Elektron ishonchnoma qanchalik qonuniy?

preview

Ayrim EHA operatorlari «Elektron hujjat aylanishi toʻgʻrisida»gi Qonunga amal qilib, ishonchnomani elektron shaklda yozib berishni taklif etmoqdalar. Bir qarashda bu qulaydek koʻrinadi. Biroq Tovar-moddiy boyliklarni olishga ishonchnomalar berish va ularni ishonchnomalar boʻyicha berish tartibi toʻgʻrisida nizom faqat qogʻozda yozilgan ishonchnomalar muomalasini tartibga soladi. Buxgalter qanday yoʻl tutishi kerak: ishonchnomani qogʻozda yozib bersinmi yoki elektron shaklda?

Yaqinda buxgalter.uz da «Yangi texnologiyalar» IAMning EHFni joriy etish va ularga xizmat koʻrsatish boʻlimi boshligʻi Nozim TOʻRAYeVning nuqtai nazari chop etilgan edi. Uning fikricha, boshlangʻich buxgalteriya hujjatlari, shu jumladan ishonchnomalarni faqat elektron hujjat aylanishi tizimi yordamida – qonun hujjatlari talablariga rioya etgan holda rasmiylashtirish mumkin. Biroq uning ishonchnomalar xususidagi pozitsiyasi amaliyotchi mutaxassislar oʻrtasida qizgʻin muhokamalarga sababchi boʻldi. Mavzuni davom ettirish maqsadida buxgalter.uz ushbu masalaning turli jihatlarini koʻrib chiqqan ekspertlarga murojaat qildi.


ERI ishonchnomalarni rasmiylashtirishga moʻljallanmagan

Yekaterina TKAChENKO, «Muhammadboyev arbitraj uyi» SMT MChJ bosh buxgalteri:

– «Elektron hujjat aylanishi toʻgʻrisida»gi Qonunda elektron hujjat qogʻoz hujjatga tenglashtiriladi va u bilan bir xil yuridik kuchga ega boʻladi deyilgan. Elektron hujjatning majburiy rekviziti – ERI. «Elektron raqamli imzo toʻgʻrisida»gi Qonunda aytilishicha, ERIdan elektron raqamli imzo kalitining sertifikatida koʻrsatilgan maqsadlarda foydalanilayotgan boʻlsa, u qoʻlda oʻzi qoʻygan imzo bilan bir xil ahamiyatga ega boʻladi.

Elektron hujjat aylanishi tizimida Davlat soliq qoʻmitasi huzuridagi «Yangi texnologiyalar» IAM elektron kalitlarni roʻyxatga olish markazi tomonidan berilgan ERI qoʻllaniladi. Foydalanuvchiga olish uchun soʻrovnomani toʻldirayotganda uni qoʻllash maqsadini tanlash taklif etiladi. Biroq ushbu roʻyxatda ishonchnomani rasmiylashtirish degan band yoʻq. Quyidagi variantlar taklif etiladi:

  • davlat xizmatlarini olish;
  • murojaatlar;
  • elektron tijorat uchun.

Elektron ishonchnomani rasmiylashtirishni qaysi bandga kiritish mumkinligi tushunarsiz. Ushbu jihat koʻrib chiqilgan normativ hujjatlar ham yoʻq.

Binobarin, ERIni qoʻllagan holda rasmiylashtirilgan ishonchnomadagi ishonchli shaxs imzosining qonuniyligi shubha uygʻotishiga asos bor.

Yangi qonun qabul qilinganda barcha normativ-huquqiy hujjatlarga tuzatishlar kiritiladi. Biroq ular Ishonchnomalar berish tartibi toʻgʻrisida nizomga kiritilmagan. Moliya vazirligi, DSQ va Adliya vazirligining mas’ul xodimlari bilan uchrashuvlarda tadbirkorlar Nizomda elektron ishonchnomalar shakli, hisobga olishga doir talablar, ular bilan ishlashning oʻziga xos xususiyatlari, mansabdor shaxslar va ishonchli shaxsning javobgarligini qayd etish zarurligi haqida bir necha marta gapirganlar.

Elektron hujjat aylanishi toʻgʻrisidagi qonun hujjatlari oʻta umumiy tusga ega boʻlib, ularda elektron ishonchnoma boʻyicha TMBni olish uchun ishonchli shaxsning imzosiga taalluqli koʻp savollarga javob berilmagan. «Elektron raqamli imzo toʻgʻrisida»gi Qonunda qayd etilishicha, ERI egasi uni qoʻllashning huquqiy oqibatlari uchun toʻliq javobgar boʻladi. Bunda elektron kalitning yuridik kuchini tan olmaslik ancha mushkul.

