Buxgalterni qanday holda ishdan boʻshatish mumkin (emas)

preview

– «XKda buxgalter boʻlib ishlayman. Masofadan turib faoliyat yuritaman. Karantin paytida rahbar meni ishdan boʻshatishga haqlimi»? Foydalanuvchining savoliga mehnatga oid huquq masalalari boʻyicha «Norma» eksperti Lenara XIKMATOVA javob berdi.

– Karantin davri uchun xodimlar bilan tuzilgan mehnat shartnomasini bekor qilishning qandaydir alohida tartibi belgilanmagan. Ish beruvchi amaldagi Mehnat kodeksiga rioya etishi shart, unda ishdan boʻshatish asoslarining har biri uchun mehnatga oid munosabatlarni bekor qilishning oʻz tartib-taomili nazarda tutilgan.

Deyarli ixtiyoriy ravishda…

Rahbaringiz oʻz xohishingizga koʻra ishdan boʻshashga majbur qilayotgan boʻlsa, aslida bunday istagingiz boʻlmasa, hech qanday holatda ham ariza yozmang. Hatto ish beruvchi «bu vaqtinchalik, faqat karantin davridagi chora» desa ham.

MK 99-moddasi boʻyicha (xodimning tashabbusi bilan) ishdan boʻshatilganingizdan keyin ish beuvchi sizni qaytib ishga olishiga hech qanday kafolat yoʻq.

Vaqtingiz tugadi…

Mehnat shartnomasi muddati tugashi bilan bekor qilinsa – bu boshqa gap . Xodimni ushbu asosga koʻra ishdan boʻshatish uchun uning arizasi talab etilmaydi. Ish beruvchi shartnoma muddati tugagan sanadan boshlab bir hafta davomida – bu haqda ogohlantirmay u bilan mehnatga oid munosabatlarni bekor qilishga haqli. Biroq bir muhim jihat mavjud!

Ushbu bir haftalik muddatda ishdan boʻshatilmasa, shartnoma nomuayyan muddatga uzaytirilgan deb hisoblanadi . Va tegishincha, uni muddati tugaganiga asoslanib bekor qilib boʻlmaydi, ish beruvchi buning uchun boshqa asoslarni izlashiga toʻgʻri keladi.

Diqqat
Homilador yoki 3 yoshga toʻlmagan bolalari bor boʻlgan xodima bilan muddatli mehnat shartnomasi bekor qilinayotgan boʻlsa, ish beruvchi MK 237-m. 2-qismiga muvofiq uni ishga joylashtirish choralarini koʻrishi shart.

Pul yoʻqligi sababli…

Umuman olganda MK 97-m. koʻrsatilgan mehnat shartnomasini bekor qilish uchun 6 ta asos mavjud. Bular:

1) taraflarning kelishuvi. Ushbu asosga binoan mehnat shartnomasining barcha turlari istalgan vaqtda bekor qilinishi mumkin;

2) taraflardan birining tashabbusi;

3) muddatning tugashi;

4) taraflar ixtiyoriga bogʻliq boʻlmagan holatlar;

5) mehnat shartnomasida nazarda tutilgan asoslar. Mehnatga oid munosabatlarni bekor qilish toʻgʻrisidagi shart mehnat shartnomasida bu shartnoma ish beruvchi tomonidan korxona rahbari, uning oʻrinbosarlari, bosh buxgalter bilan, korxonada bosh buxgalter lavozimi boʻlmagan taqdirda esa, bosh buxgalter vazifasini bajaruvchi xodim bilan tuzilganda, shuningdek qonunda yoʻl qoʻyiladigan boshqa hollarda ham nazarda tutilishi mumkin;

6) yangi muddatga saylanmaganlik (tanlov boʻyicha oʻtmaganlik) yoxud saylanishda (tanlovda) qatnashishni rad etganlik munosabati bilan .

Mazkur moddaning 2-bandiga kelsak, shartnomani bekor qilish tashabbusi bilan xodim ham , ish beruvchi ham chiqishi mumkin . MK 100-moddasida ham ish beruvchining tashabbusi bilan xodimni ishdan boʻshatish mumkin boʻlgan 7 ta band koʻrsatilgan. Shu bois MK 100-moddasi 2-qismida koʻrsatilmagan boshqa qandaydir sabablarga (asoslarga) koʻra mehnat shartnomasining bekor qilinishi huquqqa zid boʻladi.

Yuqorida koʻrsatilgan asoslardan biri boʻyicha xodimni ishdan boʻshatish uchun ish beruvchining xohishi kamlik qiladi, kam deganda koʻrsatilgan holatlar yuz berishi kerak. Bundan tashqari, MKda koʻrsatilgan muayyan tartibga rioya etish zarur.

