Алоҳида вазиятларда иш ҳақи қандай ҳисобланади

Тавсияда:

– қуйидаги ҳолларда меҳнатга ҳақ тўлаш:
       ўриндошлик асосида ишлаганда;
       бир неча касбда ишлаганда;
       ноқулай табиий-иқлим ва бошқа шароитларда ишлаганда;
       вақтинчалик бошқа ишга ўтганда;
       вахта усулида ишлаганда;
       бекор туриб қолганда;
       яроқсиз маҳсулот тайёрланганда;
       мажбурий прогулда.

Ўриндош ходимларнинг иш ҳақини ҳисоблаш

Қонунчилик ўриндошлик асосида ҳақ тўлаш бўйича алоҳида шартлар белгиламайди, яъни умумий қоидалар амал қилади.

Ўриндошлик бўйича ишлашга вакант лавозимлар мавжуд бўлганда ёки вақтинчалик мавжуд бўлмаган ишчининг мажбуриятларини бажаришда йўл қўйилади. Ўриндошлик асосида ишловчи шахсларнинг меҳнатига ҳақ тўлаш ишлаб берилган вақтга мутаносиб равишда ишлаб чиқариш натижасига ёхуд меҳнат шартномасида белгиланган бошқа шартларга қараб амалга оширилади .

Ўриндош учун ҳам асосий ишчи учун белгиланган иш ҳақи тўлаш шартлари (шакли ва тизими, мукофотлар, қўшимча тўловлар, устамалар ва ижтимоий тўловлар) қўлланилади, агар жамоа шартномаси ёки бошқа ички ҳужжатларда бошқача шартлар назарда тутилмаган бўлса.  

Ходим ва иш берувчи ўзлари иш ҳақи тўлаш шартларини ўриндошлик бўйича ишлаш тўғрисида меҳнат шартномасини тузиш орқали белгилаш ҳуқуқига эга. Ушбу шартлар қуйидагича бўлиши керак:

• Меҳнат кодексида ёки корхонанинг ички ҳужжатларида назарда тутилганлардан ёмонроқ бўлмаслиги;
• меҳнатга ҳақ тўлашнинг энг кам миқдори (МҲТЭКМ) талабларига мос келиши, ишлаб берилган вақтга мутаносиб равишда ишлаб чиқариш натижасига ёхуд меҳнат шартномасида белгиланган бошқа шартларга мос бўлиши.

Агарда иш берувчи юқори тоифали мутахассис-ўриндошлар учун тўловнинг рағбатлантирувчи шартларини белгилашни мўлжалласа, унда:

• штат жадвалида тўловнинг янада юқори ставкасини кўриб чиқинг;
• уларга шахсий устамаларини тўланг.

Жамоа шартномасида ёки бошқа ички ҳужжатларда юқори тоифали мутахассислар учун ушбу иш ҳақи шартларини белгилаб қўйинг.