Эътибор беринг: дарё ўзанларида қум-шағал қазиб олишга муддатсиз мораторий жорий этилди

12.09.2024 йилдаги 566-сон ВМҚда дарё ўзанларида норуда материаллари қазиб олишга мораторий жорий этиладиган ҳудудлар чегаралари белгиланди. Тафсилотларни norma.uz портали келтирмоқда.

Агар сиз ўз фаолиятингизда бундай материаллардан фойдалансангиз, ушбу шарҳ сиз учун:

17.01.2024 йилдаги УФ-14-сон Фармонга мувофиқ дарё ўзанлари, соҳилбўйи минтақалари ва сувни муҳофаза қилиш зоналарида жойлашган норуда материалларни қайта ишлаш корхоналарини тоғ ва тоғ олди ҳудудларига ёки ушбу ҳудудларнинг яқинида жойлашган кичик саноат зоналарига кўчириш назарда тутилган.

Экология вазирлиги томонидан Чирчиқ, Сирдарё, Сангзор, Зарафшон, Норин, Қашқадарё ва Сурхондарё дарёлари ўзанларидаги қум-шағални қазиб олишга муддатсиз мораторий жорий этилмоқда.

Қуйидагиларни ўз ичига олган белгиланган зоналарда қум-шағал қазиб олиш тақиқланади:

• дарё ўзанлари;
• соҳилбўйи минтақалари;
• сувни муҳофаза қилиш зоналари.

Бунда, рухсат этилган дарё ўзанлари, соҳилбўйи минтақалари ва сувни муҳофаза қилиш зоналарида қум-шағал материалларини қазиб олишга бўлган ҳуқуқни фақат “E-auksion” электрон савдо платформаси орқали реализация қилиш назарда тутилган.

Норуда материалларни қазиб олаётган фаолият кўрсатаётган корхоналар атроф-муҳитга зарарни минималлаштириш учун махсус саноат ёки кичик саноат зоналарига кўчирилиши лозим.

Манбага қаранг.