Қандай қилиб уйдан кредит тарихини текшириш мумкин (қадамма-қадам йўриқнома)

Ягона интерактив давлат хизматлари порталида жисмоний шахслар учун онлайн режимида ўз кредит тарихини билиш имконини берадиган янги сервис ишга туширилди. Buxgalter.uz тафсилотларни аниқлаштирди.

Хизмат Кредит-ахборот таҳлилий маркази томонидан тақдим этилади. Асос - “Кредит ахбороти алмашинуви тўғрисида"ги Ўзбекистон Республикаси Қонунини амалга ошириш чора-тадбирлари тўғрисида” 74-сон ВМҚ.

Ўз кредит тарихингизни билиш учун My.gov.uz орқали:

1. OneID сервиси орқали рўйхатдан ўтинг ёки киринг.
2. “Молия ва банк” бўлимида “Кредит тарихини олиш” хизматини танланг.
3. Ариза берувчининг сўровномасини тўлдиринг.
4. Киритилган барча маълумотларни текширинг ва смс-хабарнома келадиган телефон рақамини тасдиқланг.
5. Бир неча сония давомида кўрсатилган рақамга буюртма рақами билан хабарнома келади, My.gov.uz даги шахсий кабинетда эса кредит скоринг натижалари билан файл пайдо бўлади.

Кредит-ахборот таҳлилий маркази томонидан тақдим этилган ахборотда қуйидаги маълумотлар сақланади:

• қарз олувчининг (ариза берувчининг) идентификация маълумотлари;
• берилган, маъқулланган, рад этилган буюртмалар, шартномалар ва кредит мажбуриятлари, кредит тўловлари бўйича муддат ўтказиб юборилганлиги, ҳисобланган пеня ва ариза берувчини “қора рўйхатга” киритган ташкилотлар бўйича умумий шарҳ;
• сўровга ишлов бериш пайтида Кредит-ахборот таҳлилий маркази баҳоси бўйича қарз олувчининг скоринг балли.

Саида ЖОНИЗОҚОВА тайёрлади