Қачон Россия компаниясининг доимий муассасаси юзага келади

Тавсияда:

– Солиқ кодекси бўйича доимий муассаса;
– халқаро шартнома бўйича доимий муассаса;
– қурилиш майдони мавжуд бўлиши муддатлари;
– доимий муассасани рўйхатдан ўтказиш муддатлари.

Миллий қонунчилик

Чет эл юридик шахсининг доимий муассасаси (ДМ) – бу Ўзбекистонда ушбу шахс тўлиқ ёки қисман тадбиркорлик фаолиятини юритаётган доимий фаолият жойи.

Шунингдек, ДМ сифатида қурилиш майдони, қурилиш, монтаж қилиш ёки йиғиш объекти ёхуд улар билан боғлиқ кузатув (назорат қилиш) фаолияти тан олинади, башарти бундай майдон, объект ёки фаолият исталган кетма-кетликдаги 12 ойлик давр мобайнида 183 кундан ортиқ муддат мобайнида мавжуд бўлса ёки давом этса.

Чет эллик юридик шахснинг фаолияти Ўзбекистонда бундай фаолият бошланган санада ДМни юзага келтиради .

Халқаро шартномаларнинг устуворлиги

Ўзбекистон ва РФ ҳукуматлари даромаддан ва мулкдан олинадиган солиқларнинг иккиёқлама қўлланилишига йўл қўймаслик тўғрисидаги битим миллий қонун ҳужжатлари талабларидан устун ҳисобланади , шунинг учун унинг қоидаларига мурожаат этамиз.

«Доимий ваколатхона» атамаси қурилиш майдони, қурилиш, монтаж қилиш ёки йиғиш объекти, улар билан боғлиқ техник назорат фаолиятини ўз ичига олади, башарти бундай майдон, (объект ёки фаолият) 12 ойдан ортиқ давр мобайнида мавжуд бўлса .

Шундай қилиб, агар бино қурилиши Ўзбекистонда 12 ойдан ортиқ давом этса, унда ушбу фаолият Ўзбекистон Республикаси ҳудудида Россия компанияси – пудратчининг ДМси юзага келишига олиб келади.

Россия компаниясининг Ўзбекистонда олган фойдаси, агар у Ўзбекистонда жойлашган ДМ орқали олинса ва ушбу ДМ тегишли қисми доирасида, фақат Ўзбекистонда солиққа тортилади .

Қурилиш майдони мавжуд бўлиши муддатларини аниқлашнинг умумий тамойиллари

Қурилиш майдони қурилиш ишлари тугаллангунга қадар ёки тўлиқ тўхтагунга қадар мавжуд бўлади. Қурилиш майдони, агар унда ишлар вақтинчалик тўхтатилган бўлса ҳам, мавжуд бўлади.

Агар Россия компанияси асосий объектни амалга ошириш бўйича мажбуриятни зиммасига олган бошпудратчи сифатида ишнинг бир қисмини субпудратчига топширса, унда субпудратчи томонидан қурилиш майдонида ишларга сарфлаган вақт даври бошпудратчи томонидан сарфланган вақт деб ҳисобланади. Субпудратчи, агар у майдонда 12 ойдан ортиқ давр мобайнида фаолият юритса, ўз ўзидан ДМни юзага келтиради.

Доимий муассасани рўйхатдан ўтказиш муддатлари

Агар чет эл юридик шахси фаолияти Ўзбекистонда ДМни юзага келтирса, унда у солиқ тўловчи сифатида рўйхатдан ўтишга мажбур .

Солиқ кодексининг 130-моддаси ва Ўзбекистон ҳамда РФ ҳукуматлари ўртасидаги Битимнинг 5-моддаси моҳиятидан келиб чиқадиган бўлсак, қуйидаги муддатларда солиқ органига зарур ҳужжатлар илова қилинган ҳолда ДМни рўйхатдан ўтказиш учун ариза топширилиши лозим:

• агар шартнома муддати 12 ойдан ошса, фаолият бошлаган кундан бошлаб 30 календарь кунидан кечиктирмай;
• агар шартнома муддати 12 ойдан кам, лекин ҳақиқатда фаолият шу муддатдан ортиқ амалга оширилаётган бўлса, фаолият бошланган кундан бошлаб 12 ойдан кечиктирмай.