Халқ таълими муассасалари ижтимоий солиқнинг 1% ставкасини қандай қўллайди

ДСҚ халқ таълими тизими муассасалари ва ташкилотлари учун ижтимоий солиқнинг 1% ставкаси тарзидаги имтиёзни автоматлаштирди 11.05.2022 й. ПҚ-241-сон қарор. Солиқ органларининг E-imtiyoz ахборот тизимида унга ID 104023 берилди.

Халқ таълими тизимидаги муассаса ва ташкилотлар солиқ тўловлари бўйича қуйидагиларни эслатиб ўтамиз 11.05.2022 й. ПҚ-241-сон қарор:

• 2022 йил 1 сентябрдан бошлаб:

– халқ таълими тизимидаги муассаса ва ташкилотлар раҳбарларига бюджетдан ташқари маблағларини мустақил тасарруф этиш ҳуқуқи берилади;

– 2025 йил 1 январга қадар халқ таълими тизимидаги муассаса ва ташкилотларнинг бюджетдан ташқари маблағлари ҳисобидан амалга ошириладиган иш ҳақи ва унга тенглаштирилган тўловларга ижтимоий солиқ ставкаси 1% миқдорида белгиланади;

– қўшимча хизмат кўрсатишдан тушган бюджетдан ташқари маблағларни яширган, шунингдек, ходимларга норасмий иш ҳақи тўлаган халқ таълими тизимидаги муассаса ва ташкилотларнинг раҳбарлари жавобгарликка тортилади.

Узлуксиз 3 йил давомида фаолият самарадорлиги даражаси юқори бўлган давлат ва нодавлат умумий ўрта таълим ташкилотларида текширувлар ташкил этишга 3 йил муддатга мораторий жорий қилинади (потенциал коррупциоген ҳолатлар бундан мустасно).

Халқ таълими вазирлигининг таълим беришга мўлжалланган бинолари ва иншоотларини таълим соҳасидан ташқари бошқа мақсадлар учун юридик ва жисмоний шахсларга берилиши тақиқланади.

Бўш турган биноларни бошқа жисмоний ва юридик шахсларга бериш улар жойлашган ҳудуднинг камида 5 йиллик демографик кўрсаткичларини инобатга олиб, халқ таълими вазирининг розилигини олган ҳолда амалга оширилади.

Саида ЖОНИЗОҚОВА тайёрлади