МҲХС асосида ишловчи юридик шахслар диққатига: солиқларни ҳисоблаб чиқиш учун кўрсаткичлар бўйича маълумотларни топшириш муддати йиллик молиявий ҳисоботни топшириш муддатига мослаштирилди

МҲХС бўйича ҳисоб юритувчи солиқ тўловчилар йилда 1 марта молиявий ҳисоботнинг халқаро стандартларига ўтган юридик шахсларнинг солиқларини ҳисоблаб чиқиш учун зарур бўлган кўрсаткичлар бўйича маълумотларни тақдим этишлари шарт . 2024 йил якунлари бўйича солиқ ҳисоботининг ушбу шаклларини тақдим этишнинг сўнгги муддати 2025 йил 3 мартдан 1 майгача ўзгартирилди.

2025 йил 1 январдан бошлаб Молиявий ҳисоботларни тақдим этиш муддатлари ҳамда уларнинг таркиби ва мазмуни тўғрисидаги низом кучга кирди. Ушбу Низом билан МҲХСга мувофиқ тақдим этиладиган йиллик молиявий ҳисобот шакллари ва янги муддатлар тасдиқланган. 2024 йил якунлари бўйича ташкилотлар йиллик молиявий ҳисоботни янги Низомга мувофиқ тақдим этишлари мумкин.

Низомга мувофиқ, МҲХС бўйича ҳисобот тақдим этувчи корхоналар уни ҳисобот йилидан кейинги йилнинг 1 майидан кечиктирмай топширишлари керак.

Айни пайтда СҚнинг 28.01.2020 йилдаги 2020-03-сон қарорига (24.02.2020 й. АВ рўйхат рақами 3221-сон) асосан МҲХС бўйича ҳисоб юритадиган солиқ тўловчилар юридик шахсларнинг солиқларини ҳисоблаб чиқиш учун зарур бўлган маълумотларни ҳисобот йилидан кейинги йилнинг 1 мартидан кечиктирмай тақдим этишлари шарт (Қарорга 13-иловага изоҳ). Бу маълумотлар молиявий ҳисобот асосида шакллантирилгани сабабли, энди уларни тақдим этиш муддати янги тартибга мувофиқлаштирилди. Яъни, МҲХСни қўллайдиган солиқ тўловчилар бу маълумотларни молиявий ҳисобот билан бир муддатда – 2024 йил якунлари бўйича 2025 йил 1 майдан кечиктирмай топширишга ҳақли.

Бу ҳақда Солиқ қўмитаси расмий телеграм-каналида хабар беради.

Солиқ қўмитаси маълумотларни электрон шаклда тақдим этиш муддатига ўзгартиришлар киритди.