўтказилиши ҳақида битимлар нотариус томонидан тасдиқланишидан олдин техника рақам агрегатлари ва бошқа техник параметрларнинг рўйхатдан ўтказиш маълумотларга мос келиши предмети юзасидан текширилиши учун битим амалга оширилган ёки техника рўйхатдан ўтган жой бўйича Марказга тақдим этилиши зарур.

9. Рўйхатдан ўтказиш ҳаракатларини амалга оширишда, шунингдек, нотариус томонидан битимларнинг тасдиқланишидан олдин кўрикдан ўтказишда техникани рўйхатдан ўтказиш ҳужжатларидаги маълумотларда шубҳали ҳолатлар аниқланганда ички ишлар бўлимига белгиланган тартибда сўровнома юборилади, техника бошқа шахсга ўтказилишига тақиқ ёки хатловнинг мавжудлиги юзасидан текширилади.

10. Кўтарувчи механизмлар билан жиҳозланган техникалар (ўзиюрар кранлар)га нисбатан рўйхатдан ўтказиш ҳаракатлари, улар Саноат хавфсизлиги давлат қўмитаси томонидан ҳисобга қўйилгандан (ҳисобдан чиқарилгандан) сўнг амалга оширилади.

11. Давлат рўйхатидан ўтган техникалар ва уларнинг эгалари тўғрисидаги маълумотлар қонун ҳужжатларида белгиланган ҳолатларда суриштирув, дастлабки тергов ва суд органларига тақдим этилиши мумкин.

12. Марказ техникаларнинг техник ҳолати, хавфсизлик талабларига жавоб беришини баҳолаш бўйича ишларни ташкил этиш, шунингдек, иш юритишни олиб бориш Марказ бошлиғи томонидан тасдиқланган тартибга асосан амалга оширилади.

2-БОБ. ТЕХНИКАЛАРНИ ДАВЛАТ

РЎЙХАТИДАН ЎТКАЗИШ

13. Қишлоқ хўжалиги, мелиорация ва йўл-қурилиш техникаларини давлат рўйхатидан ўтказиш мазкур Низомга 3-иловага мувофиқ схема бўйича амалга оширилади.

Мулкдор мазкур Низомнинг 21-бандида кўрсатилган ҳужжатларни ва техникани давлат рўйхатидан ўтказиш учун белгиланган йиғим суммаси тўланганлигини тасдиқловчи ҳужжатни илова қилган ҳолда Марказга ёзма ариза тақдим этади.

Техникаларни рўйхатдан ўтказиш билан боғлиқ аризалар 3 кундан кечиктирмасдан кўриб чиқилади.

14. Техникаларни рўйхатга олишни асосли рад этиш Марказга мурожаат қилинган кундан бошлаб 2 кун ичида амалга оширилади.

15. Техникалар давлат рўйхатидан ўтказилганда мулкдорга Марказ томонидан ДРБ ва техникани давлат рўйхатидан ўтказганлик тўғрисида техник паспорт ёки техник гувоҳнома берилади.

Олдин берилган техникани рўйхатдан ўтказганлик тўғрисидаги ҳужжат ва ДРБ, шунингдек, чет эл ҳужжатлари ва рўйхатдан ўтиш рақамли белгилари мавжуд бўлса Марказга топширилади.

16. Техника давлат рўйхатидан ўтказилганда Марказнинг техникаларни рўйхатдан ўтказиш китобига ва электрон базага техниканинг агрегат рақами ва бошқа техник параметрлари ҳамда мулкдор тўғрисидаги маълумотлар, шунингдек, унинг яшаш (турар) жойи киритилади.

Мулкдорнинг доимий манзили ўзгарганда техника 10 кун муддатда Марказдан рўйхатдан чиқарилиб, янги манзилда рўйхатдан ўтказилиши шарт.

17. Техникаларни давлат рўйхатидан ўтказиш Марказ томонидан қуйидаги ҳолатларда амалга оширилади:

а) Марказда рўйхатдан ўтказилмаган янги техника олинганда;

б) Ўзбекистон Республикаси божхона ҳудудига киритилган техникалар, уларнинг тиркамалари ва ярим тиркамалари эркин айланиши учун (импорт) божхона режимида божхона рўйхатидан ўтказилишида;

в) олдин Марказда рўйхатдан ўтган техниканинг эгаси ўзгарганда;

г) техниканинг рўйхатдан ўтган жойини ўзгартиришни талаб қилувчи, мулкдорнинг яшаш жойи ёки жойлашган манзили ўзгарганда.

18. Техника мулкдор ҳисобланувчи жисмоний ёки юридик шахснинг номига давлат рўйхатидан ўтказилади.

Юридик шахс ташкил этмасдан фаолиятини амалга оширувчи якка тартибдаги тадбиркорлар, деҳқон хўжаликлари, оилавий тадбиркорлик субъектларига тегишли бўлган техникани давлат рўйхатидан ўтказиш ушбу Низом талабларига мувофиқ амалга оширилади.

19. Жисмоний шахсларнинг техникалари уларнинг доимий ёки вақтинчалик яшаш жойида давлат рўйхатидан ўтказилади.

Техникалар 18 ёшга тўлган муомалага лаёқатли жисмоний шахсларнинг номига давлат рўйхатидан ўтказилади. Мерос, васиятнома, ҳадя (мукофот) ёки қонунда белгиланган тартибда оммавий ўйинларда ютиб олинган техникалар вояга етмаган шахслар номига давлат рўйхатидан ўтказилиши мумкин.

20. Юридик шахсларнинг техникаларини давлат рўйхатидан ўтказиш юридик шахсларни давлат рўйхатидан ўтказиш гувоҳномасида кўрсатилган юридик манзили бўйича амалга оширилади.

Юридик мақомга эга бўлмаган филиаллар, алоҳида бўлинмалар ихтиёрида бўлган техникалар уларнинг жойлашган жойи бўйича рўйхатга қўйилиши мумкин.

21. Техникани давлат рўйхатидан ўтказиш учун мулкдор ёки унинг вакили Марказга қуйидаги ҳужжатларни топширади:

техника мулкдори ёки унинг вакилини белгиланган намунадаги аризаси - ушбу Низомга 4-иловага мувофиқ - юридик шахслар учун, 5-иловага мувофиқ - жисмоний шахслар учун;

мулкдор ёки унинг вакили шахсини тасдиқловчи ҳужжат;

техниканинг аввалги мулкдорга берилган техникани рўйхатдан ўтказиш тўғрисидаги техник паспорти ёки техник гувоҳномаси;

техникага бўлган мулк ҳуқуқини тасдиқловчи ҳужжат;

рўйхатга олиш билан боғлиқ йиғимларнинг тўлаганлигини тасдиқловчи ҳужжат.

22. Мулкдор ёки унинг вакили шахсини тасдиқловчи ҳужжатларга қуйидагилар киради:

а) жисмоний шахслар учун - жисмоний шахснинг шахсини тасдиқловчи ҳужжат:

Ўзбекистон Республикаси фуқаролари учун - фуқаролик паспорти;

16 ёшга тўлмаган Ўзбекистон Республикаси фуқаролари учун - туғилганлик ҳақида гувоҳнома;

Ўзбекистон Республикаси ҳарбий хизматчилари учун - ички ишлар органларининг рўйхатдан ўтказилганлик тўғрисидаги ёки ҳарбий қисмларнинг уй ажратиш тўғрисидаги маълумотномасини илова қилган ҳолда ҳарбий қисм ёки ҳарбий муассасалар қўмондонлиги томонидан бериладиган шахсни тасдиқловчи ҳужжат ёки ҳарбий билет (ҳарбий хизматга мажбур фуқароларнинг ҳарбий билетлари бундан мустасно);

чет эл фуқаролари учун - Ўзбекистон Республикасида яшаш гувоҳномаси ёки ички ишлар органининг доимий ёки вақтинчалик рўйхатдан ўтказилган жойи тўғрисидаги белгиси қўйилган чет эл фуқаросининг миллий паспорти ёхуд дипломатик паспорти ёки Ўзбекистон Республикасида аккредитациядан ўтганлигини тасдиқловчи тегишли ҳужжат;

фуқаролиги бўлмаган шахслар учун - фуқаролиги бўлмаган шахсларнинг шахсини тасдиқловчи ички ишлар органларининг доимий ёки вақтинчалик рўйхатдан ўтказилган жойи ҳақидаги белгиси қўйилган Ўзбекистон Республикасида яшаш гувоҳномаси;

б) жисмоний шахсларнинг вакили учун:

нотариус томонидан тасдиқланган жисмоний шахснинг вакили ваколатларини тасдиқловчи ишончнома ёки жисмоний шахс қонуний вакили ваколатларини тасдиқловчи ҳужжат;

вакил шахсини тасдиқловчи ҳужжат (мазкур банднинг "а" кичик бандида кўрсатилган ҳужжатлар);

в) юридик шахслар учун:

юридик шахснинг давлат рўйхатидан ўтказилганлиги тўғрисидаги гувоҳнома нусхаси;

юридик шахснинг раҳбари (директор, раис) томонидан имзоланган ва унинг муҳри билан тасдиқланган (муҳри мавжуд бўлган тақдирда) юридик шахс вакили ваколатларини тасдиқловчи ишончнома;

вакил шахсини тасдиқловчи ҳужжат (мазкур банднинг "а" кичик бандида кўрсатилган ҳужжатлар).

