Харидор айни бир чек бўйича товарни такроран қайтарса, нима қилиш керак

“Бир сотувчининг харидори бир келишда тўртта товарни сотиб олди, бу онлайн-НКМ чекида акс эттирилган. Битта товарни у хариддан кейин дарҳол қайтарди, бироздан кейин яна битта товар позициясини қайтариш тўғрисида талаб билан мурожаат қилди. Сотувчида иккала ҳолатда қайтаришни рад этишга қонуний асослар мавжуд эмас”. 

Бу ҳолатда онлайн-НКМ тизимида қайтаришни расмийлаштирган ҳолда қандай қилиб техник муаммолардан қочиш ҳақида “Норма” илтимосига биноан “RIG” МЧЖ директори Рустам ЁҚУБОВ гапириб берди:

– Аҳоли билан пулли ҳисоб-китобларни амалга оширишда онлайн-НКМ ва виртуал касса тизимини қўллаш тартиби тўғрисида низомнинг 6-бобига мувофиқ қисман қайтаришга йўл қўйилади. Яъни харидор чек бўйича сотиб олинган товарлардан битта ёки бир нечтасини қайтариш ҳуқуқига эга. Бу ҳолда муаммолардан қочиш учун сотувчи онлайн-НКТ тизими билан ишлашнинг ўзига хос техник хусусиятларини ҳисобга олиши керак.

Агар харидор худди шу чек бўйича бошқа товарларни қайтариш тўғрисида талаб билан такроран мурожаат қилмаса, муаммо юзага келмайди. Сотувчи қисман қайтаришга чек расмийлаштиради ва унга сотиш чекини “боғлайди”. Лекин, агар шу чек билан бошқа товарнинг қайтарилиши амалга оширилса, тизим:

• сотувчига мазкур сотиш чекига қайтариш расмийлаштирилганлиги ҳақида хабар беради;
• гарчи қонун ҳужжатларида битта харид доирасида ҳақиқий қайтаришнинг исталган сонини расмийлаштиришга тақиқ бўлмаса-да, бошқа товарнинг қайтарилишини амалга ошириш имконини бермайди.

Нима қилиш керак

Агар муаммога дуч келган бўлсангиз, Солиқ қўмитасига чек бўйича товарнинг иккинчи марта қайтарилишини солиқ ҳисоботида акс эттиришга ёрдам бериш илтимоси билан ёзма мурожаат қилишга тўғри келади. Мурожаатда юзага келган вазиятни батафсил баён этинг ҳамда мазкур ўзаро ҳисоб-китоблар бўйича сотиш ва қайтариш чекларининг фискал белгиларини кўрсатинг.

Кейинчалик онлайн-НКМ тизимининг техник жиҳатдан мукаммал эмаслиги ишлашда халақит бермаслиги учун, харидор товарларни қисман қайтариш тўғрисида талаб билан мурожаат қилган барча ҳолларда:

1) онлайн-НКМнинг бутун чекига қайтаришни расмийлаштиринг;

2) харидорда қолган товарларга янги сотиш чекини уринг.

Қисман қайтаришни расмийлаштиришга нисбатан бундай ёндашув ҳар қандай вазиятда товарларни қайтариш муносабати билан солиқ ҳисоботи маълумотларига тузатиш киритиш билан боғлиқ муаммолардан қочишга ёрдам беради.

Олег ГАЕВОЙ тайёрлади