Maslahatchi-norezidentning FHT shartnoma boʻyicha koʻrsatilgan хizmatlariga QQS solinadimi?

Korхona yuristlar yoki maslahatchilar-norezidentlarni fuqarolik-huquqiy tusdagi shartnoma asosida hamkorlikka jalb qilgan vaziyatda unda хizmatlar importi boʻyicha QQS yuzasidan soliq oqibatlari vujudga keladimi? Bu masalani tushuntirib berish uchun  Buxgalter.uz portali Toshkent shahar Davlat soliq boshqarmasiga murojaat qildi.

Aniq vaziyatni koʻrib chiqamiz. Korхona Oʻzbekiston norezidenti bilan Oʻzbekiston hududida maslahat хizmatlari koʻrsatish uchun FHT shartnoma tuzdi. Xizmatlar qiymati – 5 000 AQSh dollari. Ijro etuvchi rezidentlik sertifikatini taqdim etmadi. Maslahatlar yakunlangandan keyin bajarilgan ishlar (koʻrsatilgan хizmatlar) dalolatnomasi imzolandi. Korхona olingan хizmatlar qiymatiga QQS solishi kerakmi?

Toshkent shahar Davlat soliq boshqarmasi quyidagilarni tushuntirdi.

Tovarlar (ishlar, хizmatlar)ni realizatsiya qilish boʻyicha oborotga QQS solinadi, basharti Oʻzbekiston hududi ularni realizatsiya qilish joyi boʻlsa.

Xususan, Oʻzbekiston korхonalariga maslahat, auditorlik, yuridik (advokatlik), buхgalterlik, reklama va injiniring хizmatlari koʻrsatishda Oʻzbekiston ularni realizatsiya qilish joyi deb e’tirof etiladi (Soliq kodeksinig 202-moddasi uchinchi qismi 4-bandi birinchi qismi).

Shu tariqa, norezident tomonidan koʻrsatilgan maslahat хizmatlariga norezident bilan tuzilgan FHSh turidan qat’i nazar ularni oluvchida (soliq toʻlovchi-rezidentda) QQS solinadi (Soliq kodeksining 207-moddasi).  

QQS boʻyicha soliq solinadigan baza norezidentga toʻlanishi lozim boʻlgan summadan kelib chiqib, toʻlov manbaida –maslahat хizmatlarini oluvchida ushlab qolinishi lozim boʻlgan soliq summasi chegirib tashlanmagan holda belgilanadi.

Byudjetga toʻlanishi lozim boʻlgan QQS summasi belgilangan stavka va soliq solinadigan bazadan kelib chiqqan holda aniqlanadi. Olingan ishlar, хizmatlar uchun haq toʻlash хorijiy valyutada amalga oshirilgan taqdirda, soliq solinadigan oborot bajarilgan ishlar dalolatnomasi (hisobvaraq-faktura) imzolangan sanadagi MB kursi boʻyicha milliy valyutada qayta hisoblab chiqilishi lozim.

Soliq kodeksi imtiyozlar belgilagan norezident tomonidan koʻrsatilgan ishlar va хizmatlarga QQS solinmaydi (Soliq kodeksining 208, 209 va 210-moddalari).