23. Техникага бўлган мулк ҳуқуқи ёки бошқа ашёвий ҳуқуқларни тасдиқловчи ҳужжатларга қуйидагилар киради:

меросга бўлган ҳуқуқ ёки мулкий ҳуқуқлар тўғрисида нотариус томонидан берилган гувоҳнома;

васиятнома;

суднинг қарори;

нотариус томонидан тасдиқланган шартнома (олди-сотди, айирбошлаш, ҳадя, рента ва бошқалар);

ишлаб чиқарувчи ёки махсус савдо ташкилоти (техникани ишлаб чиқарувчи корхона, унинг вакили ёки воситачи ташкилоти) томонидан бериладиган шартнома ва ҳисоб-маълумотнома;

Ўзбекистон Республикаси Давлат активларини бошқариш агентлиги ва унинг ҳудудий бўлинмалари томонидан, Ўзбекистон Республикаси Бош прокуратураси ҳузуридаги Мажбурий ижро бюроси туман (шаҳар) бўлимларининг давлат ижрочилари ҳудудий бошқармаларининг давлат ижрочилари ҳамда аукцион ўтказиш ваколатига эга бошқа ташкилотлар томонидан ташкил этилган аукционларда техникаларга эга бўлишни тасдиқловчи аукцион натижалари тўғрисидаги баённома;

юқори турувчи давлат органининг техникани бир тизим ичида текинга бериш тўғрисидаги қарори (буйруғи, фармойиши);

юридик шахснинг юқори турувчи бошқарув органининг юридик шахснинг устав жамғармасига техникани киритиш тўғрисида ёки шу юридик шахснинг иштирокчисига (таъсисчи, аъзо) юридик шахснинг техникани дивиденд сифатида тўлаш тўғрисидаги қарори (иштирокчилар, таъсисчилар, аъзолар) умумий йиғилишининг баённомаси ёки ягона иштирокчининг қарори);

давлат божхона хизмати органи томонидан берилган божхона юк декларацияси;

шахснинг техникани оммавий ўйинда (лотереяда) ютганлигини тасдиқловчи ҳужжат;

давлат органининг техникани мукофот (ҳадя) сифатида тақдим этганлиги тўғрисидаги қарорининг нусхаси.

Мулк ва бошқарув шаклидан қатъи назар барча қишлоқ хўжалиги, мелиорация ва йўл-қурилиш техникаларининг олди-сотди шартномалари нотариал идоралар орқали амалга оширилади.

24. Тугатилган юридик шахсларнинг техникалари янги ташкил этилган юридик шахсларнинг устав жамғармасига ўтганда, техникаларни давлат рўйхатига олишда унинг ҳуқуқий ворислигини тасдиқловчи ҳужжатга - юридик шахснинг устави ёки таъсис шартномаси киради.

25. Техника суд қарори асосида мусодара қилинганда, етказилган зарарни қоплашга қаратилганда, бошқа шахс ёки давлат эгалигига ўтказилганда давлат рўйхатидан ўтказиш суд қарори ёки аукцион натижалари тўғрисидаги баённома асосида амалга оширилади.

Техниканинг рўйхатда туриш жойини ўзгартиришга олиб келадиган мулкдорнинг яшаш (турар) жойи ёки жойлашган жойи (почта манзили) ўзгариши муносабати билан техникани давлат рўйхатидан ўтказишда, мазкур Низомнинг 23-банди бешинчи хатбошида келтирилган техникага бўлган мулк ҳуқуқи ёки бошқа ашёвий ҳуқуқларни тасдиқловчи ҳужжатларни тақдим этиш талаб этилмайди.

26. Давлат рўйхатидан ўтказилган барча турдаги тракторлар (ғилдиракли, занжирли ва ярим занжирли), ўзиюрар машиналар (ўзиюрар қишлоқ хўжалиги машиналари, ўзиюрар мелиоратив ҳамда йўл-қурилиш техникалари), трактор тиркамаларига техник паспорт берилади;

техник паспорт берилмайдиган қишлоқ хўжалиги, йўл-қурилиш, мелиоратив ва бошқа мақсадларга мўлжалланган тупроққа ва экинларга ишлов берувчи, юк ортувчи, дон ва уруғни қайта ишлашга мўлжалланган машиналарга, чорвачилик, паррандачилик ва ем-хашак ишлаб чиқариш машиналари ва технологик ускуналарига, кичик механизация мосламаларига техник гувоҳнома берилади.

27. Марказда қуйидаги техникалар давлат рўйхатидан ўтказилмайди:

фақат конларда, шахта ва карьерларда қўлланиладиган махсус техникалар;

Ички ишлар органларида рўйхатга олинган транспорт воситалари;

трамвай ва троллейбуслар;

Ўзбекистон Республикаси Мудофаа вазирлиги, Ўзбекистон Республикаси Давлат хавфсизлик хизмати, Ўзбекистон Республикаси Ички ишлар вазирлигига тегишли бўлган ҳарбий ва бошқа техникалар.

Қуйидаги ҳолатларда Марказ томонидан техникани давлат рўйхатига қўйиш рад этилади:

а) мазкур Низомда белгиланган тегишли ҳужжатлар тақдим этилмаганда;

б) техника хизмат муддатини ўтаб бўлгани ва фойдаланишга яроқсизлиги туфайли ҳисобдан чиқарилган бўлса;

в) техника конструкциясига киритилган ўзгартиришлар техник тартибга солиш соҳасидаги норматив ҳужжатлар талабларига, техника хавфсизлигини таъминлаш нормаларга жавоб бермайдиган бўлса;

г) техник регламентга мос бўлмаган эҳтиёт қисмлар ва агрегатлардан тайёрланган ва йиғилган бўлса;

д) техникага ишлаб чиқарувчи томонидан қўйилган идентификация тамғасини яшириш, сохталаштириш, ўзгартириш, йўқ қилиш аломатлари ёхуд тақдим этилган ҳужжатларнинг сохталаштирилиши, тақдим этилган ҳужжатларда ёки рўйхатга доир ҳужжатларда кўрсатиб ўтилган маълумотларга техника ва рақам агрегатларининг номувофиқлиги аниқланганда;

е) техниканинг рақамланган агрегати қидирувда эканлиги ёки тақдим этилган ҳужжатларнинг йўқолганлиги (ўғирланганлиги) тўғрисида маълумотлар мавжуд бўлганда.

Мазкур банднинг "д" ва "е" кичик бандларида кўрсатилган ҳолатлар аниқланганда Марказ томонидан тегишли ҳуқуқни муҳофаза қилиш органларига хабар берилади.

Мулкдор ёки унинг вакили техникани давлат рўйхатидан ўтказишга рад этиш асосларини бартараф этиб, қайта мурожаат қилишга ҳақли. Бундай ҳолда йиғимлар ундирилмайди.

3-БОБ. ТЕХНИКАЛАРНИ ДАВЛАТ

РЎЙХАТИДАН ЎТКАЗИШДА ДАВЛАТ

РАҚАМИ БЕЛГИЛАРИНИ БЕРИШ

28. Қишлоқ хўжалиги, мелиорация ва йўл-қурилиш техникалари, ўзиюрар машиналар ҳамда тиркамаларга орқа қисмига жойлаштириш учун мазкур Низомга 6-иловадаги намунада тайёрланган битта ДРБ берилади.

ДРБ ундаги рақамларнинг ўсиб бориш тартибига мувофиқ равишда берилади:

юридик шахсларга - I ва III типли ДРБ;

жисмоний шахсларга - II ва IV типли ДРБ.

Илгари фойдаланишда бўлган ДРБ кирим қилиниши ва белгиланган тартибда сарфланиши (берилиши) мумкин.

29. Техника эгаси берилган ДРБдан мақсадли фойдаланиши шарт.

30. Қишлоқ хўжалиги, йўл-қурилиш, мелиоратив ва бошқа мақсадларга мўлжалланган тупроққа ва экинларга ишлов берувчи, юк ортувчи, дон ва уруғни қайта ишлашга мўлжалланган машиналар, чорвачилик, паррандачилик ва ем-хашак ишлаб чиқариш машина ва технологик ускуналари, кичик механизация мосламалари, сув насослари, уруғ саралагичлар техник гувоҳномага мос равишда рақамланади ва рама ёки асосий қисмнинг кўринадиган жойига инвентарь рақами шаклида ёзилади.

4-БОБ. ТЕХНИКАЛАРНИ ВАҚТИНЧАЛИК

РЎЙХАТДАН ЎТКАЗИШ

31. Техникаларни вақтинчалик рўйхатдан ўтказиш мазкур Низомга 3-иловага мувофиқ схема бўйича амалга оширилади.

Мулкдор мазкур Низомнинг 33, 34 ва 35-бандларида кўрсатилган ҳужжатларни ва техникани вақтинчалик рўйхатдан ўтказиш учун белгиланган йиғим суммаси тўланганлигини тасдиқловчи ҳужжатни илова қилган ҳолда Марказга ёзма ариза тақдим этади.

Техникаларни рўйхатдан ўтказиш билан боғлиқ аризалар 3 кундан кечиктирилмасдан кўриб чиқилади ҳамда 1 ва 2-иловалардаги намунада, қоғозда тайёрланган "вақтинчалик техник паспорт" ва "вақтинчалик техник гувоҳнома" берилади ва заруратга кўра ҳар йили узайтирилади.

