Xaridorlarning puli qayerga ketayapti

preview

Naqd tushumni yashirish orqali soliqlardan qochish muammosi boy tarixga ega. Doim bunga qarshi choralar koʻrib kelingan. Ushbu sohaga zamonaviy texnologiyalar kirib keldi. Soliq organlari xodimlariga ularni bartaraf etish vazifasi yuklatilgan. Bu ishni qanchalik yaxshi uddalasalar, Davlat byudjetiga tushumlar toʻliq kelib tushishini ta’minlabgina qolmay, xaridorlarni firibgarlardan, sotib olayotgan tovar va xizmatlari uchun ortiqcha haq toʻlashlaridan ham himoyalagan boʻladilar.

Qonunni hurmat qilmaydiganlarga qarshi ayovsiz kurashish lozim

Prezident Shavkat Mirziyoyev Davlat byudjetiga tushumlar prognozlari ijrosi yuzasidan videoselektor yigʻilishi oʻtkazib, uning daromad qismini toʻldirish rezervlarini koʻrsatdi. Tadbirkorlik faoliyatini legallashtirish, soliq ma’muriyatchiligini yaxshilash ular sirasiga kiradi.

Bugungi kunda zamonaviy texnologiyalardan foydalangan holda soliqlardan boʻyin tovlash sxemalari qoʻllanilayapti. Soliq organlari qonunbuzarlarga qarshi samarali choralarni ishlab chiqayotganda buni nazardan qochirmasliklari darkor. Aks holda barcha urinishlari zoye ketadi.  

Terminaldan qoʻrqmaymiz…

Avvaliga insofsiz tadbirkorlar terminaldan qoʻrqib, faqat naqd pul bilan hisoblashishga urindilar. Bugun xaridor bank plastik kartasi vositasida hisoblashmoqchi boʻlsa, bundan hech kim choʻchimaydigan boʻlib qoldi. Ushbu vaziyatda oʻsha insofsiz sotuvchilarda Prezidentning 15.02.2017 yildagi PQ–2777-son qarori talablaridan qochish yoʻli bor. Oddiy xaridorlar toʻqnash kelgan ikkita holat bunga yorqin misol boʻla oladi.  

Chorsu bozorida xaridor va sotuvchi 500 ming soʻmlik erkaklar poyabzalini oldi-sotdi qilishga kelishib oldilar. Sotuvchi haqini plastik kartada olishga rozi boʻldi. Hisob-kitob terminali peshtaxtaning koʻrinarli joyida turgan edi. Haq toʻlashga kelganda xaridorga bozorning narigi tomonidagi bank boʻlimiga borishni taklif qildilar. U yerda sotuvchining vakili bir chekkada turgan bankomatdan kerakli summani yechib oldi. Natijada xaridor karta orqali hisob-kitob qildi, sotuvchi naqd pulga ega boʻldi. Yutqazgan faqat byudjet boʻldi.

Bunday holatlar faqat bozorlarda uchramaydi. Konsertga chipta sotib olishni olaylik. Kassir xaridorning plastik karta vositasida haq toʻlamoqchiligini koʻrib, terminal yoʻqligini aytadi. Vaziyatdan chiqish uchun toʻlov tizimlaridan biri yordamida mablagʻni kartadan kartaga oʻtkazishni taklif qiladi. Shunday qiladilar ham. Faqat nima sababdan mablagʻlar yuridik shaxsning schyotiga emas, kimningdir shaxsiy kartasiga oʻtkazilgani noma’lumligicha qoladi.    

Shu yoʻl bilan xarid qilgan kishining koʻnglida gʻashlik qoladi. Vaqt oʻtishi bilan sotuvchi aytganidan koʻra koʻproq summa toʻlaganini anglab yetadi. Bankomatda pulni naqdlashtirish va kartadan kartaga oʻtkazishda vositachilik haqi undiriladi, u xaridor zimmasiga tushadi. Qandaydir firibgarlarning qoʻlida oʻyinchoq boʻlgani ham hech kimga yoqmasa kerak…

Uzringizni qabul qildik

Tilga olingan barcha holatlarda «Iste’molchilarning huquqlarini himoya qilish toʻgʻrisida»gi Qonunga xilof ish qilingani yaqqol koʻrinib turibdi. Hujjatda quyidagi talablar belgilangan:

  • xaridorga tovar, xizmat, shu jumladan narx haqida toʻgʻri axborot berish boʻyicha;
  • real toʻlangan xarid qiymati koʻrsatilgan kassa chekini berish boʻyicha.

