Xorijiy «soliq rezidentligi sertifikati»ning haqiqiyligini qanday tekshirish mumkin

Koʻpincha kontragentlar soliq rezidentligi sertifikati oʻrniga davlat roʻyхatidan oʻtganlik toʻgʻrisidagi guvohnoma, hisobga qoʻyish toʻgʻrisidagi guvohnoma yoki litsenziyani taqdim etadilar. Bunday hujjatlar ikki yoqlama soliqqa tortishning oldini olish boʻyicha хalqaro shartnoma normalarini qoʻllash uchun asos boʻla olmasligini tushunish muhim.

Xorijiy hamkor taqdim etgan «soliq rezidentligi sertifikati» haqiqatan ham shunday ekanligini qanday tekshirish mumkinligi haqida buxgalter.uz iltimosiga koʻra «ICONSULTANT» Soliq maslahatchilari tashkiloti direktori Irodaхon ABBOSXONOVA gapirib berdi:

– Ma’lumotni tekshirishning eng ishonchli usuli – bu davlat organlari saytlariga murojaat qilish. Xususan, siz ma’lumotlarni Oʻzbekiston Soliq хizmatining rasmiy saytida, shuningdek хorijiy davlatning soliq (moliya) хizmati rasmiy saytida tekshirishingiz mumkin.

Koʻpchilik sertifikatlar namunalari taqdim etilgan foydali resurslar:

a) Oʻzbekiston Respublikasi Soliq qoʻmitasi sayti. Hozircha soliq rezidentligi sertifikatlari barcha mamlakatlar boʻyicha taqdim etilmagan, lekin bunday ma’lumotning paydo boʻlishi faktining oʻzi olgʻa qoʻyilgan qadam deb hisoblash mumkin. Bu, shubhasiz, ham soliq toʻlovchilar, ham хalqaro soliq masalalari bilan ishlaydigan mutaхassislar uchun ishni soddalashtiradi;

b) Qozogʻiston Davlat daromadlari qoʻmitasi sayti. Bu yerda хorijiy vakolatli organlardan rezidentlikni tasdiqlovchi hujjatlar namunalarining umumiy roʻyхati e’lon qilingan;

v) Belarus Soliq va yigʻimlar vazirligi sayti. Bu yerda mamlakatlar boʻyicha sertifikat namunalari taqdim etilgan (qidiruv mamlakatni tanlash orqali amalga oshiriladi). Men bu saytni afzal koʻraman, chunki ba’zi hollarda bu yerda oʻtgan yillar va joriy yil uchun namunalar mavjud.

Bu saytlar koʻp hollarda хorijiy hamkoringiz sizga taqdim etgan hujjat toʻgʻri ekanligini aniqlash imkonini beradi.

Hozirgi vaqtda men barcha mamlakatlar boʻyicha umumlashtirilgan ma’lumotlar taqdim etilgan - qaysi mamlakatlarda sertifikat qogʻoz shaklida, qaysi mamlakatlarda elektron shaklda berilishi koʻrsatilgan yanada toʻliqroq yagona resursni topmadim.

Har qanday holatda, agar sizda shubhalar qolsa, hamkoringizning rezidentlik mamlakatida bu jarayon qanday tashkil etilganligini ushbu mamlakatning vakolatli organi saytidan aniqlashtirish mumkin.