32. Техникаларни вақтинчалик рўйхатдан ўтказиш Марказ томонидан қуйидаги ҳолатларда амалга оширилади:

а) Ўзбекистон Республикаси ҳудудига вақтинчалик олиб кириш божхона режимига олиб келинган техникалар давлат божхона хизмати органлари томонидан расмийлаштирилганда;

б) техника тажриба намуналари синовларидан ўтказилганда;

в) техника лизинг (сублизинг) шартномасига асосан лизингга (сублизингга) берилганда;

г) техника ҳужжатларининг қонунийлигига аниқлик киритилиши талаб этиладиган ҳолатларда;

д) техника мулкдорининг манзили ўзгарганда, техниканинг вақтинчалик рўйхатдан ўтказиш жойини ўзгартириш талаб этилганда;

е) олти ойдан кўп бўлган муддатга унинг манзили вақтинчалик ўзгарганда, техника рўйхатда турган ҳудуддан чиқиб кетганда;

ё) эгалик ҳуқуқи белгиланмаганда.

33. Ўзбекистон Республикаси ҳудудига олиб келинган техникани вақтинчалик рўйхатдан ўтказиш учун Марказга қуйидаги ҳужжатлар тақдим этилади:

божхона юк декларацияси;

мулкдорнинг шахсини тасдиқловчи ҳужжат ёки юридик шахснинг гувоҳномаси нусхаси;

мулкдорнинг ишончли вакили ваколатларини тасдиқловчи ҳужжат (ишончнома) ва шахсини тасдиқловчи ҳужжат;

техникаларнинг тўхташ (сақлаш) жойи тўғрисида маълумотлар;

вақтинчалик рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Ўзбекистон Республикаси ҳудудига олиб келинган ва вақтинчалик олиб кириш божхона режимига расмийлаштирилган техникани вақтинчалик рўйхатдан ўтказиш вақтинчалик олиб кириш рухсатномасида кўрсатилган муддатда амалга оширилади.

34. Синовдан ўтказилаётган техникаларни вақтинчалик рўйхатдан ўтказиш учун қуйидаги ҳужжатлар тақдим этилади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжат ва ишончнома нусхаси;

Марказ томонидан расмийлаштирилган алоҳида техниканинг тажриба намунасини техник кўрикдан ўтказиш далолатномаси;

техника тажриба намунасининг тўхташ (сақлаш) жойи тўғрисидаги маълумотлар.

Тажриба намунаси бўлган техникани вақтинчалик рўйхатдан ўтказиш белгиланган синов ўтказиш муддатида амалга оширилади.

Бу ҳақда мазкур техникага техник паспорт ёки техник гувоҳнома ва "TAJRIBA" типидаги ДРБ берилади.

35. Лизингга (сублизингга) берилаётган техникани вақтинчалик рўйхатдан ўтказиш учун унинг эгаси қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжат ва ишончнома нусхаси;

техниканинг рўйхатдан ўтказиш тўғрисидаги гувоҳномаси ёки ихтисослаштирилган савдо корхонаси томонидан бериладиган ҳисоб-маълумотнома;

техниканинг лизинг ёки сублизинг шартномаси;

юридик шахслар учун - техникаларнинг тўхташ (сақлаш) жойи тўғрисида маълумот;

рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

36. Бир шахс томонидан бошқа шахсга лизинг ёки сублизинг шартномаси доирасида вақтинчалик эгалик қилиш ва фойдаланишга бериш учун олинган техникани вақтинчалик рўйхатдан ўтказиш, тузилган лизинг (сублизинг) шартномаси талабларидан келиб чиқиб, лизинг берувчи ёки лизинг олувчи номига лизинг (сублизинг) шартномасида кўрсатилган муддатда амалга оширилади. Агар лизинг шартномасида лизингга олувчи номига техникани вақтинчалик рўйхатдан ўтказиш ҳақида бир хилдаги қоидалари мавжуд бўлмаса, унда техника лизингга берувчи номига рўйхатдан ўтказилади.

Техникани лизингга берувчига вақтинчалик рўйхатдан ўтказиш лизингга берувчининг манзили (яшаш жойи) бўйича, лизингга олувчига эса - лизингга олувчининг манзили (яшаш жойи) бўйича амалга оширилади.

37. Лизингга (сублизингга) берилаётган техникани вақтинчалик рўйхатдан ўтказиш шартномада кўрсатилган муддатда техникани рўйхатдан ўтказиш тўғрисидаги техник паспорт ёки техник гувоҳнома берилган ҳолда амалга оширилади.

38. Лизингга (сублизингга) берилаётган вақтинчалик рўйхатдан ўтказилган техниканинг рўйхатдан ўтказиш китобига техникани вақтинчалик рўйхатдан ўтказиш муддатининг тугаши, лизинг (сублизинг) шартномасининг рақами ва санасини кўрсатган ҳолда "Лизинг, 20___ йил "___" _______даги "___" -сон лизинг (сублизинг) шартномасига асосан вақтинчалик рўйхатдан ўтказиш ____________ гача" деган ёзув киритилади.

39. Лизингга олувчига техника мулк ҳуқуқи асосида ўтишини назарда тутувчи лизинг (сублизинг) шартномасининг амал қилиш муддати тугаши билан техника лизинг (сублизинг) шартномаси ва лизинг берувчининг техникага бўлган мулк ҳуқуқининг лизингга олувчига ўтганлигини тасдиқловчи топшириш-қабул қилиш далолатномаси асосида лизингга олувчининг номига доимий давлат рўйхатидан ўтказилади.

Лизингга олувчига техникага бўлган мулк ҳуқуқининг ўтиши назарда тутилмаган лизинг (сублизинг) шартномасининг амал қилиш муддати тугаши билан лизингга олувчига техника фақат нотариус томонидан тасдиқланган техникани бошқа шахсга ўтказиш шартномаси (олди-сотди, айирбошлаш, ҳадя, рента ва бошқалар) асосида рўйхатдан ўтказилиши мумкин.

Лизингга берувчининг ёзма сўровига асосан техникалар лизингга олувчи номига ҳам расмийлаштирилиши мумкин. Бунда техника лизингга берувчи номидан тақиққа олинади ва унинг хати билан тақиқдан чиқарилади. Техника лизинг олувчидан олиниб, бошқага ўтказилганда янгидан рўйхатдан ўтказилади.

40. Лизингга (сублизингга) олувчи номига рўйхатдан ўтказилган техникани лизингга берувчига қайтариб берилишини назарда тутувчи лизинг шартномасини бекор қилган ҳолда, кўрсатилган техника лизинг шартномасининг бекор қилинганлиги ҳақида ҳужжат ёки техникани лизингга берувчига қайтарилишини назарда тутувчи суд ёки бошқа органлар ижро ҳужжатининг нусхаси илова қилинган ҳолда лизингга берувчининг аризасига асосан лизингга берувчи номига рўйхатдан ўтказилади.

41. Давлат рўйхатидан (вақтинчалик рўйхатдан) ўтказиш учун тақдим этилган техникаларнинг ҳужжатлари Марказда уларнинг асли эканлигига ёки улардаги маълумотларнинг қонунийлигига шубҳа туғдирса ёхуд бошқа аниқлик киритилиши лозим бўлган ҳолатлар мавжуд бўлса, лекин, шу билан бирга, мазкур Низомнинг 27-бандида кўрсатилган техникани давлат рўйхатидан ўтказишга рад қилиш учун асослар мавжуд бўлмаса, олти ойдан ошмаган муддатда вақтинчалик рўйхатга олинади.

Кўрсатилган техникаларни вақтинчалик рўйхатдан ўтказиш мазкур Низомнинг 21, 33 ёки 35-бандларига мувофиқ тақдим этилган ҳужжатлар асосида амалга оширилади.

Вақтинчалик рўйхатдан ўтказиш муддати давомида Марказ бошқа ваколатли органлар билан ўзаро ҳамкорликда тақдим қилинган ҳужжатларни текшириш бўйича тегишли тадбирларни амалга оширади. Шубҳалар тасдиқланганда ва рўйхатдан ўтказиш учун асослар пайдо бўлганда, Марказ аввалги эгасига техниканинг рўйхатдан ўтказилганлигини тиклаб бериб, техниканинг рўйхатдан ўтганлигини бекор қилади ёхуд қонун ҳужжатларида белгиланган бошқа чораларни кўради. Марказнинг шубҳалари тасдиқланмаганда ёки техниканинг вақтинчалик рўйхатдан ўтказиш муддати тугаганда, у Марказ томонидан умумий асосларга кўра рўйхатдан ўтказилади ёки вақтинчалик рўйхатдан ўтган муддати узайтирилади.

42. Техниканинг вақтинчалик рўйхатдан ўтказиш жойи ўзгартирилиши талаб этилаётган мулкдорнинг яшаш жойи ёки жойлашган манзили ўзгарганда, техникани вақтинчалик рўйхатдан ўтказиш учун мулкдор ёки унинг вакили ҳудудий Марказга қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжат ва ишончнома нусхаси;

мулкдорнинг яшаш жойи ёки жойлашган манзили ўзгарганлигини тасдиқловчи ҳужжатлар (яшаш жойи бўйича доимий яшаш жойи бўйича рўйхатга олинганлиги белгиси билан паспорт, юридик шахснинг давлат рўйхатидан ўтказилганлиги тўғрисидаги гувоҳнома ва бошқалар) нусхалари;

юридик шахслар учун - техникаларнинг тўхташ (сақлаш) жойи тўғрисида маълумот;

вақтинчалик рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Ушбу асос бўйича техникани вақтинчалик рўйхатдан ўтказиш, тегишли асосларнинг мавжуд ҳолатларидан ташқари, олдинги вақтинчалик рўйхатдан ўтказиш муддатини ўзгартирмаган ҳолда амалга оширилади.