Diqqat
Hozir karantin boʻlgani uchun korxona ishlamayotgani yoki pul yoʻqligi uchun ish haqi toʻlay olmayotgani yoxud xodim masofadan turib ishlayotgani sababli uni ishdan boʻshatish mumkin emas. Oʻzbekiston hududida faoliyat koʻrsatayotgan barcha, shu jumladan xorijiy korxona va tashkilotlar uning mehnat toʻgʻriidagi qonun hujjatlariga rioya etishlari shart.

Shtat qisqarganligi sababli…

Bunda ham hammasi oson emas. Mehnat shartnomasi MK 100-moddasi 2-qismi 1-bandiga muvofiq shtat qisqarganligi munosabati bilan bekor qilinayotgan boʻlsa, ish beruvchi quyidagilarni amalga oshirishi shart:

  • yangi shtat jadvalini tasdiqlashi;
  • kelgusida ishdan boʻshatilishi haqida xodimni kamida 2 oy oldin yozma ravishda, tilxat olib ogohlantirishi ;
  • boʻsh ish joylari mavjud boʻlganda xodimga boshqa ishni taklif qilishi;
  • qisqartirishdan kamida 2 oy oldin har bir xodimni boʻlajak ishdan ozod qilish toʻgʻrisidagi ma’lumotlarni mahalliy mehnat organiga ma’lum qilishi ;
  • xodimlarni ommaviy ravishda ishdan ozod etish ehtimoli toʻgʻrisida kamida 2 oy oldin xodimlarning vakillik organiga axborot taqdim etishi ;
  • jamoa shartnomasi yoki jamoa kelishuvida oldindan rozilikni olish nazarda tutilgan boʻlsa, kasaba uyushmasi qoʻmitasi yoki xodimlar boshqa vakillik organining roziligini olishi ;
  • ishdan boʻshatilganda xodim bilan hisob-kitob qilishi, u quyidagilarni oʻz ichiga oladi:

– barcha ish kunlari, shu jumladan mehnat shartnomasi bekor qilingan kun uchun ish haqi;

– mehnat shartnomasi bekor qilingan kunga kelib foydalanilmagan yillik ta’til uchun kompensatsiya;

– xodimning oʻrtacha oylik ish haqidan kam boʻlmagan miqdorda ishdan boʻshatish nafaqasi;

– ishdan boʻshatish haqida ogohlantirish muddati oʻrniga kompensatsiya (taraflar bunday almashtirish haqida kelishib olgan boʻlsalar);

  • xodimga ish qidirish paytida moddiy jihatdan qoʻllab-quvvatlash boʻyicha qoʻshimcha kafolatlar berishi .


Alohida toifadagi xodimlar

Karantinni hisobga olganda ham ayrim toifadagi xodimlar uchun kafolatlar amal qilishda davom etishini yoddan chiqarmaslik zarur. Masalan, ish beruvchining tashabbusi bilan homilador va 3 yoshga toʻlmagan bolalari bor boʻlgan xodimalarni ishdan boʻshatishga yoʻl qoʻyilmaydi, korxonaning toʻliq tugatilishi hollari bundan mustasno. MKda bu holda ham ishdan boʻshatilayotgan xodimalarni majburiy ravishda ishga joylashtirish nazarda tutilgan, buning uchun tugatilayotgan ish beruvchi emas, balki mahalliy mehnat organi javob beradi .

Ish beruvchi xodim vaqtincha mehnatga layoqatsiz yoxud ta’tilda boʻlgan paytda ham oʻz tashabbusi bilan mehnat shartnomasini bekor qilishga haqli emas.

Bundan tashqari, Prezidentning PF-5969-son Farmoniga muvofiq, koronavirus infeksiyasi bilan zararlangan yoki karantinga joylashtirilgan, shuningdek 14 yoshga toʻlmagan bolaning ota-onasi, vasiylari, homiylari boʻlgan xodimlar bilan mehnat shartnomalarini ish beruvchining tashabbusi bilan bekor qilish taqiqlanadi.

Mehnat shartnomasi qonunga zid ravishda bekor qilingan boʻlsa, xodimni ish beruvchining oʻzi, sud yoxud boshqa vakolatli organ ishga tiklashi kerak. Bunda xodimga yetkazilgan zararni qoplash majburiyati ish beruvchining zimmasiga yuklatiladi .

Mehnat shartnomasini bekor qilish Mehnat shartnomasini bekor qilish Mehnat shartnomasini bekor qilish /oz/publish/doc/text159710_buhgalterni_qanday_holda_ishdan_bushatish_mumkin_emas