Айланмадан олинадиган солиқни кимлар тўлаши мумкин

Тавсияда:

– ким айланмадан олинадиган солиқни тўлаш ҳуқуқига эга;
– ўрнатилган даромад чегарасидан ошиб кетганда  айланмадан олинадиган солиқни  ким тўлаши мумкин;
– ким айланмадан олинадиган солиқни тўлай олмайди;
– қандай қилиб айланмадан олинадиган солиқ тўловчи бўлиш мумкин;
– айланмадан олинадиган солиқни тўлашдан фойда солиғи ва ҚҚС тўлашга ўтиш;
– айланмадан олинадиган солиқни тўлашга қайтиш;
– айланмадан олинадиган солиқ тўловчилар тўлайдиган бошқа солиқлар.

Ким айланмадан олинадиган солиқни тўлашни танлаш ҳуқуқига эга

2020 йилдан бошлаб,  сиз айланмадан олинадиган солиқни тўлашни танлашингиз мумкин, агар қуйидагилар тоифасида бўлсангиз :

• солиқ даврида (календарь йили) жами даромади 1 млрд. сўмдан ошмаган юридик шахс;
• солиқ даврида товарларни (хизматларни) реализация қилишдан даромади 100 млн. сўмдан ошган, лекин 1 млрд. сўмгача бўлган якка тартибдаги тадбиркор.

Агар сиз воситачилик хизматларини амалга оширсангиз, ўрнатилган (белгиланган) даромад чегарасини ўзингизга тегишли мукофот суммасидан эмас, балки реализация қилиш бўйича умумий айланмадан (битим суммасидан) келиб чиқиб аниқлайсиз .