43. Эгалик ҳуқуқи белгиланмаган техникаларни вақтинчалик рўйхатдан ўтказиш учун тақдим этиладиган ҳужжатлар:

юридик ёки жисмоний шахснинг аризаси;

техниканинг техник маълумотлари (шасси, двигатель ва бошқа рақамлари);

маҳалла фуқаролар йиғинидан 3 йилдан ортиқ муддатда фойдаланиб келаётганлиги тўғрисида ҳамда 3 нафар қўшниси имзолаган маълумотнома;

ички ишлар бўлимидан шу рақамдаги техника ёки қисмларни ўғирланган техникалар рўйхатида мавжуд ёки мавжуд эмаслиги тўғрисида маълумотнома;

техникани сотиб олгани ёки йиғилганлиги тўғрисида тақдим этувчининг тушунтириш хати ва шу техника бошқага тегишли бўлган тақдирда қайтарилиши тўғрисида тилхат;

вақтинчалик рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Уч йил давомида ушбу техникага даъвогар чиқмаган тақдирда, у тақдим этган юридик ёки жисмоний шахсга доимий мулк ҳуқуқи билан расмийлаштирилади.

44. Техника сақланаётган ва унинг мулкдорининг яшаш жойи олти ойдан кўп бўлган муддатга вақтинчалик ўзгарганда, техника рўйхатдан ўтган ҳудуддан ташқарига вақтинча олиб чиқиб кетилганда, вақтинчалик рўйхатдан ўтказиш учун қуйидаги ҳужжатлар тақдим этилади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжат ва ишончнома;

мулкдорнинг яшаш жойи ёки жойлашган манзили вақтинчалик ўзгарганлик ҳолатларини тасдиқловчи ҳужжатлар (рўйхатга қўйилганлиги белгиси билан паспорт, хизмат сафари тўғрисидаги гувоҳнома ва бошқалар), нотариус томонидан тасдиқланган ва техникани вақтинчалик фойдаланишга олганлигини тасдиқловчи ҳужжатлар нусхалари (шартнома, ишончнома ва ҳ.к.);

юридик шахслар учун - техниканинг тўхташ (сақлаш) жойи тўғрисида маълумот;

вақтинчалик рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

5-БОБ. БОШҚА ШАХСЛАРГА ЎТКАЗИШ

БИЛАН БОҒЛИҚ БЎЛМАГАН ТЕХНИКАЛАР

БИЛАН КЕЛИШУВЛАРНИ ҲИСОБГА ҚЎЙИШ

45. Нотариус, шунингдек, қонун ҳужжатларида назарда тутилган ҳолатларда эса консул томонидан ҳам тасдиқланган қишлоқ хўжалиги, мелиорация ва йўл-қурилиш техникалари ҳамда ўзиюрар техникалардан фойдаланиш ва (ёки) тасарруф этиш ишончномалари (юридик шахслар томонидан ўз ходимларига берилган техникалардан фойдаланиш ва (ёки) тасарруф этиш ишончномалари бундан мустасно), ижара, текинга фойдаланиш ва техникаларни гаровга қўйиш шартномалари, техниканинг рўйхатдан ўтиш жойи бўйича Марказда техникаларни рўйхатдан ўтказмасдан ҳисобга қўйилади.

46. Мазкур Низомнинг 45-бандида кўрсатилган ҳужжатларни ҳисобга қўйиш учун нотариус ва консуллар томонидан уларнинг ёзма (электрон) шакллари Марказга юборилади ёки техникаларни ҳисобга қўйиш тўғрисидаги маълумотлар рўйхатга олиш китобига ва электрон маълумотлар базасига киритилади.

Барча турдаги техникаларнинг кўрсатилган ҳужжатлари ҳисобга қўйиш учун Марказга:

мулкдорнинг ёки унинг вакилининг шахсини тасдиқловчи ҳужжати;

техниканинг рўйхатдан ўтказилганлиги тўғрисидаги техник паспорт ёки техник гувоҳнома;

нотариус томонидан тасдиқланган ҳисобга қўйиладиган ҳужжатнинг иккита нусхаси (ишончнома биттадан ортиқ ишончли шахсга берилган тақдирда, Марказга ишончли шахслар сони бўйича ишончномалар нусхалари, шунингдек, Марказга битта нусхаси) берилиши лозим.

47. Мазкур Низомнинг 45-бандида назарда тутилган ҳужжатларни ҳисобга қўйиш, ҳисобга қўйиладиган ҳужжатлар ҳақидаги маълумотларни техникаларнинг рўйхатдан ўтказиш китобига киритиш йўли билан амалга оширилади, унга ҳужжатнинг шакли илова қилинади.

Мазкур Низомнинг 45-бандида кўрсатилган ҳужжатларни ҳисобга қўйишда Марказнинг рўйхатдан ўтказиш ҳаракатларини амалга оширишда белгиланган йиғим ундирилади.

6-БОБ. ТЕХНИКАЛАРНИ ҚАЙТА

РЎЙХАТДАН ЎТКАЗИШ

48. Техникаларни қайта рўйхатдан ўтказиш мазкур Низомга 3-иловага мувофиқ схема бўйича амалга оширилади.

Мулкдор мазкур Низомнинг 50, 51, 52, 54, 55 ва 56-бандларида кўрсатилган ҳужжатларни ва техникани қайта рўйхатдан ўтказиш учун белгиланган йиғим суммаси тўланганлигини тасдиқловчи ҳужжатни илова қилган ҳолда Марказга ёзма ариза тақдим этади.

Техникаларни қайта рўйхатдан ўтказиш билан боғлиқ аризалар 3 кундан кечиктирмасдан кўриб чиқилади.

49. Техникаларни қайта рўйхатдан ўтказиш қуйидаги ҳолатларда амалга оширилади:

а) мулкдор - жисмоний шахснинг фамилияси, исми, отасининг исми ўзгарганда, шунингдек, мулкдор - юридик шахс қайта ташкил этилганда ёки номланиши ўзгарганда;

б) техниканинг рўйхатдан ўтказиш жойини ўзгартиришни талаб қилмаган ҳолатда мулкдорнинг яшаш жойи ёки жойлашган манзили ўзгарганда;

в) юридик шахсларга тегишли техникаларнинг сақлаб туриладиган жойи ўзгарганда;

г) техникаларнинг ранги ва (ёки) агрегат рақами ўзгарганда;

д) техника қайта жиҳозланганда;

50. Мулкдор - жисмоний шахснинг фамилияси, исми, отасининг исми ўзгарганда, шунингдек, мулкдор - юридик шахс қайта ташкил этилганда ёки номланиши ўзгарганда техникани қайта рўйхатдан ўтказиш учун мулкдор ёки унинг вакили Марказга қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

мулкдор - жисмоний шахснинг фамилияси, исми, отасининг исми ўзгарганлигини (ФҲДЁ органларининг ёки хорижга чиқиш-келиш ва фуқароликни расмийлаштириш бўлимининг маълумотномаси), шунингдек, мулкдор - юридик шахснинг қайта ташкил этилиши ёки номланиши ўзгарганлигини (юридик шахснинг давлат рўйхатидан ўтганлиги тўғрисида маълумот ва юридик шахснинг бошқарув органи қарори) тасдиқловчи ҳужжат;

қайта рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Мулкдор - жисмоний шахснинг фамилияси, исми, отасининг исми ўзгарганда, шунингдек, мулкдор - юридик шахс қайта ташкил этилганда ёки номланиши ўзгарганда техниканинг рўйхатга олиш картасига тегишли ўзгартиришлар киритилади, илгари берилган техниканинг рўйхатдан ўтказилганлиги тўғрисидаги техник паспорт ёки техник гувоҳнома эса техника эгаси ҳақида янги маълумотларни кўрсатган ҳолда алмаштирилади.

51. Мулкдорнинг рўйхатдан ўтган жойини ўзгартиришни талаб этмайдиган мулкдорнинг яшаш (турган) жойи ёки жойлашган жойи (почта манзили) ўзгарганда техникани қайта рўйхатдан ўтказиш учун мулкдор ёки унинг вакили Марказга қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

мулкдорнинг яшаш (турган) жойи ёки жойлашган жойи (почта манзили) ўзгарганлигини тасдиқловчи ҳужжат (яшаш жойи бўйича рўйхатдан ўтказилганлиги тўғрисидаги белги билан паспорт, юридик шахснинг давлат рўйхатидан ўтказилганлиги тўғрисидаги техник паспорт ёки техник гувоҳнома ва бошқалар);

қайта рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Мулкдорнинг рўйхатдан ўтган жойини ўзгартиришни талаб этмайдиган мулкдорнинг яшаш жойи ёки жойлашган манзили ўзгарганда техниканинг рўйхатга олиш китоби (картаси)га тегишли ўзгартиришлар киритилади, илгари берилган техниканинг рўйхатдан ўтказилганлиги тўғрисидаги техник паспорт ёки техник гувоҳнома эса мулкдорнинг янги яшаш жойи ёки жойлашган манзилини кўрсатган ҳолда алмаштирилади.

