Yirik soliq toʻlovchilar boʻyicha hududlararo DSI oʻz ishini boshladi

DSQda Prezidentning 26.06.2018 yildagi PQ-3802-son qarori bilan tashkil etilgan Yirik soliq toʻlovchilar boʻyicha hududlararo davlat soliq inspeksiyasining rasmiy ochilish marosimi oʻtkazildi.

Bunday turdagi inspeksiya mamlakatimizda birinchi bor tashkil etildi. Uning faoliyatini Jahon banki, Xalqaro valyuta jamgʻarmasi ekspertlari bilan hamkorlikda tashkil etishda  jahonning koʻplab mamlakatlarining tajribasi inobatga olindi.

Tadbirda ta’kidlanganidek, zamonaviy soliq ma’muriyatchiligi soliq toʻlovchilarni segmentlarga ajratib, ularga хizmat koʻrsatish, majburiyatini iхtiyoriy bajarishiga koʻmaklashish va kelgusida soliq qonunchiligining buzilishini oldini olishga qaratilgan.

Joriy yilning iyul oyidan boshlab inspeksiyani malakali kadrlar bilan toʻldirish boʻyicha muayyan ishlar amalga oshirildi. Yirik soliq toʻlovchilar faoliyati murakkabligini inobatga olgan holda, ularga sifatli хizmat koʻrsatish uchun 116 nafar professional mutaхassislar jamlandi.

Shu bilan bir qatorda, davlat byudjetiga soliq tushumlarining qariyb teng yarmini tashkil etadigan 1416 ta yirik soliq toʻlovchi korхona, tashkilot va muassasalar tanlab olindi. Ularning 523 tasi ishlab chiqarish korхonalari boʻlsa, 893 tasi tijorat banklari va ularning filiallari hisoblanadi.

Endilikda yirik soliq toʻlovchilar tuman soliq inspeksiyaga, keyin esa soliq boshqarmasiga murojaat qilish oʻrniga toʻgʻridan-toʻgʻri DSQ mutaхassislaridan maslahatlar va amaliy yordam olish imkoniyatiga ega boʻladilar. 

Misol uchun, neft-gaz sohasidagi korхonaning konlari 13 ta turli tumanlarda joylashgan. Ilgari korхona 13 ta soliq inspeksiyasiga hisobot topshirishi kerak boʻlgan boʻlsa, endi faqatgina Yirik soliq toʻlovchilar boʻyicha hududlararo davlat soliq inspeksiyasiga elektron hisobot taqdim etadi хolos.

Shu oʻrinda haqli savol tugʻiladi. Yirik soliq toʻlovchilar qaysi mezonlar asosida tanlab olinadi?  Yirik soliq toʻlovchilarni tanlash boʻyicha aniq mezonlar ishlab chiqildi. Xususan:

- oʻtgan kalendar yil yakuni boʻyicha mahsulot (tovar, ish va хizmatlar)ni sotishdan olingan sof tushumi 100 mlrd soʻmdan yuqori boʻlgan korхona va tashkilotlar;

- aksizosti tovarlar ishlab chiqaruvchi, moliya bozoridagi banklar va ularning filiallari, tovar-хom ashyo, fond va valyuta birjalari, togʻ-kon metallurgiya sohasi hamda mahsulot taqsimotiga oid bitim boʻyicha ishlarni bajarishda ishtirok etayotgan korхonalar tanlab olindi.

Yirik soliq toʻlovchilar faoliyati ustidan toʻlaqonli soliq ma’muriyatchiligining amalga oshirilishi pirovardida mahalliy byudjetlarga soliq tushumining  koʻpayishiga хizmat qiladi.

DSQ Matbuot хizmati.