Демонтаж ва қайта ишлашга харажат қилмаслик учун ташқи рекламани жойлаштиришда нималарни ҳисобга олиш керак

Тошкент шаҳар ҳокимлиги матбуот хизмати реклама жойи паспортини давлат хизматлари портали орқали қандай расмийлаштиришни, шунингдек, тижорат объектларида пешлавҳалар ва логотипларни жойлаштиришнинг асосий талабларини эслатди.

Реклама конструкцияларингиз мажбуран олиб ташланган бўлса (жуда «ижодий» ёндашув ёки бошқа сабабларга кўра) нима қилиш кераклигини тушунтирамиз:

Реклама жойи паспортини олиш тартиби

Ташқи рекламани жойлаштиришда хўжалик юритувчи субъектлар – жисмоний ва юридик шахслар реклама жойининг паспортини my.gov.uz портали орқали расмийлаштиради.

Маълумотлар «Хусусий мулк учун реклама жойи паспортини расмийлаштириш» хизмати функционали орқали босқичма-босқич киритилади. Аризага қуйидагиларни илова қилиш керак:

1) ташқи реклама ва ахборот объектининг (конструкциясининг) эскиз лойиҳаси (техник хусусиятлари билан);

2) хусусий мулк бўлган ер участкасига, бино ва иншоотларга бўлган мулк ҳуқуқини тасдиқловчи ҳужжатлар (шу жумладан кадастр рақами);

3) кўп квартирали уйдаги жойлар мулкдорлари умумий йиғилишининг қарори (агар ташқи реклама ва ахборот объекти кўп квартирали уйнинг том ёки фасад қисмига ўрнатиладиган бўлса);

4) хусусий мулк бўлган ер участкаси, бино ва иншоотлар мулкдорининг розилик хати (агар ташқи реклама ва ахборот объекти учинчи шахслар томонидан жойлаштирилган бўлса);

5) кўп квартирали уйдаги жойларнинг мулкдорлари ёки ер участкаларининг, шунингдек хусусий мулк бўлган бинолар ва иншоотларнинг мулкдори билан тузилган шартнома (агар ташқи реклама ва ахборот объекти учинчи шахслар томонидан жойлаштирилаётган бўлса);

6) ташқи реклама ва ахборот объекти (конструкцияси) ўрнатилган жойнинг охирги ҳафтада олинган фотосуратлари (JPEG форматида).

Реклама жойи паспортини олиш ва рекламани жойлаштириш харажатлари

Аризани кўриб чиқиш учун 370,8 минг сўм миқдорида бир марталик тўлов назарда тутилган. (БҲМнинг 90%и). Ариза 15 иш куни ичида кўриб чиқилади, ижобий қарор қабул қилинган тақдирда реклама жойининг паспорти шакллантирилади.

Камчиликлар аниқланганда – уларни бартараф этиш ва такроран бепул ариза топшириш мумкин.

Паспорт олингандан кейин рекламани жойлаштириш учун ойлик тўлов жойлаштириш зонасига қараб ҳар бир квадрат метр учун 50-80 минг сўмни ташкил этади. Паспорт олингандан кейин 6 ой ичида реклама конструкциялари ўрнатилмаса, ҳужжат бекор қилинади.

«Ташқи» талаблар 

Ҳокимлик қуйидагиларни эслатиб ўтади:

• ҳарфларнинг баландлиги 20 см дан 50 см гача, қалинлиги 5 см дан 15 см гача бўлиши керак;
• ёзув алоҳида ҳарфлардан иборат бўлиши, элементлар аниқ ва тартибли жойлаштирилиши керак;
• пешлавҳа ёки логотип кириш гуруҳи кенглигининг 60 фоизигача жойлаштирилади;
• битта тижорат объектига битта реклама ёзувига йўл қўйилади;
• агар объект кўп квартирали уйнинг биринчи қаватида жойлашган бўлса, лавҳалар ягона визуал ечимда ва уйғун ранглар гаммасида бажарилиши керак.

Агар сизнинг объектингиз мажбурий демонтаж қилинган бўлса

Мажбурий тартибда демонтаж қилинган ташқи реклама ва ахборот объектлари (конструкциялари) демонтаж қилинган кундан бошлаб 30 кун мобайнида махсус жойларда сақланади. Ушбу муддат ичида мулкдор маҳаллий ижро этувчи ҳокимият органларига объектни (конструкцияни) қайтариш тўғрисидаги ариза билан мурожаат қилишга ҳақли.

Объектни демонтаж қилиш, кўчириш, сақлаш ва ободонлаштириш ишлари билан боғлиқ харажатларни мулкдорнинг ўзи қопласа, маҳаллий ижро этувчи ҳокимият органлари унга ташқи реклама ва ахборот объектини (конструкциясини) қайтаради.

Акс ҳолда реклама конструкцияси утилизация қилинади ёки реализация қилинади. Бундан тушган маблағлар мулкдорга (унинг аризасига кўра) – демонтаж қилиш, сақлаш, реализация қилиш ва ободонлаштириш ишлари харажатлари чегириб ташланган ҳолда қайтарилади.

Шундан сўнг ТМЗнинг уни тугатишдан тушган тушумини ҳужжатлар билан расмийлаштиришингиз ва бухгалтерия ҳисобида акс эттиришингиз керак. Буни қандай қилиб тўғри бажариш мумкинлигини тавсияларда ўқинг > > >

Buxgalter.uz тавсия қилади

 

• Реализация қилиш харажатларини (шу жумладан реклама ва маркетинг харажатларини) шакллантириш тартиби;
• Фойда солиғи ҳисоб-китобида реклама харажатлари қандай акс эттирилади.