52. Юридик шахсларга тегишли техникаларнинг сақлаб туриладиган жойи ўзгарганда техникани қайта рўйхатдан ўтказиш учун мулкдор ёки унинг вакили Марказга қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

техникаларнинг сақлаб туриладиган жойи ўзгарганлигини тасдиқловчи ҳужжат;

қайта рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Техникаларнинг сақлаб туриладиган жойи ўзгарганда техниканинг рўйхатга олиш китоби (картаси)га тегишли ўзгартиришлар киритилади.

53. Техникага ўзгартириш киритиш ва уни қайта жиҳозлаш мулкдорнинг мазкур Низомга 7-иловага мувофиқ берган аризасига ва Марказ томонидан тегишли муассасанинг хулосаси асосида бериладиган мазкур Низомга 8-иловага мувофиқ берилган рухсатномаси билан амалга оширилади.

54. Техниканинг ранги ва (ёки) агрегат рақами ўзгарганда техникани қайта рўйхатдан ўтказиш учун мулкдор ёки унинг вакили ҳудудий Марказга қуйидаги ҳужжатларни тақдим этади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

агрегатнинг қонуний олинганлигини тасдиқловчи ҳужжат (ҳисоб-маълумотнома, нотариус томонидан тасдиқланган олди-сотди шартномаси);

техникани таъмирлаш ва техник хизмат кўрсатиш бўйича махсус корхонада агрегатнинг алмаштирилганлигини ёки ранги ўзгартирилганлигини тасдиқловчи ҳужжат;

қайта рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Техниканинг ранги ва (ёки) агрегат рақами ўзгарганда техниканинг рўйхатга олиш китоби (картаси)га тегишли ўзгартиришлар киритилади, илгари берилган техникани рўйхатдан ўтказиш тўғрисидаги техник паспорт ёки техник гувоҳнома эса техниканинг янги ранги ва (ёки) агрегат рақамини кўрсатган ҳолда алмаштирилади.

55. Техника қайта жиҳозлаганда уни қайта рўйхатдан ўтказиш қуйидаги ҳужжатлар асосида амалга оширилади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

рақамли агрегатлар (ҳисоб-маълумотнома, нотариус томонидан тасдиқланган олди-сотди шартномаси) ва техника қайта жиҳозланганда ишлатилган бошқа деталлар олинганлигининг қонунийлигини тасдиқловчи ҳужжатлар;

Марказ томонидан берилган техникани қайта жиҳозлашга рухсати бўлган техникани таъмирлаш ва техник хизмат кўрсатиш бўйича махсус корхонада қайта жиҳозлашни амалга оширганликни тасдиқловчи ҳужжат;

газ баллони ускуналарини техникага қонун ҳужжатларида белгиланган тартибда ўрнатиш далолатномасининг нусхаси ва газ баллонларининг мувофиқлик сертификатининг нусхаси (газ баллони ускунаси ўрнатилган ҳолда қайта жиҳозланган техникалар учун);

ушбу техникада қайта жиҳозлашни амалга ошириш учун Марказ томонидан берилган рухсатноманинг нусхаси (тегишли гувоҳномага эга бўлган техникани таъмирлаш ва унга техник хизмат кўрсатиш бўйича ихтисослаштирилган корхоналарда техника қайта жиҳозланган ҳолатлар бундан мустасно);

қайта рўйхатдан ўтказиш учун белгиланган йиғимларнинг тўланганлигини тасдиқловчи ҳужжат.

Техникани қайта жиҳозлашни амалга оширганда техниканинг рўйхатга олиш китоби (картаси)га тегишли ўзгартиришлар киритилади, илгари берилган техникани рўйхатдан ўтказиш тўғрисидаги техник паспорт ёки техник гувоҳнома эса техниканинг янги агрегат рақами кўрсатилган ҳолда алмаштирилади.

56. Техниканинг рўйхатдан ўтказилганлиги тўғрисидаги техник паспорт ёки техник гувоҳнома яроқсиз ҳолга келганда, шикастланганда ёки ўғирланганда ва (ёки) ДРБ яроқсиз ҳолга келганда, шикастланганда ёки ўғирланганда уларнинг дубликатини бериш қуйидаги ҳужжатлар асосида амалга оширилади:

мулкдор ёки унинг вакилининг (Низомга 4 ва 5-иловадаги намунада) аризаси;

мулкдор ёки унинг вакилининг шахсини тасдиқловчи ҳужжати;

техниканинг рўйхатдан ўтказилганлиги тўғрисидаги техник паспорт ёки техник гувоҳнома (у яроқсиз ҳолга келганда);

шикастланган ДРБлар (улар шикастланганда);

ички ишлар органларининг техниканинг рўйхатдан ўтказилганлиги тўғрисидаги техник паспорт ёки техник гувоҳноманинг ва (ёки) ДРБлар ўғирланганлиги тўғрисидаги маълумоти;

дубликат ҳужжат олиш учун белгиланган йиғимларнинг тўланганлигини тасдиқловчи ҳужжат.

Техникани рўйхатдан ўтказиш гувоҳномаси яроқсиз ҳолга келганда, шикастланганда ёки ўғирланганда техникани рўйхатдан ўтказиш китоби (картаси) маълумотлари асосида Марказ техника воситасининг рўйхатдан ўтказилганлиги тўғрисидаги техник паспорт ёки техник гувоҳноманинг дубликатини беради.

ДРБлар шикастланганда, йўқолганда ёки ўғирланганда техниканинг рўйхатдан ўтказиш маълумотлари асосида белгиланган миқдорда тўловлар амалга оширилгач, Марказ янги ДРБ берилишини таъминлайди.

ДРБлар дубликатининг йўқолган ёки ўғирланганларининг ўрнига қайта дубликат берилишига йўл қўйилмайди.

ДРБлар шикастланганда Марказ буюртмасига асосан дубликати тайёрланиши ва қайта фойдаланилиши мумкин.

Амалга оширилган рўйхатга олиш тўғрисидаги маълумотлар (техниканинг рўйхатга олинганлиги тўғрисидаги техник паспорт ёки техник гувоҳноманинг дубликатини, янги ДРБни ёки дубликатини бериш) техниканинг рўйхатга олиш китоби (картаси)га киритилади.

7-БОБ. ТЕХНИКАЛАРНИ ҲИСОБДАН ЧИҚАРИШ

57. Техникаларни ҳисобдан чиқариш мазкур Низомга 3-иловага мувофиқ схема бўйича амалга оширилади.

Мулкдор мазкур Низомнинг 59 ва 61-бандларида кўрсатилган ҳужжатларни ва техникани ҳисобдан чиқариш учун белгиланган йиғим суммаси тўланганлигини тасдиқловчи ҳужжатни илова қилган ҳолда Марказга ёзма ариза тақдим этади.

Техникаларни ҳисобдан чиқариш билан боғлиқ аризалар 3 кундан кечиктирмасдан кўриб чиқилади.

58. Расмийлаштирилган божхона юк декларациясига асосан техника Ўзбекистон Республикаси ҳудудидан товар сифатида четга чиқарилганда ҳамда техника кейинги фойдаланувга яроқсиз деб ҳисобланганда Марказ ҳисобидан чиқарилади.

59. Расмийлаштирилган божхона юк декларациясига асосан Ўзбекистон Республикаси ҳудудидан техника товар сифатида четга чиқарилганда техникани ҳисобдан чиқариш қуйидаги ҳужжатларга асосан амалга оширилади;

мулкдор ёки унинг вакилининг аризаси;

мулкдор ёки унинг вакилининг шахсини тасдиқловчи ҳужжати;

расмийлаштирилган божхона юк декларацияси;

техникани рўйхатдан ўтказиш тўғрисида гувоҳнома.

Техника унинг чет давлат ҳудудига чиқарилганлиги муносабати билан ҳисобдан чиқарилганда, олдинги ДРБ Марказ томонидан вақтинчалик (бир марталик қоғозли транзит) йўл ҳаракатида иштирок этиш учун рухсат этилган техникалар учун ДРБларга алмаштирилади, техниканинг рўйхатдан ўтказилганлиги тўғрисидаги техник паспорт ёки техник гувоҳномада ҳисобдан чиқаришнинг сабаблари, белгиланган манзил ва ҳисобдан чиқариш санаси тўғрисидаги маълумотлар ёзиб қўйилади.

Ўзбекистон Республикасига вақтинчалик олиб келинган чет давлат ёки халқаро ташкилотлар техникани уларнинг Ўзбекистон Республикаси ҳудудидан чиқариб кетилиши муносабати билан ҳисобдан чиқарганда аризачиларга техникани ҳисобдан чиқарганлик тўғрисидаги белги билан техниканинг рўйхатдан ўтказилганлиги тўғрисидаги техник паспорт ёки техник гувоҳнома берилади, шунингдек, чет давлатларнинг рўйхатдан ўтган техникаларининг ДРБлари қайтариб берилади, улар мавжуд бўлмаганда - вақтинчалик (бир марталик қоғозли транзит) йўл ҳаракатида иштирок этиш учун рухсат этилган техникалар учун ДРБлар берилади.

