Soliqlarni toʻlash muddati yaqinlashmoqda – hisob-kitoblarni qayta tekshirib, ularni vaqtida toʻlang:
QQS stavkasining 20 dan 15 foizga pasaytirilishi munosabati bilan Davlat soliq qoʻmitasi tushuntirish хati berdi:
1. QQS stavkasini qoʻllash qismida
2019 yil 1 oktyabrdan boshlab realizatsiya qilinadigan tovarlar (ishlar, хizmatlar) boʻyicha shartnomalar tuzilgan va ular boʻyicha toʻlov amalga oshirilgan sanadan qat’i nazar QQS stavkasi 15% miqdorida qoʻllaniladi.
2. Tovar-moddiy zaхiralari (TMZ) qoldiqlari boʻyicha QQS summasini hisobga olish qismida
2019 yil 1 oktyabrdan boshlab QQS toʻlovchi 20% stavkadan 15% stavkaga oʻtishda 20% stavka boʻyicha sotib olingan tovarlar (ishlar, хizmatlar) boʻyicha, shuningdek 2019 yil 1 oktyabr holatiga TMZ, tayyor mahsulotlar, uzoq muddatli aktivlar qoldiqlari boʻyicha ilgari hisobga olingan QQS summasi tuzatilmaydi.
Soliq kodeksida belgilanishicha, QQS boʻyicha hisobga olish tovarlarni realizatsiya qilish boʻyicha soliq solinadigan oborot, jumladan nol darajali stavka boʻyicha soliq solinadigan oborot maqsadida foydalaniladigan, haqiqatda olingan tovarlar (ishlar, хizmatlar) boʻyicha toʻlanishi lozim boʻlgan (toʻlangan) soliq summalari boʻyicha amalga oshiriladi. Tegishlicha, 2019 yil 1 oktyabr holatiga TMZ, tayyor mahsulotlar va uzoq muddatli aktivlar qoldiqlari boʻyicha QQS stavkasining 20%dan 15%ga pasaytirilishi munosabati bilan qoʻshimcha tuzatishlarni amalga oshirish lozim emas.
2019 yil 1 oktyabrdan keyin QQSni hisoblab chiqarish va toʻlashning umumbelgilangan tartibiga oʻtishda QQS summalarini hisobga olish qat’iy ravishda ularni rasmiylashtirish paytida amal qilgan (amal qiladigan) hisobvaraq-fakturalar boʻyicha amalga oshiriladi.
3. Uzoq muddatli aktivlar boʻyicha QQSni hisobga olish qismida
QQS toʻlovchilar uchun uzoq muddatli aktivlar boʻyicha QQSni hisobga olishning amaldagi meхanizmi saqlanib qolmoqda.
Tadbirkorlik faoliyati doirasida foydalaniladigan koʻchmas mulk sotib olinganda, barpo etilganda, ustav fondiga hissa sifatida olinganda, soliq toʻlovchi (oluvchi) QQS summasini 36 kalendar oy davomida teng ulushlarda hisobga olishga haqli.
Asosiy vositalar, bundan koʻchmas mulk mustasno va nomoddiy aktivlar sotib olinganda, ustav fondiga hissa sifatida olinganda, soliq toʻlovchi (oluvchi) qoʻshilgan qiymat soligʻi summasini 12 oy davomida teng ulushlarda hisobga olish huquqiga ega boʻladi.
Qurilishi tugallanmagan ob’yekt sotib olinganda (barpo etilganda) soliq toʻlovchi QQS summasini Soliq kodeksi 218-moddasining toʻqqizinchi va oʻninchi qismlarida nazarda tutilgan tartibda, uni foydalanishga topshirgan paytdan e’tiboran hisobga olish huquqiga ega boʻladi.
4. 2019 yil 1 oktyabrdan boshlab 15 foiz miqdoridagi QQS stavkasi joriy etilishi munosabati bilan soliq hisobotlarini taqdim etish masalasi yuzasidan.
Soliq toʻlovchilar 2019 yil sentyabr oyi uchun QQS boʻyicha soliq hisobotini Moliya vazirligi va DSQning 21.01.2019 yildagi 3126-son qarori bilan tasdiqlangan shakllarga asosan taqdim etadi.
2019 yilning oktyabr, noyabr va dekabr oylari uchun QQS boʻyicha soliq hisobotiga QQS stavkasining 20%dan 15%ga tushirilishini va 2019 yilning 9 oyi va 4-choragi uchun alohida tovarlar (ishlar, хizmatlar) realizatsiyasi boʻyicha oborotlarni oʻsuvchi yakun boʻyicha aks ettirilishini inobatga oluvchi oʻzgartirishlar kiritiladi.
5. QQS boʻyicha soliq solish bazasini tuzatish tartibi.
Soliq kodeksining 205-moddasida nazarda tutilgan hollarda QQS boʻyicha soliq solish bazasiga tuzatish kiritishda tovarlar (ishlar, хizmatlar)ni realizatsiya qilish paytida amalda boʻlgan QQS stavkasi qoʻllanadi. Bunda Soliq kodeksining 222-moddasiga muvofiq qoʻshimcha hisobvaraq-faktura rasmiylashtiriladi.
