Масъулияти чекланган жамиятни очиш ва рўйхатдан ўтказиш тартиби

Тавсияда:

– МЧЖни ким очиши мумкин, ким эса очиши мумкин эмас;
– МЧЖнинг тижорат тузилмаларининг бошқа турларидан фарқи нимада;
– МЧЖни рўйхатдан ўтказиш учун зарур ҳужжатлар;
– МЧЖнинг фирма номига қўйиладиган талаблар;
– МЧЖни рўйхатдан ўтказиш ва қайта рўйхатдан ўтказиш тартиби.

Масъулияти чекланган жамиятни (МЧЖ) очиш ва рўйхатдан ўтказиш тартиб-таомилини бошлаганда, қуйидагилар унинг таъсисчилари бўлиши мумкинлигини ёдда тутинг:

• жисмоний шахслар (фуқаролар, чет эл фуқаролари, фуқаролиги бўлмаган шахслар);
• ҳар қандай ташкилий-ҳуқуқий шаклидаги юридик шахслар.

МЧЖнинг иштирокчилари унинг мажбуриятлари бўйича жавобгар бўлмайдилар ва жамият фаолияти билан боғлиқ зарарлар учун ўзлари қўшган ҳиссалар қиймати доирасида жавобгар бўладилар. Агар таъсисчилар устав фондига ўз ҳиссасини тўла қўшмаган бўлса, улар унинг мажбуриятлари бўйича ҳар бир иштирокчи ҳиссасининг тўланмаган қисмининг қиймати доирасида солидар жавобгар бўладилар . Жамият ўз таъсисчиларининг мажбуриятлари бўйича жавоб бермайди .