Технопарк резиденти хорижий дастурий таъминотдан фойдаланиш ҳуқуқини сотиб олаётганда қандай солиқлар тўлайди

«Технопарк резиденти бўлган ташкилот интернет орқали хорижий ташкилотдан дастурий таъминотдан фойдаланиш ҳуқуқини сотиб олмоқда. Бу ҳолда қандай солиқ оқибатлари юзага келади?»

Buxgalter Pro фойдаланувчисининг саволига Иқтисодиёт ва молия вазирлигининг Солиқ ва божхона сиёсати бошқармаси бошлиғи Умид ХАМРОЕВ жавоб берди:

– Хорижий ташкилотдан дастурий таъминотдан фойдаланиш ҳуқуқини сотиб олиш - бу хизматлар импортидир.

ҚҚС

Ўзбекистон ҳудудида товарлар (хизматлар)ни реализация қилувчи хорижий юридик шахслар, агар товарлар (хизматлар) реализация қилинадиган жой Ўзбекистон бўлса, ҚҚС тўловчилари деб эътироф этилади .

Дастурий таъминотдан фойдаланиш ҳуқуқини тақдим этиш СК 282-м. 1-қ. 1-бандига асосан электрон шаклдаги хизматларга киради. Агар электрон шаклдаги хизматларни Ўзбекистонда жойлашган ёки фаолият юритаётган шахслар сотиб олса, хизматлар реализация қилинадиган жой Ўзбекистон деб эътироф этилади . Яъни, хорижий ташкилот Ўзбекистон ташкилотига ўз дастурий таъминотидан фойдаланиш ҳуқуқини тақдим этиб, Ўзбекистонда ҚҚС тўловчисига айланади.

Агар хорижий ташкилот солиқ тўловчи сифатида солиқ органларида ҳисобда турмаган бўлса, ҚҚСни у учун дастурий таъминотдан фойдаланиш ҳуқуқини сотиб олаётган ташкилот (солиқ агенти) тўлайди .

Шу билан бирга, Технопарк резидентлари 2028 йил 1 январгача ҚҚС тўлашдан озод қилинганини, шу жумладан Ўзбекистон норезидентларидан ахборот технологиялари соҳасидаги хизматларни сотиб олишда ҳам ҳисобга олиш керак  .

Шундай қилиб, Технопарк резиденти бўлган ташкилот хорижий ташкилотнинг дастурий таъминотидан фойдаланиш ҳуқуқи қийматидан ҚҚС тўламайди.

Фойда солиғи

Ўзбекистондаги манбалардан даромад олувчи Ўзбекистоннинг норезидент юридик шахслари фойда солиғи тўловчилари деб эътироф этилади .

Ўзбекистондаги манбалардан олинган ва доимий муассаса билан боғлиқ бўлмаган норезидентнинг даромадларидан солиқни норезидентга даромад тўлаётган солиқ агенти ҳисоблаб чиқаради ва ушлаб қолади .

Бундай даромадларга, бошқалар қаторида, қуйидагилар киради:

• Ўзбекистонда фойдаланиш ёки ҳар қандай номоддий активдан фойдаланиш ҳуқуқини тақдим этиш учун роялти ;
• Техник хизматлардан олинадиган даромадлар, улар бошқарув, техник ёки маслаҳат хусусиятидаги хизматлар учун тўлов сифатида белгиланади .

Шартнома шартларига қараб, дастурий таъминотдан фойдаланиш ҳуқуқини тақдим этиш юқорида келтирилган бандлардан бирига тегишли бўлади.

Норезидентнинг даромади 20% ставка бўйича солиққа тортилади . Солиқ суммаси норезидентга даромад тўланган санада Марказий банк томонидан белгиланган курс бўйича ҳисобланади .

Норезидент даромадидан фойда солиғи икки ёқлама солиқ солишнинг олдини олиш тўғрисидаги халқаро шартнома нормаларига мувофиқ ушлаб қолинмайди ёки пасайтирилган ставка бўйича ушлаб қолинади. Бунда норезидент даромад тўланадиган санадан кечиктирмай ўз мамлакатининг ваколатли органидан ушбу мамлакатда резидентлик фактини тасдиқловчи ҳужжатни тақдим этиши керак . Роялти тўланганда норезидентнинг ушбу даромадга нисбатан ҳақиқий ҳуқуққа эга эканлигини ҳужжатлар билан тасдиқлаш ҳам зарур .

Шундай қилиб, Ўзбекистондаги ташкилот хорижий дастурий таъминотдан фойдаланиш ҳуқуқини сотиб олишда солиқ агенти деб тан олинади ва юқорида келтирилган шартларни ҳисобга олган ҳолда норезидент даромадидан солиқ тўлайди (ёки тўламайди).

Эътибор беринг, Технопарк резиденти бўлган ташкилотни ПФ-5099-сонли фармоннинг 5-бандига мувофиқ барча турдаги солиқлардан озод қилиш уни норезидент ташкилот даромадларидан солиқ ҳисоблаш ва тўлаш бўйича солиқ агенти мажбуриятларини бажаришдан озод қилмайди.