Пулсиз операцияларда товарларнинг келиб тушишини қандай расмийлаштириш ва ҳисобга олиш керак
Тавсияда:
– устав капиталига ҳисса сифатида товарларнинг келиб тушиши;
– товарларнинг текинга олиниши;
– айирбошлаш шартномаси бўйича товарларнинг келиб тушиши;
– товарларнинг қарз шартномаси бўйича олиниши;
– товар кўринишида қарз олиниши;
– қарз олувчи олдин берилган қарзни қайтараётганда товарнинг келиб тушиши;
– хатловда аниқланган, ҳисобга олинмай қолган товарнинг келиб тушиши.
Устав капиталига ҳисса сифатида товарларнинг келиб тушиши
Корхонанинг устав капиталини шакллантириш (кўпайтириш)да корхона муассиси ўз ҳиссасини мол-мулк, шу жумладан товарлар билан тўлаши мумкин .
Устав капиталига ҳисса сифатида киритилган товарни таъсисчилар (иштирокчилар) томонидан келишилган қиймат асосида ҳисобга олинг . Айрим ҳолатларда (улар ҳақида қуйида маълумот берилади) уларнинг қийматини баҳолаш учун баҳолаш ташкилотини жалб қилиш зарур.
Бундай операцияни ўтказишда ҳиссани баҳолаш корхонанинг ташкилий-ҳуқуқий шаклига боғлиқлигини ҳисобга олинг.
Масъулияти чекланган жамият
МЧЖнинг устав капиталига қўшиладиган пулсиз ҳиссаларнинг пул баҳоси жамият иштирокчиларининг умумий йиғилиши томонидан бир овоздан қабул қилинадиган ва баённома билан расмийлаштириладиган қарор билан тасдиқланади .