Истиқболли лойиҳалар миллий агентлиги директорининг 15.06.2026 й. 20-сон "Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисидаги низомга ўзгартириш ва қўшимчалар киритиш ҳақида"ги Буйруғи (АВ томонидан 29.06.2026 й. 3380-3-сон билан рўйхатга олинган)

ЎЗБЕКИСТОН РЕСПУБЛИКАСИ

АДЛИЯ ВАЗИРЛИГИ ТОМОНИДАН

РЎЙХАТГА ОЛИНГАН

29.06.2026 й.

N 3380-3

ЎЗБЕКИСТОН РЕСПУБЛИКАСИ

ИСТИҚБОЛЛИ ЛОЙИҲАЛАР МИЛЛИЙ

АГЕНТЛИГИ ДИРЕКТОРИНИНГ

15.06.2026 й.

N 20

БУЙРУҒИ

Крипто-активлар айланмаси соҳасидаги хизматлар

провайдерлари фаолиятини лицензиялаш тартиби

тўғрисидаги низомга ўзгартириш ва қўшимчалар

киритиш ҳақида

Ўзбекистон Республикасининг "Лицензиялаш, рухсат бериш ва хабардор қилиш тартиб-таомиллари тўғрисида"ги Қонуни, Ўзбекистон Республикаси Президентининг 2017 йил 27 июлдаги ПҚ-3150-сон "Ўзбекистон Республикаси Истиқболли лойиҳалар миллий агентлиги фаолиятини ташкил этиш тўғрисида"ги, 2018 йил 3 июлдаги ПҚ-3832-сон "Ўзбекистон Республикасида рақамли иқтисодиётни ва крипто-активлар айланмаси соҳасини ривожлантириш чора-тадбирлари тўғрисида"ги ҳамда 2026 йил 17 апрелдаги ПҚ-143-сон "Қорақалпоғистон Республикасида махсус майнинг зонасини ташкил этиш ва унинг фаолиятини йўлга қўйиш чора-тадбирлари тўғрисида"ги қарорларига мувофиқ БУЮРАМАН:

1. Ўзбекистон Республикаси Истиқболли лойиҳалар миллий агентлиги директорининг 2022 йил 14 июлдаги 32-сон буйруғи (рўйхат рақами 3380, 2022 йил 15 август) (Қонунчилик маълумотлари миллий базаси, 15.08.2022 й., 10/22/3380/0742-сон) билан тасдиқланган Крипто-активлар айланмаси соҳасидаги хизматлар провайдерлари фаолиятини лицензиялаш тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур буйруқ расмий эълон қилинган кундан эътиборан уч ойдан кейин кучга киради.

Директор                                                                         Д.Р. Ли

         

          

Буйруққа

ИЛОВА

Крипто-активлар айланмаси соҳасидаги хизматлар

провайдерлари фаолиятини лицензиялаш тартиби

тўғрисидаги низомга киритилаётган ўзгартириш

ва қўшимчалар

1. 9-бандда:

1) "з" ва "и" кичик бандлар қуйидаги таҳрирда баён этилсин:

"з) хизматлар провайдерларини:

террористик фаолиятда ёки оммавий қирғин қуролларини тарқатишда иштирок этган ёки иштирок этишда гумон қилинаётган;

иқтисодий жиноятлар, шунингдек жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролларини тарқатишни молиялаштириш, уюшган жиноятчилик, гиёҳванд моддаларнинг ноқонуний савдоси, коррупция ва ахборот технологиялари билан боғлиқ жиноятларни содир этганлик учун гумонланаётган ёки судланганлиги олиб ташланмаган ёхуд ўталмаган;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда доимий яшаётган, бўлиб турган ёки рўйхатга олинган шахслар томонидан бошқаришга йўл қўймаслик;

и) хизматлар провайдерларининг устав жамғармасида (капиталида) ушбу банднинг "з" кичик бандида кўрсатилган шахсларнинг ҳамда жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда рўйхатдан ўтган компанияларнинг иштирок этишига йўл қўймаслик;";

2) қуйидаги мазмундаги "к" ва "л" кичик бандлар билан тўлдирилсин:

"к) жисмоний ва юридик шахсларга, шу жумладан норезидентларга, лицензиатнинг устав капиталидаги улушини реализация қилишни лицензияловчи орган билан келишиш;

л) лицензиатнинг раҳбарияти (директор ва унинг ўринбосарлари), шунингдек, жиноий фаолиятдан олинган даромадларни легаллаштириш, терроризм, оммавий қирғин қуролларини тарқатиш, уларни молиялаштиришга қарши курашиш бўйича таркибий бўлинма раҳбарини алмаштириш масаласини лицензияловчи орган билан келишиш.".

2. 31-банддаги "олтинчи хатбошисида" деган сўзлар "олтинчи ва еттинчи хатбошиларида" деган сўзлар билан алмаштирилсин.

3. 54-бандда:

1) "б" ва "в" кичик бандлар қуйидаги таҳрирда баён этилсин:

"б) хизматлар провайдерларини:

террористик фаолиятда ёки оммавий қирғин қуролларини тарқатишда иштирок этган ёки иштирок этишда гумон қилинаётган;

иқтисодий жиноятлар, шунингдек жиноий фаолиятдан олинган даромадларни легаллаштириш, терроризмни молиялаштириш ва оммавий қиргин қуролларини тарқатишни молиялаштириш, уюшган жиноятчилик, гиёҳванд моддаларнинг ноқонуний савдоси, коррупция ва ахборот технологиялари билан боғлиқ жиноятларни содир этганлик учун гумонланаётган ёки судланганлиги олиб ташланмаган ёхуд ўталмаган;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда доимий яшаётган, бўлиб турган ёки рўйхатга олинган шахслар томонидан бошқарилиши;

в) хизматлар провайдерларининг устав жамғармасида (капиталида) ушбу банднинг "б" кичик бандида кўрсатилган шахсларнинг ва жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда рўйхатдан ўтган компанияларнинг иштирок этиши;";

2) қуйидаги мазмундаги "ж" кичик банд билан тўлдирилсин:

"ж) лицензиатнинг устав капиталидаги улушини жисмоний ва юридик шахсларга, шу жумладан норезидентларга реализация қилиш тўғрисида лицензияловчи орган билан келишмаслик.";

3) ўн иккинчи хатбошидаги "а" - "е" кичик бандларида" деган сўзлар "а" - "ж" кичик бандларида" деган сўзлар билан алмаштирилсин.