60. Техниканинг рўйхатдан ўтказиш жойини ўзгартиришни талаб қилмайдиган ҳолатда мулкдорнинг яшаш жойи ёки жойлашган манзили ўзгарганда техникани ҳисобдан чиқариш ҳудудий Марказ томонидан техниканинг рўйхатдан ўтган янги жойи бўйича рўйхатдан ўтган техникалар китоби (картаси)га ва электрон маълумотлар базасига тегишли маълумотларни киритган ҳолда амалга оширилади.

61. Техника кейинги фойдаланувга яроқсиз деб ҳисобланганда уни ҳисобдан чиқариш қуйидаги ҳужжатлар асосида амалга оширилади:

мулкдор ёки унинг вакилининг аризаси;

мулкдор ёки унинг вакилининг шахсини тасдиқловчи ҳужжати;

техниканинг рўйхатдан ўтказилганлиги тўғрисидаги ҳужжат;

техникани кейинги фойдаланувга яроқсиз деб топиш ва уни ҳисобдан чиқариш тўғрисидаги буйруқ (юридик шахслар учун) ёки тегишли масъуллар иштирокида тузилган далолатнома (жисмоний шахслар учун);

техника жойлашган жой бўйича Марказ томонидан расмийлаштирилган алоҳида техникани техник кўрикдан ўтказганлик тўғрисида далолатнома;

ҳисобдан чиқариш ҳаракатлари учун белгиланган йиғимларнинг тўланганлигини тасдиқловчи ҳужжат.

Кейинги фойдаланувга яроқсиз деб ҳисобланган техника ҳисобдан чиқарилганда техниканинг рўйхатдан ўтказилганлиги тўғрисидаги техник паспорт ёки техник гувоҳнома ва ДРБ олиб қўйилади.

62. Техникани ҳисобдан чиқариш ёки асосли рад этиш ҳаракатлари мурожаат этилган кундан бошлаб 3 иш куни ичида амалга оширилади.

63. Техника қуйидаги ҳолатларда ҳисобдан чиқарилмайди:

мазкур Низомнинг 59 ва 61-бандларида назарда тутилган ҳужжатлар тақдим этилмаганда;

техникага туширилган идентификация тамғасининг яширилиши, сохталаштирилиши, ўзгартирилиши, йўқ қилиниши аломатлари ёхуд тақдим этилган ҳужжатларнинг сохталаштирилиши, тақдим этилган ҳужжатларда ёки рўйхатга доир ҳужжатларда кўрсатиб ўтилган маълумотларга техника ва агрегат рақамларининг номувофиқлиги аниқланганда;

техника, рақам агрегатларининг қидирувда эканлиги ёки тақдим этилган ҳужжатларнинг йўқолганлиги (ўғирланганлиги) тўғрисида маълумотлар мавжуд бўлганда;

қонун ҳужжатларига мувофиқ техниканинг тасарруф этилишига тақиқ ёки унинг хатлаб қўйилиши мавжуд бўлганда;

ҳуқуқни муҳофаза қилувчи органлар томонидан жиноят ишида ашёвий далил сифатида эътироф этилганда;

васийлик ва ҳомийлик органининг ёки белгиланган ёшга етмаган ёхуд муомалага лаёқатсиз мулкдорнинг қонуний вакилларининг рухсати бўлмаганда;

лизинг берувчининг розилиги мавжуд бўлмаганда - лизингга тақдим этилган техникалар учун.

Мулкдор ёки унинг вакили техникани ҳисобдан чиқаришнинг рад этиш асосларини бартараф этган тақдирда техникани ҳисобдан чиқариш тўғрисида ариза билан қайтадан мурожаат қилишга ҳақли.

64. Техника ҳисобдан чиқарилганда унинг рўйхатга олиш китобига ҳисобдан чиқаришнинг сабаблари тўғрисидаги маълумотлар киритилади.

Ҳисобдан чиқарилиши лозим бўлган техниканинг рўйхатга олинганлиги тўғрисидаги техник паспорт ёки техник гувоҳнома ва (ёки) техниканинг ДРБи йўқолганда, уларнинг Марказда мавжудлиги текширилгандан сўнг, техникани рўйхатга олиш китоби (картаси)га техниканинг рўйхатга олинганлиги тўғрисидаги техник паспорт ёки техник гувоҳнома ва (ёки) техниканинг ДРБси йўқолганлиги тўғрисида тегишли ёзув киритилади.

Зарур ҳолатларда, техниканинг эгасига белгиланган тартибда техниканинг агрегат рақамлари ҳисобдан чиқарилганлиги тўғрисидаги тегишли маълумотнома берилади.

8-БОБ. ЭГАЛИК ҲУҚУҚИ ВА ҲУЖЖАТЛАРИ

МАВЖУД БЎЛМАГАН ТЕХНИКАЛАРНИ

РАСМИЙЛАШТИРИШ ВА РЎЙХАТГА ҚЎЙИШ

65. Эгалик ҳуқуқи ва ҳужжатлари мавжуд бўлмаган техникаларни расмийлаштириш ва рўйхатга қўйиш мазкур Низомга 3-иловага мувофиқ схема бўйича амалга оширилади.

Эгалик ҳуқуқи ва ҳужжатлари мавжуд бўлмаган техникани расмийлаштириш ва рўйхатга қўйиш учун мурожаат қилган юридик ёки жисмоний шахс мазкур Низомнинг 69 ва 70-бандлари талаби бўйича кўриб чиқиш учун тегишли ҳужжатларни илова қилган ҳолда Марказга ёзма ариза тақдим этади.

Эгалик ҳуқуқи ва ҳужжатлари мавжуд бўлмаган техникани расмийлаштириш ва рўйхатга қўйиш билан боғлиқ аризалар 10 кундан кечиктирмасдан кўриб чиқилади.

66. Эгалик ҳуқуқи бўлмаган, қайта тикланган ёки мавжуд имкониятлар билан тайёрланган қишлоқ хўжалиги, мелиорация ва йўл-қурилиш техникалари ва ўзиюрар машиналарга эгалик ҳуқуқини бериш ва давлат рўйхатидан ўтказиш Инспекциянинг туман (шаҳар) бўлимлари тузадиган комиссия томонидан кўриб чиқилади.

67. Комиссия фаолиятига Инспекция ходими раҳбарлик қилади.

68. Комиссия таркибига туман қишлоқ хўжалиги бўлими ва бошқа давлат хўжалик бошқаруви органларининг ҳудудий вакиллари киритилади.

69. Комиссия эгалик ҳуқуқи ва ҳужжатлари бўлмаган техникаларнинг техник регламент ва техника хавфсизлик талабларига мослигини, техникадан фойдаланиб келинаётган муддатни, техниканинг қидирувда ёки қидирувда эмаслигини кўриб чиқади.

70. Комиссия томонидан, камида уч йилдан ортиқ муддатда фойдаланиб келинаётгани, ўғирланмагани, техник талабларга жавоб бериши бўйича далолатнома тузилади ва тегишли ташкилот (маҳаллий ҳокимликлар, судлар)га эгалик ҳуқуқини белгилаш учун тақдим этилади.

Юридик ёки жисмоний шахслар эгалик ҳуқуқини белгилаш учун тўғридан-тўғри тегишли ташкилотларга мурожаат қилиши мумкин.

71. Эгалик ҳуқуқи белгиланган техникалар ушбу Низомда белгиланган тартибда рўйхатдан ўтказилади.

Эгалик ҳуқуқи белгиланмаган техникалар вақтинчалик рўйхатдан ўтказилади ва 3 йил давомида техник кўрик даврида вақтинчалик рўйхатдан ўтказиш муддати узайтириб борилади ва 3 йил ўтгач доимий рўйхатга олинади.

9-БОБ. ТЕХНИКАНИ РЎЙХАТДАН ЧИҚАРИШ

72. Техникаларни давлат рўйхатидан чиқариш Марказ томонидан қуйидаги ҳолатларда амалга оширилади:

а) олдин Марказда рўйхатдан ўтган техниканинг эгаси ўзгарганда;

б) техниканинг рўйхатдан ўтган жойини ўзгартиришни талаб қилувчи, мулкдорнинг яшаш жойи ёки жойлашган манзили ўзгарганда;

в) техникалар ҳисобдан чиқарилгандан сўнг.

73. Техникаларни рўйхатдан чиқариш мазкур Низомга 3-иловага мувофиқ схема бўйича амалга оширилади.

Мулкдор мазкур Низомнинг 74-бандида кўрсатилган ҳужжатларни ва техникани рўйхатдан чиқариш учун белгиланган йиғим суммаси тўланганлигини тасдиқловчи ҳужжатни илова қилган ҳолда Марказга ёзма ариза тақдим этади.

Техникаларни ҳисобдан чиқариш билан боғлиқ аризалар 3 кундан кечиктирмасдан кўриб чиқилади.

74. Мулкдор томонидан техникаларни рўйхатдан чиқариш учун Марказга қуйидаги ҳужжатлар тақдим этилади:

мулкдор ёки унинг вакилининг мазкур Низомга 9-иловада белгиланган намунадаги аризаси;

мулкдорнинг ёки унинг вакилининг шахсини тасдиқловчи ҳужжати;

техниканинг сотилганлиги, мерос сифатида берилганлиги каби ҳолатларда нотариус томонидан тасдиқланган ҳужжат нусхаси;

техник паспорт ёки техник гувоҳнома;

давлат рақами белгиси;

тақиққа олинган бўлса, тақиққа олдирган идоранинг тақиқдан чиқариш тўғрисидаги хати;

75. Марказда тақиққа қўйилмаганлиги текширилгандан сўнг китобга белгиланган тартибда рўйхатдан чиқарилганлиги қайд этилади, электрон маълумотлар базасига рўйхатдан чиқариш рақами ва санаси қўйилади.

