9 oyni xatolarsiz yopamiz:
Boshqa shaharda oʻtkaziladigan tenderda qanday ishtirok etish mumkin? Qurilish materiallarini qanday sotib olish mumkin? Kun kechirishga mablagʻi yetmayotgan jismoniy shaxslarga banklar tomonidan koʻmak koʻrsatiladimi? Bu va boshqa savollarga javoblar – buxgalter.uz ning toʻplam materialida.
Jamoliddin QALANDAROV, Qurilish vazirligi axborot xizmati rahbari:
– Karantin sharoitida qurilish materiallarini qanday tartibda sotib olish mumkin?
– Barcha ishlab chiqaruvchilarga ijtimoiy tarmoqlardagi oʻz sahifalari orqali mijozlari bilan aloqa oʻrnatish va qurilish joyiga mahsulot yetkazib berish topshirilgan. Bu borada ishlar toʻliq amalga oshirilmoqda.
– Toshkentda yashayman. Navoiy viloyatida oʻtkaziladigan tender savdolarida ishtirok etish istagim bor. Karantin sharoitida tender tashkilotchisiga takliflar paketini qanday yetkazib berishim mumkin?
– «Oʻzbekiston pochtasi» AJ xizmatidan foydalaning. Bugungi kunda Qurilish vazirligi tizimida barcha xizmatlar raqamlashtirilayotganligini ta’kidlab oʻtaman. 1 iyuldan loyihalarning tender savdolari elektron shaklda oʻtkazilishi rejalashtirilmoqda.
Sevara OʻRINBOYeVA, Adliya vazirligi axborot xizmati rahbari:
– Xususiy tibbiyot muassasasi rahbariman. Koronavirus infeksiyasiga tekshiruv testini oʻtkazish boʻyicha pulli xizmatlar koʻrsatsak boʻladimi? Agar mumkin boʻlsa, kim bilan bogʻlanishimiz lozim?
– Respublika maxsus komissiyasining qaroriga muvofiq nodavlat tibbiyot tashkilotlariga 2020 yil 1 sentyabrga qadar sanitariya-epidemiologiya holatini yaxshilash hududiy markazlari rahbarlari bilan tuzilgan shartnoma asosida barcha talablarga rioya etilgan holda, koronavirus infeksiyasi laboratoriya tekshiruvlari boʻyicha pullik tibbiy xizmatlar koʻrsatishga ruxsat beriladi.
Tegishincha, sanitariya-epidemiologiya holatini yaxshilash hududiy markazlariga murojaat qilishingiz mumkin.
Akmal NAZAROV, Markaziy bank jamoatchilik va kommunikatsiya siyosati munosabatlari departamenti direktori:
– Karantin sababli vaqtincha uydaman. Kun kechirish uchun yetarli mablagʻim yoʻq. Moliyaviy qiyinchilikdan chiqish uchun bank kartasiga onlayn mikroqarz olishim mumkinmi?
– Jismoniy shaxslar (muntazam ish haqi oladigan) tijorat banklarining mobil ilovalari orqali bank kartalari yordamida onlayn-mikroqarzlar olish imkoniyatiga egalar.
Bunday xizmatlar 11 ta tijorat banklari orqali taqdim etilmoqda. Banklarning rasmiy saytlari, ijtimoiy tarmoqlardagi sahifalari va mobil ilovalaridan batafsil ma’lumot olish mumkin.
AOKA materiallari asosida.