4. Қуйидаги мазмундаги 6-1-боб билан тўлдирилсин:

"6-1-БОБ. АЙРИМ ЛИЦЕНЗИЯ ТАЛАБЛАРИ

ВА ШАРТЛАРИНИ АМАЛГА ОШИРИШНИНГ

МАХСУС ТАРТИБИ

54-1. Хизматлар провайдерлари лицензияловчи орган билан қуйидагиларни келишишлари лозим:

ўз устав капиталидаги улушларни жисмоний ва юридик шахсларга, шу жумладан норезидентларга реализация қилиш;

ўзининг раҳбарияти (раҳбар, унинг ўринбосарлари), жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролларининг тарқалишини молиялаштиришга қарши курашиш бўйича таркибий бўлинма раҳбарини алмаштириш.

54-2. Мазкур Низомнинг 54-1-бандида кўрсатилган ҳолатларда хизматлар провайдерлари лицензияловчи органга қуйидаги ҳужжатларни тақдим этишлари керак:

а) юридик шахснинг номи ва ташкилий-ҳуқуқий шакли, почта манзили, солиқ тўловчининг идентификация рақами (СТИР), электрон почта манзили, хизмат кўрсатувчи банк номи ва ҳисобварағи, мурожаат қилиш мақсади (устав капиталидаги улушни реализация қилишга ёки раҳбариятни (раҳбар, унинг ўринбосарларини), жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролларини тарқатишни молиялаштиришга қарши курашиш бўйича таркибий бўлинма раҳбарини алмаштиришни келишиш) кўрсатилган ариза;

б) жисмоний шахс, шу жумладан хизматлар провайдерининг устав капиталидаги улушни потентсиал олувчи ҳақидаги маълумотлар (Ф.И.О., шахсни тасдиқловчи ҳужжат рақами, ЖШШИР). Чет эл фуқаролари учун мазкур банднинг "г" кичик бандида назарда тутилган маълумотлар қўшимча равишда тақдим этилади;

в) хизматлар провайдерининг устав капиталидаги улушни потенциал олувчи - юридик шахснинг раҳбарияти (раҳбар, унинг ўринбосарлари) ва таъсисчилари ҳақида ушбу Низомнинг 3-иловасига мувофиқ шаклдаги маълумотлар. Бунда, таъсисчилар ҳақидаги маълумотлар охирги бенефитсиар мулкдорга қадар (охирги бенефитсиар мулкдор ҳам) кўрсатилади;

г) хизматлар провайдерининг устав капиталидаги улушни потенциал олувчи - юридик шахснинг раҳбарияти (раҳбар, унинг ўринбосарлари) ва таъсисчилари чет эл фуқаролари бўлганда, ушбу Низомнинг 9-банди "з" кичик бандида назарда тутилган жиноятлар бўйича белгиланган тартибда легаллаштирилган ёки апостил қўйилган тегишли хорижий мамлакатнинг ваколатли органидан олинган судланмаганлик ҳақидаги маълумотнома ҳамда унинг Ўзбекистон Республикаси давлат тилига нотариал тартибда тасдиқланган таржимаси.

54-3. Лицензияловчи орган аризани қабул қилган кундан бошлаб ўн иш кунидан ортиқ бўлмаган муддатда келишиш ёки келишишни рад этиш ҳақида қарор қабул қилади.

Бунда, мазкур Низомнинг 54-1-бандида кўрсатилган шахслар лицензия талаблари ва шартларига мувофиқ бўлган тақдирда, лицензияловчи орган томонидан уларни келишиш ҳақида қарор қабул қилинади. Агар улар лицензия талаблари ва шартларига мувофиқ эмас деб топилганда, шунингдек асослантирилган мулоҳазага мувофиқ уларни келишиш рад этилади.

Лицензияловчи орган тегишли қарор қабул қилинган кундан бошлаб бир иш куни ичида лицензиатни қабул қилинган қарор тўғрисида хабардор қилади.

54-4. Аризани кўриб чиқиш ва қарор қабул қилиш учун йиғим ундирилмайди.".

5. Мазкур ўзгартириш ва қўшимчаларнинг иловасига мувофиқ 3-илова билан тўлдирилсин.

   

         

Ўзгартириш ва қўшимчаларга

ИЛОВА

"Крипто-активлар айланмаси

соҳасидаги хизматлар провайдерлари

фаолиятини лицензиялаш тартиби

тўғрисидаги низомга

3-ИЛОВА

Хизматлар провайдерининг устав капиталидаги улушни

сотиб олувчи потенциал шахс - юридик шахснинг

раҳбарияти (раҳбар, унинг ўринбосарлари)

ва таъсисчилари тўғрисида

МАЪЛУМОТЛАР

            

1-жадвал

        

       

2-жадвал

".

         

              

Қонун ҳужжатлари маълумотлари миллий базаси (www.lex.uz),

2026 йил 30 июнь