76. Техника рўйхатдан чиқарилганда ДРБ Марказга топширилади.

77. Янги харид қилинган, рўйхатдан чиқарилган техникалар 10 иш куни давомида рўйхатга қўйилиши шарт. Рўйхатга қўйишнинг муддатини бузган юридик ва жисмоний шахслардан қонунчиликда белгиланган тартибда жарима ундирилади.

10-БОБ. ТЕХНИКАНИ ТАҚИҚҚА ОЛИШ

ВА ТАҚИҚДАН ЧИҚАРИШ

78. Марказга тақиққа қўйдириш нотариал идоралар, Мажбурий ижро бюроси ва суд идоралари ҳамда қонунда белгиланган бошқа ташкилотларнинг сўрови асосида амалга оширилади.

79. Мазкур Низомга 10-иловада белгиланган ТМ-1 шаклидаги маълумотнома асосида техникалар олди-сотди қилинганда, совға қилинганда, мерос қилиб қолдирилганда ёки бошқа ҳолатларда шартнома тузилишида нотариал идоралар, савдо биржалари ва бошқалар томонидан талаб қилиниши шарт.

80. Техникаларни тақиққа қўйиш тақиқлар китобига ҳамда электрон маълумотлар базасида қайд қилинади, тақиққа қўйдирган ташкилот номи ва тақиққа қўйилган сана ёзиб қўйилади.

81. Марказда тақиқдан чиқариш тақиққа қўйдирган муассасанинг хати ёки суд қарорига асосан амалга оширилади. Тақиқдан чиқарилган техникалар тақиқлар китобига ҳамда электрон маълумотлар базасига киритилади ва тақиқдан чиқарилган санаси ёзиб қўйилади.

11-БОБ. ЯКУНЛОВЧИ ҚОИДАЛАР

82. Марказда рўйхатга олиш ҳаракатларини амалга ошириш учун асос бўладиган ҳужжатлар беш йил, техникаларни ва ДРБни беришни рўйхатга олиш китоби Марказда йигирма беш йил сақланади ва ушбу муддат ўтгандан кейин белгиланган тартибда давлат архивига топширилади.

83. Марказга ҳужжатлар нусхалари қабул қилинаётганда, улар асли билан таққосланиши шарт.

84. Қишлоқ хўжалиги, мелиорация ва йўл-қурилиш техникаларини ишлаб чиқарувчи корхоналарнинг вакиллигини тасдиқловчи ҳужжатлари бўлмаган тақдирда тижорат билан шуғулланувчи жисмоний ва юридик шахслар техникаларни белгиланган тартибда ўз номларига рўйхатдан ўтказишлари шарт.

85. Бошқарув ва мулк шаклидан қатъи назар, барча турдаги қишлоқ хўжалиги, мелиорация ва йўл-қурилиш техникаларининг олди-сотди шартномалари фақат нотариал идоралар томонидан расмийлаштирилиши шарт.

Ишлаб чиқарувчи, диллер, лизинг, биржа ва махсус аукцион савдо ташкилотларининг шартномалари бундан мустасно.

86. Техникаларнинг олди-сотди шартномалари ва бошқа мулк эгасининг ўзгаришига олиб келувчи шартномалар Марказда махсус китобларда рўйхатдан ўтказилиб, қайд этилади ва шартномага махсус штамп қўйилади.

87. Техникани давлат рўйхатидан (вақтинчалик ёки қайта рўйхатдан) ўтказиш, давлат рўйхатидан ва ҳисобдан чиқаришда қўшимча маълумот олиш талаб этилганда тақдирда, ушбу масалалар бўйича келиб тушган аризалар 10 кунда кўриб чиқилади.

88. Мулкдор рўйхатдан ўтказувчи ташкилот қарорлари юзасидан қонунда белгиланган тартибда шикоят қилиши мумкин.

Техникаларни давлат рўйхатидан ўтказиш билан боғлиқ давлат хизматлари Инспекция бошлиғининг буйруғига асосан тўғридан-тўғри масъул инспекторлар томонидан ҳам кўрсатилиши мумкин.

89. Мазкур Низом талабларининг бузилиши қонунда белгиланган тартибда жавобгарликка тортишга сабаб бўлади.

Низомга

1-ИЛОВА

Қишлоқ хўжалиги, мелиорация ва йўл-қурилиш

техникалари ҳамда ўзиюрар машиналарга

бериладиган техник паспортнинг

НАМУНАСИ

Техник паспортнинг

ТАСНИФИ

Техника рўйхатдан ўтказилганлиги тўғрисидаги "TEXNIK PASPORT" халқаро стандартлар тавсиялари асосида 54х86 мм ўлчамда пластикдан тайёрланади. Техника рўйхатдан ўтказилганлиги тўғрисидаги "TEXNIK PASPORT"нинг ранги - очиқ сариқ пушти. Лотин ёзувидаги давлат тилидан фойдаланилади. Серияли рақам - тўрт ҳарфли (UZ-TP), номери - олтита рақамли.

Техника рўйхатдан ўтказилганлиги тўғрисидаги "TEXNIK PASPORT"да жисмоний шахс учун - шахсий идентификация рақами (ЖШ ШИР), юридик шахс учун - солиқ тўловчининг идентификация рақами (СТИР) ва қурилмалар ўртасида бевосита алоқасиз ахборот айирбошлаш имконини берувчи электрон белги (NFC Смарт-карт) бўлади.

Техника рўйхатдан ўтказилганлиги тўғрисидаги "TEXNIK PASPORT"нинг пластик шакли қуйидаги ҳимоя воситаларига эга:

микроматн - "TEXNIK PASPORT" технический паспорт Vehicle license", ўлчами - максимум 30 микрон;

ультрабинафша қоплама;

"UZ" ёзуви, эгилганда бир рангдан бошқа рангга товланадиган оптик турланадиган бўёқ;

гильош, доимий равишда қийшайиб турадиган 40 - 70 мкм қалинликдаги тўлқинли чизиқларнинг қалин тармоғи шаклидаги нақш;

гувоҳнома пластик шаклининг серияли рақамининг лазер ўйма нақши.

Техник паспортнинг олд томонида "TEXNIK PASPORT", "Технический паспорт", "Vehicle license" сўзлари ёзилган, шунингдек, Ўзбекистон Республикаси Давлат байроғининг тасвири туширилган, "Ўзбекистон Республикаси" сўзлари давлат тилида, рус ва инглиз тилларида ёзилган. Техниканинг давлат рақами белгиси, маркаси, модели, ранги, эгаси тўғрисидаги маълумотлар (фамилияси, исми, отасининг исми ёки ташкилотнинг номи, манзили), техник паспорт берилган сана, Инспекциянинг тегишли бўлими ("Агросаноат мажмуида хизматлар кўрсатиш маркази" давлат унитар корхонасининг тегишли бўлими), жисмоний шахс учун - шахсий идентификация рақами (ЖШ ШИР), юридик шахс учун - солиқ тўловчининг идентификация рақами (СТИР) мажбурий тартибда кўрсатилади.

Техника рўйхатдан ўтказилганлиги тўғрисидаги "TEXNIK PASPORT"нинг орқа томонида техника тўғрисидаги маълумотлар; ишлаб чиқарилган йил, тури, кузов/шасси рақами, тўла вазни, юксиз вазни, двигателининг тоифаси ва қуввати, ёнилғи тури, алоҳида белгилар мажбурий тартибда кўрсатилади.

Низомга

2-ИЛОВА

Техник паспорт берилмайдиган қишлоқ хўжалиги,

йўл-қурилиш, мелиоратив ва бошқа мақсадларга мўлжалланган

тупроққа ва экинларга ишлов берувчи, юк ортувчи, дон ва

уруғни қайта ишлашга мўлжалланган машиналар, чорвачилик,

паррандачилик ва ем-хашак ишлаб чиқариш машина ва

технологик ускуналари, кичик механизация мосламаларига

бериладиган техник гувоҳноманинг

НАМУНАСИ

Техник гувоҳноманинг

ТАСНИФИ

Техника рўйхатдан ўтказилганлиги тўғрисидаги "TEXNIK GUVOНNOMA" халқаро стандартлар тавсиялари асосида 54х86 мм ўлчамда пластикдан тайёрланади. Техника рўйхатдан ўтказилганлиги тўғрисидаги "TEXNIK GUVOНNOMA"нинг ранги - кулранг пушти. Лотин ёзувидаги давлат тилидан фойдаланилади. Серияли рақам - тўрт ҳарфли (UZ-TG), номери - олтита рақамли.

Техника рўйхатдан ўтказилганлиги тўғрисидаги "TEXNIK GUVOНNOMA"да жисмоний шахс учун - шахсий идентификация рақами (ЖШ ШИР), юридик шахс учун - солиқ тўловчининг идентификация рақами (СТИР) ва қурилмалар ўртасида бевосита алоқасиз ахборот айирбошлаш имконини берувчи электрон белги (NFC Смарт-карт) бўлади.

