Ноябрь ойидаги бухгалтер учун фойдали ахборот:
Корхона ўзи фойдаланиши учун меҳмонхона қурмоқда. Уни 2020 йилда фойдаланишга киритиш режалаштирилганди, бироқ пандемия туфайли қурилиш ишлари ҳануз якунланмаган. Бу ҳолда меҳмонхона учун мол-мулк солиғи тўлаш зарурми? Буни Молия вазирлиги Солиқ-божхона сиёсати ва даромадларни прогнозлаштириш департаменти директори Иродахон АББОСХОНОВА тушунтирди:
– Мол-мулк солиғи, хусусан, қуйидагиларга солинади:
- уларга бўлган ҳуқуқларни давлат рўйхатидан ўтказувчи органларда рўйхатдан ўтказилиши лозим бўлган бинолар ва иншоотлар. Яъни - кадастр ҳужжатлари расмийлаштирилган қурилиши тугалланган объектлар;
- қурилиши тугалланмаган объектлар - лойиҳа-смета ҳужжатларида белгиланган норматив муддатда қурилиши тугалланмаган объектлар. Агар бундай муддат белгиланмаган бўлса - қурилишга ваколатли бўлган органнинг рухсатномаси олинган ойдан эътиборан 24 ой ичида қурилиши тугалланмаган объектлар
.
2020 йилда бинолар ва иншоотлар бўйича солиқ ставкаси 2%ни, қурилиши тугалланмаган объектлар бўйича эса - 4%ни ташкил қилган .
Бундан ташқари, қурилиши тугалланмаган объектлар эгаллаган ер участкалари учун ер солиғи икки баравар солиқ ставкалари бўйича тўланади .
Юқорида келтирилган нормалардан келиб чиққан ҳолда, агар объектнинг қурилиши юқорида келтирилган муддатда тугалланмаса, бундай объект мол-мулк солиғини ҳисоблаб чиқиш мақсадларида қурилиши тугалланмаган объект деб эътироф этилади ва корхона мол-мулк солиғини 4% ставка бўйича (2020 йилда) тўлаши зарур.
Эътибор беринг
Бўш турган бинолар, фойдаланилмаётган ишлаб чиқариш майдонлари, яшаш учун мўлжалланмаган иншоотлар, шунингдек тугалланмаган қурилиш объектларига нисбатан мол-мулк ва ер солиғи бўйича оширилган солиқ ставкаларини белгилаш йўли билан таъсир чоралари қўлланилиши мумкин. Бунда солиқ имтиёзлари уларга татбиқ этилмайди. .Таъсир чоралари солиқ органлари ва махсус ишчи гуруҳининг хулосалари асосида қўлланилади. Қўллаш тартиби 13.08.2019 йилдаги 666-сон қарорда назарда тутилган.
Бунда шуни эътиборга олиш жозки, агар 2020 йил 1 апрелдан 31 декабрга қадар бўлган даврда хўжалик юритувчи субъект ўз фаолиятини коронавирус инфекциясига қарши курашиш учун киритилган чеклов чоралари туфайли тўхтатишга мажбур бўлган бўлса, қуйидагилар тўхтатилади:
- фойдаланилмаётган ишлаб чиқариш майдонлари, яшаш учун мўлжалланмаган иншоотларга (шу жумладан 2020 йил 1 апрелга қадар аниқланганларга) нисбатан мол-мулк солиғи ва ер солиғининг оширилган ставкаларини қўллаш;
- ушбу солиқлар бўйича оширилган ставкаларни қўллаш натижасида юзага келган қарздорликка нисбатан пеня ҳисоблаш ва мажбурий ундириш чораларини кўриш .
