Ҳисобот давридан кейинги ҳодисалар

Мазкур бобда ҳисобот давридан молиявий ҳисоботни эълон қилиш учун маъқулланган санагача бўлган даврда содир бўлган ҳодисаларни молиявий ҳисоботларда қандай тақдим этишни кўриб чиқамиз. Бундай ҳодисаларни ҳисобга олиш 10-сон БҲХС “Ҳисобот давридан кейинги ҳодисалар”га мувофиқ амалга оширилади.

15.2.1 Қўллаш доираси

10-сон БҲХС - ҳисобот даври охиридаги сана ва молиявий ҳисоботни эълон қилиш учун маъқулланган сана оралиғида содир бўлган ҳодисаларни ҳисобга олиш ва ёритиб беришга нисбатан қўлланади. Шунингдек, мазкур стандартга кўра, агар ҳисобот давридан кейинги ҳодисалар фаолият узлуксизлиги тамойили ўринли эмаслигини кўрсатса, молиявий ҳисобот ушбу тамойил асосида тайёрланмаслиги талаб этилади.