Солиқчилар ЭҲФ бўйича саволларга жавоб бердилар

14 декабрь куни Давлат солиқ қўмитасида солиқ тўловчилар учун “Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби” мавзусида семинар-тренинг ўтказилди. 400 нафардан зиёд бухгалтерлар ва тадбиркорлар ДСҚ раҳбариятига савол бериш имкониятига эга бўлишди. Олувчи учун ЭҲФ пуллик бўладими?

• Биз – ҳисобварақ-фактураларни қабул қилувчи тараф. Ҳисобварақ-фактураларни қабул қилганимиз (имзо қўйганимиз) учун биз ҳам ҳар бир қабул қилинган ЭҲФ учун ҳақ тўлаймизми? Ёки ойлик абонент тўлови бўладими?

- Тақдим этилган ЭҲФ учун тўловни етказиб берувчи (сотувчи) амалга оширади. Қабул қилувчи тараф (харидор, буюртмачи) олинган ЭҲФ учун ҳақ тўламайди.

• Агар буюртмачи норезидент, ҚҚС ставкаси 0% бўлса, ЭҲФ қандай расмийлаштирилади?

- 25.06.2019 йилдаги 522-сон ВМҚ билан тасдиқланган Низомнинг 3-бандига асосан БЮДни расмийлаштиришда ЭҲФ расмийлаштирилмайди.

• E-factura гуруҳида тижорат банклари учун ҳисобварақ-фактураларни тўпламли юклаб олиш имконияти ҳақида илтимос билан мурожаат қилишган. Бу амалга оширилдими?

- E-factura тизимида Excel шаклидан ЭҲФни юклаб олиш имконини берадиган опция пайдо бўлди.

• Электрон шаклдаги ҳисобварақ-фактура 28 декабрда расмийлаштирилди ва жўнатилди, деб фараз қилайлик. Объектив сабабларга кўра олувчи уни шу куни тасдиқлай олмайди. Масалан, у унинг олинганлигини 6 январда тасдиқлайди. Байрам саналари, интернет-алоқасининг техник жиҳатдан ишдан чиқиши ва ҳоказо муносабати билан ЭҲФни расмийлаштиришни кечиктириш  назарда тутилмоқдами? Қоғоз шаклида ЭҲФ ва юкхати ёзиш, ЭҲФни эса шу рақам остида кейинроқ ўтказиш мумкинми?

- Ҳисобварақ-фактура бухгалтерияда уни расмийлаштириш санасида ҳисобга олинади. Агар ҳисобварақ-фактурада товар (хизмат)ни реализация қилиш санаси сифатида 28 декабрь кўрсатилган бўлса, ҳам жўнатувчи, ҳам олувчининг бухгалтериясида ҳисобварақ-фактура 28 декабрда ёки келаси йилнинг 6 январида қабул қилинганлигидан қатъи назар, у ҳисобварақ-фактурада  кўрсатилган операция амалга оширилган сана бўйича, яъни 28 декабрда акс эттирилади.

• Жисмоний шахс офисни юридик шахсга ижарага тақдим этади. Жисмоний шахс ЭРИга эга бўлган ҳолда электрон ҳисобварақ-фактура тақдим этиши мумкинми?

- Жисмоний шахс ЭРИга эга бўлган ҳолда factura.soliq.uz сайти орқали ЭҲФни тақдим этиши мумкин.

• Контрагент томонидан қабул қилинган ЭҲФни қандай бекор қилиш ёки ўзгартириш мумкин?

- Бу ҳолда тузатилган (корректировка қилинган) электрон ҳисобварақ-фактура жўнатиш лозим.

Soliq xizmati xabarlari маълумотлари асосида