Qanday qilib uyda turib soliqlarni toʻlash muddati kechiktirilishini rasmiylashtirish mumkin

2020 yil 8 aprel

Soliq toʻlovchilar iqtisodiyot sohasidagi joriy noxush vaziyat tufayli xarajatlarini maqbullashtirishga urinmoqdalar. Bunday imkoniyatlardan biri – soliqlarni toʻlashni kechiktirish (boʻlib-boʻlib toʻlash) huquqi. DSQ boshqarmasi boshligʻi Nodir ERKAYeV uydan yoki ofisdan chiqmay turib undan qanday foydalanish mumkinligi haqida gapirib berdi:

Toʻlashni kechiktirish (boʻlib-boʻlib toʻlash) imkoni kimlarga berilgan

– Soliqlarni toʻlashni kechiktirish (boʻlib-boʻlib toʻlash) imkonini berish qoidalari SK 97-102-moddalarida belgilangan.

Soliqlarni toʻlashni kechiktirish yoki boʻlib-boʻlib toʻlash imkoniyati quyidagi asoslardan loaqal bittasi mavjud boʻlgan taqdirda berilishi mumkin:

1) tabiiy ofat, texnologik falokat yoki boshqa bartaraf etib boʻlmaydigan holatlar natijasida zarar yetkazilganligi;

2) byudjetdan (davlat maqsadli jamgʻarmalaridan) moliyalashtirish kechiktirilganligi yoki soliq toʻlovchi tomonidan bajarilgan davlat buyurtmasi, davlat ehtiyojlari yoki mahalliy davlat hokimiyati organlarining ehtiyojlari uchun bajarilgan ishlar va (yoki) koʻrsatilgan xizmatlar haqini toʻlash kechiktirilganligi;

3) soliqni bir yoʻla toʻlash oqibatida nochorlik (bankrotlik) alomatlari paydo boʻlishi xavfi yuzaga kelganligi;

4) jismoniy shaxsning mulkiy holati (qonun hujjatlariga muvofiq undiruv qaratilishi mumkin boʻlmagan mol-mulk hisobga olinmaganda) soliqni bir yoʻla toʻlash imkoniyatini istisno etishi;

5) tovarlar yoki xizmatlarni ishlab chiqarish va (yoki) realizatsiya qilish mavsumiy xususiyatga ega ekanligi;

6) bojxona toʻgʻrisidagi qonun hujjatlarida belgilangan toʻlanishi lozim boʻlgan soliqlarni toʻlashni kechiktirish yoki boʻlib-boʻlib toʻlash imkoniyatini berish uchun asoslar mavjud ekanligi.

1, 3-6-bandlarda koʻrsatilgan asoslar mavjud boʻlganda, soliqni toʻlashni kechiktirish yoki boʻlib-boʻlib toʻlash imkoniyati quyidagilarga berilishi mumkin:

yuridik shaxsga – uning sof aktivlari qiymatidan oshmaydigan summaga;
jismoniy shaxsga – uning mol-mulki qiymatidan oshmaydigan summaga, bundan Oʻzbekiston qonun hujjatlariga muvofiq undiruv qaratilishi mumkin boʻlmagan mol-mulk mustasno.

Buning uchun nima qilish lozim

Soliq toʻlovchining shaxsiy kabineti orqali talab etilayotgan hujjatlarni ilova qilgan holda ariza joʻnating. Vakolatli organning qarorini (roʻyxati bu yerda) ham soliq toʻlovchining shaxsiy kabineti orqali olasiz.

Qabul qilinayotgan chora-tadbirlarning biznesga salbiy ta’sirini yumshatishga yoʻnaltirilgan Prezidentning PF-5969-son va PF-5978-son farmonlari bilan ayrim tadbirkorlik sub’yektlariga soliqlarning ba’zi turlari boʻyicha soddalashtirilgan tartibda toʻlashni kechiktirish (boʻlib-boʻlib toʻlash) huquqidan foydalanish imkoni berilgan. Ular buni SK 101-moddasida nazarda tutilgan hujjatlarni taqdim etmasdan, ariza (xabarnoma) asosida amalga oshirishlari mumkin. Bu haqdagi axborotni jadval koʻrinishida e’tiboringizga havola etamiz:

