Вақтинча меҳнатга қобилиятсизлик нафақаси суммасидан иш ҳақи бўйича ортиқча тўловни ушлаб қолиш мумкинми

Вазият: ходим жорий ой учун маошининг 50% миқдорида бўнак олган, кейин касал бўлиб қолган ва ой охиригача «касаллик таътилида» бўлган. Иш ҳақи миқдори ҳисоблаб чиқилганда, ойлик иш ҳақи бўйича ортиқча тўлов 440 минг сўмни ташкил этган. Ҳисобланган «касаллик варақаси» суммасидан иш ҳақи бўйича ишлаб топилмаган бўнакни ушлаб қолиш мумкинми?

Buxgalter.uz тушунтиради:

– Йўқ, вақтинча меҳнатга қобилиятсизлик нафақаси суммасидан иш ҳақи бўйича ортиқча тўловни ушлаб қолиш мумкин эмас.

Меҳнат кодекси иш ҳақи ҳисобига берилган бўнак ходимнинг ёзма розилигидан қатъи назар, айнан иш ҳақидан ушлаб қолинишини назарда тутади .

Меҳнатга ҳақ тўлаш ва иш ҳақи тушунчаси қуйидагиларни англатади :

• иш берувчи томонидан ходимнинг малакаси, бажариладиган ишнинг мураккаблиги, миқдори, сифати ва шарт-шароитларига қараб тўланадиган меҳнат ҳақи суммаси;
• компенсация тўловлари (компенсация хусусиятига эга бўлган қўшимча тўловлар ва устамалар, шу жумладан, нормал шароитлардан четга чиқувчи шароитларда ишлаганлик, ноқулай табиий-иқлим шароитларида ишлаганлик учун ва компенсация хусусиятига эга бўлган бошқа тўловлар);
• рағбатлантирувчи тўловлар (рағбатлантирувчи тусдаги қўшимча ва устамалар, мукофотлар ва рағбатлантирувчи тўловлар).

Шунга кўра, «касаллик варақаси» − бу иш ҳақи эмас, уларнинг миқдоридан ишланмаган бўнакни ушлаб қолиш мумкин эмас.

Кўриб чиқилаётган ҳолатда бўнакни − ходимнинг даромадлари таркибига қараб ва ушлаб қолишнинг умумий миқдорини чеклашни ҳисобга олган ҳолда кейинги ойнинг иш ҳақидан ушлаб қолиш керак.

Buxgalter.uz тавсия қилади

 

• Вақтинча меҳнатга лаёқатсизлик (касаллик) нафақасини ҳисоблашда қандай тўловларни ҳисобга олиш керак;
• Касаллик нафақаси қачон ва қандай тўланади;
• Ижро ҳужжатлари бўйича ундирувлар иш ҳақидан қандай ушлаб қолинади;
• Алоҳида ҳолларда иш ҳақини қандай ҳисоблаш керак.