Норезидент доимий муассасаси фойда солиғини қандай тўлайди

Тавсияда:

– норезидентнинг доимий муассасаси юзага келаётганлиги қандай аниқланади;
– доимий муассаса фойда солиғини қандай ҳисоблайди;
– доимий муассаса қандай қилиб фойда солиғини тўлайди ва у бўйича ҳисобот беради.

Норезидентнинг доимий муассасаси юзага келаётганлиги қандай аниқланади

Агар хорижий компания Ўзбекистон ҳудудида хизматлар кўрсатса ёки ишларни бажарса, ушбу фаолият норезидентнинг доимий муассасасини юзага келтираётган ёки келтирмаганлигини аниқлаш лозим.

Доимий муассаса (ДМ)  юридик шахс эмас, бу шунчаки Ўзбекистон ҳудудида фаолиятини амалга ошираётган норезидент – компания эга бўладиган солиқ мақоми. Ушбу мақом:

• фақат солиқ солиш мақсадида фойдаланилади;
• хизматчилари ёки ёлланган бошқа ходимлар орқали Ўзбекистон ҳудудида “жисмонан” фаолият юритаётган хорижий компанияга нисбатан қўлланилади.

Хорижий компаниянинг Ўзбекистон ҳудудида фаолият юритаётганини қуйидагича асослаш мумкин: 

• хизматлар кўрсатади, ишлар бажаради;
• жой, ускуна, омборхона ва бошқаларга эга;
• Ўзбекистон резиденти – жисмоний ёки юридик шахсга ўзининг номидан шартнома имзолашни топширади, шунинг натижасида  мамлакатда даромадга эга бўлади. 

Қуйидагиларга асосан ДМ юзага келаётганлигини аниқланг: 

• СК 36-моддаси;
• иккиёқлама солиқ солишнинг олдини олиш мақсадида халқаро шартноманинг 5-моддаси, агар бундай битим норезидентнинг давлати билан тузилган бўлса.