Asos	19.03.2020 yildagi PF-5969-son	03.04.2020 yildagi PF-5978-son
Qaysi tadbirkorlik sub’yektlari toʻlashni kechiktirish (boʻlib-boʻlib toʻlash) imkonidan foydalanishlari mumkin	yuridik shaxslar, shu jumladan OʻzR norezidentlari; yakka tartibdagi tadbirkorlar; yuridik shaxslarning alohida boʻlinmalari	Oʻz faoliyatini toʻxtatgan va (yoki) tovarlar (xizmatlar) realizatsiyasidan tushumi 2020 yilning I choragidagi oʻrtacha oylik miqdoriga nisbatan 50%dan koʻproqqa kamaygan mikrofirmalar, kichik korxonalar va yakka tartibdagi tadbirkorlar
Qanday soliqlar boʻyicha toʻlashni kechiktirish (boʻlib-boʻlib toʻlash) imkoni beriladi, olish shartlari	mol-mulk soligʻi; yer soligʻi; suv resurslaridan foydalanganlik uchun soliq. Foizlarni undirmasdan 6 oyga toʻlashni kechiktirish (boʻlib-boʻlib toʻlash) imkoni beriladi. Tadbirkorlik sub’yekti uchala soliqning har birini toʻlash chogʻida yoki oʻz xohishiga koʻra tanlab, toʻlashni kechiktirish (boʻlib-boʻlib toʻlash) imkonidan foydalanishi mumkin	aylanmadan olinadigan soliq, mol-mulk soligʻi, yer soligʻi, suv resurslaridan foydalanganlik uchun soliq boʻyicha – ularni keyinchalik 12 oy davomida teng ulushlarda toʻlash sharti bilan; ijtimoiy soliq boʻyicha – uni keyinchalik 6 oy davomida teng ulushlarda toʻlash sharti bilan. Toʻlashni kechiktirish (boʻlib-boʻlib toʻlash) imkoni 2020 yil 1 oktyabrga qadar taqdim etiladi. Tadbirkorlik sub’yekti har bitta soliqni toʻlash chogʻida yoki oʻz xohishiga koʻra tanlab, toʻlashni kechiktirish (boʻlib-boʻlib toʻlash) imkonidan foydalanishi mumkin
Uydan yoki ofisdan chiqmay turib qanday olish mumkin	soliq toʻlovchining shaxsiy kabinetida tegishli arizani toʻldirib, joʻnating; koʻrib chiqish natijasi soliq toʻlovchining shaxsiy kabinetiga xabarnoma koʻrinishida keladi; soliq toʻlovchining shaxsiy kabinetida xabarnoma shaklini toʻldirib, joʻnating (material berilayotgan paytda shakl yangilanayotgan edi); koʻrib chiqish natijasi yana soliq toʻlovchining shaxsiy kabinetiga xabarnoma koʻrinishida keladi

Tadbirkor toʻlashni kechiktirish (boʻlib-boʻlib toʻlash) huquqidan foydalangani haqida roʻyxatdan oʻtkazilgan (soliq toʻlaydigan) joydagi soliq organlarini xabardor qilishi kerak emas. Ular oʻz kanallari orqali bu haqda xabardor qilinadilar.

Eslatib oʻtamiz: toʻlashni kechiktirish faqat balansda aks ettiriladi.

Diqqat!

SK 424-moddasiga muvofiq, Vazirlar Mahkamasi, Qoraqalpogʻiston Respublikasi Vazirlar Kengashi, mahalliy davlat hokimiyati organlari tomonidan ijaraga berilgan yer uchastkalari uchun toʻlanadigan ijara toʻlovi yer soligʻiga tenglashtirilgan. Binobarin, ushbu toʻlovga nisbatan ham Prezidentning 19.03.2020 yildagi PF-5969-son va 03.04.2020 yildagi PF-5978-son farmonlarida yer soligʻi uchun nazarda tutilgan toʻlashni kechiktirish (boʻlib-boʻlib toʻlash) qoʻllanilishi mumkin.

Oleg GAYeVOY.