Техника рўйхатдан ўтказилганлиги тўғрисидаги "TEXNIK GUVOНNOMA"нинг пластик шакли қуйидаги ҳимоя воситаларига эга:

микроматн - "TEXNIK GUVOНNOMA", Техническое свидетельство, Vehicle license", ўлчами-максимум 30 микрон;

ультрабинафша қоплама;

"UZ" ёзувли, эгилганда бир рангдан бошқа рангга товланадиган оптик турланадиган бўёқ;

гильош, доимий равишда қийшайиб турадиган 40 - 70 мкм қалинликдаги тўлқинли чизиқларнинг қалин тармоғи шаклидаги нақш;

гувоҳнома пластик шаклининг серияли рақамининг лазер ўйма нақши.

Техник паспортнинг олд томонида "TEXNIK GUVOНNOMA", "Техническое свидетельство", "Vehicle license" сўзлари ёзилган, шунингдек, Ўзбекистон Республикаси Давлат байроғининг тасвири туширилган, "Ўзбекистон Республикаси" сўзлари давлат тилида, рус ва инглиз тилларида ёзилган. Техниканинг номи, маркаси, модели, ранги, эгаси тўғрисидаги маълумотлар (фамилияси, исми, отасининг исми ёки ташкилотнинг номи, манзили), рўйхатдан ўтказилганлиги тўғрисидаги "TEXNIK GUVOНNOMA" берилган сана, Инспекциянинг тегишли бўлими ("Агросаноат мажмуида хизматлар кўрсатиш маркази" давлат унитар корхонасининг тегишли бўлими), жисмоний шахс учун - шахсий идентификация рақами (ЖШ ШИР), юридик шахс учун - солиқ тўловчининг идентификация рақами (СТИР) мажбурий тартибда кўрсатилади.

Техника рўйхатдан ўтказилганлиги тўғрисидаги "TEXNIK GUVOНNOMA"нинг орқа томонида техника тўғрисидаги маълумотлар; ишлаб чиқарилган йил, тури, агрегат рақами, тўла вазни, юксиз вазни, вазифаси, алоҳида белгилар мажбурий тартибда кўрсатилади.

Низомга

3-ИЛОВА

Қишлоқ хўжалиги, мелиорация ва йўл-қурилиш

техникаларини давлат рўйхатидан ўтказиш

СХЕМАСИ

       

Низомга

4-ИЛОВА

А Р И З А

Аризага қуйидаги ҳужжатлар илова қилинади:

1. Техника олинганлиги ҳақидаги нотариал ҳужжат ёки шартнома нусхаси.

2. Техника ишлаб чиқарилган корхона томонидан берилган техник ҳужжат, техник паспорт ёки гувоҳнома.

Олинган техника ҳақида маълумотлар

Тел. рақами: ________________

20___ йил "____"_______________

Техник паспорт рақами _____________

Давлат рақами _______________

Низомга

5-ИЛОВА

А Р И З А

   

Аризага қуйидаги ҳужжатлар илова қилинади:

1. Техника олинганлиги ҳақидаги нотариал ҳужжат.

2. Техника ишлаб чиқарилган корхона томонидан берилган техник ҳужжат, техник паспорт ёки гувоҳнома.

Олинган техника ҳақида маълумотлар

Тел. рақами: ________________

20___ йил "____"_______________

Техник паспорт рақами _____________

Давлат рақами _______________

Низомга

6-ИЛОВА

Қишлоқ хўжалиги, мелиорация ва йўл-қурилиш

техникалари ҳамда ўзиюрармашиналарнинг

давлат рақами белгилари

НАМУНАЛАРИ

I тип - юридик шахсларнинг тракторлари, йўл-қурилиш ва мелиоратив техникаси, ўзиюрар машиналарга бериладиган давлат рақами белгилари кабинанинг орқа қисмига маҳкамланади.

Давлат рақами белгисининг фони оқ рангда, четки қисми, рақам ва ҳарфлари қора рангда. Чап қисмида рўйхатга олиш сонлари билан баравар қилиб тракторнинг шартли расми, қуйида чап томонда фарқловчи ҳарфлар гуруҳлари ва ўнг томонда ҳудуднинг коди*, Ўзбекистон Республикасининг байроғи ва UZ ҳарфлари тасвирланган.

II тип - жисмоний шахсларнинг тракторлари, йўл-қурилиш ва мелиоратив техникаси, ўзиюрар машиналарга бериладиган давлат рақами белгилари кабинанинг орқа қисмига маҳкамланади.

Давлат рақами белгисининг фони сариқ рангда, четки қисми, рақам ва ҳарфлари қора рангда. Чап қисмида рўйхатга олиш сонлари билан баравар қилиб тракторнинг шартли расми, қуйида чап томонда фарқловчи ҳарфлар гуруҳлари ва ўнг томонда ҳудуднинг коди*, Ўзбекистон Республикасининг байроғи ва UZ ҳарфлари тасвирланган.

III тип - юридик шахсларнинг трактор тиркамаларига бериладиган давлат рақами белгилари тиркаманинг орқа қисмига маҳкамланади.

Давлат рақами белгисининг фони оқ рангда, четки қисми, рақам ва ҳарфлари қора рангда. Қуйида чап томонда фарқловчи ҳарфлар гуруҳлари ва ўнг томонда ҳудуднинг коди*, Ўзбекистон Республикасининг байроғи ва UZ ҳарфлари тасвирланган.

IV тип - жисмоний шахсларнинг трактор тиркамаларига бериладиган давлат рақами белгилари тиркаманинг орқа қисмига маҳкамланади.

Давлат рақами белгисининг фони сариқ рангда, четки қисми, рақам ва ҳарфлари қора рангда. Қуйида чап томонда фарқловчи ҳарфлар гуруҳлари ва ўнг томонда ҳудуднинг коди*, Ўзбекистон Республикасининг байроғи ва UZ ҳарфлари тасвирланган.

*) Тракторлар, йўл-қурилиш ва мелиоратив техника, ўзиюрар машиналар, трактор тиркамаларига бериладиган рўйхатдан ўтказиш давлат рақами белгиларининг ҳудудий кодлари, шунингдек, рўйхатдан ўтказиш давлат рақами белгиларида қўлланадиган рақамлар ва лотин алифбоси ҳарфларининг намуналари Ўзбекистон Республикаси Вазирлар Маҳкамасининг "Автомототранспорт воситалари учун рўйхатдан ўтказиш давлат рақами белгиларининг янги намуналарини жорий этиш чора-тадбирлари тўғрисида" 2007 йил 27 июндаги 131-сон қарорига 1 ва 3-иловаларга мувофиқ белгиланади.

Низомга

7-ИЛОВА

А Р И З А

қисмига ўзгартириш киритиш ва қайта жиҳозлашга рухсат беришингизни сўраймиз.

Аризага қуйидаги ҳужжатлар илова қилинади:

1. Техника эгаси ўзгарганлиги тўғрисидаги ҳужжат

2. Техника ишлаб чиқарилган корхона томонидан берилган техник ҳужжат, техник паспорт ёки гувоҳнома.

Техника ҳақида маълумотлар

Тел. рақами: ________________

20___ йил "____"_______________

Техник паспорт рақами _____________

Давлат рақами _______________

Низомга

8-ИЛОВА

Техникага ўзгартириш киритиш ва уни қайта

жиҳозлашни амалга ошириш учун

РУХСАТНОМА

Техника ҳақида маълумотлар

Техникага киритилаётган ўзгартириш ва уни

қайта жиҳозлашдан кейинги маълумотлар

9. Техникага киритилган ўзгартириш ва уни қайта жиҳозлашнинг умумий техник

               

10. Техникада ўзгартирилган рақамли агрегат олинганлиги тўғрисида ҳужжат:

Низомга

9-ИЛОВА

А Р И З А

Аризага қуйидаги ҳужжатлар илова қилинади:

1. Техника эгаси ўзгарганлиги тўғрисидаги ҳужжат

2. Техника ишлаб чиқарилган корхона томонидан берилган техник ҳужжат, техник паспорт ёки гувоҳнома.

Олинган техника ҳақида маълумотлар

   

Тел. рақами: ________________

20___ йил "____"_______________

Техник паспорт рақами _____________

Давлат рақами _______________

Низомга

10-ИЛОВА

(ТМ-1 ШАКЛ)

Қишлоқ хўжалиги, мелиорация ва йўл-қурилиш

техникаси ҳамда ўзиюрар машиналар тўғрисида

М А Ъ Л У М О Т Н О М А  N_______

Техника эгаси тўғрисидаги маълумотлар:

Техника тўғрисидаги маълумотлар

Изоҳ. Ушбу маълумотнома техникаларнинг олди-сотдиси бўлганда, совға қилинганда, мерос қилиб қолдирилганда ёки бошқа ҳолларда шартнома тузилишида нотариал идоралар, савдо биржалари ва бошқалар томонидан талаб қилиниши лозим. Ушбу маълумотнома билан бирга техник паспорт тақдим этилиши шарт. Маълумотноманинг амал қилиш муддати 10 кун. Маълумотнома техниканинг нархини белгилашга ва ажратиладиган кредит суммасига, лизингга беришга асос бўла олмайди.

Қонун ҳужжатлари маълумотлари миллий базаси (www.lex.uz),

2019 йил 18 апрель