“Business city”: ob’yekt qurilishiga qanday investitsiya kiritiladi

preview

“Business city” zamonaviy ishbilarmonlik markazlari hududida joylashtirish uchun investorlarning eng yaxshi investitsiya takliflarini tanlash va ularga yer uchastkalarini berish tartibi tasdiqlandi (VMning 5.06.2019 yildagi 461-son qarori).

Eslatib oʻtamiz, Prezidentning 2.08.2018 yildagi PQ-3895-son qarori bilan mahalliy va xorijiy investitsiyalarni jalb qilgan holda hududlar va poytaxtda “Business city” shaklida zamonaviy ishbilarmonlik markazlarini  tashkil etish  nazarda tutilgan. Sharhda mazkur loyihani amalga oshirish mexanizmi, shuningdek markazlar hududida qurilayotgan ob’yektlar investorlari va pudratchilariga taqdim etiladigan soliq va bojxona imtiyozlari bilan tanishish mumkin.

“Business city”ob’yektlarini qurish boʻyicha tanlovda yuridik va jismoniy shaxslar (mamlakatimizning rezidenti yoki norezidenti boʻlgan) ishtirok etishi mumkin. Tanlov oʻtkazilishidan kamida 30 kun oldin mahalliy va xorijiy OAVda bu haqda e’lonlar batafsil ma’lumotlar koʻrsatilgan holda joylashtiriladi.

Tanlovda ishtirok etish uchun loyiha tashabbuskori “Business city” ob’yektlarini qurish va undan foydalanish direksiyasiga belgilangan shaklga muvofiq toʻldirilgan investitsiya buyurtmanomasini taqdim etadi. Unga quyidagilar ilova qilinadi:

  • qurilishi rejalashtirilayotgan ob’yekt taqdimoti;
  • yuridik shaxs (investor)ning davlat roʻyxatidan oʻtkazilganligi toʻgʻrisidagi guvohnoma yoki investor faoliyatini tasdiqlovchi boshqa hujjatlar;
  • oxirgi hisobot davri uchun tegishli soliq organiga taqdim etilgan buxgalteriya balansi;
  • agar loyihani amalga oshirish uchun yangi yuridik shaxs tashkil etilsa - uning ustav jamgʻarmasi miqdori va ta’sischilari toʻgʻrisida ma’lumot.

Investorning xohishiga koʻra hujjatlar xorijiy tilda, shuningdek, majburiy tartibda ingliz, oʻzbek yoki rus tillariga tarjimasi bilan birga taqdim etiladi. Buyurtmanomani elektron pochta orqali ERI bilan tasdiqlangan holda yuborishga yoʻl qoʻyiladi.

Investitsiya loyihasining taqdimotida quyidagi ma’lumotlar aks ettirilishi lozim:

  • qurilishi rejalashtirilayotgan ob’yektda energiyani tejaydigan hamda yuqori texnologik materiallar va mahsulotlardan foydalanish hamda binolarning zamonaviy arxitektura qiyofasini hisobga olgan holdagi tavsifi;
  • ob’yekt qurilishi loyihasining dastlabki qiymati va yoʻnalishi;
  • kelgusida ob’yektning barqaror faoliyat yuritishi uchun zarur boʻladigan infratuzilma va muhandislik tarmoqlari toʻgʻrisida ma’lumot;
  • ob’yektni samarali joylashtirish va qurilishni yakuniga yetkazish uchun zarur boʻladigan yer maydoni va amalga oshirish muddati.

Taqdim etilgan investitsiya buyurtmanomalari hududiy hokimlar oʻrinbosarlari, qurilish boshqarmalari, UKX boshqarmalari, davlat kadastri rahbarlaridan va h.k. iborat tarkibdagi tanlov komissiyasi tomonidan koʻrib chiqiladi. Eng yaxshi taklif hujjatda koʻrsatilgan mezonlar asosida ochiq ovoz berish yoʻli bilan oddiy koʻpchilik ovoz asosida tanlanadi. Komissiya qarori bayonnoma bilan rasmiylashtiriladi va investor bilan bitim tuzish uchun asos hisoblanadi.

Bitim kuchga kirgandan soʻng 5 kun ichida direksiya investorga yer uchastkasi ajratish toʻgʻrisida tegishli hokimlikka murojaat qiladi.

Hujjat Qonun hujjatlari ma’lumotlari milliy bazasida e’lon qilingan va 7.06.2019 yildan kuchga kirdi.

 

Lenara Xikmatova.


Buxgalteriya hisobi va soliq solishga doir normativ hujjatlardagi yangi oʻzgarishlar Yangiliklar Yangiliklar /oz/publish/doc/text151481_business_city_obekt_qurilishiga_qanday_investiciya_kiritiladi