Солиқ хизматларида нималар ўзгарди: Tax Free, кешбек ва электрон давлат хизматлари

Tax Free учун минимал харид миқдори ўзгарди, чеклар бўйича кешбек олиш имкониятлари кенгайтирилди ва жисмоний шахслар учун солиқ имтиёзлари бўйича янги давлат хизмати ишга туширилди. Батафсил маълумот – buxgalter.uz сайтида.

Tax Free тизими қоидаларини янгилаш

Янгиликлар инфратузилма, хорижий фуқароларга улар мамлакатдан чиқиб кетаётганда сотиб олинган товарлар бўйича ҚҚС суммасини қайтариш шартлари, муддатлари ва механизмларига тааллуқли бўлди:

• Tax Free’ни фаоллаштириш учун товарларни харид қилишнинг минимал суммаси 300 минг сўмни ташкил этиши керак. (ҚҚСни ҳисобга олган ҳолда) (илгари – 1 млн сўм эди). Харид қилинган кундан бошлаб 3 ой ичида қайтариш учун мурожаат қилишингиз мумкин;
• ҚҚСни қайтариш туристнинг танловига кўра амалга оширилиши мумкин – % мобил иловасида кўрсатилган халқаро банк картасига, банк ҳисобварағига (хорижий фуқаронинг Ўзбекистон Республикаси ҳудудидан чиқиб кетиши факти тасдиқлангандан сўнг 3 иш кунидан кўп бўлмаган муддатда), шунингдек, энди нақд хорижий валютада (АҚШ долл.);
• агар сайёҳ нақд пулни танласа – тўлов мамлакатдан чиқиш кунида амалга оширилади;
• Tax Free тизимининг расмий оператори – Солиқ қўмитаси ҳузуридаги «Солиқ Сервис» АЖнинг хизмат кўрсатиш шохобчалари Тошкент, Самарқанд, Бухоро, Фарғона ва Урганч халқаро аэропортларида жойлаштирилиб, энди кеча-ю кундуз (24/7) ишлаш режимини таъминламоқда;
• қайтаришнинг умумий суммаси қуйидагича ҳисобланади:

– чеклар бўйича қайтарилиши лозим бўлган ҚҚСнинг умумий суммасидан (100%) оператор ўз хизматлари учун тўлов сифатида 15% ушлаб қолади;

– чет эл фуқароси тўланган ҚҚС суммасининг 85 %ни қўлига олади;

• шунингдек, оператор махсус белги (флаер) да кўрсатилган маълумотларни нафақат давлат тили ва инглиз тилида, балки рус, хитой ва араб тилларида ҳам баён этиши, уларнинг расмий веб-сайтда ва ижтимоий тармоқларда жойлаштирилишини таъминлаши шарт.

Илгари оператор ҳар ойда, ҳисобот ойидан кейинги ойнинг 25-санасидан кечиктирмай ваколатли банкка ҚҚСни қайтариш ҳуқуқига эга бўлган чет эл фуқароларининг реестрларини тақдим этар эди. Энди у буни ҳар 10 кунда қилиши керак.

Тизимни тартибга солиш учун туристлар чиқиб кетаётганда ҚҚСни қайтариш татбиқ этилмайдиган товарлар гуруҳлари рўйхати тасдиқланди. Ушбу рўйхатга асосий озиқ-овқат маҳсулотлари – гўшт, балиқ, сабзавотлар, мевалар, ёғ, чой, ун ва бошқалар киритилган.

Энди ЯИДХПда ҳам кешбек

Чекларни сканерлаш ва олинган кешбекнинг 1 %ни нафақат солиқ органларининг Солиқ мобил иловаси орқали, балки ЯИДХП мобил иловаси орқали ҳам ўтказиш имконияти яратилди.

Агар фойдаланувчи берилмаган чек устидан шикоят қилса ёки хариднинг ҳақиқийлигига шубҳа туғилса (масалан, баҳсли транзакцияларни текширишда), Солиқ қўмитаси фуқародан исталган платформа орқали рўйхатдан ўтказилган товарнинг ҳақиқий сотиб олинганлиги фактини тасдиқлашни талаб қилиш ҳуқуқига эга. Аммо фирибгарлик ёки шубҳали ҳаракатлар тасдиқланса, кешбек тўлаш рад этилиши мумкин.

Янги давлат хизмати

Жисмоний шахслар мол-мулк солиғи ва ер солиғи бўйича солиқ имтиёзларини қўллаш учун онлайн тарзда – ЯИДХП ёки солиқ портали орқали мурожаат қилишлари мумкин бўлади. Солиқ қўмитасига 2 ой муддатда янги давлат хизматини ишга тушириш топширилди.

Ёшга доир пенсия олувчи фуқаролар, шунингдек, I ва II гуруҳ ногиронлиги бўлган шахслар тўғрисидаги маълумотлар автоматик тарзда узатилади. Бу хизматни ариза берувчилардан ҳужжатларни сўрамасдан электрон шаклда тақдим этиш имконини беради.