DSQ barcha soliq toʻlovchilarga yuborilgan JShDS boʻyicha xabarnoma yuzasidan tushuntirish berdi

preview

Davlat soliq qoʻmitasi 2019 yil 5 mart kuni jismoniy shaxslardan olinadigan daromad soligʻi boʻyicha soliq toʻlovchilarning shaxsiy kabineti orqali yuborilgan xabarnoma yuzasidan tushuntirish berib oʻtadi.

 

Joriy yilning 1 yanvaridan Oʻzbekiston Respublikasi Soliq kodeksining 188-moddasiga kiritilgan oʻzgartirishlarga muvofiq, jismoniy shaxslardan olinadigan daromad soligʻi pul mablagʻlarini olish uchun bankka hujjatlarni taqdim etish bilan bir vaqtda, biroq hisobot oyidan keyingi oyning 25-sanasidan kechiktirmay byudjetga toʻlanishi lozim.

 

2019 yil 1 yanvarga qadar amalda boʻlgan qonunchilikka asosan daromad soligʻini toʻlash muddatining chegaraviy sanasi belgilanmagan edi. Ya’ni daromad soligʻi haqiqatda berilgan ish haqi qismiga hisoblanib, qolgan qismi keyingi hisobot davriga qoldiq (saldo) boʻlib oʻtib kelgan.

 

Shu munosabat bilan, korxonalarning 2018 yil IV chorak yakuni boʻyicha taqdim qilgan hisobotida koʻrsatilgan toʻlanmagan ish haqiga hisoblagan daromad soligʻi va jamgʻarib boriladigan pensiya badali summalari soliq toʻlovchilarning shaxsiy kartochkasida hisoblanmaganligi sababli ushbu summalarni bir marotabalik yozuv orqali shaxsiy kartochkaga hisoblash uchun kiritish nazarda tutilmoqda.

 

Buni toʻgʻri amalga oshirish uchun soliq toʻlovchidan nima talab qilinadi?

 

1. Xabarnomada koʻrsatilgan 2019 yil 1 yanvar holatiga ish haqidan qarzdorlik va hisoblanmagan daromad soligʻi hamda jamgʻarib boriladigan pensiya badali summalari bilan 2018 yil 4 chorak uchun taqdim qilingan jismoniy shaxslardan olinadigan daromad soligʻi hisobotidagi qoldiq summalarini solishtirish;

 

2. Agar farq mavjud boʻlsa, roʻyxatdan oʻtgan joydagi davlat soliq inspeksiyasiga tashrif buyurib, farq summasiga aniqlik kiritish va qayta hisobot taqdim etish orqali bartaraf qilish lozim;

 

3. Xabarnomada koʻrsatilgan qoldiq summalariga e’tiroz boʻlmagan taqdirda, bu haqda roʻyxatdan oʻtgan joydagi davlat soliq inspeksiyasiga yozma bildirishnoma berishingiz tavsiya etiladi.

 

Ma’lumot uchun:

 

Yuqoridagilarni amalga oshirish orqali haqiqatda 2019 yil 1 yanvar holatiga mavjud ish haqidan qarzdorlik (2019 yil 1 yanvardan keyin toʻlanganligi yoki toʻlanmaganligi) sababli hisoblanmagan jismoniy shaxslardan olinadigan daromad soligʻi va jamgʻarib boriladigan pensiya badali (INPS) summalar aniqlanadi va bir marotabalik yozuv orqali shaxsiy kartochkaga hisoblashga kiritiladi.

 

Yuqoridagilarni aniq misol asosida koʻrib chiqadigan boʻlsak.

 

2018 yilning dekabr oyi uchun ishchi-xodimlarga 10 000 000 soʻm miqdorida ish haqi (shu jumladan, jismoniy shaxslardan olinadigan daromad soligʻi 750 000 soʻm, S’HJBPHga hisoblangan badallar 20 000 soʻm hamda Pensiya jamgʻarmasiga sugʻurta badallariga 800 000 soʻm) hisoblangan boʻlib, ushbu ish haqi 2019 yil 4 yanvar kuni ishchi-xodimlarga toʻlab berildi.

 

Unga koʻra, 2018 yil 4 choragi uchun taqdim etilgan jismoniy shaxslar daromad soligʻi hisobotining “Toʻlangan daromadlar va oʻtkazilgan jismoniy shaxslardan olinadigan daromad soligʻi hamda S’HJBPHga badallar summasining rasshifrovkasi (bundan dividendlar va foizlar mustasno)” nomli 1-ilovasi 6- va 7-ustunlarida “0” (nol) koʻrsatilgan.

 

Shundan kelib chiqqan holda, “Chorak oxiriga qoldiq” satrida hisoblangan ish haqi 8 430 000 soʻmni, jismoniy shaxslardan olinadigan daromad soligʻi 750 000 soʻmni va S’HJBPHga hisoblangan badallar 20 000 soʻmni tashkil qiladi.

 

Korxona tomonidan 2019 yil 4 yanvar kuni xodimlarga ish xaqi bilan birgalikda byudjetga 750 000 soʻm miqdorida jismoniy shaxslardan olinadigan daromad soligʻi hamda Xalq bankiga 20 000 soʻm miqdorida S’HJBPHga hisoblangan badallar toʻlab berildi. Korxonaning shaxsiy kartochkasida jismoniy shaxslardan olinadigan daromad soligʻi boʻyicha 750 000 soʻm, S’HJBPHga hisoblangan badallar boʻyicha 20 000 soʻm ortiqcha toʻlov hosil boʻldi.

 

Jismoniy shaxslardan olinadigan daromad soligʻi va yagona ijtimoiy toʻlov boʻyicha soliq hisobotining yangi shaklida (Adliya vazirlida 2019 yil 21 yanvarda 3126-son bilan roʻyxatga olingan) “Jismoniy shaxslarga toʻlangan daromadlar” satri mavjud emas.

 

Yuqoridagilardan kelib chiqib, davlat soliq xizmati organlari tomonidan soliq toʻlovchining shaxsiy kartochkasiga jismoniy shaxslardan olinadigan daromad soligʻi boʻyicha 750 000 soʻm, S’HJBPHga hisoblangan badallar boʻyicha 20 000 soʻm hisoblashga beriladi va ortiqcha toʻlov summasi qoplanadi.

 

DSQ Daromadlarga soliq solish boshqarmasi.

 

 

Buxgalteriya hisobi va soliq solishga doir normativ hujjatlardagi yangi oʻzgarishlar Yangiliklar Yangiliklar /oz/publish/doc/text148996_yuridik_shahslar_diqqatiga