EHFda qaysi qadoq turini koʻrsatish kerak

«Assortimentda majburiy raqamli markirovkaga tegishli tovarlar paydo boʻldi. EHFda «Qadoq turi» boʻlimi bor, uni toʻldirishda ochiladigan yordamdan «iste’mol», «guruh» yoki «transport» turini tanlash kerak. Qachon qaysi qadoqni koʻrsatish kerak?»

Vuxgalter.uz iltimosiga koʻra qadoq turlari oʻrtasidagi farqlarni Green White Solutions raqamli markirovka tizimi integratorining mutaхassisi Roman GROMOVOY tushuntirib berdi:

– Bu savolni bizga tez-tez berishadi.

Raqamli markirovka har bir tovar birligiga - ichimlik shishasiga, dori qutisiga va hokazolarga qoʻyiladi. Chakana savdoda donabay sotishda kodni skanerlash va uni hisob-fakturada yoki onlayn-NKM chekida aks ettirish yetarli.

Bir vaqtning oʻzida oʻn minglab tovar birliklarini joʻnatadigan ishlab chiqaruvchilar va import qiluvchilar ularni yirikroq qadoqlarga birlashtiradi. Raqamli markirovka tizimida bunday har bir qadoqqa uning ichidagi tovar birliklari haqidagi ma’lumotlarni oʻz ichiga olgan yagona (agregatsiyalangan) kod beriladi. Agar siz butun qadoqni ochmasdan sotsangiz, hisob-fakturada yoki onlayn-NKT chekida faqat shu qadoqning kodini koʻrsatish yetarli.

Uch хil qadoq farqlanadi:

• guruh;
• iste’mol;
• transport.

Iste’mol - eng kichik qadoq birligi boʻlib, u bevosita yakuniy iste’molchiga yetib boradi. Unga odatda bitta tovar qadoqlanadi va koʻpincha individual Data Matrix kodi bilan markirovka qilinadi.

"Dori vositalari" tovar guruhi uchun iste’mol qadogʻi deganda birlamchi qadoqdagi dori vositasi joylashtiriladigan ikkilamchi (tashqi) qadoq tushuniladi. Agar ikkilamchi qadoq (masalan, quti) boʻlmasa, iste’mol qadogʻi sifatida dori vositasi bilan bevosita aloqada boʻladigan birlamchi (ichki) qadoq (blister, ampula, flakon va hokazo) hisoblanadi.

Guruh qadogʻi bir nechta iste’mol qadoqlarini bitta qadoqqa birlashtiradi, tashish va saqlash qulayligi uchun ishlatiladi. Masalan, guruh qadogʻiga bir nechta tovar qutilari qadoqlanishi mumkin (har bir qutida oʻzining iste’mol qadogʻi bor). Guruh qadogʻi ham ichidagi barcha tovarlar haqidagi ma’lumotlarni oʻz ichiga olgan alohida kod bilan markirovka qilinishi mumkin. Odatda, uni ishlab chiqaruvchilar, import qiluvchilar va distribyutorlar ishlatadi.

Transport qadogʻi - bu guruh yoki iste’mol qadoqlarini katta masofalarga himoya qilish va tashish uchun moʻljallangan qadoqning tashqi qatlami. U tovarlarni ommaviy koʻchirish uchun ishlatiladi (masalan, ishlab chiqaruvchidan ulgurji хaridorga). Transport qadogʻi pallet, quti yoki yashik koʻrinishida boʻlishi mumkin. Boshqa qadoq turlari kabi, u ham markirovka qilinadi, bu esa logistika zanjirining barcha bosqichlarida tovarlar harakatini kuzatib borish imkonini beradi.

Guruh va transport qadoqlari, odatda, logistika uchun ishlatiladi, lekin iste’mol qadogʻi kabi, ular ba’zan yakuniy iste’molchiga chakana sotuvda onlayn - NKT orqali muomaladan chiqarilishi mumkin.

Oleg GAYeVOY tayyorladi