Kontragent insofsiz boʻlib chiqsa yoki nazorat qiluvchi organlarda savollar yuzaga kelsa, elektron ishonchnomani tan olgan buxgalter deyarli himoyasiz boʻlib qoladi».


Elektron ishonchnomani qoʻllash masalasi tartibga solinmagan

Abdugʻani MUHAMMADBOYeV, «Muhammadboyev arbitraj uyi» SMT MChJ direktori:

– «Elektron hujjat aylanishi operatorlari taklif etayotgan elektron ishonchnoma turi buxgalter uchun ham, umuman korxona uchun ham xatar yuzaga kelishiga zamin yaratadi.

Ishonchnoma shaxsning TMBni olish huquqini tasdiqlab va uning imzosini identifikatsiyalabgina qolmay, balki ishonchnomani bergan kontragentning manfaatlarini koʻzlagan holda yetkazib beruvchi/sotuvchi majburiyatlarni bajarganidan ham guvohlik beradi.

TMBni qabul qilish-topshirish payti bir qator tartib-taomillari bilan farqlanadi, oluvchining tovarni yuklab joʻnatish hujjati va ishonchnomadagi imzosining bir xilligi kontragent miqdori, assortimenti lozim darajada, oʻrami/idishi but boʻlgan, ayrim hollarda esa sifati lozim darajada boʻlgan boyliklarni olganidan guvohlik beradi.

Bitim taraflari oʻrtasida nizo yuzaga kelmasa, demak, hammasi joyida, mavjud kamchiliklarni, elektron ishonchnomaning amaldagi normativ bazaga nomuvofiqligini hech kim eslamaydi. Biroq kontragentlar oʻrtasida nizo yuzaga keldi, deylik. U yuklab joʻnatilgan TMB miqdori yoki assortimenti, qayta navlarga ajratilishi, oʻram holati va boshqalar boʻyicha kelib chiqishi mumkin.

Aksariyat xoʻjalik nizolarida da’vo arizasiga bitimga doir hujjatlar, shu jumladan ishonchnoma va TMB yuklab joʻnatilganini tasdiqlovchi hujjatni ilova qilamiz. Bu turdagi nizolarda ishonchnoma muhim dalil hisoblanadi. Sud nafaqat ushbu hujjatning kuchini, balki yetkazib beruvchi oʻz kontragentining manfaatlarini koʻzlab majburiyatni lozim darajada bajarganini ham tekshiradi. Bu holda ushbu hujjatlardagi imzoning bir xilligi muhim jihat hisoblanadi.

Oʻz navbatida, nizo taraflari ham oʻz majburiyatlarini bajarganliklarini yoki kontragent ularni bajarmaganligini asoslash uchun ushbu jihatga tayanadilar. Imzolarning bir xil emasligi tarafning tovarni olmaganini tan olish yoki olganlik dalilini shubha ostiga qoʻyish uchun asos boʻlishi mumkin.

Ishonchnoma ERI vositasida, tovarni yuklab joʻnatish hujjati esa oluvchining oʻz qoʻli bilan imzolangan boʻlsa, nima qilish kerak? Yoki ikkala hujjat gadjetlar yordamida tuzilgan va imzolangan boʻlsa-chi? Bitta ERIdan kompaniyadagi bir nechta xodim foydalanishi holati kuzatilsa-chi?

Jinoyat kodeksi va Ma’muriy javobgarlik toʻgʻrisidagi kodeks ishlab chiqilishiga sababchi boʻlgan shaxslar borligini ham unutmaslik darkor.

Elektron ishonchnomaga oʻtishdan oldin unga doir huquqiy va texnik muammolarni hal etish lozim. Uni qoʻllash xususiyatlari TMBni olishga ishonchnomalar berish va ularni ishonchnomalar boʻyicha berish tartibi toʻgʻrisida nizomda qayd etilgan boʻlishi kerak.

Elektron ishonchnomani imzolash chogʻida ERIni qoʻllashning qonuniyligi – alohida masala. ERIni qoʻllash tartibini belgilovchi normativ hujjatda bitimlarni tuzish va bajarish paytida xoʻjalik operatsiyalarida undan foydalanish imkoniyati toʻgʻrisidagi qoidalar mavjud emas. Xususan – uning yordamida elektron ishonchnomalarni imzolash imkoni.