Soliq qonunchiligi ham buzilgani koʻrinib turibdi.

Vaziyat oʻz-oʻzidan hal etilishini kutib boʻlmaydi. Chora koʻrilmasa, muammo chuqur ildiz otadi. Jamiyat ongi va tushunchasini oʻzgartira oladigan kompleks chora-tadbirlarni amalga oshirish zarur. Davlat soliq qoʻmitasi Monopoliyaga qarshi kurashish qoʻmitasi va huquqni muhofaza qilish organlari bilan birga shunday tashabbus bilan chiqa oladi.

Birinchidan, soliq solish tizimi samaradorligini tahlil qilish, soliq toʻlovchilarning har bir guruhi kesimidagi ishlarning ahvolini oʻrganish zarur. Bunda eskicha yondashib boʻlmaydi. Bozorda ishlovchi tadbirkorlar orasida soliqlarni belgilangan shkalada xotirjam toʻlay oladiganlari ham, bunga qurbi yetmaydiganlar ham bor. Qiyin ahvolda qolganlarga umumbelgilangan darajaga chiqishida yordam berish kerak. Ayrim sohalarda qabul qilingan stavkalarni qayta koʻrib chiqish kerak boʻlishi mumkin. Bunda iqtisodiyotning barcha sohalarida xufiya aylanmani oshkor qilishga qaratilgan asosli tadbirlarni koʻrish lozim.   

Ikkinchidan, nihoyat, xaridorlarni ragʻbatlantirish tizimini toʻla ishga tushirish zarur, ular doim chek talab qilib, uning mazmuni qonunchilik normalariga qanchalik muvofiq kelish-kelmasligini tekshiradigan boʻlsinlar. Onlayn-NKMni joriy etish boʻyicha pilot loyiha doirasida tilga olingan gʻoyani asos qilib olish mumkin. Xaridorga berilgan har bir kassa cheki – qimmatbaho yutuqlar oʻynaladigan lotereya bileti.

Uchinchidan, soliq organlari iste’molchilar bilan real samara beruvchi operativ aloqani yoʻlga qoʻyishi maqsadga muvofiqdir. Iste’molchi qonunbuzarlik dalillari haqida tez xabardor qilishi mumkin boʻlgan barcha aloqa kanallarini ishga solish zarur. Bunda barcha zamonaviy internet-texnologiyalardan, shu bilan birga an’anaviy ishonch telefonlari, yozma murojaat qilish imkoniyatidan foydalanish kerak.

Toʻrtinchidan, iste’molchilarning xabarlariga imkon qadar tez munosabat bildirish, dalillarning ishonchliligini nazorat xaridi yordamida tekshirish zarur. Amaldagi Nizomda (28.06.2013 yilda 2475-son bilan roʻyxatdan oʻtkazilgan) chakana savdodagi hisob-kitoblarda sodir etilgan huquqbuzarliklar toʻgʻrisida soliqchilarga kelib tushgan ma’lumotlarni oʻrganib chiqishga uch kun ajratilgan. Bu juda uzoq muddat. Bunda oʻt oʻchiruvchilardek harakat qilish: signal kelib tushishi bilan chaqirilgan joyga yetib borish kerak.

Beshinchidan, fosh etilgan huquqbuzarlarga nisbatan keskin choralarni qoʻllash talab etiladi. Davlat va iste’molchiga yetkazilgan zararni qoplasin, shuningdek qonunga muvofiq jazosini olsin – uzringizni qabul qildik qabilida ish tutilmasin. Shu bilan birga tadbirkorda nima sababdan noqonuniy yoʻlni tanlaganini izohlash huquqi boʻlishi kerak. Tahliliy materiallar tayyorlashda va yechimlarni taklif etishda ushbu axborotga tayanib ish koʻrish mumkin boʻladi.

Oleg Gayevoy.


Buxgalteriya hisobi va soliq solishga doir normativ hujjatlardagi yangi oʻzgarishlar Yangiliklar Yangiliklar /oz/publish/doc/text149565_haridorlarning_puli_qaerga_ketayapti