2021 йил учун сув солиғи бўйича “бўнаклар” тўғрисида маълумотнома қандай тўлдирилади

Жорий йилда сув ресурсларидан фойдаланганлик учун солиқ бўйича бўнак тўловлари тўғрисида маълумотномани тўлдирган ҳолда нималарни инобатга олиш лозимлигини buxgalter.uz илтимосига биноан “Норма” эксперти  Олег ЦОЙ сўзлаб берди: 

- Солиқ даври-календарь йил давомида сув ресурсларидан фойдаланганлик учун солиқ бўйича бўнак тўловларини унинг барча  тўловчилари тўлайдилар, бундан қишлоқ хўжалиги корхоналари, фаолиятини доимий муассасалар орқали амалга ошираётган норезидентлар бўлган юридик шахслар ва деҳқон хўжаликлари мустасно .

Сувдан фойдаланиш ёки сув истеъмоли жойи бўйича солиқ органига жорий календарь йил учун солиқ суммаси тўғрисида маълумотномани қуйидаги муддатларда тақдим этинг:

• янги ташкил этилган корхоналар - давлат рўйхатидан ўтказилган кундан эътиборан 30 кундан кечиктирмай;
• солиқ бўйича мажбуриятлари солиқ даври ичида юзага келган солиқ тўловчилар - солиқ мажбурияти юзага келган санадан эътиборан 30 кундан кечиктирмай;
• қолганлар - жорий йилнинг 20 январига қадар.

Қуйидагилар бўнак тўловларини тўлайди:

• солиқ даврида солиқ суммаси БҲМнинг 200 бараваридан кўпроқни ташкил этадиган юридик шахслар (бундан айланмадан олинадиган солиқни тўловчилар мустасно) - ҳар ойнинг 20 санасидан кечиктирмай йиллик солиқ суммасининг 1/12 қисми миқдорида;
• солиқ даврида солиқ суммаси БҲМнинг 200 бараваридан камроқни ташкил этадиган, айланмадан олинадиган солиқни тўловчилар бўлмаган юридик шахслар, шунингдек айланмадан олинадиган солиқни тўловчилар ва якка тартибдаги тадбиркорлар - ҳар чорак учинчи ойининг 20 санасидан кечиктирмай йиллик солиқ суммасининг 1/4 қисми миқдорида.

Календарь йил якуни бўйича Ҳисоб-китобни солиқ тўловчилар қуйидаги муддатларда тақдим этадилар:

• Ўзбекистон юридик шахслари (бундан қишлоқ хўжалиги корхоналари мустасно) - йиллик молиявий ҳисобот тақдим этиш муддатида;
• қишлоқ хўжалиги корхоналари - жорий йилнинг 15 декабрига қадар;
• фаолиятини ДМлар орқали амалга ошираётган Ўзбекистон норезидентлари бўлган юридик шахслар ва якка тартибдаги тадбиркорлар - солиқ даври (йили)дан кейинги йилнинг 20 январига қадар.

Солиқни (тўловчилар учун бўнак тўловларини ҳисобга олган ҳолда) худди шу маддатларда тўланг.

Деҳқон хўжаликлари учун солиқ суммасини солиқ органлари ҳисоблаб чиқаради.

Маълумотнома учун ахборот қандай тайёрланади?

My.soliq.uz да бўнак тўловлари тўғрисида маълумотноманинг 4 та шакли жойлаштирилган, улардан сизга тўғри келадиган зарурини танлаш лозим.

Бўнак тўловларини  мўлжалланаётган солиқ базаси (сувдан фойдаланиш ҳажми) ва тегишли солиқ ставкаларидан келиб чиқиб ҳисоблаб чиқаринг .

Маълумотномани тўлдириш учун қуйидаги кўрсаткичларни ҳисоблаб чиқаринг:

1. Солиқ солиниши лозим бўлган мўлжалланаётган сувдан фойдаланиш ҳажми (куб.м да). 

Ушбу кўрсаткични ҳисоблаб чиқаришда сизга ташкилотингизнинг техник мутахассислари қуйидагилардан келиб чиқиб ёрдам беришади:

• 2021 йил учун маҳсулот ишлаб чиқаришнинг режалаштирилган ҳажми ва сув ресурслари харажатлари нормалари;
• жорий истеъмолларни ҳисобга олган ҳолда олдинги йилларда сувдан фойдаланиш ҳажмлари .

Сув ресурсларининг ер усти ва ер ости манбаларидан олинган сув ҳажмини сув ўлчагич асбоблар кўрсаткичлари асосида аниқланг . Агар сизнинг сув ўлчагич асбобларингиз ер усти ва ер ости манбаларидан олинган сувнинг алоҳида-алоҳида ҳисобини юритиш имконини берса, мўлжалланаётган фойдаланиш ҳажмини иккита манба бўйича алоҳида аниқланг.

Сув ўлчагич асбоблари мавжуд бўлмаган тақдирда мўлжалланаётган сувдан фойдаланиш ҳажмини қуйидагилардан келиб чиқиб аниқланг:

• сув объектларидан сув олиш лимитларидан;
• сувни истеъмол қилишнинг технологик ва санитария нормаларидан;
• экинлар ҳамда яшил дарахтзорларни суғориш нормаларидан;
• қўлланиладиган бошқа нормалардан.

Агар сиз ер усти ва ер ости манбаларидан сув келадиган водопровод тармоғидаги сувдан фойдалансангиз, солиқ базасини сув ҳажмларининг нисбатидан келиб чиқиб аниқланг. Ушбу нисбатни ҳар бир йил учун солиқ органларига жорий солиқ даврининг 15 январига қадар сув етказиб беришни амалга оширувчи юридик шахслар тақдим этиши керак. Солиқ органлари эса 3 кун ичида ушбу маълумотларни солиқ тўловчилар эътиборига етказади.

Алкоголли маҳсулот ва алкоголсиз ичимликларни ишлаб чиқариш ва бошқа мақсадлар учун фойдаланилган сувнинг ҳажми ишлаб чиқарувчи юридик шахслар учун солиқ базаси ҳисобланади. Алкоголли маҳсулот ва алкоголсиз ичимликлар ишлаб чиқариш учун фойдаланиладиган сув ҳажми деганда истеъмол идишидаги тайёр маҳсулотга тўғри келадиган сувнинг ҳажми тушунилади.

2. Мўлжалланаётган водопровод сувидан фойдаланиш ҳажми.

Агар сиз ер усти ва ер ости манбаларидан сув келадиган водопровод тармоғидаги сувдан фойдалансангиз, мўлжалланаётган фойдаланиш ҳажмини фоиз нисбатидан келиб чиқиб аниқланг, уни сув етказиб беришни амалга оширувчидан билиб олишингиз мумкин.

«Toshkent shahar suv ta’minoti» МЧЖ 2021 йил учун Тошкент шаҳри бўйича ер усти ва ер ости сувларининг фоиз нисбатини маълум қилди:

• ер усти сувлари – 90,5%; 
• ер ости сувлари – 9,5%.  

3. Сизнинг ташкилотингиз фаолияти соҳасидан келиб чиққан ҳолда солиқ ставкалари.

Белгиланган лимитлар доирасида ер усти ва ер ости манбаларидан олинадиган сув ресурслари учун солиқ ставкалари 1 куб метр учун мутлақ ўлчамда белгиланган .