Чартер қатновлар ва трансфер ҳисоби
Тавсияда:
– чартер қатновлар қандай ҳисобга олинади;
– трансфер қандай ҳисобга олинади.
Чартер қатнов – бу йўловчиларни маълум бир йўналиш бўйича ташиш учун туристик ташкилот томонидан фрахтланган самолёт қатновидир. Бундай авиақатнов мунтазам қатновлар жадвалига кирмайди, улар бўйича чипталар одатда турпакет таркибида сотилади. Чартер қатновлар катта афзалликка эга – улар доимо тўғридан-тўғри бўлади. Мисол учун, Тошкент–Анталия-Тошкент ёки Тошкент–Иссиқ-Кўл–Тошкент йўналиши бўйича чартер қатновлари.
Чартер қатнови бўйича учиш қийматини турпакет қийматига киритинг ва 2010-«Асосий ишлаб чиқариш» счётида акс эттиринг.
Туристик ташкилотлар ҳар доим ҳам чартердаги ҳамма жойларни сота олмайди. Самолёт тегишли бўлган авиакомпания бундай ҳолларда тўланган пулларни қайтармайди. Туристик маҳсулотнинг таннархини шаклланишида буни назарда тутинг ва таннархга маълум миқдордаги жойларни технологик йўқотиш сифатида киритинг.