Bir qator hal etilmagan texnik muammolar mavjud. Elektron ishonchnomani qoʻllashda qiyinchilik tugʻilmasligi, qalbaki hujjatlar va ruxsatsiz kirishdan himoya qilish tizimlari amalda ishlashi kerak. Bunda elektron hujjat aylanishi tizimi fuqarolik muomalasining barcha xususiyatlarini inobatga olishi zarur.

Normativ tusdagi masalalar va barcha texnik muammolar hal etilmaguncha TMBni olish chogʻida shaxsan hozir boʻlishi shart boʻlgan kishi ishonchnomaga ham, tovarni yuklab joʻnatish hujjatiga ham oʻz qoʻli bilan imzo qoʻyishi kerak.

Hurmatli tadbirkor va buxgalterlarga  2020 yil yanvardan kuchga kirgan Soliq kodeksida aytilganidek, hisobga olishda konservativlik prinsipi, shuningdek lozim darajada ehtiyotkorlik qilishlari kerakligi haqida eslatib oʻtmoqchiman ».


Elektron ishonchnoma yetarli yuridik kuchga ega

Albert SAFIN, yurist, «Norma» eksperti:

– «Ha, qonun hujjatlarida muayyan ziddiyatlar mavjud. Ishonchnomalar berish tartibi toʻgʻrisida nizomda qayd etilishicha, korxona tomonidan yetkazib beruvchilardan tovar-moddiy boyliklarni olish uchun ishonchli shaxsga berilgan yozma vakolat ishonchnoma deb tan olinadi . Biroq ayni paytda TMBni olish uchun ishonchnomalar korxona ixtiyoriga koʻra yoxud belgilangan shaklda rasmiylashtiriladi . Ya’ni korxonaning ishonchnomani elektron shaklda rasmiylashtirish huquqini hech kim cheklamaydi. Ishonchnoma – yozma vakolat degan juz’iy ziddiyatni Nizom 2003 yilda tasdiqlangani va oʻsha paytda elektron hujjat aylanishi nazarda tutilmagani bilan izohlash mumkin.

Elektron ishonchnoma «Elektron hujjat aylanishi toʻgʻrisida»gi Qonunning 5-moddasi va 6-moddasi qoidalariga koʻra rasmiylashtirilgan boʻlsa, xuddi shunday toʻlaqonli EHA ishtirokchisi boʻlishi mumkin. Bu holda u qogʻoz ishonchnoma singari yuridik kuchga ega boʻladi ».

Har qanday holatda NHH iyerarxiyasiga rioya etish zarur, unda «Elektron hujjat aylanishi toʻgʻrisida»gi Qonun idoraviy hujjatdan ustun turadi. Ishonchnoma elektron shaklda rasmiylashtirilishi uchun hech qayerda toʻgʻridan-toʻgʻri taqiq nazarda tutilmagani sababli, tegishincha, bunday imkoniyat bor.

Qogʻoz ishonchnomalarni yuritish barcha uchun voz kechish oson boʻlmagan koʻp yillik odat boʻlib qolgani butkul boshqa masala. Deyarli hamma joyda muhr bosish bekor qilinganiga qaramay, hamma joyga uni odatdagidek bosayotganlariga oʻxshaydi.  

Shu sababli elektron ishonchnomaning rasmiylashtirilishi ziddiyat emas, u yuridik kuchga ega boʻlib, toʻlaqonli hujjat hisoblanadi. Ishda elektron ishonchnomadan foydalanish – korxonaning majburiyati emas, balki huquqi va hujjat aylanishining yanada qulay usuli».

***

Xulosa chiqaramiz:

Har doimgidek, normativ jihatdan toʻliq tartibga solmaslik sharoitida ishonchnomani qanday shaklda yozib berish, elektron ishonchnomaning qogʻoz shaklini ham rasmiylashtirish, kontragentingiz vakili koʻtarib kelgan elektron ishonchnomani tan olish masalasini qanday hal qilish oʻzingizga havola.

Shu bilan birga normativ-huquqiy hujjatlarni qayta koʻrib chiqish, ularda elektron ishonchnomalarni rasmiylashtirish va ularning muomalasi qoidalarini aniq qayd etish, bunda barcha ziddiyat va nuqsonlarni bartaraf etish vaqti kelgani barchaga ayon.

Oleg GAYeVOY.

Boshqa Boshqa Boshqa /oz/publish/doc/text159629_elektron_ishonchnoma_qanchalik_qonuniy